Pe e Mafai Ona Iai se Uiga o Lenei Talisuaga mo Oe?

O SE masina atoa ua na ufitia le laufanua i se malama faatoʻā tatafa. I le potu i luga o se fale i Ierusalema le aai ua āu tausagā, na faatasitasi ai ni tane se toʻa 12 i se laulau. E toʻa sefulutasi na matuā uaʻi atu i lo latou Faiaʻoga a o ia faatomuaina atu se sauniga e sili ona aloaia ma saunoa ai i upu e sili ona tāua. E pei ona fai mai se tasi o faamatalaga:

Sa “tago Iesu [Keriso] i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o loʻu tino lenei. Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, Ina inu ia outou uma i ai; auā o loʻu toto lenei, o le toto o le feagaiga fou, ua faamaligiina mo tagata e toatele e faamagalo aʻi agasala. Ou te fai atu foi ia te outou, ou te le toe inu lava i lenei fua o le vine, seia oo i lea aso ou te inu ai le uaina fou faatasi ma outou i le malo o loʻu Tamā. Ua uma ona fai o a latou pese, ona latou o atu ai lea i le mauga o Olive.”—Mataio 26:26-30.

Na tupu lenei mea ina ua mavae le goto o le la i le aso 14 o le masina faa-Iutaia o Nisani i le tausaga e 33 T.A. Na faatoʻā faamanatuina lava e Iesu ma ona aposetolo le Paseka, o le faamanatuga o le faasaolotoina mai o Isaraelu mai noanoataga i Aikupito i le senituri lona 16 T.L.M. Na faatulai ese ai e Keriso Iuta le Sekara, o lē o le a ia faalataina o ia. O lea, sa na o Iesu ma ona aposetolo faamaoni e toʻa 11 sa auai i ai.

O lenei talisuaga sa lē o le faaauauina lea o le Paseka faa-Iutaia. O se mea fou lea sa taʻua o le Talisuaga Afiafi a le Alii. E tusa ai ma lenei gaoioiga, na faatonuina ai e Iesu ona soʻo e faapea: “Tou te faia le mea nei e fai ma faamanatuga ia te au.” (Luka 22:19, 20; 1 Korinito 11:24-26) Aiseā na ia fetalai ai faapea? Ma e mafai faapefea e lenei mea na tupu i le faitau senituri ua mavae ona iai sona uiga mo oe?