Le Uiga o le Talisuaga Afiafi a le Alii mo Oe

NA AMATA e Iesu Keriso le Talisuaga Afiafi a le Alii i le po mulimuli o lona soifuaga faaletagata. O le afiafi po lena o le aso Tofi, Mati 31, ma na maliu Iesu i le afiafi o le aso Faraile, Aperila 1. Ona o aso o le kalena faa-Iutaia e faitau mai le afiafi o le isi aso agaʻi i le afiafi o le isi aso e sosoo ai, o le Talisuaga Afiafi la a le Alii ma le maliu o Iesu na faataunuuina uma ia Nisani 14, 33 T.A.

Aiseā na amata ai e Iesu lenei talisuaga? O le ā ua faatusaina i ai le areto ma le uaina na ia faaaogāina? O ai e ao ona tagofiaina? E faafia ona faamanatu lenei talisuaga? Ma e mafai faapefea ona iai sona uiga mo oe?

Aiseā na Faia Ai?

E tusa ai ma le Talisuaga Afiafi a le Alii, na taʻu atu e Iesu i ona aposetolo e faapea: “Ia outou faia lenei mea ma faamanatuga ia te au.” E tusa ai ma se tasi faaliliuga, na ia faapea mai: “Ia fai lenei mea o se faamanatuga ia te aʻu.” (1 Korinito 11:24; The New English Bible) O le mea moni, o le Talisuaga Afiafi a le Alii e taʻua foi o le Faamanatuina o le maliu o Keriso.

Na maliu Iesu o ia o sē na tausia ma le faamaoni le sapasapaia o le pule aoao silisiliese a Ieova, ma ua faamaonia ai Satani o le pepelo taufaifai i le tuuaʻia faapea, o loo auauna tagata i le Atua i le na o se uiga manatu faapito. (Iopu 2:1-5) O lona maliu na faafiafiaina ai le finagalo o le Atua.—Faataoto 27:11.

E ala i lona maliu o se tagata lelei atoatoa, sa faapena ai foi ona ‘tuuina atu e Iesu lona ola o se togiola e sui ai tagata e toatele.’ (Mataio 20:28) Ina ua agasala i le Atua, na melea ai e le uluai tagata le ola faaletagata lelei atoatoa ma ona faamoemoe. Ae peitai “ua faapea lava ona alofa mai o le Atua i le lalolagi [o tagata], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) Ioe, “o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.”—Roma 6:23.

“Na Maua Mai le Alii”

O se faasusuluina atili mai o le malamalamaga e uiga i le faamanatuina o le maliu o Keriso, o upu ia a le aposetolo o Paulo e faapea: “O aʻu foi, na ou maua mai le Alii le mea na ou tuuina atu ai ia te outou, O lea lava po na faalataina ai le Alii o Iesu, na ia tago ai le areto, ua ia faafetai, ona tofitofi ai lea, ma fai atu, Ina tago ia, ina aai; o loʻu tino lenei ua tofitofi ma sui o outou, ia outou faia lenei mea ma faamanatuga ia te au. Ua ia faapea foi i le ipu ina ua uma ona aai, ua faapea atu, O le ipu lenei o le feagaiga fou lea i loʻu toto; ia outou faia lenei mea ma faamanatuga ia te au i aso uma tou te feinu ai. Auā o aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia.”—1 Korinito 11:23-26.

Ona sa leʻi faatasi atu Paulo ia Iesu ma le au aposetolo e toʻa 11 ia Nisani 14, 33 T.A., ua faamaonia ai la o nei upu “na . . . maua mai le Alii” e ala mai i se faaaliga faagaeeina. Na amata e Iesu le Faamanatuga i le “po na faalataina ai” o ia e Iuta i lima o ona fili, le au taʻitaʻi lotu Iutaia, o ē na faamalosia tagata Roma ina ia faasatauroina Keriso. O i latou na sa filifilia ina ia tagofia le areto ma le uaina faafaatusa e tatau ona latou faia e fai ma faamanatuga mo ia.

 E Faafia ona Faamanatu?

O le ā le uiga o upu a Paulo: “O aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia”? E ao ona faia “soo” e Kerisiano faamaoni faauuina seʻi oo ina latou maliliu, mulimuli ane ona toe faatutūina ai lea i le ola faalelagi. Ona latou faailoa ai lea i luma o le Atua ma le lalolagi, lo latou faatuatua i le sauniuniga na fai e Ieova, o le taulaga lea a Iesu. Mo le ā le umi? Na faapea mai Paulo: “Seia afio mai o ia.” E mautinoa lava la o lona uiga o nei faalauiloaga e ao ona faaauau pea seia afio mai Iesu ma taliaina ona soʻo faauuina i le lagi e ala i le toetu i le taimi o lona “afio [“faatasi,” NW] mai.” (1 Tesalonia 4:14-17) Ua ōgatasi lea ma upu a Keriso i ona aposetolo faamaoni e toʻa 11 e faapea: “Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma aʻu, ina ia i ai outou i le mea ou te i ai aʻu.”—Ioane 14:3.

Pe e ao ea ona faamanatuina i aso uma le maliu o Keriso pe faamanatu faalevaiaso? Na faamanatuina e Iesu le Talisuaga Afiafi a le Alii ma sa fasiotia i le aso o le Paseka, lea na faamanatuina ai le faasaolotoina mai o Isaraelu mai saisaitiaga i Aikupito. O le mea moni, e taʻua o ia o le “Keriso la tatou paseka” talu ai o ia o le Tamai mamoe ua faataulagaina mo Kerisiano. (1 Korinito 5:7) Sa faia le Paseka e na o le faatasi lava i le tausaga, ia Nisani 14. (Esoto 12:6, 14; Levitiko 23:5) Ua fautuaina ai foi e lenei mea e faapea e ao ona faamanatuina soo le maliu o Keriso i le tulaga tonu lava sa faia ai i le Paseka—sa faatasi i le tausaga na faia ai, ae e lē o aso uma po o vaiaso uma.

Mo le tele o senituri, e toatele i latou sa faapea mai o Kerisiano na latou faamanatuina le maliu o Iesu e faatasi i le tausaga. Talu ai ona sa latou faia ia Nisani 14, na taʻua ai i latou o Quartodecimans, o lona uiga “o tagata o le aso sefulufa.” E tusa ai ma i latou na, na tusia ai e se tusitala o talafaasolopito o J. L. von Mosheim e faapea: “O Kerisiano i Asia Itiiti sa masani ona latou faamanatuina lenei faigaʻai paia, e faamanatu ai le amataina o le Talisuaga a le Alii, ma le maliu o Iesu Keriso, i le taimi lava e tasi pe a taumafaina e tagata Iutaia la latou mamoe e taʻua o le Paschal o lona uiga i le po o le aso lona sefulufa o le uluai masina [o Nisani]. . . . Sa latou manatu faapea e iai se malosi faaletulafono i le faaaʻoaʻoga a Keriso.”

Uiga o le Areto ma le Uaina

Na faapea mai Paulo e uiga ia Iesu “na ia tago ai le areto, ua ia faafetai, ona tofitofi ai lea.” O lena falaoa manutinuti sa tao, o le paluga o le falaoamata ma le vai e aunoa ma se fefete sa tatau ona tofitofi e aai ai. I se faatusatusaga a le Tusi Paia, o le mea faafefete ua fai ma sui o le agasala po o mea leaga. I le uunaia o Kerisiano i Korinito e aveese le tagata amio leaga mai le faapotopotoga, na faapea mai ai Paulo: “Tou te le iloa ea o se mea faafefete itiiti, e faafefeteina ai le palugāfalaoa uma lava? O le mea lea ia outou faatea ese ai le mea faafefete tuai, ina ia avea outou ma paluga fou, ona ua leai o se mea faafefete ia te outou; auā foi o Keriso la tatou paseka ua fasia mo i tatou. O lenei, aua tatou te faia le tausamiga ma le mea faafefete tuai, po o le mea faafefete o le loto leaga ma le amio leaga; a ia faia ma le mea e le faafefeteina, o le loto lelei ma le faamaoni.” (1 Korinito 5:6-8) E pei lava o sina mea faafefete laitiiti e fefete ai le paluga atoa o falaoa, na faapena foi ona lē mamā le faapotopotoga i le silafaga a le Atua pe afai sa lē aveesea le tagata agasala mai le faapotopotoga. Sa latou manaomia ona aveesea le “mea faafefete” mai ia i latou, e pei lava ona lē iai se mea faafefete i totonu o fale o tagata Isaraelu i le taimi o le Tausamiga o Areto Lē Faafefeteina na sa sosoo ma le Paseka.

E tusa ai ma le areto lē faafefeteina o le Faamanatuga, na fetalai Iesu: “O loʻu tino  lenei ua tofitofi ma sui o outou.” (1 Korinito 11:24) O le falaoa ua fai ma sui o le tino faaletino lelei atoatoa o Iesu, lea sa faatatau i ai upu na tusia e Paulo e faapea: “O le mea lea ua fetalai mai ai o ia [Iesu] i lona maliu mai i le lalolagi, O manu fasia atoa ma taulaga ua e le finagalo i ai, a ua saunia e oe le tino mo aʻu; o taulaga mu ma taulaga mo agasala ua e le fiafia i ai; ona ou fai ane lea, Le Atua e, silasila mai ia, ou te alu atu e faia lou finagalo; (ua tusia aʻu i le Tusi taai.) . . . O le finagalo lea ua faapaiaina ai i tatou i le taulaga i le tino o Iesu Keriso na fai faatasi.” (Eperu 10:5-10) O le tino faaletagata lelei atoatoa o Iesu sa leai se agasala ma sa faia ai le taulaga togiola mo tagata.—Eperu 7:26.

Ina ua uma ona ia tatalo mo le ipu o le uaina mūmū e lē suia, ona fetalai lea o Iesu: “O le ipu lenei o le feagaiga fou lea i loʻu toto.” (1 Korinito 11:25) O le tasi faaliliuga o loo faapea mai: “O le uiga o lenei ipu o le feagaiga fou lea ua faamaonia e ala i loʻu toto.” (Moffatt) E pei lava o toto o povi poʻa ma ʻoti na fai ai taulaga sa faamausalīina ai le feagaiga o le Tulafono i le va o le Atua ma le nuu o Isaraelu, ua faapena foi le sasaaina atu o le toto o Iesu ina ia oti ona faamautū ai le feagaiga fou. O le taʻua o lena feagaiga fou, ua fesoasoani lea ia i tatou ia tatou iloa ai i latou e ao ona tagofia le areto ma le uaina o le Faamanatuga.

O Ai e Ao ona Tagofia?

O soʻo faauuina o Iesu, o ē o loo i le feagaiga fou, ua latou tagofia ma le tonu le areto ma le uaina o le Faamanatuga. O lenei feagaiga ua faia i le va o le Atua ma le Isaraelu faaleagaga. (Ieremia 31:31-34; Kalatia 6:16) Ae o le feagaiga fou o le a mautinoa e aumaia ai faamanuiaga mo tagata uma e usiusitai, ma e mafai ona avea oe o se tasi o i latou na e mauaina na faamanuiaga.

O ē tagofia le areto ma le uaina o le Faamanatuga e ao ona iai i le feagaiga totino mo le Malo lea sa faia e Iesu. Ina ua amataina lea talisuaga, na taʻu atu e Iesu i ona aposetolo faamaoni e faapea: “E faapei ona tofia mai e loʻu Tamā o le malo ia te au, e faapea foi ona ou tofia outou.” (Luka 22:29) O le feagaiga o le Malo lea na faia e le Atua ma le Tupu o Tavita sa faasino atu lea i le afio mai o Iesu, o lē o le a fai ma tupu e faavavau i le Malo faalelagi. O le 144,000 o Isaraelu faaleagaga, o ē o le a auai faatasi ma ia i lena pulega, ua vaaia o loo tutū i le Mauga o Siona faalelagi faatasi ma le Tamai mamoe, o Iesu Keriso. Pe a toe faatutūina mai i latou, o le a latou pule faatasi ma Keriso o ni tupu ma faitaulaga lagolago. (2 Samuelu 7:11-16; Faaaliga 7:4; 14:1-4; 20:6) E na o i latou lava o loo iai i le feagaiga fou ma iai foi i le feagaiga totino ma Iesu e tagofia ma le tonu le areto ma le uaina o le Talisuaga Afiafi a le Alii.

E molimau mai le agaga o le Atua i agaga o i latou o ē faauuina faapea o i latou o Ana fanau ma o suli faatasi ma Keriso. Na tusi mai Paulo e faapea: “O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.” (Roma 8:16, 17) E galueaiina e le agaga paia o le Atua, po o lona malosi galue, i totonu o ē faauuina se faamautinoaga e faapea ua fuafuaina i latou mo le ola faalelagi. Ua latou iloaina e faasino atu ia i latou mea uma ua fai mai ai le Tusi Paia e uiga i le olaga faalelagi ma ua latou loto malilie e faataulagaina mea uma lava faalelalolagi, e aofia ai le ola faaletagata. E ui lava o le ola i le lalolagi Parataiso o le a ofoofogia, ae e lē o ia i latou, o ē ua faauuina, lea faamoemoe. (Luka 23:43) O le faamoemoe mautinoa faalelagi e lē masuia, lea e faatagaina ai i latou ina ia tagofiaina le areto ma le uaina o le Faamanatuga, e lē faavaeina aʻe i vaaiga faalotu sese.

O le a lē fiafia Ieova pe afai e faapea mai se tagata lava ia o ia ua valaauina e avea ma  tupu ma ositaulaga ae leʻi valaauina o ia e le Atua. (Roma 9:16; Faaaliga 22:5) Na faasalaina e le Atua Koru i lona faia ma le faamaualuga o le tulaga faaositaulaga. (Esoto 28:1; Numera 16:4-11, 31-35) O lea, e faapefea pe afai o ni manatu faalelotu sa iai muamua ma ni faalogona malolosi ua uunaia ai se tagata e tagofia ma le lē tatau le areto ma le uaina o le Faamanatuga? Ia e tatau loa i lea tagata ona lē toe faia faapea ma ia tatalo atu ma le faamaulalo i le Atua mo lana faamagaloga.—Salamo 19:13.

Ua Faapefea ona E Aafia Ai

E lē manaomia ona tagofia e se tasi le areto ma le uaina o le Faamanatuga ina ia maua ai e ia aogā o le taulaga togiola a Iesu ma maua le ola e faavavau i luga o le lalolagi. Mo se faataʻitaʻiga, e lē o faaalia mai i le Tusi Paia faapea o tagata na matataʻu i le Atua e pei o Aperaamo, Sara, Isaako, Repeka, Poasa, Ruta, ma Tavita faapea latou te tagofiaina le areto ma le uaina o le faamanatuga. Ae peitai, o i latou atoa ma isi o loo faanaunau mo le ola e lē uma i lenei lalolagi, e tatau ona faaalia le faatuatua i le Atua ma Keriso, atoa ma le sauniuniga a Ieova o le taulaga togiola lea a Iesu. (Ioane 3:36; 14:1) O le faamanatuga faaletausaga o le maliu o Keriso ua fai lea ma faamanatuga o lena taulaga sili.

O le tāua o le taulaga a Iesu sa faaalia lea i upu a le aposetolo o Ioane e faapea: “Ou te tusi atu nei mea ia te outou, ina neʻi agasala outou; pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava.” (1 Ioane 2:1, 2) E mafai ona faapea mai Kerisiano faauuina o Iesu “o le togiola foi o ia mo a [latou] agasala.” Ae peitai, o ia foi o le togiola mo agasala a le lalolagi uma lava, e maua ai e tagata usiusitai le ola e faavavau i le Parataiso i le lalolagi lea ua matuā lata tele mai!

E ala i le auai i le faamanatuina o le maliu o Keriso, o le a e maua ai ni aogā mai lauga faale-Tusi Paia e faatupu manatu. O le a faamanatu atu ai ia te oe le tele o mea ua faia e Ieova le Atua ma Iesu Keriso mo i tatou. O le a avea o se taui faaleagaga le auaufaatasi ma i latou o ē āva i le Atua ma Keriso ma amanaia le taulaga togiola a Iesu. O lenei avanoa atonu o le a matuā faamalosia ai lou naunau e avea ma sē na te mauaina le alofa tunoa ma le agalelei o le Atua, lea e taʻitaʻiina atu ai i le ola e faavavau. Matou te valaaulia ma le mafana oe ina ia e faatasi atu ma Molimau a Ieova i le mavae o le goto o le la ia Aperila 6, 1993, e faamanatuina ai le maliu o Iesu Keriso ona o le Talisuaga Afiafi a le Alii e mafai ona iai sona uiga sili mo oe.