O Tauaofiaga Itumalo “Aʻoaʻoga Mai le Atua”

O I LATOU uma o ē mananao e aʻoaʻoina e Ieova ua vaavaai i luma ma le naunautaʻi i Tauaofiaga Itumalo o “Aʻoaʻoga Mai le Atua.” O le polokalama i aso e fa o le a faamatilatila ai vala tāua o aʻoaʻoga faale-Tusi Paia e puipuia ai Kerisiano i nei taimi o le faatuputupulaia o faafitauli totino ma vevesiga i le lalolagi. O le a fesoasoani le polokalama ia i latou e tumau mausalī ai faasaga i ‘so o se mea e faatuʻiese ai i le mataupu e ola ai’ ma avea ai ma faiaʻoga e sili atu ona lelei o le Afioga a le Atua.—1 Timoteo 1:10.

Maeu ni faaaʻoaʻoga lelei ua ia i tatou e faataʻitaʻi i ai! O le Faiaʻoga Silisili o Ieova lava ia! O lea ua talafeagai ai upu a Eliu ia Iopu faapea o Ieova “o le aʻoaʻo mai ia te i tatou e sili i manu e tataa, ma na faapopotoina i tatou e sili i manu felelei.” Sa ia tuufesili foi e faatatau ia Ieova: “O ai na te aʻoaʻo e faapei o ia?” (Iopu 35:11; 36:22) Ua taʻua le Atua i le Isaia 30:20 o le “Aʻoaʻo [“Silisili,” NW].”

O lē pito ia Ieova i le tulaga tau faiaʻoga o Iesu Keriso. Sa taʻua o ia o le “Faiaʻoga” ma le “Aʻoaʻo,” ma sa taʻua faapea o ia pe ā ma le 50 taimi i Evagelia. E ui ina tele ana faamalōlōga ofoofogia ma isi vavega, sa lē taʻua Iesu o le Fomaʻi ae o le Faiaʻoga, le Aʻoaʻo.—Mataio 8:19; Luka 5:5; Ioane 13:13.

E tusa ai ma lena tulaga, na aʻoaʻoina e Iesu ona soʻo ma ona aposetolo ia avea o ni faiaʻoga e pei o ia. Ua tatou iloa lea mai le Mataio 10:5 seia oo i le 11:1 ma le Luka 10:1-11. Toeitiiti a o lumanai lona afio i le lagi, sa tuuina atu ai e Iesu i ona soʻo le tofiga lauiloa tau aʻoaʻo atu lea o loo faamaumauina i le Mataio 28:19, 20. O le tusi o Galuega, faatasi ma tusitusiga faagaeeina o loo sosoo mai ai i Tusitusiga Eleni faa-Kerisiano, o loo faamatalaina ai le maelega, le agavaa ma le faamaoni na faataunuuina ai e uluai soʻo o Iesu lenei tofiga o le aʻoaʻo atu.

Ua sili atu le faanatinati o lenei galuega aʻoaʻo atu i aso nei na i lo so o se isi lava taimi. Ua tatou ola i aso mulimuli o lenei faiga o mea, ma ona o lea, o loo aafia ai ola o tagata. Ina ia lē auai tagata i agasala a Papelonia le sili ma lē aafia ai i ona mala, e tatau ona aʻoaʻoina i latou ma fesoasoani i ai ia ō ese mai Papelonia ma filifili e auauna mo Ieova ma lona Malo.—Faaaliga 18:4.

Ina ia fesoasoani i Molimau a Ieova uma i a latou taumafaiga ina ia faataunuuina lo latou tofiga e aʻoaʻo atu, ua saunia ai e Ieova e ala i lana faalapotopotoga, Tauaofiaga Itumalo o “Aʻoaʻoga Mai le Atua.” O nei tauaofiaga e taʻi fa aso, o le a amataina i le amataga o le tau mafanafana, mo i latou e i le Vaega i Matū o le Ekueta. Ia faamautinoaina e so o se auauna tuuina atu a Ieova lona auai i se tasi o nei tauaofiaga, i le auai atu ma uaʻi i ai mai le pese ma le tatalo amata i le aoauli o le Aso Tofi seia oo i le tatalo faaiʻu i le afiafi o le Aso Sa.