Lipoti a Ē Faalauiloa le Malo

Faamalieina le Matelaina Faaleagaga—I Aʻoga

NA TAʻUA e Iesu i lana Lauga i luga o le Mauga e faapea: “Amuia i latou e iloa o latou manaoga faaleagaga.” (Mataio 5:3, NW) E toatele tamaiti aʻoga o loo galala mo le poto e uiga i le Atua ma ana fuafuaga ofoofogia. Latou te manaomia ni tali i fesili e uiga i le olaga ma latou mananao e iloa le auala e ao ona latou ola ai ina ia maua le faamaoniga mai le Atua ma ia ola fiafia. Sa faamaonia lenei mea i se aʻoga e i British Virgin Islands. Ua faamatala mai e se tasi o Molimau a Ieova e nofo ai i inā e faapea:

□ “Sa ou auai i se fono a matua ma faiaʻoga i le aʻoga a lo matou nuu, ma sa tele lava ina talanoaina mataupu e faatatau i vailaau oona, inuga ava, tuugatala, matamataga i televise, tulaga o taumafaiga a tamaiti i le aoga ma isi lava mataupu, o lea na ou manatu ai e ave le tusi Questions Young People Ask—Answers That Work ma tuu atu i le tamaitai pule o le aʻoga. Ina ua maeʻa ona ia iloiloina le tusi, na ia fai mai o le tusi tonu lava lea sa latou moomia ma sa talosaga mai loa pe e mafai ona maua atu ni tusi mo tamaiti uma e 120 o le aʻoga. Na talanoaina le mataupu ma toeaina o le faapotopotoga ma na latou filifilia ai e foai faameaalofa atu tusi i le a’oga. Ina ua matou taʻu atu lenei fuafuaga, sa talosaga mai faiaʻoga ina ia matou tauaaoina saʻo atu ia tusi i tamaiti aʻoga. E toalua Molimau na ō, ma na matuā faatumulia le potu i tamaiti aʻoga i le faatalitaliga mai o i laua. E tusa ma le ʻafa itula o talanoa atu uso i tamaiti aʻoga ma faitau i ai ni mea tutupu o loo aumaia i mekasini a le Sosaiete o le Olo Matamata, e faaalia ai pe na faapefea ona fesoasoani le tusi i talavou ma ē matutua. Ona tauaaoina atu loa lea o tusi i tamaiti aʻoga sa faatali ma le naunautai.”

O se fiafiaga le iloaina faapea ua filifilia e le aʻoga le tusi e faaaogā e fai ai se vaega o mataupu faifaipea a le vasega fa maualuga ma le vasega lima maualuga. O le a tali moni lava e le tusi le tele o fesili a nei tamaiti aʻoga e uiga i le olaga ma le lumanai.

Ua Faamalieina le Matelaina Faaleagaga—I Papua Niu Kini

O lenei tala i se mea na tupu na maua mai i se ovasia femalagaaʻi. E faataʻitaʻia ai i lenei tala le tulaga o iai le matelaina faaleagaga o tagata o lena atunuu ma le auala na aogā ai a tatou lomiga faale-Tusi Paia i le faamalieina o lo latou matelaina.

□ Na faapea mai le ovasia: “Talu ai na lē faataunuuina laʻu asiasiga i le nuu o Kamberatoro, o lea na faaaluina ai loʻu taimi e galulue faatasi ai ma le faapotopotoga laitiiti i Vanimo. E matuā tele le fiafia o tagata i lena oganuu. E toatele tagata mai Bewani na taliaina lomiga. Na talosaga mai se tasi tamaloa ia te aʻu ina ia ou sau e asiasia lenei nuu, ae o le a ia saunia se mea ou te nofo ai. E toatele tagata e masani lelei ma a tatou lomiga. O taimi uma lava matou te ō ai i le taulaga o Vanimo, e lē taitai lava a matou lomiga e ui ina aveina ni pusa tusi se tolu. O Laʻu Tusi o Tala o Le Tusi Paia sa pei o se auro lona tāua. O loo sailia e tagata lenei tusi. Na vave lava ona uma aʻu tusi sa ave. Ina ua faaali atu i tagata a matou lomiga, sa fesili mai nisi: ‘O fea le tusi samasama?’ Na ota e le isi tamaloa ni tusi samasama se ono. Sa ia aumaia ia te aʻu lona suafa ma lona tuatusi ma talosaga mai ia te aʻu ina ia faasalalau atu i le leitio le taimi e maua ai. Ona sau lea o ia mai lona nuu e avatu.” Ua faaopoopo mai le ovasia femalagaaʻi: “Na ou matauina o le toatele o tagata i Vanimo na latou taliaina tusi o le Mankindʻs Search for God ma le Questions Young People Ask—Answers That Work.”

Ua faataʻitaʻia mai ai e lenei mea le matelaina o loo iai tagata loto faamaoni, mo meaʻai faaleagaga o loo maua i le Tusi Paia ma lomiga ua saunia e Ieova e ala mai i le “auauna faamaoni ma le mafaufau.” (Mataio 24:45-47) Maeu le fiafia o Molimau a Ieova i le mafai ona latou fesoasoani atu i nei tagata o loo matelaina mo le upu moni!

[Ata i le itulau 19]

Le molimau atu i Papua Niu Kini