Ia Papatiso! Ia Papatiso! Ia Papatiso!—Ae Aiseā?

“I LE vaitaimi o ni nai masina sa ou papatisoina ai le sili atu i le sefulu afe tane, fafine, ma tamaiti.” Na tusi mai ai le misionare Jesuit o Francis Xavier e tusa ai ma lana galuega i le malo o Travancore i Initia. “Sa ou alu atu mai lea nuu i lea nuu ma fai i latou ma Kerisiano. Ma i so o se mea lava ou te iai ou te tuua ai lava se kopi o a matou tatalo ma faatonuga i le gagana a le atunuu.”

Ona o le uunaia o ia i tusi a Francis Xavier na faatonu atu ai e le Tupu o Ioane o Potukale tagata ina ia faitau mai i so o se pulelaa o lona malo na faatonuga. O le tusi o Ianuari 1545 na faatoʻā uma ona siiina mai sa faamaonia e fai ma tusi faitau ma faasalalau atu. O le ā le iʻuga? Na tusi mai Manfred Barthel i lana tusi The Jesuits—History & Legend of the Society of Jesus e faapea: “E leʻi leva lava, o le toatele o tagata aʻoga i Europa, ‘na tootutuli ma fetagisi,’ ona o le fia ō atu i Initia ina ia faaliliu tagata faapaupau.” Na ia faaopoopo mai: “Sa leʻi mafaufauina e i latou i lena taimi faapea e iai foi nisi mea e manaomia e sili atu na i lo tagata e toalua e faatulutuluina le vai paia i tagata ma se taga o sāvali ina ia faaliliuina ai le atunuu atoa.

O le ā moni lava sa faataunuuina e ala i lenei faaliliuga o le toatele? Na lipotia moni mai e Jesuit Nicolas Lancilloto ia Roma e faapea: “E iai mafuaaga lē lelei ua papatisoina ai le toatele o i latou. Sa faamoemoe pologa o Arapi ma Hinitu e maua mai so latou saolotoga e ala i le papatisoina po o le mauaina o se puipuiga mai se matai sauā po o le mauaina o se manoa fou po o se mea e ufiufi ai le ulu. O le toatele latou te faia faapea ina ia solaese ai mai le faasalaga. . . . So o se tasi lava e taumafai e sailia se faaolataga e ala i o latou talitonuga malolosi i a tatou aʻoaʻoga e manatu iai o se vale. O le toatele o i latou faatoʻā uma lava ona papatiso ua avea nei ma aposetate ma ua toe foi atu lava i a latou aʻoaʻoga faapaupau sa iai muamua.”

I na aso sa iai foi le manaoga i tagata folau mai Europa ina ia faaliliuina tagata faapaupau ma ia papatisoina. Ua faapea mai na papatisoina e Chistopher Columbus uluai tagata “Initia” na ia mauaina i le Karipiane. Na fai mai foi le The Oxford Illustrated History of Christianity e faapea: “Na faatomuaina e le emeperoa o le malo o Sepania le faaliliuina o le faitau aofai atoa o tagatanuu. I le faaiʻuga o le senituri lona sefuluono, o le toʻa 7,000,000 o tagata Initia o le emepaea o Sepania, ua taʻua o Kerisiano. I nuu sa iai le fuainumera faamaumauina o tagata ua faaliliuina (o Pedro de Gante, o se aiga o le emeperoa o Charles V, lea na faatasi atu i misionare, na ia taʻu atu na ia papatisoina le toʻa 14,000 faatasi ma le fesoasoani a se tagata e toatasi i le aso e tasi,) o loo faamaonia sa leʻi mafai ona faia ni uluai aʻoaʻoga loloto.” O lena faaliliuina faatagāfai sa  na ona faia e ala i le soonafai faamalosi, le faasaunoa, ma faiga sauā.

O le faatāuaina o papatisoga sa faaosofia ai nei tagata folau ma misionare. I le 1439, na faailoa mai ai e Pope Eugenius IV se iʻugafono mai le Fonotaga i Florence e faapea: “O le Papatisoga Paia e tuu i le tulaga muamua i sakalameta, talu ai ona o le faitotoa o le ola faaleagaga; ona o lena ua faia aʻe ai e i tatou ni sui o Keriso ma ē aufaatasi ma le Ekalesia. Ma talu ai ua oo mai le oti i tagata uma ona o le uluai tagata e toatasi, e lē mafai la ona tatou ulu atu i le malo o le Lagi seʻi vagana ua toe fanauina i tatou i le vai ma le Agaga Paia.”

E ui i lea, ua mapuna aʻe se finauga, i le pe na o le papatisoga o ai e aogā. Na taʻua e le The Encyclopedia of Religion e faapea: “Talu ai ona sa avea foi le papatisoga o se gaoioiga faavae mo le ulu atu i le lotu a le atunuu, sa vave ai ona avea le papatisoga o se aiā mo le tele o lotu sa tauvā, sa taʻua na lotu e i latou lava o le lotu moni ma tuuaʻia ai isi lotu ona o a latou aʻoaʻoga tetee ma le fevaevaeai. O fesuisuiaiga o sauniga o le papatisoga sa lē mafai ona alofia.”

Ae peitai, sa faatinoina le papatisoga, a o leʻi faavaeina le faatuatuaga, po o le lotu Kerisiano. Sa faia i Papelonia ma Aikupito anamua, i le vai malūlū o le Naila lea na manatu e faateleina ai le malosi ma faatumauina ai pea le ola e aunoa ma le oti. Sa faapena foi ona talitonu tagata Eleni faapea o le papatisoga e mafai ona toe faafouina ai po o le mafai ona maua ai le ola e lē mafai ona uma mo lē e papatiso. Sa faatinoina e le ituaiga lotu Iutaia i Qumran le papatisoga ina ia taliaina ai tagata i totonu o a latou faapotopotoga. Sa manaomia ai faapea o tagata o Nuu Ese ua liliu i le Lotu Iutaia, e ao ona peritomeina ma i le fitu aso mulimuli ane ai, e tatau ona papatisoina e ala i le faatofuina i luma o molimau.

E manino lava, e sili atu ona tele le tāua ua faia e le papatisoga i le tele o tausaga ua mavae. Ae faapefea i aso nei? Pe o se mea ua talafeagai i o tatou aso? Afai o lea, aiseā? Pe e tatau moni ea la ona e papatiso?