O le Atua Na te Faatupuina—Po o E Fai Lau Vaega?

TAGAI faalemafaufau i le ata. O loo e tū i totonu o se togalaau matagofie, ua siosioina e laau tetele matagofie, o pupuvao laiti ola lauusiusi, ma le mafiafia o laau fua mātala i lanu felanulanuai. O le laufanua lanu lauʻava e taatia faasasasasa ifo i lalo, i ituvai o se ālia o loo punapuna mai ai se vai manino. E leai se mea e faaletonu i le ata. Ona o lou ofo tele, ua e fesiligia ai po o ai na faia lenei nofoaga matagofie. Ua tali ma le loto maulalo mai lē e ana le togalaau, o le Atua ua ia faatupuina nei mea uma.

O le mea moni, sa e iloa lena itu. Ma ina ua e taunuu i lou fale, ua e manatua ai upu a le fai togalaau, ina ua e vaai atu i lou lava laufanua e lē o mamā ona teu, e leai ni foliga mananaia o mea o loo ola ai, ua matuā mafiafia le lapisi, ma ua toʻa solo vaivai timu i omoomo o le laufanua. Ua matuā oso lava lou manao ina ia iai sou togalaau e pei o le togalaau lea na faatoʻā mavae atu lava ona e asiasi i ai. I lou talitonu maumauai la i le faamatalaga a le fai togalaau, ua e tootuli ifo ai ma tatalo faatauanau atu i le Atua ina ia faaola aʻe ni laau fua matagofie i lou laufanua. O le ā ua tupu? E mautinoa lava e leai se mea o tupu.

Ae faapefea le tuputupu aʻe faaleagaga? Atonu o lou faanaunauga sili ia e vaai atu ua tuputupu aʻe mea uma i se tulaga lelei faaleagaga, e pei o le talilelei mai o ni soʻo fou i le upu moni o le Afioga a le Atua, po o lou lava foi agaʻigaʻi i luma faaleagaga. Ma atonu e te tatalo faatauanau ia Ieova ina ia faagaoioia lena tuputupu aʻe, ma lou talitonuga maumaututū ua ia te ia le mana e faia ai faapea. Ae faamata ea o lou faanaunauga sili, lau tatalo faatauanau, ma lou mautinoa i le mana o le Atua, ua lava na, e faagaoioia ai le tuputupu aʻe?

E Faatupuina e le Atua

Atonu e te lagona faapea e lē tāua ma e lē uigā foi lau vaega i le faagaoioia o le tuputupu aʻe faaleagaga. Pe sa leʻi faatūina mai ea e le aposetolo o Paulo lenei manatu i le 1 Korinito 3:5-7? Na ia tusi ai: “O ai foi Paulo? O ai ea Apolo? E le o auauna lava ea na outou faatuatua ai, pei ona foai e le Alii taitasi ia te i maua? Na ou totōina, na faasūsūina e Apolo; a e peitai o le Atua ua faatupuina. O lenei, e le o lē totō, e le o lē faasūsū; a e peitai o le Atua o le na te faatupuina.”

Ua faailoa mai ma le saʻo e Paulo e faapea, o le viiga uma e avatu i le Atua pe a tutupu aʻe mea. Atonu e faamalū e le fai togalaau lana palapala, e lūlū ana fatu laau, ma e tausia foi ma le faaeteete laau, peitai, o le mana ofoofogia tau le foafoaga a le Atua ua mafai ai ona tutupu aʻe na laau. (Kenese 1:11, 12, 29) O le ā la na uiga i ai Paulo ina ua faapea mai “e le o lē totō, e le o lē faasūsū”? (“E lē faitaulia le auala e totō ma faasūsū ai e le fai togalaau,” The New English Bible.) Pe ua ia taʻu faatauvaaina ai ea le vaega a faifeau uma i le faia o soʻo fou, i le faatū mai o se manatu faapea e itiiti lava se aogā o le auala tatou te faia ai la tatou faiva?

 “E Le o Lē Toto”

Ia manatua, i lenei vaega o le tusi a Paulo, na te lē o talanoaina ai le faiva faa-Kerisiano, ae o le valea o le mulimuli atu i faaaʻoaʻoga a tagata na i lo faaaʻoaʻoga a Iesu Keriso. Sa faatāuaina i se tulaga lē talafeagai e nisi i Korinito nisi o auauna iloga a Ieova, e pei o Paulo ma Apolo. O isi sa latou uunaia le faia o ni vaega i le faapotopotoga ma faasilisilia ai nisi tane o ē sa latou manatu i ai faapea e silisili atu na i lo o isi o latou uso Kerisiano.—1 Korinito 4:6-8; 2 Korinito 11:4, 5, 13.

E lē saʻo le faamamaluina o tagata i se auala faapena. O ni mafaufauga faaletagata, ma e faapogaia ai le matauʻa ma maseiga. (1 Korinito 3:3, 4) Ua faaali mai e Paulo iʻuga o na mafaufauga. Ua ia faapea mai: “O ia te outou misa. O laʻu upu lenei, ua taitoatasi outou ma faapea ane, O aʻu o lo sa Paulō, O aʻu o lo sa Apolō, O aʻu o lo sa Kefā, O aʻu o lo sa Kerisō.”—1 Korinito 1:11, 12.

O lea, ina ua ia tusi, “e leai se tāua o lē e totō ma lē e faasūsū” (Phillips), o lona uiga o loo tauivi le aposetolo e tetee atu i na mafaufauga faaletagata, i le faamamafaina lea o le manaoga ina ia manatua o Iesu Keriso o le Taʻitaʻi ma ia mautinoa o le viiga uma mo le tuputupu aʻe i le faapotopotoga e tuuina atu lea i le Atua. O aposetolo ma isi toeaina ua na o ni auauna lava i le faapotopotoga. E leai se tasi e ao ona faasilisilia, e lē tatau foi ia i latou na ona sailia ni mea e viiviia ai i latou pe maua ai so latou lauiloa. (1 Korinito 3:18-23) Ua faapea mai la Paulo, o lē totō ma lē faasūsū e lē tāua, “i le faatusatusa atu ia te ia o lē o loo faaolaina le laau.”—1 Korinito 3:7, Phillips.

Le Au Faigaluega Faatasi ma le Atua

O lea la, ina ua taʻua e le aposetolo o Paulo nei upu, sa ia leʻi taʻufaatauvaaina ai le tāua o la tatou vaega i le totō ma le faasūsū. E lē o le uiga o lana faamatalaga e faapea ia amata ona tatou mafaufau, “o le a faatupuina e le Atua mea i lana lava taimi,” ona tau loa lea o le nofonofo ma faatalitali ia te ia na te faia faapea. E silafia e ia, o a tatou galuega ma le auala tatou te faia ai, e iai sona uunaiga malosi i le auala e tuputupu aʻe ai mea.

O le pogai lena o le faalaeiauina pea e Paulo o Kerisiano ina ia galulue mamafa i la latou faiva ma ia faaleleia o latou tomai o ni faiaʻoga. Mafaufau i lana fautuaga i le talavou o Timoteo. “Ia oe lava ia te oe, atoa ma lau e aʻoaʻo atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.” (1 Timoteo 4:16) “Ou te matuā fai atu ia te oe . . . , ia e talaʻi atu le upu, ia e faamalosi . . . , ma le onosai uma atoa ma le aʻoaʻo atu. . . . ia e matuā faaiuina lau faiva.” (2 Timoteo 4:1, 2, 5) Na semanū e itiiti se aogā i le galuega mamafa a Timoteo i le faaleleia o ona tomai, pe ana leai le uunaiga malosi sa iai i lana totō ma le faasūsū ina ia faatupuina ai mea.

E mafai foi la ona pei oe o Paulo ma Apolo, i le iai lea o sou faaeaga lē mafaatusalia o le auauna e avea o se tasi o ē galulue faatasi ma le Atua. (1 Korinito 3:9; 2 Korinito 4:1; 1 Timoteo 1:12) E faapena foi ona tāua lau galuega. E lē faatalitalia e le fai togalaau ina ia faavavega ona faatupuina e le Atua se togalaau matagofie, e aunoa ma sana taumafaiga na faia. Pe ua ese ea lena mai le tuputupu aʻe faaleagaga? E matuā leai lava. I le pei o le faifaatoaga e ‘faatalitali ma le onosai i le fua matagofie mai o le laueleele,’ e ao ai foi la ona tatou muai tinoū i tatou lava i le totō ma le faasūsū, ia faatalitali a o faatupuina aʻe e le Atua.—Iakopo 1:22; 2:26; 5:7.

Fai Lau Vaega

Talu ai ona sa faapea mai le aposetolo o Paulo, “e taitasi ma lona lava taui e maua, e tusa ma lana lava galuega,” ua talafeagai ai la ona tatou fesiligia le auala o loo tatou galulue ai.—1 Korinito 3:8.

O Geoffrey Smith o se tagata e poto faapitoa i le faiga o togalaau na ia faapea mai: “E lē manaomia ni agavaa faapitoa ina ia avea ai se tasi ma se fai togalaau, ae tau lava o le iai o sona naunau fiafia i laau.” (Shrubs & Small Trees) I le tulaga tutusa, e leai ni agavaa faapitoa tatou te manaomia ina ia avea ai ma ni ē galulue faatasi ma le Atua, ae tau lava o se naunau moni i tagata ma le lotomalie ina ia  faaaogāina i tatou e le Atua.—2 Korinito 2:16, 17; 3:4-6; Filipi 2:13.

Seʻi manatunatu i nisi o fautuaga lelei mai nisi o fai togalaau ua iai le tomai. E pei ona fai mai se tasi o tagata e tomai i togalaau, afai o se fai togalaau e leʻi iai sona tomai ae e naunau e faalogo atu i ē ua sili atu lo latou tomai na i lo ia, “e mafai ona vave avea lea fai togalaau ma sē e poto faapitoa.” Ua toe fai mai foi lenei lava tagata tomai i togalaau, “o le tagata e poto faapitoa, e masani lava ona maua pea se mea fou na te aʻoaʻoina.” (The Encyclopedia of Gardening) Pe e te taliaina ea ma le naunautai le fesoasoani ma le aʻoaʻoina ua saunia e Ieova ina ia mafai ai ona e totō ma faasūsū i se tulaga e uigā? Afai o lea, e tusa lava la pe e te fou i le galuega po ua iai foi sou tomai, ae e mafai lava ona e atiina aʻe ni tomai atili i le avea o sē e galulue faatasi ma le Atua, ma avea ai ma se tasi “ua mafaia ona aʻoaʻoina atu i nisi.”—2 Timoteo 2:2.

Ua faapea mai Geoffrey Smith, afai e naunau o ia e faalogo ma aʻoaʻo, “o le a alofia ai e le tagata ua faatoʻā amata, ni toʻatugā sili ona leaga.” Afai tatou te faalogo atu i taʻiala ua tuuina mai e Ieova i lana Afioga ma lana faalapotopotoga, o le a tatou faia la mea i lana auala. Mo se faaaʻoaʻoga, o le a tatou alofia ai na toʻatugā e pei o le finauvale ma i latou o ē e na ona mananao lava e finau po o le tauupu.—Faataoto 17:14; Kolose 4:6; 2 Timoteo 2:23-26.

O se isi fautuaga lelei mo le faia o togalaau, o le muai fuafua lea ma le faaeteete o mea a o leʻi nanati atu e faatoʻa le eleele. Ua faapea mai le The Encyclopedia of Gardening: “A o leʻi faatoʻaina le eleele, ia faaalu se taimi e fuafua lemū ai [ou faamoemoega].” Po o e lape ea i le soona nanati atu i le faiva faa-Kerisiano e aunoa ma le muai mafaufau ma le faaeteete ma ia tatalo atu, i mea o e manao e faataunuu ma le auala e sili ona lelei e faia ai? Ia faamanino uma au auala ma ou sini a o e leʻi amata. Mo se faaaʻoaʻoga, ia mafaufau i le ituaiga o tagata atonu tou te fetaiai ma faafitauli atonu e te fesagaʻia, ma ia sauniuni e taulimaina nei mea. O lenei tulaga o le a mafai ai ona e ‘maua ni tagata se toatele a o e taumafai e faafetaui atu oe i tulaga eseese o tagata.’—1 Korinito 9:19-23.

“Aua foi le Mapu Lou Lima”

Afai tatou te talisapaia le faaeaga o le auauna atu o ni ē galulue faatasi ma le Atua, o le a tatou lē manatu māmā ai i la tatou vaega i lea galuega fai faatasi. “O le taeao ia e lulu ai au saito, aua foi le mapu lou lima i le afiafi; auā e te le iloa po o le fea e manuia, o lenei, po o lena, pe gatusa ona lelei o ia mea e lua.” (Failauga 11:6) O loo ia Ieova iʻuga, peitai seʻi vaganā ua tatou muai lūlū ma le maelega, ona tatou selesele mai foi lea.—Failauga 11:4.

E leai lava se togalaau e mafai ona matagofie i le na o ni nai galuega e lē uigā, i sina elieli e lē o iai se naunautai, ma le tau ina lūlū solo fatu laau. I le tulaga tutusa, e sili atu nisi mea e manaomia i le faiva faa-Kerisiano na i lo na o sina vaega e faia i le tufatufaina atu o lomiga faale-Tusi Paia. I le avea ma ni ē galulue faatasi ma le Atua, e manaomia ona tatou maelega ma ia maeʻaeʻa e faalauiloa atu le tala lelei o le Malo o le Atua, i le sailia o i latou o ē saʻo o latou loto. (Galuega 13:48) Ia manatua le mataupu silisili o loo i upu a le aposetolo o Paulo i le 2 Korinito 9:6: “O le ua itiiti ana saito e lulu, e itiiti foi ana e selesele mai; a o le ua tele ana e lulu, e tele foi ana e selesele mai.”

I le pei o fai togalaau lelei uma, tatou te taumafai ai ina ia totō i se eleele lelei. Ae ui i lea,  e tusa lava po o se eleele e sili ona lelei e totō ai se laau, ae e lē gata ai i inā le galuega. Ua faapea mai Geoffrey Smith: “E lē o le uiga e faapea, a totō loa le laau, ona lē toe manaomia lava lea o se galuega a le tagata ae na o lona fiafia ma malōlō.” E leai, auā ina ia tutupu aʻe ni laau, e manaomia ona faasūsūina ma ia puipuia.—Faatusatusa i le Faataoto 6:10, 11.

O le mea moni, e mafai ona avea le faiva faa-Kerisiano ma vaitaimi uumi o galuega mamafa pe foliga mai foi e leai lava se mea o tupu. Peitai e faafuaseʻi, ma i nisi foi taimi e leʻi faatalitalia, o le a mapuna aʻe ai ni iʻuga matagofie. Ua faapea mai Geoffrey Smith: “O le faia o togalaau e aofia ai vaitaimi uumi o se faasologa o galuega mamafa faifai pea, e aofia ai ma taimi sili ona tāua o le tutupu matagofie aʻe o laau, lea e matuā galo uma ai le eliina, le veleina, ma popolega uma sa tau faavaivaia ai.” E mafai foi ona e maua na taimi sili ona tāua o le faamalieina, pe a talileleia mai e se tasi o iai se loto talisapaia le feau o le upu moni—ae faatoʻā maua lena tulaga pe a e naunautai e muai fai le eliina, le totōina, le veleina, ma le faasūsūina.—Faatusatusa i le Faataoto 20:4.

Sa iloa e Paulo ma Apolo o le la galuega o le talaʻiga o le Malo ma le faia o soʻo la te leʻi maua ai se tulaga faapitoa i le faapotopotoga Kerisiano. Sa malamalama i laua e faapea, o le Atua na te faatupuina mea. Peitai, sa faaauau pea ona la totō ma faasūsū—ma le maelega. Seʻi tau ina ia tatou mulimuli atu i la laua faaaʻoaʻoga, ma ia faaavanoa atu i tatou lava i le Atua e avea o ni ‘auauna e mafaia ona faaliliuina mai isi ina ia avea o ni ē talitonu.’—1 Korinito 3:5, 6.

[Ata i le itulau 23]

O le Atua na te faatupuina mea uma—ae e ao foi ona fai le vaega a le fai togalaau