‘Ia Savavali Pea Faapei o Fanau o le Malamalama’

“Ia oofu [outou] i le tagata fou na foafoaina e tusa ma le finagalo o le Atua i le amiotonu moni ma le faamaoni.”—EFESO 4:24, NW.

1. O ā mea ua faamanuiaina ai tagata tapuai o Ieova? Aiseā?

O IEOVA LE ATUA o “le Tamā o malamalama,” ma “e leai lava se pouliuli o ia te ia.” (Iakopo 1:17; 1 Ioane 1:5) Na fetalai lona Alo, o Iesu Keriso e uiga ia te ia lava: “O aʻu nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.” (Ioane 8:12) O le mea lea, o tagata tapuai moni o Ieova, o soʻo o lona Alo, ua faamanuiaina i le faamalamalamaina—i le mafaufau, amioga, ma le faaleagaga—ma ua ‘pupula atu i latou faapei o mea e faamalamalama aʻi i le lalolagi.’—Filipi 2:15.

2. O le ā le eseesega na valoia e uiga i le va o tagata o le Atua ma tagata o le lalolagi?

² I aso la ua leva, na faagaeeina ai le perofeta o Isaia e valoia lenei eseesega: “Faauta mai, e ufitia le lalolagi i le pouliuli, e ufitia foi nuu i le pogisa; a e afio ae Ieova i ou luga, ma le pupula o Ieova e aliali mai lea i ou luga.” O le mea moni, o tagata uma ua liliuese mai le Atua, ua taʻua faapea ua i lalo o le pule ma  taaʻiga a ‘pule o le pouliuli o lenei lalolagi.’—Isaia 60:2; Efeso 6:12.

3. Ona o ā mafuaaga ua tatou matuā naunau fiafia ai i fautuaga talafeagai a Paulo?

³ Sa matuā popole le aposetolo o Paulo ona o le manao ina ia tumau pea ona saoloto ese ona uso Kerisiano mai lena pouliuli. Sa ia uunai atu faapea ia le “toe savavali faapei o isi nuu faapaupau uma” a o i latou, ‘ia savavali pea faapei o fanau o le malamalama.’ (Efeso 4:17; 5:8) Sa ia faamatalaina foi le auala e mafai ai ona latou taulau i le faia o lenei mea. I aso nei, ua faateleina le mafiafia o le pouliuli ma le pogisa lea ua ufitia ai nuu. Ua goto atu i le loloto le lalolagi i le ogatotonu o faiga leaga tauamio ma le faaleagaga. Ua tauina ai e tagata tapuai o Ieova se taua e sili ona faigata. O le mea lea, tatou te matuā naunau fiafia ai i upu a Paulo.

Aʻoaʻo e Uiga i le Keriso

4. O le ā le mea sa i le mafaufau o Paulo ina ua ia faapea mai: “Ua le aʻoaʻoina outou faapena i le matāupu a Keriso”?

⁴ Ina ua uma ona faamatalaina mea lē aogā sa faia ma amioga lē mamā a le lalolagi, ona toe sagaʻi atu lea o le aposetolo o Paulo i ona uso Kerisiano i Efeso. (Ia faitau le Efeso 4:20, 21.) E tolu tausaga sa faaalu e Paulo e talaʻi ma aʻoaʻo atu ai i lena aai, ma sa tatau ona masani lelei o ia i le toatele i le faapotopotoga. (Galuega 20:31-35) I lea, ina ua ia faapea mai, “Ua le aʻoaʻoina outou faapena i le matāupu a Keriso,” sa ia faamatalaina lona malamalamaga totino e faapea, sa leʻi aʻoaʻoina Kerisiano i Efeso i se mataupu e faasoloatoa, ma faavaivaia ai o le upu moni na e ono faatuutuu ai i ituaiga o amioga sili ona matuiā e pei ona sa ia faamatalaina i fuaiupu e 17 e oo i le 19. Sa ia iloa na lelei ona aʻoaʻoina ma le saʻo i latou i le auala moni faa-Kerisiano o le olaga e pei ona sa faataʻitaʻia mai e Iesu Keriso. Ona o lena mafuaaga, latou te leʻi toe savavali ai i le pouliuli faapei ona sa faia e isi nuu, ae sa avea i latou ma fanau o le malamalama.

5. O le ā le eseesega i le tau ina faataʻetaʻealuga o le iai i le upu moni, ma le iai o le upu moni ia i tatou?

⁵ O lea, maeu la le tāua o le ‘aʻoaʻoina e uiga i le Keriso’ i le auala saʻo! E iai ea ni auala e aʻoaʻoina ai e uiga i le Keriso? Ioe, o le mea moni lena. Muamua lava, i le Efeso 4:14, na lapatai mai ai Paulo i le au uso e faapea: “Ia le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.” E foliga mai sa iai nisi o ē na aʻoaʻoina e uiga i le Keriso ae sa savavali pea i ala o le lalolagi ma sa oo lava ina taumafai e uunaia isi ina ia faia faapena. Pe ua faailoa mai ea e lenei mea ia i tatou le mataʻutia o le tau ina iai i le upu moni e pei ona faaupu ai e nisi, i le eseese ma le iai o le upu moni ia i tatou? I aso o Paulo o i latou sa na ona iai o se malamalamaga faataʻetaʻealuga, sa faigofie lava ma vave foi ona taʻitaʻiseseina e isi, ma ua faapena foi ona moni i aso nei. Ina ia puipuia mai lenei mea, sa faaauau ona faapea mai Paulo, sa manaomia e tagata Efeso ona ‘faalogo ia Keriso ma ia aʻoaʻoina e ala ia Iesu.’—Efeso 4:21.

6. E mafai faapefea ona tatou faamasani, faalogo, ma aʻoaʻoina e Keriso i aso nei?

⁶ O faaupuga ‘ia faamasani’ “ia faalogologo,” ma “ia aʻoaʻoina” sa faaaogāina e Paulo ona sa faaalia uma ai lava faagasologa o suesuega ma faatonuga, e pei ona iai i se aʻoga. E moni, e lē mafai ona tatou faalogo atu, e lē mafai ona aʻoaʻo mai, e lē mafai foi ona aʻoaʻo tuusaʻo mai Keriso lava ia i aso nei. Ae o loo ia faatonutonuina se tauiviga tau aʻoaʻoga faale-Tusi Paia i le lalolagi aoao e ala i lana “auauna faamaoni ma le mafaufau.” (Mataio 24:45-47; 28:19, 20) E mafai ona tatou ‘aʻoaʻoina le Keriso’ i le auala tonu ma le saʻo aʻiaʻi pe afai tatou te ave i fale e lē aunoa meaʻai faaleagaga talafeagai, ua saunia e le vasega o le auauna, pe afai e suesue ma le filigā i ai, i suesuega totino po o totonu o le faapotopotoga, pe afai e mafaufau loloto i ai, ma ia faatino mea ua tatou aʻoaʻoina. Seʻi tatou faamautinoaina ua tatou faaaogā atoatoa sauniuniga uma ina ia mafai ai ona tatou fai atu moni ua tatou “faalogologo ia te ia, ma ua aʻoaʻoina i lana mataupu.”

7. O le ā le uiga faapitoa o upu a Paulo faapea, o “le upu moni o loo ia Iesu”?

 ⁷ E tāua ona mātau, i le Efeso 4:21, ina ua uma ona faamatilatila le faagasologa faaleaʻoaʻoga, ona faaopoopo mai lea o Paulo: “E tusa ma le upu moni o loo ia Iesu.” Ua uaʻi atu manatu o nisi tagata faimanatu o le Tusi Paia i le mea moni faapea, sa seāseā faaaogā e Paulo na o le suafa totino o Iesu i ana tusitusiga. E moni, e na o le pau lava lenei o le faataʻitaʻiga o lena ituaiga o faaaogāina i le tusi i tagata Efeso. O iai ea se uiga faapitoa o lenei mea? Atonu sa tataʻi atu e Paulo manatu i le faataʻitaʻiga na faataatia e Iesu i le avea o se tagata. Manatua, na iai se taimi na fetalai ai Iesu ia te ia lava: “O aʻu nei le ala, ma le upu moni, ma le ola.” (Ioane 14:6; Kolose 2:3) Na fetalai mai Iesu: “O aʻu . . . le upu moni” ona sa leʻi na ona ia tautala ma aʻoaʻo ai, ae sa ola ai ma faatinoina foi lea upu moni. Ioe, o le Faa-Kerisiano moni e lē na o se manatu, ae o se auala o le olaga. O le ‘aʻoaʻoina o Keriso’ e aofia ai le aʻoaʻo ina ia faataʻitaʻi ia te ia i le ola aʻe e tusa ma le upu moni. Po o faataʻitaʻi lou olaga ia Iesu? Po o e mulimulituʻi i ona tulagaaao i aso uma? I le na o le faia faapea, e mafai ai ona tatou savavali pea e avea o ni fanau o le malamalama.

Ia “To Ese le Tagata Tuai”

8. O le ā le faataʻitaʻiga i le Efeso 4:22, 24, na faaaogā e Paulo, ma aiseā ua alagatatau ai?

⁸ Ina ia faaalia pe mafai faapefea ona taulau lo tatou ‘aʻoaʻoina o Keriso’ ma savavali ai o ni fanau o le malamalama, sa faaauau ona faapea mai Paulo i le Efeso 4:22-24, faapea e tolu laasaga maioio e tatau ona tatou mulimuli ai. O le laasaga muamua o mea nei: “Ia outou to ese le tagata tuai o loo ua leaga, e tusa ma le amioga faaanamua, e tusa ma tuʻinanau e faasese ai.” (Efeso 4:22. O faaupuga “to ese” (“tuu ese,” Kingdom Interlinear) ma le “ia oofu” (fuaiupu 24) ua aumaia ai se ata faalemafaufau i le toeseina ma le ofuina o se ofu. O se faaupuga faafaatusa lenei sa masani ona faaaogā e Paulo, ma o se faaupuga e sili ona uigā. (Roma 13:12, 14; Efeso 6:11-17; Kolose 3:8-12; 1 Tesalonia 5:8) Pe a eleelea pe pisipisia o tatou ofu, e pei o le taimi o se taumafataga, tatou te suia vave lava i le uluai avanoa tatou te maua. Pe e lē ao ea ona faapena foi ona tatou popole i so o se mea e faaeleelea ai lo tatou tulaga faaleagaga?

9. I le ā le auala e to ese ai e se tasi le tagata tuai?

⁹ E faapefea la ona to ese e se tasi le tagata tuai? O le veape “to ese” i le uluai gagana o loo i le mea ua taʻua o le aorist tense. O loo faaalia ai se gaoioiga e faia e na o le faatasi lava po o le faatasi ma e lē toe faia lava. Ua taʻu mai ai e lenei mea ia i tatou faapea o le “tagata tuai” (“tagata muamua,” Kingdom Interlinear), faatasi ma a tatou “amioga faaanamua,” e tatau ona tuuesea i se gaoioiga maʻoti ma se gaoioiga maumauai, e maʻeaeʻa ma matuā atoatoa. E lē o se mea e mafaia ona faia i ai sa tatou filifiliga manuia pe tatou te faatalatū ai foi. Aiseā?

10. Aiseā e tatau ai ona tatou mausalī ma filigā i le toeseina o le tagata tuai?

¹⁰ O le faaupuga ‘ua iʻuvale’ ua faaalia ai faapea “o le tagata muamua” o loo faaauau pea  ma agaʻigaʻi i luma i le auala o amioga matagā ua iai i se tulaga maulalo, e paʻū mai le leaga i le sili atu ona leaga. O le mea moni, ona o le teena o le faamalamalamaga faaleagaga, ua agaʻi atu ai tagata uma i se suiga e paʻū maulalo. O le iʻuga lenei o “tuʻinanau e faasese ai,” e pei ona taʻua e Paulo. E matuā taufaasese lava tuʻinanauga faaletino ona atonu e foliga mai e lē afaina, ae e matuā faaleagaina ai. (Eperu 3:13) Afai e lē taofia, o lona taunuuga, o le a faaleagaina ma oti ai. (Roma 6:21; 8:13) O le pogai lena e tatau ai ona to ese le tagata tuai, ia matuā sasae ese atoatoa, e pei ona ia matuā aveesea o se ofu ua tuai ma eleelea.

Se “Agaga [Fou] o le Mafaufau”

11. O fea e tatau ona amata ai le faafouina faaleagaga?

¹¹ O se tagata ua alu ese mai se vaivai palapalā, e manaomia e lē gata ina tatala ese ona ofu eleelea, ae ia taele mamā foi o ia a o leʻi ofuina se isi ofu fou ma mamā. O le mea tonu lava lena na otootoina mai e Paulo e avea o se laasaga lona lua i le faamalamalamaina faaleagaga: “E ao ona faafouina outou i le malosi e toe fuataʻiina ai o outou mafaufau.” (Efeso 4:23, NW) E pei ona sa ia faasino mai muamua i le fuaiupu e 17 ma le 18, o loo savavali nuu “i le valea [“le aogā,” NW] o latou loto” ma ua “faapouliuligia o latou mafaufau.” O le mea moni, o le mafaufau, le mafuaaga o le tofā mamao ma le malamalama, o i inā e tatau ona amata mai ai ona toe faafouina. E mafai faapefea ona faia o lenei mea? Na faamatalaina e Paulo faapea, e ala i le toe faafouina o le malosi lena e fuataʻiina ai o tatou mafaufau. O le ā lena malosi?

12. O le ā le malosi e fuataʻiina ai le mafaufau?

¹² Po o le agaga paia ea, o le malosi lea e fuataʻiina ai o tatou mafaufau, lea na faasino i ai Paulo? E leai. O le fuaiupu “le malosi e toe fuataʻiina ai o outou mafaufau” e faitauina moni faapea “le agaga o le mafaufau o oe.” E leai se vaimea o le Tusi Paia o tautala ai faapea o le agaga paia o le Atua e mai se tagata po o se vaega o se tagata. O le upu “agaga” o lona uiga faavae o le “mānava,” ae ua faaaogāina foi e le Tusi Paia “e faailogaina ai le malosi lena e faapogaia ai se tagata e faaalia mai se uiga patino, se gaoioiga, po o se faalogona, pe uia foi se auala patino o gaoioiga.” (Insight on the Scriptures, Tusi 2, itulau 1026) O lea ‘o le agaga o le mafaufau’ o le malosi lea na te uunaia pe fuataʻiina o tatou mafaufau, o tatou lava faanaunauga ma manatunatuga o o tatou mafaufau.

13. Aiseā e tatau ai ona faafouina faanaunauga o o tatou mafaufau?

¹³ O faanaunauga masani ma manatunatuga o le mafaufau lē lelei atoatoa, e matele lava i le  manao i le malosi faaletino, tuʻinanau o le tino, ma le manao tele i mea faitino. (Failauga 7:20; 1 Korinito 2:14; Kolose 1:21; 2:18) E tusa lava po ua to ese e se tagata le tagata tuai ma ana faiga leaga, ae afai e lē o suia faanaunauga agasala o lona mafaufau, o le a lē pine ae uunaia o ia ina ia toe foi atu i le mea na ia lafoaia. Pe lē o le mea ea lenei na oo i le toatele o ē na taumafai, mo se faaaʻoaʻoga, e taofia le ulaula, le inu tele, po o isi lava faiga leaga? Pe afai sa latou lē faia se taumafaiga ina ia faafouina le malosi e toe fuataʻiina ai o latou mafaufau, na toetoe lava a lē mafai ona alofia le toe foi atu i tua i le toe faia o na amioga leaga. So o se liliuina lava e tatau ona aafia ai le toe fuataʻiina atoatoa o le mafaufau.—Roma 12:2.

14. E mafai faapefea ona faia ia fou le malosi e toe fuataʻi ai le mafaufau?

¹⁴ E faapefea la ona toe faafouina e se tasi lena malosi ina ia mafai ai ona suia lona mafaufau i le ala saʻo? O le veape “faafouina” i tusitusiga Eleni o loo i le uiga o le taimi nei, e faamamafaina ai se gaoioiga faifai pea. O lea, e ala i le faaauauina pea ona suesueina o le Afioga a le Atua o le upu moni, ma le mafaufau loloto po o le ā lona uiga, o le a mafai ai ona faafouina le malosi e toe fuataʻiina ai le mafaufau. Ua taʻu mai e saienitisi ia i tatou e faapea, i o tatou faiʻai, o loo fegasoloai ai mai lea neura i lea neura faamatalaga, e pei o ni faatonuga e vave ona auina atu, e felaasaʻi solo i le tele o fesootaiga ua taʻua o synapses. Ua fai mai le tusi The Brain: “O se ituaiga o mafaufauga e mafai ona tupu aʻe i le fesootaiga o neura, pe a oo atu le faatonuga i neura, ma taofimau ai i inā se manatu fou.” Pe a toe oo atu i se isi taimi le faatonuga lava lea, o le a mātau e neura ma sili atu ai ona tali vave mai.”—Filipi 4:8.

“Oofu i le Tagata Fou”

15. I le ā le uiga e fou ai le tagata fou?

¹⁵ I le faaiʻuga, ua faapea mai ai Paulo: “E ao ona oofu [outou] i le tagata fou na foafoaina e tusa ma le finagalo o le Atua i le amiotonu moni ma le faamaoni.” (Efeso 4:24, NW) Ioe, e ofu e se Kerisiano le tagata fou. O le “fou” i inei e lē faasino i le taimi, ae o le uiga. O lona uiga la, e lē o le fou i le uiga faapea o se faamatalaga po o se manatu fou. O se tagata e fou atoatoa, “na foafoaina e tusa ma le finagalo o le Atua.” I le Kolose 3:10, sa faaaogā ai e Paulo le faaupuga e tali tutusa ma na ia faapea mai “ua faafouina . . . e faatatau ia foliga i [Lē] na faia o ia.” E faapefea la ona maua lenei tagata fou?

16. Aiseā ua fai atu ai faapea o le tagata fou “na foafoaina e tusa ma le finagalo o le Atua”?

¹⁶ Na foafoaina e Ieova le Atua le uluai  ulugalii, o Atamu ma Eva, i Lona faatusa ma foliga ia te ia. Sa foaiina ia i laua ni uiga tau i amioga ma le faaleagaga na sa faaesea ai i laua ma e sili mamao aʻe ai i lo o manu. (Kenese 1:26, 27) E ui lava o la laua fouvalega ua aafia uma atu ai tagata i le agasala ma le lē lelei atoatoa, a o i tatou i le avea o ni ē tupuga mai ia Atamu, o loo iai pea le avanoa e faatinoina ai uiga lelei tauamio ma uiga faaleagaga. O le finagalo o le Atua, o i latou o ē faaalia le faatuatua i le taulaga togiola, e ao ona tiai ese le tagata tuai ma ia olioli ‘i le saolotoga mamalu o le fanau a le Atua.’—Roma 6:6; 8:19-21; Kalatia 5:1, 24.

17. Aiseā ua avea ai le amiotonu ma le faamaoni o ni uiga mataʻina o le tagata fou?

¹⁷ O le amiotonu moni ma le faamaoni o uiga na e lua na faamatilatila mai e Paulo e avea ma uiga o le tagata fou. Ua faamamafa atili mai ai e faapea, o le tagata fou ua faafouina e tusa ai ma le faatusa o Lē na foafoaina o ia. Ua taʻu mai e le Salamo 145:17 ia i tatou e faapea: “E amiotonu Ieova i ona ala uma; o loo alofa ia i ana mea uma lava na faia.” Ma ua faapea mai le Faaaliga 16:5, e uiga ia Ieova: “O lē amiotonu oe, o lē soifua, o lē na soifua, ma loo lelei [“faamaoni,” NW].” E moni, o le amiotonu ma le faamaoni o ni uiga matuā talafeagai, pe afai tatou te ola ina ia tusa ai ma le faiga o i tatou i le faatusa o le Atua, e atagia atu ai lona mamalu. Tau ina ia tatou pei o Sakaria, le tamā o Ioane le Papatiso, o lē na faagaeetia e le agaga paia e vivii atu i le Atua ona o le foaiina mai i Ona tagata o ‘le faaeaga o le tuuina atu ia te ia ma le lē mataʻu le auaunaga paia i le faamaoni ma le amiotonu.’—Luka 1:74, 75.

‘Ia Savavali Pea Faapei o Fanau o le Malamalama’

18. Ua fesoasoani mai faapefea Paulo ia i tatou e iloa ai le uiga moni o ala o le lalolagi?

¹⁸ I le talanoaina auiliili o upu a Paulo i le Efeso 4:17-24, ua tele ai mea tatou te mafaufau i ai. I le fuaiupu e 17 e oo i le 19, ua fesoasoani mai ai Paulo ia i tatou ina ia tatou iloa ala o le lalolagi e pei ona iai. O le teena o le poto i le Atua ma le faamaʻaa o o latou loto ia te ia, ua momotu ese ai e i latou o i le lalolagi i latou lava mai le puna moni o le ola. I le iʻuga, i le aunoa ma se fuafuaga moni po o se taʻitaʻiga, ua iʻuvale ai a latou taumafaiga ma lē aogā. Ua matuā magoto atu i latou i le faaleagaina tauamio ma le faaleagaga. Pagā se tulaga faanoanoa! Ma maeu se mafuaaga malosi mo i tatou e filifili ai ina ia savavali faapei o fanau o le malamalama!

19. O le ā le faalaeiauga faaiʻu ua tatou maua mai ia Paulo ina ia savavali pea e faapei o fanau o le malamalama?

¹⁹ I lea, ua faamamafa mai ai e Paulo i le fuaiupu e 20 ma le 21, le tāua o le aʻoaʻoina ma le filigā o le upu moni, ina ia lē tau ai ina tatou auaufaatasi ma le upu moni, ae ia ola ai o tatou olaga e pei ona sa faia e Iesu. I le faaiʻuga, i le fuaiupu e 22 e oo i le 24, ua ia apoapoai mai ai ia i tatou ina ia to ese le tagata tuai ae ofu i le tagata fou—ua filifilia lelei ma le maumauaʻi. I le taimi nei, e tatau ona tatou tausia pea faanaunauga o o tatou mafaufau i se auala e atoatoa ona mamā faaleagaga. I lo mea uma lava, e tatau ona tatou vaavaai atu ia Ieova mo le fesoasoani a o faaauau pea ona tatou savavali e faapei o fanau o le malamalama. “Auā o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.”—2 Korinito 4:6.

E te Manatua?

□ E mafai faapefea ona tatou ‘aʻoaʻoina e uiga i le Keriso’ i aso nei?

□ Aiseā e tatau ai ona matuā to ese le tagata tuai?

□ O le ā le malosi e toe fuataʻiina ai le mafaufau, ma e faapefea ona faia ia fou?

□ O ā uiga ua faailogaina ai le tagata fou?

[Fesili mo le Suʻesuʻega]

[Ata i le itulau 15]

Na fetalai Iesu: “O aʻu nei le ala, ma le upu moni, ma le ola”

[Ata i le itulau 16]

‘Ia tuu ese le tagata tuai ma ana faiga’—o le lotoa, o le ita, o uiga leaga, o upu leaga, o talanoaga matagā, ma le pepelo.—Kolose 3:8, 9

[Ata i le itulau 17]

“Ia oofu [outou] i le tagata fou na foafoaina e tusa ma le finagalo o le Atua i le amiotonu moni ma le faamaoni.”—Efeso 4:24, “NW”