Pe e Tatau ona E Papatiso?

I LE tolu tausaga ua mavae, toeitiiti lava tasi le miliona tagata na papatisoina e Molimau a Ieova. O lona uiga o se aofaiga e 824 tagata i le aso e tasi, po o le toʻa 4 tagata papatiso i le taʻi 7 minute. Pe ua na o se mea e mulimuli atu i le maelega faalotu o le 15 ma le 16 senituri?

E leai, o nei tagata taitoatasi sa leʻi papatisoina faamalosi, e pei o se vaega o tagata e toatele ua faaliliuina, po o se iʻuga o se valaau faaoso lagona a ni failauga faalotu. Ua ala ona latou papatiso ona o le faatonuga mai le Matai ma le Taʻitaʻi o tagata Kerisiano e tatau ona fai, o Iesu Keriso. Sa latou mulimuli i tulagāaao ma feuiuiaiga na sa faamatala mai e Iesu ma ia faatinoina e ala i ona aposetolo sa ia filifilia ma toleniina.

Ina ua mavae le toetu mai o Iesu a o leʻi afio atu i le lagi, na ia tuuina atu i ona soʻo lenei poloaiga faamavae: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.” (Mataio 28:19, 20) Mai lena taimi ma agaʻi mai ai, e na o le pau lava lenei o le papatisoga i le vai o loo iai le faamaoniga a le Atua.

Ma le talafeagai ai, ua taʻu mai ia i tatou e le Tusi Paia faapea o na uluai soʻo o Keriso na fai “ma molimau ia [Iesu] i Ierusalema ma Iutaia uma lava, ma Samaria, e oo lava i le tuluʻiga o le lalolagi.” (Galuega 1:8) E pei ona sa  taʻua e Iesu, o le iʻuga o la latou galuega talaʻi ma le aʻoaʻo atu o le papatisoina lea o ē talitonu o ē o le a avea foi ma soʻo o Keriso.

O le uluai faaaʻoaʻoga faamauina o lenei mea, o lea sa tupu i Ierusalema i le aso Penetekoso i le 33 T.A. I lena taimi na ‘tū ai i luga Peteru ma le toasefulutasi’ ma lauga atu i le motu o tagata sa faatasi ai e uiga ia Iesu le Mesia. Ua taʻu mai e faamaumauga ia i tatou faapea o lana tautalaga sa ‘tuia ai o latou loto,’ ma na latou fesili ai po o le ā e tatau ona latou faia. Ona fai atu lea o Peteru: “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala.” O le iʻuga e faapea “ona papatisoina lea o e na talia lana upu ma le fiafia; o lea aso foi ua faaopoopoina ai pe tolu afe o tagata.” (Galuega 2:14-41) O faamatalaga o loo mulimuli mai ua faamautūina ai e faapea sa fetaui lelei le papatisoga o le au soʻo ona sa latou faalogo muamua i le feau faa-Kerisiano, sa talitonu i le tala lelei, ma na salamō foi.—Galuega 8:12, 13, 34-38; 10:34-48; 16:30-34; 18:5, 8; 19:1-5.

I le ā le Auala?

Ae faapefea ona papatisoina nei soʻo fou i le vai? Pe sa faia e ala i le aspersion (faatulutulu i ai sina vai i le muāulu), affusion (sasaa i ai le vai i le ulu), po o le immersion (matuā faatofuina i le vai)? O le ā ua faaalia i tala na tusia i le Tusi Paia? Talu ai na tuu e Iesu se faaaʻoaʻoga mo i tatou “ina ia . . . mulimuli atu i ona tulagāaao,” i le ā la le auala na papatisoina ai o ia?—1 Peteru 2:21.

Ua faaalia e le Tusi Paia faapea na papatisoina Iesu i le Ioritana, o se vaitafe telē. Ina ua uma ona papatisoina, “ona maliu ae loa lea o ia nai le vai.” (Mareko 1:10; Mataio 3:13, 16) O le mea moni sa faatofuina Iesu i le Vaitafe o le Ioritana. Sa papatisoina o ia e Ioane, o lē, a o saili mo se nofoaga talafeagai e faia ai papatisoga, na ia filifilia ai le Vaitafe o Ioritana i le itu e latalata i Salima “auā e tele ai vai.” (Ioane 3:23) O le faamaoniga moni o le faatofuina atoatoa i le vai o le tulaga sa faatinoina ai le papatisoga o soʻo o Iesu lea e pei ona vaaia i upu a le eunuka Aitiope. I le tali atu i le aʻoaʻoga a Filipo, na ia fai atu ai: “Faauta, o le vai; se a ea se mea e vaoia ai aʻu e aua le papatisoina o aʻu?” Ma ua tatou iloaina “ona o ifo lea o i laua uma i le vai” ma mulimuli ane “ua o ae i laua nai le vai.”—Galuega 8:36-39.

Pe o faasino atu talafaasolopito faalelalolagi i le faatinoina o le papatisoga e ala i le faatofuina o Kerisiano? O le mea moni lea. Ma e tāua ona iloa faapea o le tele o tapu lapopoa e fai ai papatisoga e talafeagai mo le faatofuina o loo iai pea i le tele o atunuu. Na faapea mai le tusi o le Ministry: “O le faamaoniga mai i eliga o le palapala ua faaalia ai le moni o le faatofuina o se auala tāua ua masani ai talu mai le uluai sefulu i le sefulufa o senituri.” Na ia faaopoopo mai e faapea: “I toēga o fale sa faaleagaina o tagata Kerisiano, ma e faapena foi i falesā ua leva o loo faaaogāina pea, e mafai ona iloa ai le talafaasolopito o le papatisoga. E valiina i ana o fanuatanu ma falesā, o ata lanu eseese i fola o fale, i puipui, i taualuga, i faatagata ma ni ata i manusikulipi o le Feagaiga Fou ua faaopoopo i ai ni faamatalaga i lenei talafaasolopito . . . Ua faaopoopo atu lenei i faamaoniga na mauaina i tusitusiga a tamā o le lotu faapea o le faatofuina i le papatisoga o se mea taatele i uluai lotu.”

Ua taʻutino mai foi e le New Catholic Encyclopedia: “Ua faamaonia e faapea o le Papatisoga i le uluai Lotu, o le faatofuina.” E lē o se mea la e ofo ai, ona ua tatou mauaina ni nusipepa o loo faaulutalaina faapenei: “Ua Toe Faia e Tagata Katoliko le Papatisoga e Ala i le Faatofuina” (The Edmonton Journal, Kanata, o Setema 24, 1983), “O le Papatisoga e Ala i le Faatofuina ua Toe Amataina e Katoliko o loo Iai i Inei” (St. Louis Post-Dispatch, Aperila 7, 1985), “E Toatele Katoliko ua Filifilia le Papatisoga e Ala i le Faatofuina” (The New York Times, Mati 25, 1989), ma le “Toe Faafouina i le Faatofuina i le Papatisoga” (The Houston Chronicle, Aokuso 24, 1991).

 Mo le ā le Fuafuaga?

Aiseā na manaomia ai e Iesu ona soʻo ina ia papatisoina? Ia, o se faailoga fetaui lelei o le tuuina atu ma o latou loto atoatoa i le Atua. Sa tatau ona talaʻia le “tala lelei” i le lalolagi aoao, ma ia fai tagata mai “nuu uma lava” ma soʻo. (Mataio 24:14; 28:19) O le uiga o lenei mea sa lē toe iai se feutagaʻiga faapitoa a le Atua ma tagata Iutaia, lea sa faia aʻe i tagata o ē sa tuuina atu ia te ia talu ina fananau mai. Sa avea Konelio ma lona aiga ma uluai tagata o Nuu Ese, po o ē e lē o ni tagata Iutaia, na taliaina le upu moni e uiga ia Iesu Keriso ma sa papatisoina loa.

O le lolomiina i lalo i le vai e faaalia ai faapea o i latou ua papatisoina ua oti i tulaga o le ola sa faatāuaina e i latou lava. O lo latou toe faatūina aʻe mai le vai sa faaatagia ai ua latou ola nei mo le faia o le finagalo o le Atua ma ua tuu faamuamua i o latou olaga, e pei ona sa faia e Iesu. (Mataio 16:24) O le papatisoina i le “suafa o le Tamā, ma le Atalii, ma le Agaga Paia” ua faaalia ai faapea ua uma ona latou aʻoaʻoina ma talia le upu moni faatatau i ai ma amanaiaina o latou tulaga. (Mataio 28:19; faatusatusa i le Galuega 13:48.) O le papatisoga e na o le uluai laasaga lena o le usiusitai i le Atua ma gauai i lona finagalo.

E lē o lagolagoina e le Tusi Paia le talitonuga lautele o lotu faapea o le papatisoga o se sakalameta, o lona uiga, o se sauniga faalelotu e maua ai e lē ua papatiso le manuia—le alofa tunoa, le faapaiaina, po o aogā faaleagaga. Mo se faataʻitaʻiga, o upu o le tusi a le ofisa o le Pope o Eugenius IV na siiina mai i le mataupu muamua sa faaauau ona faapea mai e uiga i le papatisoga: “O le iʻuga o lenei sakalameta o le faamagaloga o agasala uma, o le uluai agasala ma agasala faatoʻā faia; atoa foi ma faasalaga uma lava e ao ona faia ona o le agasala. Ona o lea, e lē toe faalavelaveina ai tagata ua papatisoina ona o le faamalieina sa latou mauaina i a latou agasala ua mavae; ma afai ua maliliu i latou ae e leʻi toe faia so o se agasala, o le a vave ona latou ulu atu i le malo o le lagi ma le vaaiga o le Atua.”

Ae peitai, sa papatisoina Iesu e ui lava “na le agasala.” (1 Peteru 2:22) E lē gata i lea, e tusa ai ma le Tusi Paia, na o le pau lava le auala mo le faamagaloina o agasala o le taulaga togiola lea a Iesu Keriso. Na uunaia e Anania Saulo o Taso: “Tulai ia, ma ia papatisoina oe, ma ia fufulueseina au agasala i lou valaau i le suafa o le Alii [o Iesu].” (Galuega 22:12-16) Ioe, e pau lava le auala talafeagai mo le faaolataga, e na o le toto lea o Iesu ma le ‘valaau i lona suafa’ i le faatuatua.—Eperu 9:22; 1 Ioane 1:7.

O le ā la le uiga o upu a Peteru o loo i le 1 Peteru 3:21? I inā o loo faapea mai: “O le faatusa foi lea mea o le papatisoga, o loo faaola mai ai nei ia i tatou, (e le o le faateaeseina o le eleele o le tino, a o le tali a le loto fuatia ifo lelei i le Atua,) i le toe tu mai o Iesu Keriso.” Na faatusatusa e Peteru le papatisoga i le tulaga o Noa ina ua faasaoina mai le vai o le Lolo. (Fuaiupu e 20) Na faaalia e Noa le faatuatua atoatoa i le Atua, ma na ia fau ai le vaa mo le faasaoina o lona aiga. (Eperu 11:7) E faapena foi, e ala i le faatinoina o le faatuatua i sauniuniga a Ieova le Atua mo le faaolataga e ala ia Keriso Iesu, e mafai ona faasaoina ai tagata i aso nei mai lenei faiga tuai o mea a le lalolagi. E tatau foi ona latou gaoioi e tusa ai ma lo latou faatuatua. E ala i le salamō mai agasala, le liliuese mai ala sese, ma le faia o se tuuina atu lē mataofiofia ia Ieova le Atua e ala i le tatalo, o se talosaga e faia i le Atua mo se loto fuatiaifo lelei. Peitai e faavae aʻe lea i le taulaga a Iesu, ma lona toetu i le lagi ina ia ofoina atu ai le aogā o lena taulaga i le Atua, ina ia faamagaloina agasala ma maua ai le faaolataga.—1 Peteru 3:22.

O le ā o le a E Faia?

Po o oe o se tasi sa auaufaatasi ma Molimau a Ieova mo se vaitaimi? Atonu ua uma ona e faia ni suiga talafeagai i lou olaga e tusa ai ma mataupu silisili o le Tusi Paia ae e te leʻi faia le laasaga o le tuuina atu ma le papatisoga. Atonu ua e manao e faia le finagalo o le Atua, ae peitai atonu e te popole o le a aumaia e le  papatisoga ia te oe ni matafaioi. O lea la, atonu e te mafaufau e fia aloese mai i avega tauave mo se vaitaimi. I le tausaga ua mavae e toetoe lava 11.5 miliona tagata na auai i le faamanatuga o le Talisuaga Afiafi a le Alii. E ui i lea, o le tumutumuga o le aofai o i latou na auai i le galuega o le talaʻiina o le tala lelei i le tausaga atoa e laitiiti ifo i le 4.5 miliona. O lona uiga, e tusa ma le fitu miliona i latou ua faaalia sina talisapaia mo le upu moni a le Atua, e ui lava e leʻi avea ma Molimau papatisoina a Ieova. O le mea moni, o nisi o i latou nei o fanau laiti ma ē fou loto naunau. Ae o nisi o i latou ua auai foi i le galuega talaʻi ae leʻi papatisoina lava. E toatele tagata o ē ua aveina i totonu le poto saʻo o le Tusi Paia e leʻi faaaogāina atoatoa e i latou sauniuniga a le Atua mo le faaolataga e ala i le papatisoina.

O se manatu tāua e ao ona manatuaina o le poto e uiga i mea manaomia a le Atua mo oe e aumaia ai matafaioi. Ua faapea mai le Iakopo 4:17: “O lenei, o le ua iloa e fai le mea lelei, a e le faia, o le agasala lea ia te ia.” Ua faaalia foi i le Esekielu 33:7-9 e faapea o le tagata o lē ua taʻuina atu i ai poloaiga ma faatonuga a le Atua, e tatau ona ia faia foi. O lea, o le fesili la e faapea, pe o iai i se tasi se alofa moni mo le Atua ma se faanaunauga moni e faafiafia o ia. O se tasi o lē ua iai lea alofa moni ma manao i se faiā faapitoa ma Ieova le Atua, e lē tatau ona taofia mai le tuuina atu atoatoa o lona ola mo ia. O se faailoga vaaia o le tuuina atu o le papatisoga lea. O se laasaga talafeagai agaʻi i le faaolataga. O tagata talitonu moni ua papatisoina.—Galuega 8:12.

O avanoa ofoofogia ua tauaaoina mai e le Atua mo ē faatuatua, ma tuu atu ia te ia, i le lalolagi fou o loo sau, e sili ona tāua i lo so o se aogā lē tumau o loo ofo mai e lenei faiga tuai o mea. O le a mou atu le mataʻu i tagata pe afai tatou te manatu i le aao malosi o le Atua. (1 Korinito 10:22; 1 Peteru 5:6, 7) E moni, o le taimi lava lenei e te fesili ifo ai ia te oe lava, e pei ona sa fesili atu ai le eunuka Aitiope ia Filipo: “Se a ea se mea e vaoia ai aʻu e aua le papatisoina o aʻu?”

[Ata i le itulau 7]

E pei o le eunuka Aitiope, po o e fesili ia te oe lava: “Se a ea se mea e vaoia ai aʻu e aua le papatisoina o aʻu?”