Misionare i Maikoronesia

E UI lava ina nonofo ese atu i motu tūtū mamao o le Vasa Pasefika, ae o loo mafai pea e misionare o le Maikoronesia ona faapotopoto i tausaga taitasi mo se “toe faatasiga faaleaiga.” Ma o fea o loo feiloai uma i ai nei faievagelia mai atumotu vāvā mamao? I le nofoaga ua talafeagai lelei, lea ua faaigoaina e le malo, o Jehovah Street—o le tuātusi o le ofisa o le lālā i Guam, lea o loo latou auauna ai.

Ia Iuni 1992, e toʻa 56 misionare na potopoto uma ane i le lālā ina ia auai atu i le Tauaofiaga Itumalo “O Ē Faasusulu atu le Malamalama.” Na matuā pisapisaō lea nofoaga i taliēga ma talanoaga faafiafia loto a o toe faamanatuina tala i a latou faigauō i aso ua leva ma tala foi i a latou faigauō fou ua iai nei. E pei lava ona masani ai, sa faatulaga la latou laina i sitepu o le Maota o le Malo mo le puʻeina o le ata, ona nofoi ai lea i ni laulau uumi se tolu mo se taumafataga faaletausaga mo misionare, lea sa faaautū atu i lenei tausaga i le asiasiga a Albert Schroeder, o se sui o le Vaega Pule.

O lenei faatasitasiga faaletausaga i Guam ua faatoʻā maua ai e le toatele o misionare se avanoa e tuua ai o latou aiga lamoʻimoʻī i le teropika. Ma e matuā lamoʻimoʻī lava nei motu. O Ebeye Island, o se tasi o motu o le Atu Malesala, e na o le 78 eka lona telē. O le fale misionare i Majuro i Malesala ma le fale misionare i Kiripati i le Atu Kiripati e tutū uma i motu amuamua vaiti e itiiti ifo na i lo le ʻafa maila [0.8 kilomita] le lautele. O lea ua matuā faafiafiaina ai misionare ina ua alu atu la latou faigamalaga i Guam.

E ui ina matagofie le faalogo atu i le manatu o le talaʻiga i se motu o le teropika, ae o le mea moni, o se luʻi ua nofo sauni se vaega toaitiiti e faafesagaʻia. E mataʻina, auā e na o le toʻa 7 mai le 56 misionare, o ē na aauina mai le Aʻoga Faale-Tusi Paia a le Olomatamata i Kiliata. O le toatele sa ō mai mai Hawaii po o le atu Filipaina, o i inā sa latou galulue ai o ni faifeau paeonia, ma ua masani i le olaga i le teropika, ma sa ō atu saʻo lava i latou mai o latou atunuu moni i o latou tofiga faamisionare.

Talu ai e latalata tele motu o Maikoronesia i le ekueta, sa matuā tauivi ai misionare ma le vevela ma le susū o le ea, ina ia mafai ona faaoo atu i tagata o le motu le tala lelei. E sili foi ona avea fesootaiga ma luʻi. E tofu lava motu taitasi po atunuu ma lana gagana—o nisi gagana e matuā lē iloa lava e nisi ma e lē o faamauina foi i se lomifefiloi—ma e faitau tausaga ona faatoʻā mafai lea ona solo lelei ai le tautala a se tagata fou. Ina ia fesoasoani la i tagata o nei motu tūtū mamao ina ia malamalama i le Tusi Paia, ua lolomia ai e le lālā i Guam lomiga i gagana e 11, ma o le 9 o nei gagana e faaaogāina faapitoa i Maikoronesia.

E matuā vāvā mamao lava nisi motu, ma seiloga o se vaa faatoʻā mafai lea ona oo atu i ai. E iai le fale misionare i Tol i Chuuk (Truk) i se tasi o na motu, ma e faalagolago misionare i inā i le la e maua mai ai se eletise mo ni nai itula i aso taitasi.

O le aofai atoa, e 14 aiga misionare i Maikoronesia atoa, lea e aofaia ai atumotu i le vai vasa e tai tutusa lona telē ma le konetineta o le Iunaite Setete. Mai le sili atu i le 400,000 o le faitau aofai o tagata o loo nonofo ai, e iai le 1,000 tagata talaʻi o le tala lelei, ua faamaopoopoina i faapotopotoga e 20 ma vaega tūtū mamao e 3.

E ui lava o le uiga masani o tagata i Maikoronesia e sili ona faaleuō, peitai o tū faalotu  a le nuu ma omiga mai aiga ua faavaivai ai le toatele mai le taliaina o le upu moni o le Malo o le Atua. O lea, e ui lava i le tulaga aoao, o loo olaola ai le galuega talaʻi i le tele o motu, (o loo faia e tagata talaʻi e 1,000 o le Malo le toetoe 2,000 suesuega faale-Tusi Paia), ae o loo tumau pea ona toaitiiti isi faapotopotoga ma vaega. Mo se faataʻitaʻiga, e na o le toʻa 5 tagata talaʻi i le motu o Tinian, e na o le toʻa 7 tagata talaʻi i le motu o Nauru, ma faapotopotoga i Yap, Kosrae, ma Rota e itiiti ifo i le 40 tagata talaʻi o loo iai i faapotopotoga taitasi. Ae ui lava i lea, o loo tumau pea nisi misionare i o latou tofiga mo le silia i le 20 tausaga. E mataʻina, ona o misionare uma e toʻaono o loo iai pea i inā i le motu o Belau mo le 12 tausaga.

E maoaʻe taui mo i latou o ē tumau. I aso taitasi ua latou maua ai ni avanoa e maofa ai i le matagofie o foafoaga a Ieova. I atumotu o Maikoronesia, ua tutū taapeape solo e pei o ni maatāua ninii lanu lauava o loo taatia mai ai i tua le lanu moana o le Pasefika. O matafaga uumi e gaogao, ma āau ʻamua ua feilafi mai i iʻa lanu eseese ua faatosina atu ai tagata maulu ina ia latou suesueina nisi o vaega e sili ona lelei mo maulumauluga i le lalolagi. Ma i le iʻuga o aso taitasi, e vaaia ai se vaaiga matagofie o le goto ifo o le la i le fogatai.

Peitai ane, o le taui silisili, o le faaeaga lea e auauna atu ai ia Ieova e ala i le taʻu atu i isi o folafolaga ofoofogia mo le lumanai. Talu ai o loo faaauau pea ona aapa atu misionare o Maikoronesia mo lena taui, ua latou faataunuuina ai upu o le Isaia 42:12: “Latou te avatu le faaneeneega ia Ieova, ma latou taʻu atu lona viiga i nuu tu matafaga.”

[Faafanua/Ata i le itulau 31]

(Tagaʻi i le lomiga mo le ata atoa)

Barrigada, Guam

Santa Rita, Guam

Koror, Belau

Atu Chuuk (Truk)

Tarawa, Kiripati

Kosrae

Ebeye

Atu Malesala

Majuro

Kolonia, Pohnpei

Songsong, Rota

Saipan

Yap

MAIKORONESIA

MELANISIA

LE ATU KAROLAINA

VASA PASEFIKA

FILIPAINA

NIU KINI

EKUETA

[Ata]

O misionare o loo faapotopoto i Guam, ia Iuni 1992