Vaaiga Mai le Nuu Folafolaina

Ia Olioli! Ua Taumasuasua Tuugāuaina i le Suāuu

NA APOAPOAI mai le perofeta o Ioelu i ‘atalii o Siona ina ia fiafia ma olioli ia Ieova.’ Sa ia faaaogāina le suāuu olive e faamatala ai lo latou olioli ma le uluola: “E tutumu mea e sasa ai saito i saito, e taumasuasua o latou tuugāuaina i le uaina ma le suāuu.”—Ioelu 2:23, 24.

Ana faapea sa e soifua i Isaraelu i taimi o le Tusi Paia, semanū o le a e fiafia e tū latalata ane i lou fale, po o lou fanua, se laau o le olive e pei ona faaalia i luga. * Semanū o le a faafaigofie ai lou olaga, ma sili atu ona fiafia. Aiseā e sili ai ona tāua se laau o le olive?—Faatusatusa i le Faamasino 9:8, 9.

Muamua, seʻi tagaʻi lelei i lau laau. O laau o olive, atonu e mafai ona ola mo le tele o ni senituri, o nisi e sili atu i le afe ni tausaga, o lea, atonu o le a faapena ona faaalia ai i se suesuega se ogālaau tauponapona, lanu efuefu. O lau laau atonu po ua tusa ma le 20 futu [6 mita] le maualuga, e mautinoa lava e lē tāuluulu ee pei o le arasi pe matagofie foi lona tupu e pei o le pama. O ona lau iila lanumeamata vaivai, ua saunia ai se faapaologa i le tausaga atoa. Peitai, i le taimi muamua, atonu e lē tāua ia te oe lau laau ona o lona foliga mai ma lona paolo. E matuā leai lava.

O le fua, o le mea tāua lena i le faitauafe o na olive lanumeamata pe uliuli! O le mea lena ua avea ai le laau o le olive o se mea matuā manaomia mo le ola ma gaoioiga i tagata Isaraelu i aso faisoo. Ia Me, e ufitia ai le laau i fugalaau e lē malolosi o latou lanu, e sauniuni ai mo le fuaina mai o olive. (Iopu 15:33) Pe a matua nei fua, e mafai ona suia mai fua samasama i fua eena paʻauli ma le uliuli.

O le seleseleina o olive ia Oketopa e oo ia Novema, o se galuega mamafa. E te sasaina le tino o le laau i ni ogālaau ina ia toulu i lalo fua pula i luga o ie o loo fofola i lalo ifo. (Teuteronome 24:20) E muamua ona fufulu olive a o leʻi faaaogāina, e pei o le faapalaina i le vai ua uma ona faamasima, ina ia aveesea lo latou tofo oona e masani ai. O le ā e sosoo ai?

O le mea lena e faalagolago i le auala e te manao e olioli ai pe maua ai foi ni aogā mai lau seleselega fua tele. E mafai ona e ʻaina mata olive, e mafai foi ona e tuuina faatasi ma le vineka ina ia mafai ai e lou aiga ona maua pea ni olive susua mo le tele o masina. E mafai ona avea olive o se vaega autū o taumafataga masani, o se ʻaiga e mafai ona maua faatasi  ai sina tofo o olive ma keke e faia i le karite.

O lea la, atonu o le a e manao e gaosia olive i le faagasologa manaomia ina ia mafai ai ona maua lena mea aogā ma le tautele mo fefaatauaiga—o le suāuu olive. E mafai ona e maua mai ai ni ituaiga o suāuu eseese, e faaaogāina i le tele o auala. Muamua, e mafai ona e sasaina lemu pe tatau olive pula i le tuʻiina i totonu o se pesini pe soli foi i vae. (Mika 6:15) O lena faiga e mafai ona maua mai ai se suāuu olive sili ona lelei ma sili ona tautele, lea ua taʻua o le suāuu sili ona fou, sa talafeagai lelei mo lamepa na sa faamalamalamaina ai le fale fetafai. (Esoto 25:37; 27:20, 21) Seʻi manatu i le maeu o lou manaomia i le mauaina pea o lenei suāuu manaomia e faaaogā i le kukaina o meaʻai mo faatasiga faapitoa!

O olive, e oo lava i olive faalēlelei, e mafai lava ona tuu i totonu o le mea e tatau ai, ina ia tatau mai ai le tele o suāuu mai le aano e ui lava ina maulalo le tulaga o le suāuu e maua mai ai. O le aano o le olive e tusa ma le 50 pasene o le suāuu. E mafai ona faaaogā ituaiga eseese o mea e tatau ai le suāuu, ae e tasi le auala lea o loo faaalia mai i inei. O olive atoatoa po o olive e leʻi uma ona tuʻiina, e tuu i totonu o se faatanoa lapotopoto. O se maa olo saito telē, e faataamilo e se asini po o se tagata foi, na te oloina olive ina ia sau ai i fafo le suāuu, lea e tafe atu ma utuina i totonu o faguele lapopoa.—Mataio 18:6.

O le suāuu olive e mafai ona faatusaina i le auro ua liu suāvai—e matuā tautele lava le suāuu ma sa faaaogāina i le tele o auala eseese. O se laau e tasi e mafai ona maua mai ai pea le suāuu mo se aiga e toalima pe toaono tagata mo le tausaga atoa. E mafai ona avea o se vaega autū o a latou taumafataga masani, ona e faigofie ona faamalū ma e maua ai foi le malosi faaletino. (Faatusatusa i le Ieremia 41:8; Esekielu 16:13.) E mafai ona e faamanogiina se suāuu ma faaaogā e fai ma suāuu e uu ai le tino pe liligi foi sina suāuu i luga o le ulu o se mālō e fai ma faailoga o le agaga talimālō. (2 Samuelu 12:20; Salamo 45:7; Luka 7:46) E mafai ona e faaaogāina e avea o se vailaau e faapepē ai manuʻa.—Isaia 1:6; Mareko 6:13; Luka 10:34.

E lē ona pau lena o aogā mo le mauaina pea o le suāuu olive. E mafai foi ona e faaaogāina, e faamalamalama ai lou fale, e fai ma vaega o se taulaga i le Atua, po o se mea tāua foi e aogā mo fefaatauaiga. Ioe, i taimi o le Tusi Paia, sa avea ai le laau o le olive o se laau e sili atu ona tautele, o lea, ua mafai ai ona faaaogā ma le talafeagai lelei e Ioelu e faaatagia ai le uluola ma le olioli.—Teuteronome 6:11; Salamo 52:8; Ieremia 11:16; Mataio 25:3-8.

[Faaopoopoga i lalo]

[Ē Ana le Ata i le itulau 24]

Pictorial Archive (Near Eastern History) Est.