Ola aʻe ma le Faalapotopotoga a Ieova i Aferika i Saute

E pei ona taʻua e Frans Muller

INA ua ma faalatalata atu ma loʻu uso matua o Tavita i le tasi afiafipo i se nofoaafi e masani ona ma ō ai i Cape Town, sa faateʻia i maʻua ina ua vaaia se faailoga “Na o Tagata Papaʻe.” I le 1948 na manumalo ai le Nationalist Party i le palota ma na aumaia ai le tulafono o le faanonofo eseese o tagata.

O le mea moni, ua leva ona amataina le faaeseesega o ituaiga i Aferika i Saute, e pei ona sa iai i le tele o atunuu o Aferika i taimi o le kolone. Ae i le taimi lenei ua faamalosia e le tulafono, ma ua matuā lē faatagaina ai se toe femalagaai faatasi ma ni tagata uli o Aferika i Saute. I le fasefulu ma le lima tausaga mulimuli ane ai, ua lē toe pulea e lenei faaeseesega tagata.

I le vaitaimi atoa o le faatulafonoina o le faaeseesega, lea na tuuina mai ai se luʻi i le faasalalauina atu o la tatou faiva i le auala tatou te mananao ai, sa ou auauna ai o se faifeau sauatoa a Molimau a Ieova. I lenei taimi, i le 65 o oʻu tausaga, e mafai ona ou toe tepa ai i tua i le ofoofogia o le tuputupu aʻe o le faalapotopotoga a Ieova i le itu i saute o Aferika, ma ua ou fiafia tele i le faaeaga o loʻu iai faatasi i lea tuputupu aʻe.

O se Meaalofa Faa-Kerisiano mai Loʻu Aiga

A o talavou loʻu tamā, sa manaomia o ia e faitau leotele le Tusi Paia i taeaopo taitasi i le tamā o loʻu tamā. I lea taimi na atiina aʻe ai e Tamā se alofa loloto mo le Afioga a le Atua. Ina ua ou fanau mai i le 1928, sa auauna ai loʻu tamā i se fono a le ekalesia o le Dutch Reformed i Potgietersrus. I lena lava tausaga na avatu ai e le uso o loʻu tamā ia te ia se kopi o le tusi The Harp of God.

Ae peitai, na fai atu Tamā ia Tinā e susunu le tusi, fai mai o ia o se tusi mai se vaega faalotu. Peitai sa teuina e loʻu tinā le tusi, ma i le isi aso ina ua tago i ai Tamā, sa matala tonu lava i le ulutala “Pe Faapuapuagaina ea e le Atua se Tasi?” E ui ina ia manatu faapea e sese Tagata Aʻoga o le Tusi Paia, e pei ona taʻua ai Molimau a Ieova i lena taimi, ae na iʻu ina manumalo lona fia iloa, ma amata loa ona faitau. Sa lē mafai ona ia taofia le faitauina o le tusi. I le vaveao ina ua faatoʻā alu e moe, na fai mai o ia: “Tinā, e ui lava ina ou lē fiafia i ai, ae o loo ia i latou le upu moni.”

I le aso na sosoo ai, na malaga ai Tamā i lana pasika mo le 30 maila ina ia maua mai nisi tusi mai Tagata Aoga o le Tusi Paia e latalata ane. E faitau pea lava pea seʻi oo i le po i aso taitasi. Sa ia taumafai foi e faatalitonuina le faifeau o le lotu Dutch Reformed e uiga i upu moni o le Tusi Paia ua ia aʻoaʻoina, ma lona faamoemoe o le a faia e le lotu ni suiga. Sa iʻuvale ana taumafaiga, o lea na ia faamavae ai mai le ekalesia ma amata loa ona ia talaʻi atu ma le maelega. Sa avea le upu moni o le Tusi Paia o se mea e sili ona tāua i lona olaga, ma o se mea e pito sili ona tāua i lo matou aiga. O le siomaga lena sa ou ola aʻe ai.

 Mulimuli ane, na avea Tamā ma paeonia, po o se faifeau sauatoa. Sa ia faimalaga e talaʻi i mea mamao i se taavale e taʻua o le Model T Ford. Ina ua mavae ni nai tausaga se lua, na faamalosia o ia e manaoga o lona aiga ua faatoateleina ina ia taofi lana galuega paeonia, peitai sa ia tumau pea ma le aasa i le galuega talaʻi. I nisi Aso Sa matou te malaga ai mo le 60 maila [90 kilomita] ina ia talaʻi faatasi ma ia i le aai o Pietersburg.

Se Pisinisi Faamanuiaina

Sa tatalaina e Tamā se tamai faleoloa. E leʻi leva lava ae faaluaina le telē, ma sa tatalaina ai foi ma se faleoloa lona lua. E leʻi leva ae ō atu nisi o faifaatoaga mauoloa ina ia faipisinisi faatasi ma Tamā, ma sa tuufaatasi loa i latou ma faia se faleoloa o oloa siiatoa, faaopoopo i ai ma nisi faleoloa se ono e salalau lava i lea vaipanoa.

O nisi o oʻu uso matutua sa faatasi atu i ai i le taumafaiga o le pisinisi, ma i le taimi lena na maua ai e i latou le avanoa e avea ai ma ē mauoa. Ae peitai, sa amata ona faaletonu lo matou itu faaleagaga. Ua amata ona sili atu ona matou talia uō faalelalolagi ma tuaoi, o ē latou te valaauliaina i matou i patī. I le vaai atu i le tulaga mataʻutia, na taloina ai e Tamā se talanoaga a le aiga ma faaiʻu ai loa e faatau atu le pisinisi ae ō atu i Pretoria ina ia faateleina ai le sao i le auaunaga ia Ieova. E na o le tasi le faleoloa na ia taofia, ma o loo tausia ma vaaia e tagata faigaluega.

Sa amata ona paeonia oʻu uso matutua o Kusi ma Tavita, na faatasi atu foi i ai ma loʻu tuafafine matua o Lina. I le masina e tasi i le 1942, sa faaaluina ai e tagata e toasefulu o lo matou aiga le aofaiga o itula e 1,000 i le galuega talaʻi. O le tausaga lena na faatinoina ai le tuuina atu o loʻu ola ia Ieova e ala i le faatofuina i le vai.

Le Pogai na Vave Tuua ai Laʻu Aʻoga

I le 1944, a o matuā aasa le Taua Lona Lua a le Lalolagi, na fesiligia ai aʻu e se ovasia femalagaai o Molimau a Ieova, po o oʻu fuafua e ulu atu i le galuega paeonia. Na ou tali atu “Ioe, pe a uma laʻu aʻoga maualuga i le toe lua tausaga.”

I le faaalia o manatu o le toatele o Molimau a Ieova i lena taimi, na ia lapatai mai ai: “Ia faaeteete ia aua neʻi oo mai Amaketo a o loo avea pea oe ma talavou aʻoga na i lo le paeonia.” Talu ai ou te lē manao e tupu lena mea, sa taofi loa laʻu aʻoga ma ulu atu i le galuega paeonia ia Ianuari 1, 1945.

O loʻu tofiga muamua lava o Vereeniging, e latalata i Johannesburg, ma aʻu paga o Piet Wentzel ma Danie Otto. E masani lava ou te faaaluina le sili atu i le 200 itula i le masina. Ina ua faagasolo le taimi, na siitia atu ai Piet i le aai o Pretoria, a o Danie ua taofi lana paeonia ina ia fesoasoani i lona tamā matua i lana faatoaga. Na tuua ai na o aʻu lava le Molimau e tausia suesuega faale-Tusi Paia e 23 i Vereeniging.

E leʻi leva mulimuli ane, ae ou mauaina se tusi mai le ofisa o le lālā ua tofia aʻu i Pretoria. E ui lava ou te leʻi malamalama i le pogai mo lenei tofiga fou i lea taimi, ae na ou iloa mulimuli ane e lē o se mea poto le tuua na o se tagata ua leai se poto masani e 17 ona tausaga na o ia. O loo oʻu manaomia atili pea ona aʻoaʻoina ina ia ou lē faavaivai ai.

Ina ua mavae laʻu auaunaga i Pretoria ma ua maua ai le poto masani sa manaomia, na valaaulia ai aʻu e avea ma paeonia faapito. Na ma fuafuaina ma  Piet Wentzel ina ia tuuina atu se toleniga aogā mo faifeau talavou o ē ua ō mai i Pretoria e paeonia ai. I lena taimi na tofia ai Piet e avea ma ovasia femalagaai i le oganuu. Na mulimuli ane faaipoipo Piet i loʻu tuafafine o Lina, ma o loo la auauna faatasi nei i le ofisa o le lālā i Aferika i Saute.

Ia i latou ia na ō mai e paeonia i Pretoria sa sau ai Martie Vos, o se tuafafine talavou lalelei o lē na ola aʻe i se aiga Molimau. Na fetosinaai lo ma alofa o le tasi i le isi, ae o le taimi lena o loo ma laiti pea, e laiti tele mo le faaipoipo. Ae e ui i lea, ina ua maua mai ni o ma tofiga e ō ai i nisi nofoaga, sa faaauau pea ona ma fesootai e ala i fetusiaiga.

Le Auaunaga i Peteli ma le Aʻoga i Kiliata

I le 1948, na valaaulia ai aʻu ou te auauna i le ofisa o le lālā o le Sosaiete o le Olo Matamata i Cape Town. I lea taimi, e matuā leai lava ma se fale e nonofo faatasi ai le toʻa 17 o i matou ia sa galulue i ofisa lē tumau e tolu ma le falegaosimea laitiiti e latalata ane. O nisi o i matou sa nonofo faatasi ma aiga, a o isi sa nonofo i fale mautotogi.

E ō mai uma lava sui o le aiga Peteli e toʻa 17 i taeao taitasi o aso faigaluega mo le faia o le tapuaiga i le potu e sui ai lavalava i le tamai falegaosimea. O le toatele o i matou e fai lava e i matou a matou meaʻai o le aoauli. Pe a uma le galuega i lea aso atoa, ona matou faimalaga loa lea i vaega eseese o Cape Town i le mea o loo nofo ai le tagata ia. I se tasi la o malaga o ia faigamalaga, e pei ona sa taʻua muamua, sa faateʻia i maʻua ma loʻu uso o Tavita i le faailoga o loo faasilasila mai e faapea, “Na o Tagata Papaʻe.”

Ina ua faatoʻā ou taunuu lava i le ofisa o le lālā i Cape Town, na ou iloaina ai e tele naunau ni mea e ao ona ou aʻoaʻoina, o lea na ou fesili ai i le Uso o Phillips, o lo matou ovasia o le lālā: “O le ā e tatau ona ou faia ina ia ou iloaina ai mea fou?”

Na ia tali mai, “Frans, aua le popole e uiga i le iloaina o mea fou. Tau lava o le taumafai atili!” Sa ou taumafai soo e faia lena mea, ma na ou aʻoaʻoina faapea e ala i le mulimuli atu i le auala ua sauniunia ai e le faalapotopotoga a Ieova meaʻai faaleagaga ma taʻitaʻiga, o le a faaauau ai pea ona ola aʻe se tasi ma le faalapotopotoga.

I le 1950, na valaaulia ai aʻu e auai i le vasega lona 16 a le Aʻoga Faale-Tusi Paia a le Olo Matamata i Kiliata, o le toleniga mo misionare. Na faia le aʻoga i lena taimi i South Lansing, Niu Ioka, e tusa ma le 250 maila [400 kilomita] i le itu i matu o Brooklyn, i Niu Ioka. A o galue lē tumau i le ofisa ulu o Molimau a Ieova i Brooklyn, na ou iloaina ai o le ogātotonugalemu lea o le faalapotopotoga vaaia a Ieova. O le tuutoina atu atoatoa a i latou na taʻimua i inā na faatumuina ai aʻu i le talisapaia loloto mo le faalapotopotoga a Ieova.

Le Faaauauina o Laʻu Faiva

Ina ua ou toe foi atu i Aferika i Saute, na tofia ai aʻu e avea ma ovasia femalagaai i le itu i matu o Transvaal, le mea sa ou ola aʻe ai. Ina ua mavae se fetusiaiga mo le ono tausaga, ona ma faaipoipo ai lea ma Martie ia Tesema i le tausaga e 1952, ma na ma faatasi ai i le galuega femalagaai. Na avea o se faamafanafana loto ia i maʻua le talisapaia e o ma uso Kerisiano o a ma asiasiga.

Mo se faaaʻoaʻoga, i se tasi taimi a o ma auauna ai i se faapotopotoga i se oganuu e iai faatoaga, sa ma nonofo ai i se aiga o lē na faamalie mai ia i maʻua ona o le leai o se suāsusu mo le ti po o le kofe. Na ma iloaina mulimuli ane na faatau atu la latou povi e maua ai le suāsusu ina ia maua mai ai se tupe e lava mo le faatauina o le penisini e ave ai maʻua i isi vaega o le latou oganuu e molimau atu ai i isi faifaatoaga. Maeu lo ma alolofa i ia uso!

Sa iai ni taimi na ou lagona ai ua ou lē lavatia le galuega matagaluega, ae maise lava pe a feagai ma faafitauli e aofia ai tagata ua matutua. I se tasi taimi sa oo ai ia te aʻu se lagona o le faatafetafea ese ma i lea, na ou fai ai ia Martie ina ia aua neʻi faateʻia o ia pe afai o le a toe tofia i maʻua i le galuega paeonia talu ai ona o le lē lava o loʻu poto masani. Sa ia faalototele mai ia te aʻu faapea, e fiafia lava o ia e auauna i so o se galuega, pau lava le mea ia ma tumau pea i le auaunaga sauatoa.

 Seʻi manatu i le faateʻia o i maʻua ina ua ma taunuu i le isi faapotopotoga ma maua mai ai se tusi e taʻu mai ai se isi tofiga ina ia auauna i le galuega o le ovasia itumalo. Mo le toetoe lava lua tausaga, na ma malaga ai mai Aferika i Saute ma Namibia, sa muaʻi taʻua o Aferika i Saute i Sisifo. E ui i lea, ona o le tulaga o le faanofo eseese, sa masani ai la ona faafaigata le galuega. Sa faafitia soo le faatagaina o i maʻua ina ia ulu atu i aai o tagata uli ma i nisi taimi e lē mafai ai foi ona maua se faatagaga mo ni fonotaga.

I le 1960, mo se faaaʻoaʻoga, na maua mai ai se faatagaga e faia se tauaofiaga itumalo i le aai o Soweto. I lena taimi, ua uma ona totogi e uso uli mai isi faapotopotoga mamao ni pasese mo nofoaafi ma pasi e ō mai ai, ae ina ua faalogo i ai le malo i la matou fuafuaga, na latou toe faalēaogaina le faatagaga. Na matou faalatalata atu ma le faautauta i se taʻitaʻi faaleuō i se aai e tusa ma le 12 maila [20 kilomita] i le isi itu o Johannesburg. Sa agalelei mai o ia ma faaavanoa mai se fale e sili atu ona lelei, ma sa matou maua ai se tauaofiaga ofoofogia, sa olioli ai le sili atu i le 12,000 ē na auai!

Maeu se suiga o tulaga ua iai i tausaga ua mavae atu nei! O lea, ua aveesea nei le tulafono e uiga i le faanonofo eseeseina o tagata, ua mafai nei ona matou saoloto e faapotopoto faatasi i so o se mea sa nonofo ai tagata uli, tagata papaʻe, afakasi po o tagata Initia. Ua mafai nei ona nonofo faatasi tagata uma o so o se ituaiga ma olioli faaleuso. E na o le eseese lava o gagana e taaʻina ai le tagata po o fea lava le mea e fia nofo ai.

Se Lesona Tigā

I tuā lava i le 1947, na faia ai e loʻu tamā se mea sese tele. O lona faleoloa lea na tū i le pe ā ma le 120 maila [200 kilomita] mai le mea e nonofo ai ma Tinā, na gau ona o le lē faamaoni o lē na vaaia, o lea na toe foi atu ai na o ia e toe tausia lava e ia lona faleoloa. Na iʻu ai ina paʻū atu o ia i le tofotofoga ona o le umi o le taimi na nonofo valavala ai ma Tinā. O le iʻuga, na faateʻaina ai o ia.

Sa faamautinoa mai ai e lenei mea ia te aʻu i se auala patino e faapea, ua lē lava le na o le maelega mo le upu moni o le Tusi Paia. O tagata uma e tatau ona pipii mau i mataupu silisili o le Tusi Paia. (1 Korinito 7:5) Ina ua mavae le tele o tausaga, na toe faaeaina mai Tamā e avea o se tasi o le vaega o le faapotopotoga Kerisiano ma auauna ai ma le faamaoni seia oo i lona oti i le 1970. Na tumau pea i le faamaoni loʻu tinā pele seia oo ina ua maliu i le 1991.

Isi Faamanuiaga Atili

I le 1958, na ma auai ai ma Martie i le tauaofiaga tele sa leʻi faapea ona faia muamua e Molimau a Ieova, i le Yankee Stadium ma le Polo Grounds i Niu Ioka. Sa matuā faatumulia ai i maʻua i le olioli i le avea ma vaega o le faalapotopotoga ofoofogia a Ieova. I le iai i lena motu o tagata e sili atu i le 253,000 i le afiafi o le Aso Sa, o se mea e lē mafai ona ma faagaloina. I inā, ia i maʻua, o le vaaiga moni lea o le ‘motu o tagata e toatele mai atunuu uma’ ua auaufaatasi ma le filemu. (Faaaliga 7:9, 10) Sa nofo ai pea Martie i Niu Ioka e auai i le Aʻoga i Kiliata, ae sa ou toe foi i le galuega o le ovasia itumalo i Aferika i Saute.

I le 1959, ina ua toe foi mai Martie mai le Aʻoga lona 32 i Kiliata, na valaaulia ai i maʻua ina ia auauna i le ofisa o le lālā i Aferika i Saute, ma i le taimi lena, na tū latalata ane i Elandsfontein i le itu i sasae o Johannesburg. I le tele o tausaga, na ou vaaia ai le agaʻigaʻi i luma o le faalapotopotoga i le tele o auala, ae maise lava i lona tuputupu aʻe i le alofa ma faalogona mafana. Sa ou aʻoaʻoina ai faapea e taʻitaʻia e Ieova lana faalapotopotoga e ala ia Iesu Keriso ma o le a faaaogā i latou o ē faia i latou lava ia talafeagai ai.

I le 1962, na ou toe foi ai i Brooklyn, Niu Ioka, ina ia auai i le aʻoga o le toleniga mo le lālā mo le sefulu masina. Na faamaonia le fesoasoani o lenei fuafuaga ina ua oo i le 1967, na tofia ai aʻu e avea ma ovasia o le lālā i Aferika i Saute. I le 1976, na tofia ai Komiti o le Lālā, o lea la ua paʻū ai le avega tauave o le faia o faaiʻuga tāua i Aferika Saute i toeaina Kerisiano e toalima ua iai le poto masani.

Ola i Lalo o le Tulafono e Uiga i le Nonofo Eseese o Tagata

O tulafono o le nonofo eseese na aafia ai le galueaiina o la matou lālā. Ina ua fausiaina le  Fale Peteli i Elandsfontein i le 1952, sa manaomia ai e le tulafono se fale faaopoopo i le pito i tua ina ia nonofo ai uso lanu uli ma afakasi. Sa manaomia foi e le tulafono le ʻaai eseese mai o tagata papaʻe mai i fale o tagata Aferika. Mulimuli ane, sa fuafuaina i latou ina ia ʻaai i le umukuka i le Peteli. O le faatulagaga lena o le mea e ʻaai ai ina ua ma oo atu i Peteli i le tausaga e 1959. Sa matuā tetee loʻu loto i le tuueseesega o tagata e faavae i lanu.

E leʻi leva mulimuli ane ae lē toe faatagaina e le malo o tatou uso uli e nonofo i le fale sa i le pito i tua o le Fale autū o le Peteli. Sa tatau ai la i nei uso ona nonofo i aai o tagata uli e tusa ma le 12 maila [20 kilomita] le mamao. O nisi e nonofo i fale mautotogi ma isi i fale mo tane nofofua. Sa faaauau pea lenei tulaga lē talafeagai mo le tele o tausaga.

Faatelega o Peteli

Na faatelēina le Fale Peteli i Elandsfontein i se taimi e leʻi leva atu. Ina ua mavae le faatelēina faatolu, na matou ausia ai le mea e gata mai ai le fanua. Na faatonu mai e le Vaega Pule i matou ina ia sailia se isi fanua fou i se oganuu e faamoemoe o le a faatagaina ai e fausia se fale Peteli ina ia mafai ona nonofo ai foi o tatou uso uli. E tatalo i taeao taitasi le aiga Peteli ia Ieova ina ia tatalaina le auala mo lenei fuafuaga.

Maeu se aso o le fiafia na iai ina ua matou mauaina se fasi fanua talafeagai i le tuaoi o Krugersdorp, i le itu i sisifo o Johannesburg! Ae e ui i lea, sa toe faatonuina foi i matou e toe fausia se fale e ese mai ai mo o tatou uso uli. Sa matou faia e tusa ma lea ae sa leʻi maua se faatagaga mo le sili atu i le 20 tagata uli e nonofo ai i inā. Ma le loto faafetai, e tusa o le 1985, na amata ai ona suia le tulaga. Na faafaigofieina e le malo ana tulafono tatau o le nonofo eseese, ma na valaauliaina ai le toatele o tagata uli, afakasi, ma uso Initia foi ina ia ō mai e auauna faatasi ma i matou i le Peteli.

I le taimi lenei ua matou fiafia, o se aiga Peteli autasi, i le nonofo faatasi o tagata taitoatasi, e tusa lava po o le ā le lanu po o le ituaiga, e mafai ona nonofo i so o se fale latou te filifilia. E faapena foi, ina ua mavae le tele o tausaga o fetaiaiga, ua matou maua ai se faatagaga faaletulafono e avea ai o se lotu. O le auaufaatasiga faaletulafono a tagata o le atunuu ua mafai nei ona faia ma ua lesitalaina nei o “Molimau a Ieova i Aferika i Saute.” I le taimi nei ua iai o matou lava uso e faia faaipoipoga, ae i oganuu e nonofo ai tagata uli, ua salalau ai Maota o Malo.

Maeu se agaʻigaʻi i luma o le faalapotopotoga a Ieova talu mai uluai aso a o oʻu auauna ai i le ofisa o le lālā i Cape Town! Mai se aiga toaitiiti e toʻa 17 e aunoa ma se Fale Peteli, ua iai nei le aiga Peteli i lona tuputupu aʻe e sili atu i le 460, ua iai le fale Peteli faaonaponei ma komepiuta e ofoofogia mea e faia ai, o masini lolomi tusi, ma le Aiga Peteli matagofie! Ioe, ua ia te aʻu le faaeaga o le ola aʻe faatasi ma le faalapotopotoga a Ieova i Aferika i Saute. Ua iai nei se faatelega mai le tusa ma le 400 le au talaʻi o le Malo ina ua ou faatoʻā amata i le faiva i le 50 tausaga ua mavae i le toetoe lava 55,000 i le taimi nei!

Ou te faafetai ai ia Ieova ona ua ou maua, mo le 40 tausaga ua mavae, se avā e lagolagosua mai ia te aʻu. “Ua taumasuasua laʻu ipu.” (Salamo 23:5) Ua ma loto faafetai ma Martie i le avea ma vaega o le faalapotopotoga o loo taʻitaʻia e le agaga o Ieova, ma o loo ma tumau pea ma le maumauai e faaauau i le auaunaga ia Ieova i lona maota, i Peteli, ma ō faatasi ma lana faalapotopotoga o loo agaʻi pea i luma.

[Faafanua le itulau 19]

(Tagaʻi i le lomiga mo le ata atoa)

ANGOLA

ZAMBIA

ZIMBABWE

BOTSWANA

NAMIBIA

SWAZILAND

AFERIKA I SAUTE

LESOTHO

SĀʻIA

Pretoria

Johannesburg

Cape Town

Port Elizabeth

VASA ATALANI I SAUTE

VASA INITIA

MOZAMBIQUE CHANNEL

[Ata i le itulau 20]

O Piet Wentzel ma Frans Muller (i le itu agavale) i le galuega paeonia i le 1945

[Ata i le itulau 23]

O Frans ma Martie Muller