Ia Fiafia ma ia Maopoopo

O LE maopoopo tatou te faia ai mea i se tulaga lelei. O le maelega e fesoasoani ia i tatou e matuā faaaogā lelei ai le taimi ma mea o tatou maua. (Kalatia 6:16; Filipi 3:16; 1 Timoteo 3:2) Ae e iai se isi mea e sili atu i le olaga na i lo o le faamaopoopo ma le maelega. Na tusi mai faapea le faisalamo faagaeeina: “Amuia [“fiafia,” NW] le nuu e fai Ieova mo latou Atua.” (Salamo 144:15) O se luʻi le taumafai ina ia fiafia, ma ia maopoopo foi i mea uma tatou te faia.

Ia Maopoopo ma Fiafia

O le faaaʻoaʻoga sili lava i le maopoopo lelei, o Ieova le Atua. O ana foafoaga uma lava, mai sela taitasi e oo atu i meafaiola tetele ua tuufaatasia, mai atoma ninii e oo atu i faaputuputuga tetele o fetu, ua faaalia ai le maopoopo ma le saʻolele. O ana tulafono mo le lalolagi aoao ua mafai ai ona tatou fuafuaina ma le mautinoa o tatou olaga. Tatou te iloa o le a oso aʻe le la i taeao uma ma o le a sosoo mai foi le tau mafanafana pe a mavae atu le tau malūlū.—Kenese 8:22; Isaia 40:26.

Ae ua lē avea Ieova e na o se Atua o le maopoopo. O ia foi o “le Atua fiafia.” (1 Timoteo 1:11, NW; 1 Korinito 14:33) Ua vaaia lona fiafia e ala i ana foafoaga. O tamai pusi o loo taaalo fiafia, o lā goto matagofie, o taumafa e faaoso ai le mataʻai, o musika e faagaee ai le fiafia, o galuega e faamalosi ai le tino, ma le anoanoai o isi mea, ua faaalia ai o lona finagalo ina ia tatou ola fiafia. O ana tulafono e lē o ni faasāsāaga e faatupu ita, ae o ni puipuiga mo lo tatou fiafiaga.

Sa faaaʻoaʻo Iesu Keriso i lona Tamā. O ia o “le Alii e manuia [“fiafia,” NW] mona ua toatasi” ma e amioaʻi o ia e tutusa pau lava ma lona Tamā. (1 Timoteo 6:15; Ioane 5:19) A o la galulue faatasi ma lona Tamā i galuega o le foafoaga, sa sili atu nisi ona uiga na i lo le tau o se “tufuga” e maelega. Sa fiafia o ia i ana galuega. Sa ‘olioli o ia i luma o Ieova i taimi uma, sa olioli i le fuatele tele mai o le fanua o lana lalolagi, ma na fiafia foi o ia i tagata.’—Faataoto 8:30, 31.

Tatou te fia faaatagia atu foi lena agalelei, le olioli, ma le fiafia i tagata i mea uma tatou te faia. Peitai, i nisi taimi, ona o le taumafai ina ia maelega i se mea, atonu e galo ai ia i tatou, o le ‘savavali ina ia ōgatasi ma le agaga o le Atua’ e aofia ai le faaali atu o fua o le agaga o le Atua. (Kalatia 5:22-25) Ua lelei ai la ona tatou fesili ifo, E mafai faapefea ona lē gata ina tatou maopoopo ae fiafia foi i a tatou lava gaoioiga ma i le taʻitaʻia o galuega a isi?

Aua E te Faasauā ia te Oe Lava

Manatunatu i le fautuaga ua faamauina i le Faataoto 11:17. Muamua lava, ua taʻu mai ia i tatou e le tusitala faagaeeina e faapea “o le tagata alofa ua agalelei o ia ia te ia lava.” Ae i le faafeagai na ia toe faapea mai: “A o le ua saua, na te faatigaina lona lava tino.” O le faaupuina lenei e le New International Version: “E aogā i le tagata lava ia lona agalelei, a o le tagata e faasauā na te faaleagaina o ia lava.”

E mafai faapefea ona tatou faasauā ia i tatou lava e aunoa ma so tatou matuā iloaina? O se tasi o auala, o le matuā lelei lea i le mafaufauina o se mea e fai, ae e matuā lē maopoopo lava i le faiga. O ā la iʻuga? Ua faapea mai se tasi tagata poto: “O le galogalo o mea, o le sese o ni faamaumauga  tusitusia, o le lē malamalama atoatoa i se fuafuaga na fai, o le lē saʻo ona faamaumau i lalo o ni feau na maua mai i le telefoni—o nai lē taulau iti uma na, e pei ni anufe o loo ʻatiʻatiina le ie o le uiga maelega, ma faaleaogāina uma ai fuafuaga e sili ona lelei.”—Teach Yourself Personal Efficiency.

Ua ōgatusa lena manatu ma le tusitala faagaeeina o lē na faapea mai: “O le ua paie foi i lana galuega, la te uso ma le na te faamāumau mea.” (Faataoto 18:9) Ioe, o tagata e lē maopoopo, e lē maelega, e mafai ona latou faapogaia mala ma faaleagaina ai i latou lava faapea ma isi. Ona o lenei itu, e masani ai ona teena i latou e isi tagata. Ona o lo latou paiē, ua alofia ai i latou e isi.

Po o se Ulī ua Ola po o se Leona ua Mate?

Ae e mafai foi ona tatou faasauā ia i tatou lava e ala i le soona faataatitia o ni o tatou tapulaa. Ua faapea mai le tusitala lea sa tautala e uiga i le maelega, e mafai ona tatou sini atu mo “se tulaga o le lelei atoatoa e faigata ona mauaina atoatoa.” O le iʻuga e pei ona ia taʻua, “tatou te matuā palalasi atu ai i le loto momomo ma le loto tiga.” E mafai ona maopoopo lelei ma fai mea maelega se tagata o lē e manao ia atoatoa ona lelei mea uma, peitai, o le a lē taitai ona fiafia moni o ia. Mulimuli ane e na o le loto momomo lava e oo ia te ia.

Afai tatou te faanaunau e avea ma sē e manao ia atoatoa ona lelei mea uma, e lelei la ona tatou manatua faapea “e sili ona lelei o le ulī ua ola i le leona ua mate.” (Failauga 9:4) Atonu tatou te lē fasiotia moni i tatou e ala i ni taumafaiga e lē gafatia mo le fia lelei atoatoa, ae mafai ona tatou matuā faaleagaina i tatou lava ona ua matuā vaivai ma le mafatia. O le uiga o lenei mea e pei ona taʻua e se tasi tagata tomai, e aofia ai “le matuā lē lavā i le tino, i faalogona ootia, i le faaleagaga, i le mafaufau ma le va foi ma isi.” (Job Stress and Burnout) O lo tatou lē lavavā ona o le tauivi i ni sini e lē mafai ona ausia, e mautinoa o lo tatou faasauā lena ia i tatou lava, ma e mautinoa le aveesea ai o lo tatou fiafiaga.

Ia E Agalelei ia te Oe Lava

Ia manatua: “O le tagata alofa ua agalelei o ia ia te ia lava.” (Faataoto 11:17) Tatou te tausia ma le agalelei i tatou lava e ala i le faatutūina o ni sini e moni ma aogā, ma ia manatua, e silafia e le Atua fiafia o Ieova o tatou vaivaiga. (Salamo 103:8-14) Tatou te fiafia foi pe a tatou amanaia na vaivaiga, ona “tatou finafinau” ai lea i ni tomai tatou te gafatia, ina ia faataunuu lelei ai o tatou avega tauave.—Eperu 4:11; 2 Timoteo 2:15; 2 Peteru 1:10.

E masani foi ona iai le lamatiaga o le soona faamamafa nauā—ua tatou soona faapelepele nauā ia i tatou lava. Aua neʻi galo le tali atu a Iesu i le manatu na faatū mai e le aposetolo o Peteru, “Le Alii e, ia e agalelei ia te oe lava,” ae semanū o se gaoioiga maumauai sa manaomia ona faia. E foliga mai sa mataʻutia mafaufauga o Peteru, auā o lea na fetalai atu i ai Iesu: “Satani e, ina alu ia oe i oʻu tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.” (Mataio 16:22, 23, NW) O lo tatou agalelei ia i tatou lava, e lē manaomia ai le uiga faatalalē, e lē manaomia foi le uiga o le soona papanu nauā. E mafai foi ona aveesea ai o tatou fiafiaga uma. O le mea tatou te manaomia, e lē o ni moomooga fai faavalea, ae o le mafaufau tonu.—Filipi 4:5.

Ia Agalelei i Isi

E foliga mai sa manatu le au tusiupu ma le au Faresaio i ona po o Iesu faapea sa sili lo latou maelega ma le maopoopo. Ua faapea mai le lomifefiloi o le A Dictionary of the Bible e faatatau i la latou auala tau tapuaiga: “O poloaiga uma faale-Tusi Paia sa toe lalago atu i ai ma se faatulagaga o ni aiaiga faaopoopo. Sa lē faatagaina ni  fesuiaiga o tulaga; sa matuā maumauai le poloaia o tagata Iutaia uma ina ia usiusitai atoatoa i le Tulafono i ona vala autū uma . . . Sa faaopoopoina pea auiliiliga faaletulafono seia oo ina ua avea le lotu o se pisinisi, ma avea le olaga o se avega mamafa e sili ona faigata. Na avea tagata o ni ē e faia amioga ma le lē manatu mamafa i ai. Sa lē toe faaaogāina le loto fuatiaifo; o le mana ola o le afioga a le Atua sa matuā faaleaogāina ma tanumia i le anoanoai o tulafono e lē mafaitaulia.”

E letioa ona taʻusalaina i latou e Iesu Keriso i le faia o lenei mea. Na ia fetalai atu: “Ua latou saisai avega mamafa ma le avegata ma latou faaee i ua o tagata; a e latou te le mafafai ina faagaoioi ai i so latou tamatamai lima.” (Mataio 23:4) O toeaina e alolofa latou te alofia le lafo atu i le lafu o le avega mamafa, o le faatetele atu o aiaiga ma ni tulafono faaopoopo. Latou te tausia ma le agalelei le lafu a le Atua, e ala i le mulimuli ma le agalelei i le faaaʻoaʻoga e faafouina ai a Keriso Iesu.—Mataio 11:28-30; Filipi 2:1-5.

E tusa pe faatuputupulaia tiute tauave faalefaalapotopotoga, ae o le a lē faagaloina lava e toeaina alolofa le manatu tāua e faapea, o loo latou faafeagai ma tagata—o tagata e alofa i ai le Atua. (1 Peteru 5:2, 3, 7; 1 Ioane 4:8-10) O le a lē taitai ona latou mātele nauā i a latou mataupu po o faatulagaga faalefaalapotopotoga, ae galo ai lo latou tiute autū o ni leoleo mamoe, o ni ē vaavaaia, ma o ni ē e puipuia le lafu.—Faataoto 3:3; 19:22; 21:21; Isaia 32:1, 2; Ieremia 23:3, 4.

Mo se faaaʻoaʻoga, o le mātele nauā i faasologa o taimi ma fuainumera, e ono galo ai le manatu mamafa atu i tagata. Seʻi manatu i se avepasi o lē e manatu o lana tiute autū o le pipii mau lea i lana faasologa e tusa lava po o ā ni itu e ono tulai mai. Na pau lava lona faanaunauga ia amata ana malaga mai le isi pito i le isi pito, i le taimi tonu ua faatulagaina. Peitai i lona manatu, ua faalavelave tele le pasese. E faiaga ma lē maopoopo, ma ua fai foi ma masani le taunuu ane i le nofoaga faatali pasi i le toetoe lava oo i le taimi e alu ese ai lana pasi. Na i lo le manatua la o le autū o lana galuega, ina ia auauna mo manaoga o lana pasese, e manatu ai o ia ua avea le pasese ma faalavelave i lona maelega, ma ia lafoaia ai loa i latou.

Manatu Mamafa i Tagata Uma Taitoatasi

O le faananau e aunoa ma se alofa i le maelega e masani ona lē amanaia ai manaoga o tagata taitoatasi. E foliga mai o ē e vaivai ma lē maelega ua pei o ni avega mamafa. Pe a tupu lenei mea, e mafai ona mapuna mai ai ni tulaga mataʻutia. Mo se faaaʻoaʻoga, i le aai laumua o Sparta i Eleni anamua, sa na ona tuulafoaia lava o tamaiti vaivai ma mamaʻi seia oo ina feoti. Sa lē mafai ai ona avea i latou o ni fitafita malolosi ma maelega, e ono mafai ona latou puipuia le atunuu malosi ma le maelega. Ua faapea mai le faifilosofia o Bertrand Russell: “Pe a fanau mai se tamaitiiti, e tuuina atu o ia e lona tamā i ē matutua o lona aiga ina ia iloiloina: afai e ola malōlōina, ona toe faafoi atu lea i lona tamā mo le tausiga; ae afai e lē ola malōlōina, ona lafoai lea i se lua o vai loloto.”—History of Western Philosophy.

O le faauamaʻaa ma le faasiasia, e aunoa ma se fiafia, ua mātauina ai lea atunuu lē alofa. (Faatusatusa i le Failauga 8:9.) E lē taumate sa manatu taʻitaʻi o Sparta e saʻo mafuaaga o lo latou maelega, ae o a latou amioga sa lē iai se alofa mutimutivale po o se agalelei. Sa lē tutusa o latou ala ma ala o le Atua. (Salamo 41:1; Faataoto 14:21) I le faaeseesega, o ovasia i le faapotopotoga Kerisiano latou te manatua faapea o mamoe uma a le Atua e tautele i lana silafaga, ma latou te tausia uma nei mamoe i le agalelei. Latou te lē tausia na o mamoe e 99 ia e ola malōlōina, ae tausi foi ma le mamoe e tasi o loo vaivai po o faalavelaveina ona faalogona.—Mataio 18:12-14; Galuega 20:28; 1 Tesalonia 5:14, 15; 1 Peteru 5:7.

Ia Vavalalata ma le Lafu

E mafuta vavalalata atu toeaina i le lafu o loo latou tausia. E ui i lea, i se suesuega faaonaponei i auala o loo faia ai pisinisi, ua taʻua ai se manatu e faapea, ina ia maelega i le faiga o se mea, e lē tatau i le pule po o le ovasia ona soona mafana tele i ē o loo ia vaavaaia. O le faamatalaina lenei e se tagata suesue o iʻuga eseese na oo i ai se tagata ofisa i se vaegaau ina ua ia vavalalata atu pe ina ua ia taumamao ese foi mai ē o i lana vaavaaiga: “Ina ua mafana tele atu o ia i [lana] au faigaluega, sa foliga na latou maua se lagona o le toʻamalie ma sa lē soona popole ai e maelega i le  faia o a latou galuega. Ae ina ua amata ona ia lē toe mafuta tele i ai ae ua alu uma lona mafaufau i lona tofiga maualuga, ona amata foi lea ona popole ana taʻitaʻi o vaega laiti, pe iai se mea sa lē saʻo ona fai . . . ma o o latou popolega ia, na matuā uaʻi atu ai loa i a latou galuega. O le iʻuga, sa mātauina ai le tuputupu aʻe o le maelega i le nofoaga o le vaegaau.”—Understanding Organizations.

Peitai e lē o se faalapotopotoga faavaegaau le faapotopotoga Kerisiano. E faataʻitaʻi atu toeaina Kerisiano o ē o loo vaavaaia galuega a isi, i le faaaʻoaʻoga a Iesu Keriso. Sa mafana pea o ia i ona soʻo. (Mataio 12:49, 50; Ioane 13:34, 35) Sa lē taitai ona ia faaaogā o latou popolega e soona maelega ai i le faiga o a latou mea. Sa ia atiina aʻe ni fusi malolosi o le mautinoa ma le faatuatuaina, e ala i le alofa i lona va ma ona soʻo. Sa mātaulia foi ona soʻo i fusi mautū o lo latou alofa. (1 Tesalonia 2:7, 8) O le iai o lena ituaiga o vavalalata, o le a tali lelei atu ai se lafu fiafia ua uunaia atoatoa e le alofa mo le Atua, i taʻitaʻiga e aunoa ma le faamalosia, ma o le a latou finafinau ai foi e auauna atu ma le lotomalie ia te ia.—Faatusatusa i le Esoto 35:21.

E tele mau o le Tusi Paia ua faamatilatila mai ai uiga faa-Kerisiano e pei o le fiafia ma le alofa mo le aufaatasiga o uso. (Mataio 5:3-12; 1 Korinito 13:1-13) Pe a faatusatusa atu i ai, e itiiti ni mau o loo faamatilatila mai ai le manaoga mo le maelega. Ia mautinoa, e manaomia se faamaopoopoga lelei. Ua masani pea ona maopoopo tagata o le Atua. Ae seʻi manatu mo se faaaʻoaʻoga i le faamatalaina soo e tusitala o salamo, o le fiafia o auauna a le Atua. I le Salamo 119 lea e tele ina taʻua ai tulafono, o faamanatuga, ma aiaiga a Ieova, ua amata faitauina faapenei: “Amuia [“fiafia,” NW] e ua sao lo latou ala, o e savavali i le tulafono a Ieova. Amuia [“fiafia”] i latou o e tausi i ana tulafono, o e sailiili ia te ia ma le loto atoa.” (Salamo 119:1, 2) Pe mafai ona e faafetaiaia le luʻi ina ia maopoopo ma ia fiafia foi?

[Ata i le itulau 28]

“Armillary sphere”—o se fausaga faaanamua o loo faaatagia mai ai faataliolio tetele o le lagi

[Ata i le itulau 31]

Ona o Ieova o se Leoleo Mamoe e alofa, ua avea ai o ia ua lē na o le Atua o le maopoopo, ae o le Atua foi o le fiafia

[Ē Ana le Ata]

Garo Nalbandian