Ia Mulimuli atu i le Malamalama o le Lalolagi
Ia Mulimuli atu i le Malamalama o le Lalolagi
“O lē mulimuli mai ia te au, . . . e ia te ia le malamalama o le ola.”—IOANE 8:12.
1. E faapefea ona matuā tāua le malamalama?
O LE ā e mafai ona tatou faia e aunoa ma le malamalama? Seʻi tepa faalemafaufau i le maleifua aʻe i aso uma o le tausaga i le 24 itula o le pogisa. Seʻi tepa faalemafaufau i se lalolagi e aunoa ma se lanu, auā a leai se malamalama e lē iloa foi ni lanu. Ioe, ana fai sa lē iai se malamalama, semanū foi la tatou te lē iai! Aiseā? Auā i le taualumaga lea e taʻua o le photosynthesis, e faaaogā e laau lanumeamata le malamalama mo le gaosiaina o meaʻai o loo tatou taumafaina—o saito, o fualaau faisua, ma fualaau taumafamata. E moni, i nisi taimi tatou te ʻaina aano o manufasi. Peitai, o na manu latou te ʻaia laau pe ʻaia foi isi manu na e ʻaai i laau. O lona uiga la, e faalagolago atoatoa atu lo tatou ola i le malamalama.
2. O ā puna malolosi o le malamalama o loo iai, ma o le ā ua taʻu mai e lenei mea ia i tatou e faatatau ia Ieova?
2 E maua lo tatou malamalama mai le fetu lea e taʻua o le la. O lo tatou la ua na o sina fetu faaleogalua, peitai e maua mai ai le matuā tele o le malamalama. E tele isi fetu e sili atu ona lapopoa. Ma o le faaputuga fetu lea o loo tatou ola ai, e taʻua o le aniva o le Milky Way, o loo iai fetu e silia i le selau piliona. E iai foi le lē mafaitau fia piliona o aniva i le vanimonimo. Maeu se tuufaatasiga ofoofogia o fetu! Maeu le tele anoanoai o le malamalama ua maua mai ai! Maeu le avea o Ieova o le puna sili ona malosi o le malamalama, o lē na foafoaina na mea uma! Ua faalauiloa mai e le Isaia 40:26: “Seʻi tetepa ae i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau ia te i latou uma i o latou igoa; ona o le tele o lona malosi ma lona mana tele; e leai so latou e le iloa.”
Se Isi Ituaiga o Malamalama
3. O le ā le tāua o le malamalama faaleagaga mai ia Ieova?
3 O Ieova o le Puna foi lea o se isi ituaiga o malamalama, le ituaiga lea tatou te mafai ai ona maua se vaaiga faaleagaga, po o le faamalamalamaina faaleagaga. Ua faamatalaina e se tasi lomifefiloi le “faamalamalamaina” e faapea: “Ia avatu i ai le poto: ia faatonu; ia avatu i ai le malamalama faaleagaga.” Ua ia faamatalaina le manatu “ua faamalamalamaina” e faapea: “ua faasaoloto mai le valea ma le taʻitaʻiseseina.” O le faamalamalamaina faaleagaga mai ia Ieova ua maua mai lea i le poto saʻo o lana Afioga, le Tusi Paia. Ona mafai ai lea ona tatou iloa po o ai le Atua, ma po o ā ana fuafuaga. “O le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.” (2 Korinito 4:6) O le upu moni la o le Afioga a le Atua ua faasaoloto ai i tatou mai le valea ma le taʻitaʻiseseina. Na fetalai Iesu: “E iloa foi e outou le mea moni, e tuu saʻoloto foi outou e le upu moni.”—Ioane 8:32.
4, 5. Ua faapefea i le malamalama mai ia Ieova ona avea ma malamalama i o tatou olaga?
4 O Ieova, le Puna o le malamalama moni faaleagaga, e “poto atoatoa.” (Iopu 37:16) Ua faalauiloa foi e le Salamo 119:105 le Atua e faapea: “O lau afioga o le sulu lea i oʻu vae, ma le malamalama i loʻu ala.” Na te mafaia la ona faamalamalamaina faaleagaga, e lē gata i lo tatou olaga i le taimi nei, ae faapea foi le olaga atoa i le lumanai. A aunoa ma lea, o le a pei le olaga o se taavale o loo agaʻi atu i se auala maugā fepiopioai i se po pogisa, ae aunoa ma se molī o le taavale po o ni molī i se isi lava mea. E ono faatusaina le malamalama faaleagaga mai le Atua, i le malamalama lea e maua mai molī tetele i luma o se taavale. O molī e faasusulu atu i le aualatele ina ia tatou iloa ai le itu tonu o loo tatou agaʻi atu i ai.
5 Ua faaalia i le valoaga i le Isaia 2:2-5 e faapea, i o tatou taimi, o loo aoaoina ai e le Atua mai atunuu uma, tagata o ē mananao i le faamalamalamaina faaleagaga, ina ia mafai ai ona latou aʻoaʻoina ma faatinoina le tapuaiga moni. Ua faapea mai le fuaiupu e 3: “E aʻoaʻo mai foi o ia ia te i tatou ona ala, ona tatou savavali ai lea i ona ala.” I le fuaiupu e 5 ua valaaulia ai ē uma o loo saili i le upu moni: “O mai ia ina tatou savavali i le malamalama o Ieova.”
6. E foliga mai o fea o le a taʻitaʻi atu i ai i tatou e le malamalama mai ia Ieova?
6 O Ieova la, o le puna lea o malamalama e lua ia e matuā tāua mo le ola: le malamalama faaletino ma le malamalama faaleagaga. E fesoasoani le malamalama faaletino i o tatou tino faaletino ina ia faaolaolaina ai pea, pe ā ma le 70 po o le 80 tausaga po o le sili atu. Peitai o le malamalama faaleagaga e taʻitaʻia atu ai i le ola e faavavau i le lalolagi parataiso. O le tulaga lena e pei ona taʻua e Iesu i lana tatalo i le Atua: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.
Le Pogisa Faaleagaga o le Lalolagi
7. Aiseā ua tatou manaomia ai le faamalamalamaina faaleagaga i le taimi lenei na i lo se isi lava taimi muamua?
7 Ua sili atu lo tatou manaomia i aso nei o le malamalama faaleagaga na i lo o se isi lava taimi. Ua faaalia mai i valoaga e pei o le Mataio mataupu e 24 ma le 2 Timoteo mataupu e 3 e faapea, ua tatou lalata atu i le iʻuga o lenei faiga o mea. O nei valoaga ma isi foi, ua muai taʻu mai ai mea e sili ona mataʻutia ua tutupu i o tatou taimi, e taʻu mai ai ia i tatou lo tatou ola i “ona aso e gata ai.” Ua moni na valoaga, auā ua faalausosoo mai mala i lenei senituri. Ua oo atu i ni tulaga taufaamataʻu soligatulafono ma faiga sauā. Ua sili atu i le faitau selau miliona tagata ua maliliu ona o taua. Ua sosolo lē leoa mai faamaʻi e pei o le maʻi mataʻutia o le AIDS i le faitau miliona, ma ua maliliu foi le faitau 160,000 i le AIDS, i le na o le Iunaite Setete lava ia. Ua malepelepe aiga, ma ua manatu o le tausia o le mamā i amioga faaleituaiga o se faiga ua lē toe taualoa.
8. O le ā le tulaga lea o loo fesagaʻi nei ma tagata, ma aiseā?
8 Na faapea mai lē sa avea muamua ma failautusi aoao a Malo Aufaatasi o Javier Pérez de Cuéllar: “O le tulaga o le lalolagi o se faamaoniga ofoofogia lea e faapea, o le mativa [ua faaitiitia ai] le auaufaatasi o tagata.” Na ia mātauina “e silia i le piliona tagata ua ola nei i le matuā mativa” ma “o lenei tulaga ua faapogaia ai femisaaiga sauā.” Na faapea mai o ia: “O nei mafatiaga matuā mataʻutia ua lē gafatia e vaifofo e mafai e faiga malo ona saunia.” Ma sa ioe i ai le faauluuluga o se faalapotopotoga latou te faia ni faaaafiaga tetele i ni mataupu i le faapea mai: “O le faafitauli autū ua fesagaʻi ma tagata, o le lē mafaia lea ona puleaina.” Maeu le moni o upu a le Salamo 143:3: “Aua tou te faatuatua i alii, po o le fanau a tagata, e le o i ai se olataga.”
9.O ai ua matuā tuuaʻia ona o le pouliuli lea ua faaleagaina ai tagata, ma o ai na te mafaia ona faasaoina mai i tatou mai lenei aafiaga?
9 O le tulaga i aso nei, ua tutusa ma le valoaga a le Isaia 60:2: “Faauta mai, e ufitia le lalolagi i le pouliuli, e ufitia foi nuu i le pogisa.” O le pogai o lenei pogisa ua ufitia ai le vaega tele o ē o loo ʻaināina le lalolagi, ona o lo latou lē taliaina o le malamalama mai ia Ieova. Ma o le pogai autū o le pogisa faaleagaga, o Satani le Tiapolo lea ma ana temoni, o fili sili ia o le Atua o Lē e ona le malamalama. O i latou na o “alii o le pouliuli o lenei lalolagi.” (Efeso 6:12) E pei ona taʻua i le 2 Korinito 4:4, o le Tiapolo, o “le atua o le lalolagi nei,” o lē “ua faatauasoina manatu o i latou o e le talitonu . . . ina neʻi pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.” E leai se pulega faaletagata e mafai ona faamutaina le lalolagi ua taaʻia e Satani. Na o le Atua e mafaia.
“Le Malamalama Sili”
10. Na muai valoia faapefea mai e Isaia faapea o le a faasusulu mai i tagata le malamalama i o tatou aso?
10 E ui lava ua matuā faapogisaina se vaega tele o tagata, ae sa valoia foi e le Afioga a le Atua i le Isaia 60:2, 3 e faapea: “E afio ae Ieova i ou luga, ma le pupula o Ieova e aliali mai lea i ou luga. E o mai nuu ese i lou malamalama, o tupu foi e o mai i latou i le pupula o lou alu ae.” Ua ōgatasi lenei ma le mataupu e 2 o le Isaia, lea na folafola ai faapea, i nei aso e gata ai, o le a faavaeina ai le malamalama, o le tapuaiga moni lea a Ieova, ma e pei ona taʻua i le fuaiupu e 2 ma le 3, “ona gasolo ane ai lea o nuu uma i ai. E o mai lava nuu e tele, ma latou faapea ane, O mai ia, tatou o ae ia i le mauga o Ieova,” o lona uiga, i lana tapuaiga moni ua faaeaina. E ui lava la ua pulea e Satani le lalolagi, ae ua faasusulu mai e le Atua le malamalama ma o loo faasaolotoina ai le vao o tagata mai le pogisa.
11. O ai e sili ona lauiloa i le faaatagiaina atu o le malamalama o Ieova, ma na faapefea ona faailoa atu o ia e Simeona?
11 Na muai taʻua i le valoaga i le Isaia 9:2 e faapea, o le a auina mai e le Atua i le lalolagi se tasi e faaatagiaina atu lana malamalama. Ua taʻua faapea: “O le nuu sa savavali i le pouliuli, ua latou iloa le malamalama tele; o e sa nonofo i le nuu o le ata o le oti, ua pupula mai ia te i latou le malamalama.” O lenei “malamalama tele” o le Fofoga Fetalai lea a Ieova, o Iesu Keriso. Na fetalai Iesu: “O aʻu nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.” (Ioane 8:12) Na iloa e nisi lenei mea, e oo lava i le taimi a o tamaitiiti Iesu. Ua faapea mai le Luka 2:25, o se tamaloa e igoa ia Simeona sa “amiotonu o ia ma le mataʻu i le Atua” ma sa “i luga ia te ia le Agaga Paia.” Ina ua vaaia e Simeona le tamaitiiti o Iesu, na ia tatalo atu i le Atua: “Ua iloa e oʻu mata le faaolataga mai ia te oe, ua e saunia i luma o nuu uma lava; o le malamalama e faamalamalama aʻi nuu ese.”—Luka 2:30-32.
12. O anafea ma na faapefea ona amata ona aveesea ai e Iesu le pogisa sa ufitia ai tagata?
12 Ina ua faatoʻā mavae lava le papatisoga o Iesu, sa amata loa ona ia aveesea le pogisa mai tagata. Ua taʻu mai ia i tatou e le Mataio 4:12-16 e faapea o le faataunuuga lenei o le Isaia 9:1, 2, lea sa taʻu mai e faapea o le a amata ona susulu atu le “malamalama tele” i tagata o loo iai i le pogisa faaleagaga. Ua faapea mai le Mataio 4:17: “Talu mai ai na afua ona talaʻi atu e Iesu, ua faapea atu, Ina salamo ia outou; auā ua latalata mai le malo o le lagi.” E ala i le talaʻiga o le tala lelei o le Malo o le Atua, ua faamalamalamaina ai e Iesu tagata e faatatau i fuafuaga a le Atua. “O le ola ma le le iu vale ua faamalamalamaina mai lea e ia i le tala lelei.”—2 Timoteo 1:10.
13. Na faamatalaina faapefea e Iesu o ia lava, ma aiseā na mafai ai ona ia faia faapea ma le matuā mautinoa?
13 Sa faaatagia ma le faamaoni e Iesu le malamalama o le Atua. Na ia fetalai: “Ua ou sau o le malamalama i le lalolagi, ina ia le tumau pea i le pouliuli se tasi e faatuatua mai ia te au. . . . ou te le tautala fua na o aʻu; a o le Tamā ua auina mai aʻu, na ia tuu mai le poloaiga ia te au i mea ou te fai atu ai, ma mea ou te tautala atu ai. Ua ou iloa foi o lana poloaiga o le ola faavavau lea.”—Ioane 12:44-50.
“Sa ia te Ia le Ola”
14. Ua mātauliaina faapefea Iesu i le Ioane 1:1, 2?
14 Ioe, na auina mai e Ieova lona Alo i le lalolagi e fai ma malamalama e faaali atu ai i tagata le ala i le ola e faavavau. Mātau le auala ua faamatilatila mai ai i le Ioane 1:1-16. Ua faitauina faapea le fuaiupu 1 ma le 2: “Sa i le amataga, le Lokou, sa i le Atua le Lokou, o le Atua foi le Lokou [“ma sa o se atua le Upu,” NW]. O ia lava sa i le Atua i le amataga.” O loo faaigoa e Ioane i inei Iesu, lē sa muai soifua a o leʻi avea ma tagata, i le taʻu “Lokou.” Ua faaalia mai ai i inei le galuega sa ia faia i le avea ma Fofoga Fetalai a le Atua. Ma ina ua faapea mai Ioane “sa i le amataga, le Lokou,” o lona uiga o le Lokou, o le amataga lea o galuega faalefoafoaga a Ieova, “o le amataga o mea na faia e le Atua.” (Faaaliga 3:14) O lona tulaga silisili i isi uma foafoaga ola a le Atua ua matuā alagatatau ai le taʻua o ia o “se atua,” o se tasi e malosi. Ua taʻua o ia e le Isaia 9:6 o le “Atua malosi,” e ui lava e lē o le Atua e Ona le Malosi Uma Lava.
15. O le ā le faamatalaga faaopoopo ua taʻu mai ia i tatou e le Ioane 1:3-5 e faatatau ia Iesu?
15 Ua taʻua i le Ioane 1:3 e faapea: “Na ia faia mea uma lava; e leai foi se mea e tasi na faia e lei faia e ia.” Ua faapea mai le Kolose 1:16, “na faia e ia o mea uma lava, o mea i le lagi ma mea i le lalolagi.” Ua faapea mai le Ioane 1:4, “sa ia te ia le ola; o le ola foi o le malamalama lea o tagata.” O lea la, o le Lokou na ala mai ai le foafoaina o isi uma ituaiga o ola; e auala foi i lona Alo, ua faafaigofie ai e le Atua mo tagata agasala, ona mauaina le ola e faavavau. O Iesu moni lava la o lē e malosi, o lē ua taʻua i le Isaia 9:2 e faapea o “le malamalama tele.” Ma ua faapea mai le Ioane 1:5: “Ua pupula mai foi le malamalama i le pouliuli, a e lei talia e le pouliuli.” O le malamalama ua faaatagia mai ai le upu moni ma le amiotonu, pe a faaeseese atu i le pouliuli, lea e faaatagia mai ai le sese ma le amioletonu. O le pogai lea ua taʻua ai e Ioane faapea e lē mafaia e le pouliuli ona faatoʻilaloina le malamalama.
16. Na faapefea ona faasino atu e Ioane le Papatiso le tulaga o le galuega a Iesu?
16 Ua faatalitonu atu nei e Ioane i le fuaiupu e 6 e oo i le 9 e faapea: “Na auina mai le tagata mai le Atua, o Ioane [le Papatiso] lona igoa. Na sau o ia o le molimau, ina ia molimau i le malamalama, ina ia talitonu i ai o tagata uma lava ia te ia. E le o le malamalama ia [Ioane], a ua sau o ia ina ia molimau i lea lava malamalama [Iesu]. O le malamalama moni lea, na te faamalamalamaina tagata uma lava i lona maliu mai i le lalolagi.” Sa uiga upu a Ioane i le Mesia o loo afio mai, ma sa ia faasino atu i ai ona soʻo ia te Ia [le Mesia]. I le gasologa o le taimi, na tuuina atu ai i tagata o ituaiga uma le avanoa e taliaina ai le malamalama. O lea, sa leʻi afio mai Iesu ina ia manuia ai na o tagata Iutaia, ae mo le manuia o tagata uma—o ē mauʻoa po o ē matitiva, e tusa lava po o le ā le ituaiga.
17. O le ā ua taʻu mai e le Ioane 1:10, 11 ia i tatou e faatatau i le tulaga faaleagaga o tagata Iutaia i aso o Iesu?
17 Ua faaauau mai le fuaiupu e 10 ma le 11: “Sa i le lalolagi o ia, na ia faia foi le lalolagi; a e lei iloa lava ia e le lalolagi. Ua maliu mai o ia i lona lava nuu, a e lei talia o ia e ona lava tagata.” I le tulaga sa muai iai Iesu a o leʻi avea ma tagata, sa avea ai o ia ma lē na ala mai ai le foafoaina o le lalolagi o tagata. Peitai, a o iai i le lalolagi, sa teena o ia e le toatele o ona lava tagata, o tagata Iutaia. Sa latou lē mananao e faaalialia a latou mea leaga ma a latou amioga pepelo. Sa sili atu ia i latou le pouliuli na i lo le malamalama.
18. Ua faaalia mai faapefea e le Ioane 1:12, 13 faapea e mafai e nisi ona avea ma fanau a le Atua faatasi ma so latou tofi faapitoa?
18 Ua faapea mai Ioane i le fuaiupu e 12 ma le 13: “A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava.” Ua faaalia i nei fuaiupu faapea, i le amataga, sa leʻi avea soʻo o Iesu ma atalii o le Atua. A o leʻi afio mai Keriso i le lalolagi, sa aunoa ma se faamoemoe o le avea ma atalii po o le faamoemoe foi faalelagi na tatalaina mo tagata. Ae e ala i le aogā o le taulaga a Keriso lea sa latou faatuatua i ai, na avea ai loa nisi tagata ma atalii fai, ma mafai ai foi ona maua le faamoemoe e avea ma tupu faatasi ma Keriso i le Malo faalelagi o le Atua.
19. E pei ona faaalia i le Ioane 1:14, aiseā ua matuā talafeagai ai Iesu i le faaatagiaina atu o le malamalama o le Atua?
19 Ua faatalitonu mai e le fuaiupu e 14 faapea: “Ua liu tino tagata le Lokou, sa mau foi o ia ma i tatou, (na matou matamata i lona mamalu; o le mamalu lava lea o le Alo e toatasi o le Tamā).” A o iai Iesu i le lalolagi, sa ia faaatagia mai ai le mamalu o le Atua, auā e na o le Atalii ulumatua lava o le Atua sa mafai ona faia faapea. O lea, i se tulaga tutasi, sa sili ai ona agavaa o ia e faaalia mai le Atua ma Ana fuafuaga i tagata.
20. E pei ona faamauina i le Ioane 1:15, o le ā ua taʻu mai ia i tatou e Ioane le Papatiso e uiga ia Iesu?
20 Ua toe tusi atili mai le aposetolo o Ioane i le fuaiupu e 15: “Ua molimau Ioane [le Papatiso] ia te ia, ma alaga atu, ua faapea, O ia lenei sa aʻu fai atu ai, O lē mulimuli mai, e sili o ia ia te au, auā o ia na muamua ia te au.” Na muai fanau Ioane le Papatiso i le pe tusa ma le ono masina a o leʻi fanau mai Iesu o se tagata. Peitai e sili atu le tetele o galuega na faia e Iesu na i lo o Ioane, ma sa sili ai pea o ia na i lo o Ioane i so o se mea. Sa faailoa foi e Ioane, na muai iai Iesu a o leʻi ola mai o ia, auā sa muai soifua Iesu a o leʻi avea ma tagata.
O Meaalofa Mai ia Ieova
21. Aiseā ua faapea mai ai le Ioane 1:16, ua tatou mauaina le “alofa tunoa, e faaopoopo i le alofa tunoa”?
21 O le manatu lenei o le Ioane 1:16: “O lona tumu ua maua ai e i tatou uma lava le alofa tunoa, e faaopoopo i le alofa tunoa.” E ui lava ua fananau mai tagata ma le agasala ona o loo tuufaasolo mai ia Atamu, ae ua fuafuaina e le Atua le faaumatiaga o lenei faiga leaga o mea, le faasaoina o le faitau miliona i le lalolagi fou, le toe tutū mai o ē ua maliliu, ma le soloiesea o le agasala ma le oti, lea e iʻu atu ai i le ola e faavavau i le lalolagi parataiso. O nei faamanuiaga uma e foaifuaina, e leʻi mauaina ona o ni galuega a tagata agasala. O ni meaalofa mai ia Ieova e ala mai ia Keriso.
22. (a) O le ā ua faafaigofie ai le mauaina o le meaalofa silisili a le Atua? (e) O le ā le valaaulia ua faalautele mai e le tusi mulimuli o le Tusi Paia ia i tatou?
22 O le ā le meaalofa silisili ua faafaigofie ai le mauaina o nei mea uma? “Ua faapea lava ona alofa mai o le Atua i le lalolagi [o tagata], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) O lea, e matuā tāua le poto saʻo e uiga i le Atua ma lona Alo, “le Alii o le ola,” mo i latou o ē mananao i le malamalama faaleagaga ma le ola e faavavau. (Galuega 3:15) O lena le pogai ua faalautele atu ai le valaaulia lea o loo sosoo mai i le tusi mulimuli o le Tusi Paia, i ē uma e alolofa i le upu moni ma ē mananao i le ola: “Ina sau ia; o lē fia inu, ina sau ia, atoa ma lē manao i ai, ina ave fua ia le vai o le ola.”—Faaaliga 22:17.
23. O le ā o le a faia e tagata pei ni mamoe pe a latou mauaina le malamalama?
23 I le loto maulalo, o le a lē gata ai ina ō mai tagata pei ni mamoe i le malamalama o le lalolagi, ae o le a mulimuli atu ai foi i lea malamalama: “Ona mulimuli atu ai lea o mamoe ia te ia, auā ua latou iloa [le upu moni mai i] lona leo.” (Ioane 10:4) Ioe, ua latou fiafia e “mulimuli atu i ona tulagāaao” auā ua latou iloa o le faia faapea, o le a latou maua ai le ola e faavavau.—1 Peteru 2:21.
E Faapefea ona E Tali Mai?
□ O ā ituaiga o malamalama e lua ua faasusulu mai e Ieova?
□ Aiseā ua matuā tāua ai le faamalamalamaina faaleagaga i aso nei?
□ I le ā le itu na avea ai Iesu ma “malamalama tele”?
□ O le ā ua taʻu mai e le mataupu 1 o le Ioane ia i tatou e faatatau ia Iesu?
□ O ā meaalofa ua solo atu ia i latou o ē mulimuli i le malamalama o le lalolagi?
[Fesili mo le Suʻesuʻega]
[Ata i le itulau 10]
Na taʻua e Simeona Iesu “o le malamalama e faamalamalama aʻi nuu ese”