O le ā e Sese ai le Manao i Tupe?

NA FAAFOEINA e Paulo ma Maria se faleoloa i se nuu matitiva i Aferika. * I le galulue mamafa i le ao ma le po, na la maua ai le anoanoai o tupe. I lena taimi sa gugutu ai Maria e uiga i so la fale telē fou na faatumuina i meafale fou taugatā. A o Paulo, sa mafai ona fealuai solo i se taavale taugatā.

I se tasi aso na faalatalata atu ai se vaega o tagata tetee i le malo ia Paulo. Na latou poloai atu faapea: “Matou te mananao ina ia ofo faameaalofa mai e lau pisinisi se [$100] i masina taitasi e lagolago ai la matou fuafuaga.” Ona sa lē mananao e faia sa la vaega i tauiviga faapolotiki, sa matuā teena malosi ai e Paulo ma Maria. Ona o lo la tulaga solitu, sa masalomia ai i laua faapea o loo la maua se lagolagosua tautupe mai le malo. I le faaiʻuga o se tasi vaiaso, a o ō ese Paulo ma Maria mai le aai, sa vetea ma gaoia lo la faleoloa, ma sa susunuina le la taavale ma lo la fale matagofie.

O se tala e matuā faanoanoa ai, ae pe e mafai ona tatou aʻoaʻoina mai ai se lesona? O le toatele o ē na galulue mamafa ina ia mauʻoa atonu e leʻi taia i latou i se mala na gaoia ai a latou oloa, ae faapefea i le lumanai? Aiseā ua fai mai ai le Tusi Paia faapea “a o e mananao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia”?—1 Timoteo 6:9.

Se Vaaiga Paleni i Tupe

E tusa ai ma le faamatalaga a le Tusi Paia, e tatau i se Kerisiano moni ona saunia mea mo manaoga faaletino o tagata o lona aiga o loo faalagolago atu ia te ia. O tulaga e pei o le leai o se galuega po o faafitauli o le soifua malōlōina, ua faafaigata ai lenei mea i nisi taimi. I le isi itu, o se Kerisiano e tuulafoaʻiina ma le loto i ai le tausia o lona aiga “ua faafitia e ia le faatuatua, e sili foi lona leaga i le ua le faalogo [“faatuatua,” NW].”—1 Timoteo 5:8.

I nisi nofoaga maotua, e ola ai tagata e faalagolago i fua o le laueleele i le totōina o a latou lava meaʻai ma tausia lafu manu. O nisi e tau lē manaomia ni tupe, ona e maua mea manaomia o le olaga e ala i le faafesuiaia o oloa ma galuega. Ae peitai, o le auala aupito sili ona taatele e maua ai tupe a isi mo le tausiga o o latou aiga, o le faia lea o ni galuega totogi. Latou te faaaogā tupe na latou maua mai a latou galuega e faatau ai meaʻai ma isi mea, mo le tausiga o o latou aiga. E mafai foi ona maua ai sina puipuiga i taimi o faigata po o mala ona o le teuina ma le atamai o tupe. O se faataʻitaʻiga, atonu e mafai ona faaaogā e totogi ai tausiga  faafomaʻi, pe toe faafou ai foi ni mea matuā tāua o se fale o se tasi. O le pogai lea ua taʻua manino mai ai e le Tusi Paia faapea ua ‘fai tupe ma puipuiga’ ma “o tupe e aoga i mea uma.”—Failauga 7:12; 10:19.

Ona e tele mea e mafai ona faataunuuina i tupe, o se mea mataʻutia la le atiina aʻe o se manatu lē mautinoa i lona malosi. E manaomia ona iloa e se Kerisiano ona tapulaa pe a faatusatusa atu i isi mea e sili atu ona tāua. Mo se faaaʻoaʻoga, ua faatusaina e le Tusi Paia le aogā o le tupe i le atamai faaleatua, i lona faapea mai: “Ua fai le atamai ma puipuiga, ua faapena foi i tupe ona fai ma puipuiga; a o le aogā o le poto, e faaolaina ai e le atamai ē ua latou maua.” (Failauga 7:12, NW) I le ā le auala ua aogā ai le atamai faaleatua i lo o tupe?

Se Lesona Mai Aso ua Mavae

O mea na tutupu i Ierusalema i le tausaga e 66 T.A., ua faataʻitaʻia ai le lelei o le atamai faaleatua i lo o tupe. Ina ua uma ona fouvale atu i autau a Roma na osofai mai, e foliga mai sa manatu tagata Iutaia i Ierusalema faapea, ua lelei tulaga faapisinisi i lena taimi. O le mea moni, sa amata ona latou faia a latou lava tupe mo le faamanatuina o lo latou saolotoga fou na maua. Sa faia faailoga i tupe i le gagana Eperu, ma sa iai faaupuga e pei o le “Mo le saolotoga o Siona” ma “Ierusalema le Paia.” I tausaga fou taitasi, sa latou faia ai ni tupe fou na tusia ai faaupuga na sa faailoa ai i latou e faapea e mai le “tausaga lona lua,” le “tausaga lona tolu,” ma le “tausaga lona fa.” Sa eliina aʻe e le au suesue i le eleele ni nai tupe na sa tusia ai le faaupuga le “tausaga lona lima,” e tutusa lea ma le tausaga e 70 T.A. Pe sa manatu Kerisiano Iutaia i le tupe fou a Iutaia o se faailoga matuā tāua mo le saolotoga tumau?

E leai. Ona sa latou manatua upu atamai a lo latou Matai. Na valoia e Iesu le osofaiga a autau a Roma na taunuu i le 66 T.A. Sa ia lapataia ona soʻo e faapea, pe a tupu lea mea, e tatau ona latou ‘sosola ese mai totonu o Ierusalema.’ (Luka 21:20-22) Ua molimau le talafaasolopito e faapea, o le mea tonu lena na faia e Kerisiano Iutaia. Ua foliga mai lo latou loto malilie e puapuagatia i le leiloa o a latou mea totino, mea faitino, ma avanoa mo pisinisi ona ua tuua Ierusalema. I le fa tausaga mulimuli ane, na toe foi mai ai autau a Roma ma siomia le aai.

E tusa ai ma le faamatalaga a se molimau vaaitino, le tusitala o talafaasolopito o Josephus e faaapea: “Sa iai le anoanoai o auro i le Aai.” Ae o le anoanoai o na tupe e tele, sa lē mafai ona faasaoina ai Ierusalema mai le oge, lena na matuā tupu e “sili ona leaga” ma na “faaumatia ai nisi aiga uma.” O nisi tagata na nonofo i le aai na latou foloina tupe auro ma taumafai e sosola ese mai le aai. Ae na fasiotia i latou  e o latou fili, o ē na saeia o latou manava ae vanei mai tupe i fafo. Ae “mo tagata mauʻoa,” ua faamatala mai ai e Josephus, “sa matuā sili atu ona mataʻutia mo i latou le nonofo ai i le Aai po o le tuua foi; auā sa faasalaseseina i latou e pei o ni tagata sosola ma fasiotia ai le toatele ina ia maua mai ai a latou tupe.”

A itiiti mai pe ā ma le ono masina talu ona siomia le aai, ae faaumatia loa Ierusalema, ma e sili atu i le tasi le miliona o tagata na aināina, na maliliu ona o le oge, faamaʻi, ma sa fasiotia i le pelu. O le manao tele i tupe na faatauasoina ai le toatele, ma tuuina ai i latou i le faaumatiaga ma fano ai, a o le faatatauina o upu atamai na mafai ai e Kerisiano Iutaia ona sosola.

E lē na o le pau lena o le tulaga i le talafaasolopito na lē taulau ai ona faasaoina e tupe tagata i taimi o mala. Pagā se matai sauā e ono oo i ai le manao tele i tupe! (Mataio 6:24) E lē gata i lea, ae e mafai ona ia faoa mai ia te oe le fiafiaga i le taimi nei.

Fiafiaga e Lē Mafai e Tupe ona Faatau

O le manatu ina ia avea ma mauʻoa, e mafai ona faatauasoina ai se tagata mai le iloa o le tele o fiafiaga na, e lē tau manaomia ai ni tupe se tele. Mo se faaaʻoaʻoga, seʻi manatu i faiā fiafia faaleaiga, uō mamae, mea ofoofogia o le olaga, se lā goto felanulanuai, se afā faititili malosi e maofa ai, le lagi vavaloloa, taaloga a manu, po o fugalaau ma laau i se vaomatua lafulemu.

E moni, e tele taimi e olioli ai nisi tagata mauʻoa i fiafiaga e pei ona taʻua i luga, ae o le toatele foi o i latou e matuā tele mea e fai i o latou lava olaga ona o le taumafai e faatumauina pe faateleina foi a latou ʻoa. Atonu e foliga mai o se mea e ofo ai, ona e oo lava ia i latou e iai taimi paganoa, e masani lava ona latou lē maua le fiafia. O le mea lenei e ofo ai tagata suesue o aso nei. Ua fesili Thomas Wiseman i lana tusi The Money Motive—A Study of an Obsession e faapea: “E faapefea ona tatou faamatalaina le mea moni faapea, o se mea sa matuā naunau i ai le toatele o tagata i le fia maua, ma na talitonu i ai faapea o se vaifofo mo mea uma, ae ina ua maua, sa oo ai i ni āuga matuā ese lava, na oo ina lē fiafia ma faateʻia ai i latou?”

O se tasi o mea e mafai ona faoa ai le fiafia mai se tagata mauʻoa, o le faafaigata lea ona iloa po o ai ana uō moni. O le mea lena na oo i le Tupu mauʻoa o Solomona “pe a faateleina mea lelei, e faatoateleina foi o e aai ai.” (Failauga 5:11) E toatele foi tagata mauʻoa e puapuagatia i popolega i le taumafai e tausia pe faateleina le tau o a latou ʻoa. O lenei mea, e masani ona lē maua ai sa latou moe lelei. Ua faamatala mai e le Tusi Paia: “E lelei le moe o lē faigaluega, pe itiiti, pe tele ana mea e ʻai; a o le maʻona o le mauoa e le mafai ai ona moe o ia.”—Failauga 5:12.

O le manao tele i tupe, e mafai ona faaleagaina ai faiā i le va o aiga ma uō, auā atonu o le a tofotofoina ai se tasi e faia ni gaoioiga lē faamaoni ma solitulafono. O ē mananao tele i tupe, e masani ona liliu atu i pelegātupe. E faanoanoa lava, ona o le naunau mo le toe tasi lava se pele tupe, ua taʻitaʻiina atu ai le toatele i le faia o aitalafu. Na fai mai se tasi fomaʻi o le mafaufau mai Aferika i Saute: “I le taimi latou te ō mai ai ia te aʻu, [o i latou ua lē pulea le tuʻinanau i le pelē tupe] e masani lava ona lē toe mafai ona taofia, ua leai ni a latou galuega, ua gau a latou pisinisi, ua leai ni o latou fale, ma o le mea masani, ua tuua i latou e o latou aiga.” Maeu le moni o le lapataiga a le Tusi Paia: “O le tagata faamaoni, e tele mea e manuia ai o ia; a o le ua faataalise ona mauoa, e le faasaoina [“e lē tumau ona taʻumamāina,” NW] o ia.”—Faataoto 28:20.

‘E Faia e Ia o Apaau . . . ma Lele Ese Atu’

O le isi mafuaaga e mataʻutia tele ai le manao tele i tupe, ona ua faamaonia le lē mafai e malo faalelalolagi ona felagolagomai atoatoa pe faamautinoa mai faapea, e mafai ona tumau pea le aogā faavaomalo o tupe; ua lē mafai foi ona latou taofia le paʻū maulalo o le tamaoaiga, faapea ma le paʻū o maketi o fefaatauaiga. O faiga taufaasese, le gaoi, ma le siitaʻi o le tau o mea ua faailogaina ai le moni o nei afioga faagaeeina: “Aua e te galue faapuapuaga ia mauoloa ai;  tuu ia o lou lava taofi. E te tulimatai atu ea i le mea ua leai? auā e faia lava e ia ona apaau; . . . e pei o le aeto ona lele atu o ia i le lagi.”—Faataoto 23:4, 5.

Le siitaʻi o le tau o mea. O lena faafitauli, o le mea moni e lē gata i na o atunuu matitiva. I le amataga lava o lenei senituri, o le televave o le siitaʻi o le tau o mea, na taia ai atunuu tamaoaiga i Europa tutotonu. Mo se faaaʻoaʻoga, a o leʻi pa le Taua Muamua a le Lalolagi, sa tutusa le tau o le tupe Siamani (o le maka) ma le seleni a Peretania, faapena foi le tupe Falani (o le franc), ma le tupe Italia (o le lira). I le sefulu tausaga mulimuli ane, o le seleni, le franc, ma le lira sa tali tutusa ma le 1,000,000,000,000 maka. O ā āuga ua mafatia ai tagata ona o le siitaʻi o le tau o le soifuaga i atunuu mauoloa? Ua faapea mai Adam Fergusson i lana tusi When Money Dies: “Afai o le mea na tupu ina ua faatoilaloina le Emepaea o Siamani lea sa soofaatasi ma le Emepaea o Oseteria ma Hanakeria i tausaga a o faatoʻā mavae le 1920, o le mafuaaga lea e fuafua ai, o le paʻū la o le [aogā o le tupe] ua lē mafai ai ona taofiofia le matapeʻapeʻa, faiga sauā, le lē fiafia, le feitagai, ua matuā tupu tele ona o le mataʻu, ma i lea, e leai se sosaiete o le a mafai ona faasaoina mai ai e aunoa ma le afaina ai.”

I le 1923, na toe faafouina ai e Siamani lana tupe i le titinaeseina o 0 e 12 ina ia faafuaseʻi ona avea ai le 1,000,000,000,000 maka tuai e tutusa ma le aogā o le maka fou e tasi. O lenei faiga na taofia ai le siitaʻi o le tau o mea, ae na iai isi iʻuga e sili atu ona leaga. Ua faamatala e Fergusson e faapea: “O le toe faamautūina o le aogā o le tupe, na leiloa ai le faitauafe o tālā, ma faoa ai mai le faitau miliona o tagata a latou mea e ola ai, ma faaumatia ai faamoemoega o le isi faitau miliona, ma i se auala lē tuusaʻo, na manaomia ai se tau e sili atu ona leaga lea sa tatau ona totogia e le lalolagi atoa.” E foliga mai, o le “tau e sili atu ona leaga” sa i le mafaufau o le tusitala, o le tulai mai lea o faiga faa-Nasi ma le pa o le Taua e Lua a le Lalolagi.

O le teuga tupe tele sa lē taulau ai le toatele i aso ua mavae, e ao ona oo mai e avea o se lapataiga malamalama i nei taimi o le lē mautonu tau tamaoaiga i le lalolagi aoao. Na lapatai mai le Alo o le Atua lava ia e faapea o le a lē taulau tupe, lea ua faamaonia le faia faapea i le tele o taimi. (Luka 16:9) Ae o le lē taulau aupito sili tau tupe ma sili ona taatele, o le a oo mai pe a faaooina e Ieova lana faamasinoga i luga o lenei lalolagi leaga. “E le aoga le oloa i le aso o le toasa; a o le amiotonu, e laveai lea nai le oti.”—Faataoto 11:4.

O lea la, maeu le tāua o le taumafai o i tatou taitoatasi e tausia se tulaga amiotonu ma o tatou Uō moni, o Ieova le Atua ma Iesu Keriso!

Le Puna o le Fiafiaga Tumau

O Paulo ma Maria ia na taʻua i le amataga, o ni Molimau a Ieova. Mo le tele o tausaga, sa faia ai so la sao i le galuega faaevagelia faataimi atoa. Ae peitai, o le faanaunau i le oa na faapogaia ai ona taofia lo la toe auai i sauniga a le faapotopotoga Kerisiano, ma taofia ai le tufaina atu o lo la faatuatua i le faiva i le lautele. Ae sa oo ina la toe ala mai faaleagaga. Na fai mai Maria ina ua uma ona gaoia ma faaleagaina lona fale: “Ua ou iloa nei le valea o le faaalu uma o loʻu taimi ma loʻu malosi i se mea e mafai ona faaumatia i le afi i sina taimi puupuu. O se mea e fiafia ai ona ua mafai e lenei ulugalii ona aʻoaʻoina se lesona a o leʻi fai lava sina tuai. Ioe, o le aafiaga sili e faapogaia e le manao tele i tupe, o le faoa mai lea i se tagata o se faiā faamaonia ma Ieova le Atua ma Iesu Keriso. A aunoa ma nei Uō, o le ā se faamoemoe o ia i tatou ia faasaoina ai mai le faaiʻuga o lenei lalolagi leaga, ma oo atu ai i le lalolagi fou amiotonu ua folafolaina mai?—Mataio 6:19-21, 31-34; 2 Peteru 3:13.

O lea, e tusa lava pe e te manatu ua e mauoa pe mativa, ia leoleo faasaga i le faatupuina o le manao tele i tupe. Ia galue ina ia maua ma tausia lelei le oa aupito silisili—o se tulaga faamaonia ma Ieova le Atua. E mafai ona e faia lenei mea i lou uaʻi totoʻa atu pea i le valaau faanatinati o loo faapea mai: “Ua fetalai mai le Agaga ma le faatoanofotane, Ina sau ia; ina fai atu foi ia o lē faalogo, Ina sau ia; o lē fia inu, ina sau ia, atoa ma lē manao i ai, ina ave fua ia le vai o le ola.”—Faaaliga 22:17.

[Faaopoopoga i lalo]

[Ata i le itulau 8, 9]

O itu uma e lua o le tupe na faia i le vaitaimi o le fouvalega a Iutaia faatasi ma le tusitusiga le “tausaga lona lua”

[Ē Ana le Ata]

Pictorial Archive (Near Eastern History) Est.