Pe o le a e Utagiaina Lapataiga a le Atua?

E MASANI lava ona lē amanaiaina e tagata lapataiga e faasaoina ai ola. O le toatele o ē na aināina Pompeii sa filifili e lē amanaiaina le leo pāu o le Mauga o Vesuvius. I le tulaga tutusa, e toatele tagata i aso nei ua latou lē amanaiaina lapataiga e uiga i le oo mai o se mala i le lalolagi atoa. Ae mo i latou o ē naunau e fesagaʻi ma nei mea moni, e matuā moni ia i latou le lapataiga e pei o le emo mai o le uila ma le afi lea na pasae aʻe mai le Mauga o Vesuvius i tuā lava i le uluai senituri. I taua e lua a le lalolagi, e faitau selau taua laiti, o oge, o mafuie tetele, o faamaʻi, o fasiotiga tagata ma le amioleaga, ma le tauiviga o le talaʻiga i le lalolagi aoao. A tuufaatasia nei mea uma, ona avea lea o se lapataiga iloga faapea, o le sosaiete faaletagata ua matuā lalata atu i se faatamaʻiaga mataʻutia.

Ua faamaninoina mai e le Tusi Paia lenei faamatalaga e faapea: “Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) E pei lava o le tulaga sa iai le mala i Pompeii, o le a iai foi ē e sosola—o se “motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi,” o le a faasaoina, o lona uiga, “e o mai nai le puapuaga tele.”—Faaaliga 7:9, 14.

O le fesili la, O afea o le a oo mai ai lenei faaumatiaga? E iai se mafuaaga malosi e talitonu ai faapea o le puapuaga tele ua matuā lata tele mai. Ina ia iloa po o afea o le a tutupu ai nei mea, sa fesili soʻo o Iesu: “Pe se a foi le faailoga o lou maliu mai [“faatasi mai,” NW], ma le gataaga o le lalolagi [“le faaiʻuga o lenei faiga o mea,” NW]?” (Mataio 24:3) Mātau le tali a Iesu Keriso na tuuina atu.

Taua—Se Vaega Lauiloa o le Faailoga o Mea ua Tuufaatasia

Sa leʻi valoia mai e Iesu se mea mataʻina e tasi o le a tupu. Na i lo lena, na ia fetalai i se faasologa o mea e tutupu, a tuufaatasia e pei o se mea e tasi, o le a avea ma lapataiga mai le Atua—o se faailoga o mea ua tuufaatasi mo le faaiʻuga o le faiga o mea. O le mea muamua na valoia o loo faamatalaina mai i le Mataio 24:7 e faapea: “E sii le taua e le tasi nuu i le tasi nuu, ma le tasi malo i le tasi malo.” I le valoaga tutusa ma lena o loo i le Faaaliga 6:4, na valoia mai ai e le Tusi Paia faapea ‘o le a aveesea le filemu mai le lalolagi.’ O lona uiga o le a tutupu taua i se tulaga sa leʻi faapea muamua.

Ua taʻu mai ia i tatou e talafaasolopito e faapea o lenei valoaga o taua i le lalolagi atoa ua vaaia sona faataunuuga talu mai le tausaga e lē mafaagaloina o le 1914. O loo faapea mai le tusi o le American Adventures e uiga i tausaga a o lumanai le 1914 e faapea: “E toatele tagata Amerika ua ulu atu i le senituri fou e tumu i faamoemoega. O nei tausaga o ni ‘tausaga lelei’ ma e tumau pea seia oo i le lua sefulu tausaga o lenei senituri. . . . Ae, ia Iulai 28, 1914, na masofa ai lenei sologa lelei e ala i le upu e tasi: o taua.” O le amataga lena o le Taua Muamua a le Lalolagi, lea na faaauau mai pea mai le 1914 seʻi oo atu i le 1918 ma sa taʻua e nisi faapea o le “taua e faaiʻuina ai taua uma.” E tusa ma le luasefulu valu atunuu na aafia tonu ai. Ma afai e te faaaofia ai ma atunuu na sa latou lagolago mai i ai, o lona uiga o malo na faia taua sa toetoe lava 90 pasene o le faitau aofai o le lalolagi i lena taimi.

Na vaaia ai foi i le Taua Muamua a le Lalolagi le faaaogāina o ni meatau fou o taua, ma e matuā faaumatia ai, e pei o fana taavili, kasa oona, fana afi, tane tau, vaalele tau, ma vaamaulu. Toetoe  lava sefulu miliona fitafita na fasiotia ai—e sili atu ai na i lo le aofai o fitafita uma na iai i taua tetele uma i le 100 tausaga a o leʻi oo i lena taua! E tusa ma le 21 miliona fitafita na manunuʻa. E moni, o se taua i le lalolagi atoa, ua faailogaina ai le 1914 o le amataga o “aso e gata ai.” (2 Timoteo 3:1) Ae peitai, o taua ua na o se tasi lea o vaega o le faailoga na aumaia e Iesu.

Isi Vaega o le Faailoga

Na faaopoopo mai Iesu e faapea: “Ona oo mai ai lea o oge, ma faamai, ma mafuie i lea mea ma lea mea. O na mea uma o le amataga ia o puapuaga.” (Mataio 24:7, 8; Luka 21:11) A o lumanai ona iʻu le Taua Muamua a le Lalolagi, na amata ona vave salalau atu le faamaʻi o le fulū Sepania i le lalolagi. O le mea moni, na fasiotia ai le sili atu i le 20 miliona tagata, e sili atu ai na i lo i latou na maliliu i le taua.

A o lumanai ma ina ua maeʻa le taua, e faitau miliona isi na maliliu ona o le fia aai. Sa faapea foi ona faapogaia e mafuie le maliliu o le toatele o tagata. I le 1915 e silia i le 30,000 na fasiotia i Italia; i le 1920 e tusa ma le 200,000 na fano i Saina; i le 1923 toetoe lava 143,000 na maliliu i Iapani. E pei ona faaalia e Iesu, o nei mea uma ua na o se amataga ia o mea faigata. Ua faamatalaina e se tasi o lomifefiloi le “puapuaga” o se “tiga tutui faafuaseʻi.” O lenei lalolagi ua tautevateva solo mai lea tiga o puapuaga i le isi tiga, atoa ai ma le faateleina o le malosi ma le faifai pea talu mai le 1914. Mo se faaaʻoaʻoga, i le na o le 21 tausaga ina ua mavae le Taua Muamua a le Lalolagi ae sau le taua lona lua a le lalolagi, lea na aafia ai le 50 miliona o ē na lavevea fua ma tataʻi atu ai tagata i le vaitaimi o le gaosiaina o mea faaniukelea.

I tausaga faatoʻā mavae atu, e tele nisi o faamatalaga ua faapea mai e uiga i se isi pogai o puapuaga e faapea: o le faaleagaina e tagata o le siosiomaga. E ui ina e leʻi taʻua saʻo e Iesu lenei mea i lana valoaga, ae ua faaalia i le Faaaliga 11:18 e faapea a o leʻi oo mai le faaumatiaga, o le a ‘faafanoina e tagata le lalolagi.’ Ua matuā tele faamaoniga o le faatinoina o lenei faafanoina. Na siiina mai i le tusi State of the World 1988 le feau taufaamataʻu lenei a le faufautua o le siosiomaga o Norman Myers e faapea: “E leai se tupulaga i le taimi ua teʻa na fesagaʻi ma se vaaiga o le faaumatiaga atoatoa a o leʻi uma lena  tupulaga. E leai se tupulaga i le lumanai o le a fesagaʻi ma se luʻi tali tutusa faapena: pe afai e lē taulau i lenei tupulaga ona faafetaiaʻia le luʻi, o le a oo mai loa le faatamaʻiaga ma o le a lē toe iai se ‘isi avanoa.’”

Seʻi manatu i le lipoti i le mekasini o le Newsweek o Fepuari 17, 1992, e uiga i le lē lava o le ozone i le ea. Na faapea mai Alexandra Allen o se fafine e tomai faapitoa i le suesueina o le ozone e galue i le faalapotopotoga o le Greenpeace e avea o se lapataiga, o le faaleagaina o le ea o le ozone “ua iai nei i se tulaga e faamataʻuina ai le lumanai o ola uma i luga o le lalolagi.” Tagai i le Pusa i lenei itulau mo ni faamaoniga atili o le faafanoina o le siosiomaga o le lalolagi.

Ua leai se avanoa e toe faia ai ni faamatalaga auiliili o vala uma o le valoaga a Iesu. (Tagai i le faasologa i le itulau e 5 mo se vaaiga atoa i isi vaega faavaloaga.) Peitai, o se tasi o vaega e lē tatau ona faagaloina, lena o loo faamatalaina i le Mataio 24:14: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” E leai se tau masalosalo i le po o ai o loo tauaveina i le lalolagi atoa lenei galuega o le talaʻiga. Ua faaaluina e Molimau a Ieova i atunuu e 229 le sili atu i le tasi le piliona itula i lenei galuega i le na o le tausaga e 1992 lava ia. O la latou galuega ua faailoa mai ai se tasi o faamaoniga vaaia sili faapea ua tatou ola nei i aso e gata ai.

Aua Neʻi Faaseseina!

Ae peitai atonu e finau mai nisi faapea, o nei talanoaga uma e uiga i “aso e gata ai” ua na o se vaaiga lē mautinoa. Sa latou fesili mai: ‘Ae faapefea le suiga o le tulaga talu ai nei o le faa-Komunisi i Europa i Sasae, po o taumafaiga a malo malolosi ina ia aumaia le filemu? Pe lē faamaonia ai ea e nei mea faapea ua faasolo ina lelei mea uma? E leai. Mātau sa leʻi fetalai mai Iesu faapea o le a faaauau pea ona iai taua, mafuie, ma oge, i le lalolagi atoa i nei aso e gata ai. Ina ia talaʻia le tala lelei i le lalolagi aoao, e ao ona iai ni vaitaimi e filemu ai.

Mātau foi, na faatusatusa e Iesu aso e gata ai i aso a o lumanai le Lolo i ona po o Noa. I lena taimi sa popole tagata i mea e ʻai, o mea e feinu ai, ma fai faaipoipoga—o mea e masani ai le olaga. (Mataio 24:37-39) Ua faaalia e lenei mea faapea a o tumau pea ona leaga tulaga o le lalolagi i nei aso e gata ai, ae o le a lē faaleagaina i lona tulaga e faafaigata ai ona maua mea mo le olaga masani i lea aso ma lea aso. E pei lava o aso o Noa, o le toatele o tagata o loo faapopoleina i latou i mea e masani ai le olaga i lea aso ma lea aso, ma ua latou lē popole ai i le mataʻutia o le taimi.

O le mea lea, o le a avea o se mea mataʻutia le lolo atu i le faaseseseina ona o le tuputupu aʻe o ni faiga faapolotiki e foliga mai e lelei. (Faatusatusa i le 1 Tesalonia 5:3.) Ua matuā manino faamaoniga  e uiga i le valoaga a Iesu, ua faataunuuina i le taimi nei—o se lapataiga faapea ua lata mai le faaumatiaga!

Se Taimi Faamamaluina pe a Mavae le Faaumatiaga

O le faaumatiaga o Pompeii na aumaia ai le oti ma faanoanoaga. Ae peitai, o le iʻuga o lenei faiga o mea o le a faamanino ai le ala mo le ola e faavavau i le parataiso matagofie faalelalolagi. (Faaaliga 21:3, 4) O le a lē toe faaleagaina le lalolagi i taua ona o faiga malo fevaevaeai a tagata. O le a lē toe iai foi ni tagata e popole i le faamataʻu mai o faatamaʻiaga faaniukelea. O le a mou atu falegaosimea ia o loo aumaia le kasa e faaleagaina ai le siosiomaga.—Tanielu 2:44.

I lena taimi o ē uma e ola, o ni ē alolofa i le amiotonu ma o ni uō moni, e usiusitai atoatoa atu i le pule o le Malo. (Salamo 37:10, 11) O le a avea falemaʻi, faleoti, ma fanua maliu o ni mea o le taimi ua teʻa. O le a lē toe iai foi ni talagā faaipoipoga, teteaga, faanoanoaga, ma le faasaunoa i tamaiti.—Isaia 25:8; 65:17.

Pe e te manao ea e faasaoina mai nei aso e gata ai ma soifua ina ia vaai atu i le lalolagi fou faamamaluina a le Atua? O lea, “ina mataala ia ma tatalo, auā tou te le iloa pe oo mai afea ia aso.” (Mareko 13:33) Ae peitai, o mea tutupu i le lalolagi ua faamaonia ai faapea o le taimi atofaina ua lata mai—ua mataʻutia le lata mai mo le toatele. Ua lē toe iai se taimi e faamaimauina. O lea ia fai ni gaoioiga e faasaoina ai le ola, ma ia saili atu ia i latou o ē o loo utagiaina le faailoga i le lalolagi aoao o aso e gata ai. E faigofie ona iloa i latou na, auā ua na o i latou lava na o loo usiusitai i le poloaiga a Iesu ina ia talaʻia le tala lelei o le Malo i le lalolagi atoa. Faatasi ai ma i latou na, tau ina ia e faia ni laasaga e faafetaui atu ai oe lava i le Tupu, o Keriso Iesu, o lē o loo faapea atu i ai: “O lona igoa foi e faamoemoe i ai nuu ese.”—Mataio 12:18, 21.

[Pusa i le itulau 5]

Vaega e Luasefulufa o le Faailoga

1. O taua sa leʻi faapea ona tutupu muamua —Mataio 24:6, 7; Faaaliga 6:4

2. Mafuie—Mataio 24:7; Mareko 13:8

3. Lē lava o mea taumafa—Mataio 24:7; Mareko 13:8

4. O faamaʻi—Luka 21:11; Faaaliga 6:8

5. Faateleina o soligatulafono—Mataio 24:12

6. Faafanoina o le lalolagi—Faaaliga 11:18

7. Maalili le alofa—Mataio 24:12

8. Faamataʻuga—Luka 21:11

9. O le manao tele i tupe—2 Timoteo 3:2

10. Le lē usitai i mātua—2 Timoteo 3:2

11. Tele le manao i mea faafiafia na i lo le manao i le Atua—2 Timoteo 3:4

12. Ua malosi le alofa o le tagata ia te ia lava —2 Timoteo 3:2

13. Le leai o se loto aiga—2 Timoteo 3:3

14. O ē tuumavaega—2 Timoteo 3:3

15. Leai se pulea totino i vaega uma o tagata —2 Timoteo 3:3

16. Le faateleina o le leai o se alofa i le amio lelei—2 Timoteo 3:3

17. Toatele tagata pepelo o ē fai mai o i latou o Kerisiano—2 Timoteo 3:5

18. Toatele ua soona aai ma inu—Luka 21:34

19. O ē tauemu e teena le faailoga —2 Peteru 3:3, 4

20. Toatele perofeta pepelo o loo gaoioi ma le mataalia—Mataio 24:5, 11; Mareko 13:6

21. Le talaʻiga o le tala lelei o le Malo o le Atua ua faavaeina—Mataio 24:14; Mareko 13:10

22. Le sauāina o Kerisiano moni—Mataio 24:9; Luka 21:12

23. Le alaga o le filemu ma le saogalemu i le faai’uga o aso e gata ai—1 Tesalonia 5:3

24. Le lē popole o tagata i le mataʻutia —Mataio 24:39

[Pusa i le itulau 6]

Faafitauli Tau le Siosiomaga—O se Faailoga o Aso Nei

□ I nuu i le itu i matu o le lalolagi o loo nonofo ai tagata e toatele ua vave ona manifinifi le mea e puipuia ai le ea (ozone) i se faatatauga e faaluaina lona vave na i lo le vave sa faatalitalia e saienisi i ni nai tausaga ua mavae atu.

□ O le aofai aupito itiiti o ituaiga eseese o laau ma manu e faaumatia i aso taitasi e 140.

□ O le fua o le vevela o le ea kaponi (carbon dioxide) i le fua e taofi ai le vevela ua sili atu nei i le 26 pasene ua maualuga ai na i lo le fua a o leʻi faasalalauina atu falegaosimea, ma o loo faaauau pea ona oso i luga.

□ Sa sili ona vevela le lalolagi i le 1990 na i lo so o se isi lava tausaga talu ona amata ona tausia faamaumauga i le ogatotonu o lona 19 senituri; e ono tausaga mai le fitu tausaga e sili lo latou vevela sa tusia ai i faamaumauga ua iai nei talu mai le 1980.

□ Ua mou atu vaomatua i se fua faatatau e 40,000,000 eka [17 miliona ha] i tausaga taitasi, i se oganuu e tusa ma le telē o le ʻafa o Finilani atoa.

□ Ua oso aʻe le faitau aofai o le lalolagi i le 92 miliona tagata i tausaga taitasi—ua tali tutusa ma le faaopoopo mai i ai o le faitau aofai o Mekisiko i tausaga taitasi; mai lenei aofaiga, e 88 miliona o loo faaopoopoina i atunuu tau atiaʻe.

□ E tusa ma le 1.2 piliona tagata ua leai ni vai e lelei mo le inuina.

E tusa ai ma le tusi State of the World 1992, a le Worldwatch Institute, itulau e 3, 4, a W. W. Norton & Company, i Niu Ioka, ma i Lonetona.

[Ata i le itulau 7]

Pe a mavae le faaumatiaga o le a oo mai loa le lalolagi fou faamamaluina a le Atua