E Lē Inosia e Ieova le Loto Momomo

“O taulaga i le Atua, o le loto momomo lea; le Atua e, e te le inosia le loto momomo ma le nutimomoia.”—SALAMO 51:17.

1. O le ā le silafaga a Ieova i ona tagata tapuai o ē na faia ni agasala matuiā a ua salamō?

E MAFAI e Ieova ona ‘punitia tatalo e fai atu ia te ia, e pei ona ufitia i se ao mafiafia, ina ia lē sao atu ai ia te ia.’ (Auega 3:44) Ae e finagalo o ia ina ia sao atu ona tagata ia te ia. E tusa lava pe agasala matuiā se tasi o ona tagata tapuai a ua faaalia le salamō, e manatua lava e lo tatou Tamā faalelagi mea lelei na faia e lena tagata. O lea, na mafai ai ona taʻu atu e le aposetolo o Paulo i ona uso Kerisiano e faapea: “Auā e le amioletonu le Atua, na te le faagalogaloina la outou galuega ma le faamalosi i le alofa ua outou faaali mai ai i lona suafa.”—Eperu 6:10.

2, 3. O le ā e ao ona manatua e toeaina Kerisiano i le feagai ai ma uso talitonu na faia ni mea sese?

² E ao foi i toeaina Kerisiano ona manatunatu i tausaga o le auaunaga faamaoni na tuuina atu e o latou uso talitonu i le Atua. E aofia ai i lenei mea le auaunaga paia na tuuina atu e tagata o ē na faia ni laasaga sese po o ni agasala matuiā, a ua salamō. O leoleo mamoe Kerisiano, latou te sailia le lelei faaleagaga mo i latou uma lava o i le lafu mamoe a le Atua.—Kalatia 6:1, 2.

³ O se tagata fai mea sese ua salamō, na te  manaomia le alofa mutimutivale o Ieova. Peitai, e tele isi mea e manaomia. Ua faamanino mai lenei i upu a Tavita i le Salamo 51:10-19.

E Manaomia se Loto Mamā

4. Aiseā na tatalo ai Tavita mo se loto mamā ma se agaga fou?

⁴ Afai o loo iai se Kerisiano tuuina atu i se tulaga leaga faaleagaga ona o le agasala, o le ā atonu na te manaomia e ese ai mai le alofa mutimutivale ma le faamagaloga a Ieova? Ia, na aioi atu Tavita: “Le Atua e, ia e faia se loto mamā mo aʻu; ma ia e faafouina se loto mau i totonu ia te au.” (Salamo 51:10) E foliga mai, na faia e Tavita lenei talosaga ona sa ia iloa lelei faapea sa iai pea i lona loto le faanaunauga masani e faia le agasala matuiā. Atonu tatou te leʻi faia ni ituaiga o agasala e pei o lena na maileia ai Tavita e tusa ai ma Patesepa ma Uria, ae tatou te manaomia le fesoasoani mai ia Ieova ina ia alofia ai le lolo atu i tofotofoga ina ia faia so o se amioga matuiā e agasala ai. E lē gata i lea, atonu tatou te manaomia ai le fesoasoani mai le Atua ina ia aveesea mai i o tatou loto na uiga agasala e pei o le matapeʻapeʻa ma le feitagai—o solitulafono e pei o le gaoi ma le fasioti tagata.—Kolose 3:5, 6; 1 Ioane 3:15.

5. (a) O le ā le uiga o le maua o se loto mamā? (e) O le ā na faanaunau i ai Tavita ina ua ia talosaga atu mo se agaga fou?

⁵ E finagalo Ieova ina ia maua e ana auauna “se loto mama,” o lona uiga, ia mamā faanaunauga po o manatu. I le iloa faapea na te leʻi faaalia sea ituaiga o uiga mamā, na tatalo ai Tavita ina ia faamamā e le Atua lona loto ma ia faia ina ia ōgatasi ma tapulaa mai le Atua. Sa manao foi le faisalamo i se agaga po o se mafaufauga fou, ma saʻo. Sa ia manaomia se agaga e mafai ai ona fesoasoani ia te ia ina ia tetee atu ai i tofotofoga ma ia pipii mau ai i tulafono ma mataupu silisili a Ieova.

E Matuā Tāua le Agaga Paia

6. Aiseā na aioi atu ai Tavita faapea ia aua neʻi aveesea e Ieova lona agaga paia mai ia te ia?

⁶ Pe a loto mafatia i tatou ona o ni sese po ua faia foi ni agasala, e mafai ona tatou lagona faapea o le a lafoaia i tatou e le Atua ma o le a aveesea lona agaga paia, po o le mana galue mai ia i tatou. O le lagona foi lena sa ia Tavita, auā na faapea ona ia aioi atu ia Ieova: “Aua e te lafoaiina aʻu i ou luma; aua foi e te aveeseina lou Agaga Paia ia te au.” (Salamo 51:11) Sa mafaufau Tavita ua salamō ma loto maulalo e faapea, o ana agasala ua lē aogā ai ona ia auauna atu ia Ieova. O le lafoaiina mai fofoga o Ieova, e mafai ona uiga i le lē maua o lona finagalo malie, lana faamafanafanaga, ma lana faamanuiaga. Ina ia toe faafoisia ia Tavita lona malosi faaleagaga, sa ia manaomia ai le agaga paia o Ieova. I le iai i ona luga o le agaga paia, sa mafai ai e le tupu ona saili atu i le taʻitaʻiga mai le Atua faatasi ma le tatalo ina ia faafiafia ai Ieova, e alofia ai le faia o le agasala, ma e mafai ai ona pule ma le atamai. I le iloa lelei o ana agasala i Lē Foai mai ai le agaga paia, na fetaui ai le talosaga atu o Tavita ina ia aua neʻi aveesea e Ieova lona agaga paia mai ia te ia.

7. Aiseā e ao ai ona tatou tatalo mo le agaga paia, ma faaeteete i le faatiga i ai?

⁷ Ae faapefea i tatou? E ao foi ona tatou tatalo mo le agaga paia, ma e tatau ona tatou faaeteete ina ia aua lava neʻi o tatou faatiga ia te ia ona ua lē taulau ona tatou mulimuli atu i lana taʻitaʻiga. (Luka 11:13; Efeso 4:30) Auā a lē faia faapea, e ono mafai ona aveesea mai ia i tatou le agaga paia, ma o le a lē mafai ai foi ona faaalia lona fua mai le Atua, o le alofa, le olioli, le filemu, le onosai, le lelei, le faatuatua, le agamalu, ma le pulea totino. O le a aveesea e Ieova le Atua lona agaga paia mai ia i tatou ae maise lava pe afai tatou te lē salamō ma agasala pea ia te ia.

Le Olioli i le Olataga

8. Afai tatou te agasala, ae mananao ia olioli i le olataga, o le ā e manaomia ona ia i tatou?

⁸ O se tagata agasala ua salamō o lē na toe faafoisia i le itu faaleagaga, e mafai ona toe olioli i le sauniuniga a Ieova mo le faaolataga. I le moomoo mo lenei mea, na aioi atu ai Tavita i le Atua: “Ia e faafoisia mai ia te au le olioli o le olataga mai ia te oe; ia e taofimauina foi o aʻu ma le loto fiafia.” (Salamo 51:12) Se mea ina a matagofie o le olioli i le faamoemoe mautinoa o le faaolataga mai ia Ieova le Atua! (Salamo 3:8) Ina ua uma ona agasala Tavita i le Atua, ona ia  saili ai lea ina ia toe faafoisia o ia i le olioli i le olataga mai ia te Ia. I taimi mulimuli ane, na saunia ai e Ieova e ala i le taulaga togiola a lona Alo o Iesu Keriso, se faaolataga. O i tatou, i le avea o ni auauna tuuina atu a le Atua, afai tatou te faia se agasala matuiā a ua mananao ina ia toe faafoisia mai ia i tatou le olioli i le faaolataga, tatou te manaomia la ona iai se uiga salamō, ina ia alofia ai le agasala i le agaga paia.—Mataio 12:31, 32; Eperu 6:4-6.

9. O le ā na talosaga atu ai Tavita ina ua ia ole atu i le Atua ia lagolagoina o ia “ma le loto fiafia”?

⁹ Na talosaga atu Tavita ina ia lagolagoina o ia e Ieova faatasi “ma se loto fiafia.” E foliga mai o lenei mea e faasino, e lē o le naunau mai o le Atua po o lona agaga paia e fesoasoani mai, ae e faasino i mafaufauga ua faagaeetia o Tavita. Sa manao Tavita ina ia lagolagoina o ia e le Atua e ala i le foai atu ia te ia o se uiga o le naunau e faia le mea ua tonu, ae ia lē toe paʻū atu ai i le faia o le agasala. E lagolago atu pea Ieova le Atua i ana auauna ma faatutūina i luga i latou ua faanoʻunoʻu ona o tofotofoga eseese. (Salamo 145:14) Maeu le faamafanafanaina ai i le iloa o lenei mea, ae maise lava pe afai ua tatou faia ni mea sese a ua salamō ma mananao ina ia auauna ma le faamaoni ia Ieova e oo i le faavavau!

Aʻoaʻo Ē Solitulafono i le Ā?

10, 11. (a) O le ā sa mafai e Tavita ona aʻoaʻo i tagata solitulafono o Isaraelu? (e) Sa mafai ona aʻoaʻoina e Tavita tagata agasala ina ua uma ona ia faia le ā?

¹⁰ Afai e faatagaina e le Atua, sa manao Tavita e faia ma le lē manatu faapito se mea e faaalia ai lona talisapaia o le alofa mutimutivale o Ieova ma o le a fesoasoani ai foi i isi. Ma ni faalogona ootia faatasi ma le tatalo na tuusaʻo atu ia Ieova, na toe faalauiloa mai ai e le tupu ua salamō: “Ou te aʻoaʻo atu ai ou ala i e ua solitulafono; ona faaliliuina atu ai lea ia te oe o e ua agasala.” (Salamo 51:13) E mafai faapefea e Tavita o lē agasala ona aʻoaʻo tagata solitulafono i Tulafono a le Atua? Faamata o le ā na ia taʻu atu ia i latou? Ma o le ā se lelei e ono faataunuuina e lenei mea?

¹¹ Ina ua faaalia i tagata solitulafono o Isaraelu ala o Ieova ma le faamoemoe e toe faaliliu mai i latou mai o latou ala leaga, sa mafai ai ona faasino atu e Tavita i le leaga o le agasala, le uiga o le salamō, ma le auala e maua ai le alofa tunoa o le Atua. I le lagona o le tiga o le lē fiafia mai o Ieova ma se loto fuatiaifo lē mamā, e lē taumatea na avea ai Tavita ma faiaʻoga tigaalofa o le salamō, mo tagata agasala loto nutimomoia. O le mea moni, sa ono mafai ona faaaogāina lana faaaʻoaʻoga e aʻoaʻo atu ai i isi ina ua faatoʻā uma ona ia talia faataʻitaʻiga a Ieova ma maua Lana  faamagaloga, auā o i latou e mumusu e gauai atu i mea e manaomia e le Atua, e leai se aiā e ‘tautala ai i tulafono a le Atua.’—Salamo 50:16, 17.

12. Na faapefea ona maua e Tavita aogā mai le iloa faapea o le Atua na laveaiina o ia mai le nofosala i le toto?

¹² I le toe taʻua i se isi faaupuga o ona faanaunauga, na faapea atu ai Tavita: “Le Atua e, le Atua o loʻu olataga, ia e laveai mai ia te au ai le sala i le toto; ona pese fiafia ai lea o loʻu laulaufaiva i le amiotonu mai ia te oe.” (Salamo 51:14) O le faamasaatoto, e iʻu ai i le taʻusalaina i le oti. (Kenese 9:5, 6) O lea, i le iloa faapea o le Atua o lona olataga na ia laveai ia te ia mai le faamasaatoto e tusa ai ma Uria, na avatu ai ia Tavita le filemu o le loto ma le mafaufau. Ona vivii atu ai lea o lona laulaufaiva ma le olioli e uiga i le amiotonu a le Atua, ae e lē o lana lava amiotonu. (Failauga 7:20; Roma 3:10) E lē mafai e Tavita ona aveesea lana amio leaga pe toe faafoisia mai Uria mai le tuugamau, e pei lava ona lē mafai e se tagata i aso nei ona toe faafoisia se tulaga mamā i se tagata na ia faaseseina pe toe faatū mai se tasi na ia fasiotia. Pe e lē tatau ea ona tatou mafaufau i lena mea pe a faaosoosoina i tatou? Ma o le ā le tele e ao ai ona tatou talisapaia le alofa mutimutivale o Ieova na faaalia ia i tatou i le amiotonu! O le mea moni, o le talisapaia e ao ona faagaeetia ai i tatou e tataʻi mai isi i lena Puna o le amiotonu ma le faamagaloina.

13. I le na o le ā le tulaga e mafai ai e le tagata agasala ona vivii atu ia Ieova?

¹³ E leai se tagata agasala e mafai e ia lava ona vivii atu ia Ieova seʻi vagana ua uunaia e le alofa mutimutivale o le Atua o ia, ina ia tautala i Ana upu moni. O le mea lea na pese ai Tavita: “Le Alii e [Ieova e], ia e faamatala mai oʻu laugutu; ona taʻutaʻu atu lea e loʻu gutu lou viiga.” (Salamo 51:15) Ina ua mapu lona loto fuatiaifo ona ua faamagaloina e le Atua, na faagaeetia ai Tavita e aʻoaʻo ē solitulafono i ala o Ieova, ma na mafai ai ona ia saoloto e vivii atu ia te Ia. O i latou uma ua faamagaloina a latou agasala e pei o Tavita, e ao ona talisapaia le alofa tunoa o Ieova ia i latou, ma e tatau ona latou faaaogā avanoa uma e folafola atu ai le upu moni a le Atua ma ‘taʻutaʻu atu lona viiga.’—Salamo 43:3.

Taulaga e Talia e le Atua

14. (a) O ā taulaga na manaomia e tusa ai ma le feagaiga o le Tulafono? (e) Aiseā e sese ai le manatu faapea e mafai ona tatou taui atu le faaauau pea ona faia o mea sese, e ala i le faia o ni mea lelei?

¹⁴ Sa maua e Tavita le malamalama loloto, o lea na ia faapea atu ai: “Auā ua e [Ieova] le finagalo i se taulaga; ana e finagalo i ai po ua ou avatu lava; ua e le fiafia i se taulaga mu.” (Salamo 51:16) Sa manaomia e le feagaiga o le Tulafono taulaga i manu ina ia ofoina atu i le Atua. Peitai o le agasala a Tavita o le mulilua ma le fasioti tagata, o lona faasalaga la o le oti, sa lē mafai ona taʻumamāina e na taulaga. Auā pe ana mafai, semanū e leai se mutaaga i mea na te totogia ina ia ofoina atu ai taulaga o manu ia Ieova. Ae a aunoa ma le salamō mai le loto, e matuā lē aogā lava taulaga. O le mea lea, e matuā sese lava le manatu faapea e mafai ona tatou taui atu mo le faia pea o mea sese, e ala i le faia o mea lelei.

15. O le ā le vaaiga a se tagata tuuina atu ua iai le agaga nutimomoia?

¹⁵ Na faaopoopo mai Tavita: “O taulaga i le Atua, o le loto momomo lea; le Atua e, e te le inosia le loto momomo ma le nutimomoia.” (Salamo 51:17) I le tulaga o se tagata agasala ua salamō, e taliaina lana “taulaga i le Atua, o le loto momomo.” O se tagata faapena, e lē ia te ia se loto maʻaa. O le loto o se tagata tuuina atu ua momomo, e matuā faanoanoa lava ona o lana agasala, ua faamaulaloina ona ua ia iloa le lē fiafia o le Atua, ma ua naunau e faia so o se mea ina ia toe maua ai le finagalo malie o le Atua. E leai lava se mea tāua e mafai ona tatou ofoina atu i le Atua seʻi vaganā lava ua tatou salamō i a tatou agasala ma ia tuutoina atoatoa atu o tatou loto ia te ia.—Nauma 1:2.

16. E faapefea ona silasila le Atua i se tagata ua loto momomo ona o sana agasala?

¹⁶ E lē teena e le Atua le taulaga o le loto momomo ma le nutimomoia. O le mea lea, e ui lava i faigata tatou te fetaiai i le avea ma ona tagata, seʻi aua lava neʻi o tatou lolo atu i le loto mafatia. A faatausuaiina i tatou i le gasologa o le olaga ona o nisi o amioga, ua mafua ai ona alaga atu o tatou loto ona ua manaomia le alofa mutimutivale o le Atua, aua le faavaivai, o loo iai  pea le faamoemoe. E tusa lava pe tatou te agasala matuiā ae ua salamō, e lē teena e Ieova o tatou loto ua momomo. O le a ia faamagaloina i tatou ona o le taulaga togiola a Keriso, ma o le a na toe faafoisia i tatou i Lona finagalo malie. (Isaia 57:15; Eperu 4:16; 1 Ioane 2:1) Ae peitai, i le pei o Tavita, o a tatou tatalo e ao ona fai atu ina ia toe faafoisia ai i le finagalo malie o le Atua, ae e lē ina ia sola ese ai mai le aʻoaʻiga ma le faasaʻoga manaomia. Na faamagalo e le Atua Tavita, ae sa ia faasalaina foi o ia.—2 Samuelu 12:11-14.

Manatu Mamafa mo le Tapuaiga Mamā

17. E ese ai i le talosaga atu mo le faamagaloga a le Atua, o le ā e ao ona fai e tagata agasala?

¹⁷ Afai ua tatou faia se agasala matuiā, e lē taumatea o le a avea o se avega mamafa i o tatou mafaufau, ma o se loto ua salamō o le a uunaia ai i tatou e ole atu mo le faamagaloga a le Atua. Ae peitai, seʻi o tatou tatalo foi mo isi. E ui lava sa vaavaai atu Tavita i le toe tuuina atu o se tapuaiga e talia e le Atua, ae sa leʻi tuua ai ma le manatu faapito e lona salamō isi tagata mai i ana tatalo. Ua aofia ai i lena salamō lenei olega ia Ieova: “Ia e faamanuia mai i Siona i lou finagalo alofa; ia e ati ae pa o Ierusalema.”—Salamo 51:18.

18. Aiseā na tatalo ai Tavita o lē ua salamō mo Siona?

¹⁸ Ioe, sa vaavaai atu i luma Tavita i le toe faafoisiaina o ia i le finagalo malie o le Atua. Ae peitai, sa tatalo foi le faisalamo loto maulalo faapea ‘i lona finagalo alofa, o le a faamanuia ai e le Atua Siona,’ le aai laumua o Isaraelu, o Ierusalema, o i inā na faamoemoe Tavita e fausia ai le malumalu o le Atua. O agasala matuiā a Tavita na faamataʻuina ai le nuu atoa, auā sa ono puapuagatia tagata uma ona o le mea sese na faia e le tupu. (Faatusatusa i le 2 Samuelu, mataupu e 24.) O le iʻuga, o ana agasala na faavaivaia ai “pa o Ierusalema,” o lea, na manaomia ai ona toe fausia.

19. Afai sa tatou agasala a ua faamagaloina, o le ā la e alagatatau ona tatou tatalo atu i ai?

¹⁹ Afai ua tatou agasala matuiā, ae ua maua le faamagaloga a le Atua, ua alagatatau ai la ona tatalo faapea, ia toe faafouina e ia so o se mea na faaleagaina ona o a tatou amio na fai. Atonu na tatou faalumaina lona suafa paia, na faavaivaia ai le faapotopotoga, ma atonu na oo ai foi le faanoanoa i o tatou aiga. E mafai ona aveesea e lo tatou Tamā faalelagi so o se faalumaina na tuuina atu i lona suafa, ma mafai ona toe atiina aʻe le faapotopotoga e ala i lona agaga paia, ma faamafanafanaina loto o ē pele ia i tatou, o ē o alolofa ma auauna ia te ia. E tusa lava pe aofia ai le agasala pe leai, a o le mea moni, o le faapaiaina o le suafa o Ieova ma le lelei o ona tagata, e ao ona tatou manatu mamafa pea i ai.—Mataio 6:9.

20. I lalo o le ā le tulaga o le a olioli ai Ieova i taulaga ma taulaga mu a Isaraelu?

 ²⁰ Afai sa toe fausia e Ieova pa o Siona, o le ā le isi mea o le a tupu? Na faapea ai ona pese Tavita: “Ona e finagalo [o Ieova lea] ai lea i taulaga tonu, o le taulaga mu, ma le taulaga mu uma; ona latou faaee ai lea o povi poa i lau fata faitaulaga.” (Salamo 51:19) Sa matuā faanaunau ma le faamaoni Tavita ina ia olioli o ia ma le nuu i le finagalo malie o Ieova ina ia mafai ai ona tapuai atu ia te Ia i le auala na te taliaina. Ona fiafia mai lea o le Atua i a latou taulaga mu ma taulaga atoatoa. O le a faia faapea ona o nei taulaga tonu o le a ofoina atu e tagata tuuina atu, e faamaoni, ma ua salamō o loo olioli i le finagalo malie o le Atua. Ona o le loto faafetai i le alofa mutimutivale o Ieova, o le a latou ofoina atu ai povi poʻa i luga o lana fata faitaulaga—o taulaga e aupito sili ona lelei ma aupito sili ona taugata. I aso nei, ua tatou āva ai ia Ieova e ala i le avatua ia te ia o a tatou mea e aupito sili ona lelei. Ma o a tatou taulaga e aofia ai “tamai povi o [tatou] laugutu,” o taulaga o viiga i lo tatou Atua alofa mutimutivale, o Ieova.—Hosea 14:2; Eperu 13:15.

E Faafofoga Ieova i a Tatou Alaga

21, 22. O ā lesona o loo i le Salamo e 51 e aogā mo i tatou?

²¹ O le tatalo mai le loto o Tavita o loo faamauina i le Salamo 51, ua faailoa mai ai ia i tatou faapea, e tatau ona tatou lagona le loto salamō moni pe a tatou agasala. O loo iai foi i lenei salamo ni lesona tuusaʻo e aogā mo i tatou. Mo se faataʻitaʻiga, afai tatou te agasala a ua salamō, e mafai ona tatou faatuatua i le alofa mutimutivale o le Atua. Ae peitai, seʻi o tatou manatu mamafa muamua e uiga i so o se faalumaina atonu sa tatou aumaia i le suafa o Ieova. (Fuaiupu 1-4) I le pei o Tavita, e mafai ona tatou talosaga atu i lo tatou Tamā faalelagi mo le alofa tunoa ona o le agasala tuufaasolo. (Fuaiupu 5) E ao lava ona tatou faamaoni, ma e manaomia ona tatou saili le atamai mai le Atua. (Fuaiupu 6) Afai ua tatou agasala, e tatau ona tatou ole atu ia Ieova mo le faamamāina, o se loto mamā, ma se agaga lotomau.—Fuaiupu 7-10.

²² E mafai foi ona tatou iloa mai le Salamo 51 faapea, e lē tatau lava ona tatou faatagaina le loto maʻaa i le faia o le agasala. Afai o le a tatou faia faapena, o le a aveesea la e Ieova mai ia i tatou lona agaga paia, po o le mana galue. Peitai, i le iai ia i tatou o le agaga paia o le Atua, e mafai ai ona tatou taulau i le aʻoaʻoina o isi i ona ala. (Fuaiupu 11-13) Afai tatou te agasala a ua salamō, o le a faataga i tatou e Ieova e faaauau ona vivii atu ia te ia auā na te lē inosia le loto ua momomo ma nutimomoia. (Fuaiupu 14-17) Ua faaalia atili i lenei salamo faapea, o a tatou tatalo e lē ao ona faaautū tau o i tatou. Na i lo o lea, e ao ona tatou tatalo mo le faamanuiaga ma le lelei faaleagaga o i latou uma lava o auai i le tapuaiga mamā a Ieova.—Fuaiupu 18, 19.

23. Aiseā e ao ai ona uunaia i tatou e le Salamo e 51 ina ia tatou loto tetele ma faia ma le mautinoa mea sili tatou te mafaia?

²³ O lenei salamo faamomoiloto a Tavita e ao ona uunaia ai i tatou ina ia loto tetele ma maua foi se vaaiga mautinoa. E fesoasoani lea ia i tatou e iloa ai faapea, e lē manaomia ona tatou manatu, ua leai se faamoemoe, e tusa lava pe faatausuaiina i tatou i le agasala. Aiseā? Auā afai tatou te salamō, e mafai e le alofa tunoa o Ieova ona laveaiina i tatou mai le loto mafatia. Afai tatou te salamō ma tuutoina atu atoatoa i lo tatou Tamā faalelagi alofa, o le a faafofogaina e ia a tatou alaga mo le alofa mutimutivale. Ma maeu le faamafanafanaina ai i le iloa faapea e lē inosia e Ieova le loto ua momomo ma nutimomoia!

E Faapefea ona E Tali?

□ Aiseā e manaomia ai e Kerisiano se loto mamā ma le agaga paia o le Atua?

□ O le ā e mafai e se tagata ua salamō ona aʻoaʻo atu i tagata ua agasala i le solia o le tulafono a Ieova?

□ E faapefea ona silasila Ieova i se loto momomo ma nutimomoia?

□ O ā ni lesona o loo maua i le Salamo 51?

[Fesili mo le Suʻesuʻega]

[Ata i le itulau 15]

E te tatalo ea mo le agaga paia ma puipui foi ina ia lē faatiga i ai?

[Ata i le itulau 17]

Ia faaalia le talisapaia mo le alofa tunoa o Ieova e ala i le faalauiloa atu o lana upu moni