Hele—Puapuaga e Faavavau po o le Tuugamau Taatele?

PE NA taʻu atu ia te oe e faapea o uluai Tamā o Lotu, o faifeau i tausaga e 500-1500 T.A., ma Ē na Toefuataiina, sa latou finau mai, o le puapuaga i hele e faavavau? Afai o lea, atonu la e faateʻia oe pe a e iloaina e faapea, ua luʻia i le taimi nei lena manatu e nisi tagata aʻoga, o ē latou te faaaloalogia le Tusi Paia. I Peretania, na tusi mai ai se tasi o i latou na, o John R. W. Stott e faapea, “o loo faasino e le Tusi Paia i le itu o le faatamaʻiaga, ma o le ‘faapuapuagatiaina e faavavau o ē ola’ o se talitonuga faaanamua lea ua tatau ona faatoilaloina e le pule silisili a le Tusi Paia.”—Essentials—A Liberal-Evangelical Dialogue.

O le ā na faapogaia o ia e faaiʻu mai e faapea o le faapuapuagatiaina e faavavau e lē faavaeina mai i le Tusi Paia?

 Le Lesona o le Gagana

O lana faamatalaga muamua lava e aofia ai le gagana. Na ia faamatala mai e faapea, ina ua faasino atu le Tusi Paia i le iʻuga o le faasalaga o le malaia (“Gehenna”; tagai i le pusa i le itulau e 8), e masani lava ona faaaogā ai le upu “faaumatiaga,” o le “veape “apollumi” (ia faaumatia) ma le nauna apòleia (faaumatiaga),” i le gagana Eleni. Po o faasino atu ea nei upu i le faapuapuagaina? Ua faasino mai e Stott e faapea pe afai o le veape e faia ai se gaoioiga ma faafesootaia ai ni manatu, o le apollumi la o lona uiga o le “fasioti.” (Mataio 2:13; 12:14; 21:41) O lea, i le Mataio 10:28, lena o loo taʻua ai i le King James Version le faaumatiaina e le Atua o le “agaga atoa ma le tino i hele (Kena),” o le manatu autū la o le faaumatia lea i le oti, ae e lē i le faapuapuagatiaina e faavavau. I le Mataio 7:13, 14, ua faaeseeseina ai e Iesu le “faitotoa vaapiapi . . . le ala e tau atu i le ola,” ma le “faitotoa va tele . . . le ala e tau atu i le malaia.” Ua faaopoopo mai Stott: “O le mea lea, e foliga mai o se mea uigaese pe afai e fai mai e faapuapuagaina tagata i le faaumatiaga, ae o le mea moni e lē faaumatiaina.” Faatasi ma se mafuaaga tonu, ua faapea mai ai lana faaiʻuga: “Afai o le fasiotia, o le aveesea lea o le ola o le tino, o lona uiga la o hele e foliga mai o le aveeseina lea o le ola faaletino ma le ola faaleagaga, o lona uiga, ua matuā leai aʻiaʻi se tagata.”—Essentials, itulau 315-316.

Faamatalaina le Uiga o le Afi Faafaatusa

Peitai, e toatele tagata lotu o le a ioe faatasi ma Morris H. Chapman, o le peresitene o le Tauaofiaga a le Lotu Papatiso i Saute (Southern Baptist Convention) o lē na faapea mai: “Ou te talaʻia le hele moni faitino.” Na ia faaopoopo mai: “Ua taʻua e le Tusi Paia lea mea o le ‘lepa afi,’ ma ou te lē talitonu e mafai ona faaleleia atili lena faamatalaga.”

E moni, o le faatusa o le afi o loo faaaogāina i le Tusi Paia e ono mafai ona aumaia ai i mafaufau le ata o le faapuapuagatiaina. Ae peitai, ua taʻua e le tusi Essentials: “E leai se taumasalosalo talu ai ona ua tatou masani uma lava ma tiga matuitui pe a mū, ua tuufaatasia la e lena afi le ‘faapuapuagatiaina o ē ola’ i o tatou mafaufau. Peitai o le mafuaaga moni o le afi e lē ina ia aumaia ai se tiga, ae o le faaumatiaga tumau, e pei ona molimauina e faatafunaga uma a le lalolagi.” (Itulau 316) O le tausia pea o lena faamatalaga iloga i le mafaufau o le a fesoasoani lea ia te oe e alofia ai le faauigaseseina o manatu mai le Tusi Paia. O nisi o faaaʻoaʻoga:

E tusa ai ma i latou o ē lafo i Kena, na fetalai Iesu e faapea “o i ai e le mamate o latou ilo, e le tineia foi le afi.” (Mareko 9:47, 48) Ona o le tele o le taaʻina e ala i upu o loo i le tusi e masalomia lona moni a Judith (“O le a ia aumaia le afi ma anufe i o latou tino ma o le a latou fetagisi ona o le tiga e lē mafai ona uma.”—Judith 16:17, The Jerusalem Bible), o nisi tusitala o le Tusi Paia ua latou faapea mai o upu a Iesu o loo faatatau i le faapuapuagatiaina e faavavau. Peitai, o le tusi a Judith e lē faamaonia lona moni, e leʻi faagaeeina e le Atua, e lē o se faamaoniga moni lea mo le faamautuina o le uiga o tusitusiga a Mareko. I le Isaia 66:24, le tusi e foliga mai na faasino atu i ai Iesu, ua faapea mai o le afi ma ilo ua faaumatiaina tino oti (“tino o tagata oti,” fai mai ai Isaia) o fili o le Atua. E matuā leai lava se faaupuga o se faapuapuagatiaina o tagata ola e faavavau i upu a Isaia po o upu foi a Iesu. O le afi ua faatusaina i ai le faaumatiaga e faavavau.

O loo tautala le Faaaliga 14:9-11 i nisi o ē “puapuagatia foi ia i le afi ma le teio . . . O le asu foi o lo latou puapuaga e alu ae e faavavau faavavau lava.” * Pe ua faamaonia mai ai i lenei mea se faapuapuagaina e faavavau o ē ola i se afi i hele? O le mea moni, na pau lava le mea o fai mai ai lenei mau e faapuapuagatiaina ē amioleaga, ae e lē o faapea mai ua faapuapuagatiaina i latou e faavavau. O loo faapea mai le mau o le asu—o le faamaoniga lena o le faia e le afi o lana galuega i le faaumatiaga—e faaauau e faavavau, ae lē o se faapuapuagatiaina i se afi.

Ua faapea mai le Faaaliga 20:10-15, “i le lepa afi ma le teio, . . . e puapuagaina ai i latou i le ao ma le po e faavavau faavavau lava.” I le faitauga muamua, atonu e foliga mai e faamaonia le faapuapuagaina o ē ola i se afi, peitai e matuā leai  lava. Aiseā? I le tele o isi mafuaaga, o “le manu feai ma le perofeta pepelo” ma le “oti ma Seoli [Heitisi]” o le a iʻu i le mea ua taʻua o “le lepa afi.” E pei ona faigofie ona e faaiʻua e faapea, o le manu feai, le perofeta pepelo, le oti, ma Seoli [Heitisi] e lē o ni tagata moni; o le mea lea, e lē mafai ai ona latou lagonaina se faapuapuagaina e faavavau. Na i lo lena, na tusi G. B. Caird i le A Commentary on the Revelation of St. John the Divine, “o le lepa afi” o lona uiga “o le faaumatiaga ma le matuā lē toe iai.” O lenei iloa e ao ona faigofie ona mauaina, auā i le Tusi Paia lava ia ua taʻua ai e uiga i lenei lepa afi: O lona uiga o le lepa afi, “o le oti faalua lea.”—Faaaliga 20:14.

Tuueseeseina o Aʻoaʻoga e Lua a Faifeau

E ui lava i nei finauga o loo taofia e le toatele o ē talitonu e tusa ai ma lena “faaumatiaga” e lē uiga i le mea ua fai mai ai le upu, ae e uiga i le faapuapuagatiaina e faavavau. Aiseā? Ua taaʻina o latou mafaufauga i le talitonuga o se isi aʻoaʻoga faalelotu e ōgatasi ma lea i le afi i hele—le aʻoaʻoga o le ola pea o le tagata (solu). Ma talu ai ua faafaileleina e lotu nei aʻoaʻoga e lua mo le tele o senituri, atonu ua latou manatu ai e faapea o nei mau o loo tautala i le faaumatiaga, e faauiga moni lava i le faapuapuagatiaina e faavavau. I nei mea uma, e lē mafai ona iʻu ai le tagata ola (solu)—o le manatu lea o le toatele.

Ae seʻi mātau le manatu na faia e le faifeau o le Lotu Egelani o Philip E. Hughes fai mai: “I le finau mai e faapea e na o le solu o le tagata ola e lē mafai ona oti, o le taofia i lea tulaga e lē faamaonia i aʻoaʻoga a le Tusi Paia, auā i le vaaiga faale-Tusi Paia o le foliga faaletagata e masani lava ona vaaia e tuufaatasia ai le faaleagaga ma le faaletino. . . . Na lapataia e le Atua i le amataga, e tusa ai ma le laau faasāina, ‘O le aso e te ʻai ai e te oti ai lava,’ sa taʻu atu i le tagata o se foafoaga faaletino moni ma le faaleagaga—pe afai na te ʻaina, o le a ia oti. Sa leai se faamatalaga e faapea o iai sona vaega e lē mafai ona oti ma o le a oti foi na o sona vaega.”—The True Image—The Origin and Destiny of Man in Christ.

 E tali tutusa ma le faamatalaga a le faifeau o Clark Pinnock e faapea: “O le manatu e faapea [o le tagata ola (solu) e lē oti] ua taaʻina ai aʻoaʻoga a lotu ua leva, ae e lē faale-Tusi Paia. E lē o aʻoaʻoina mai e le Tusi Paia le ola pea o le solu.” Ua faamautū mai e le Esekielu 18:4, 20 ma le Mataio 10:28 lenei mea. Ae e lē gata i lena, na tautala Iesu lava ia i le oti o lana uō o Lasalo o loo ‘malōlō o ia,’ po o loo moe. Na fetalai Iesu e faapea, “ou te alu e fafagu ia te ia.” (Ioane 11:11-14) O lea o le tagata ola, po o le solu faaletagata, o Lasalo sa oti, ae pe a mavae sina taimi, e mafai ona toe faatūina, toe faafoisia mai i le ola. Ua faamaonia e mea moni lena mea. Na toe faatūina e Iesu Lasalo mai le oti.—Ioane 11:17-44.

E faapefea i nei manatu ona aafia ai le aʻoaʻoga o le faapuapuagatiaina e faavavau? I tuā lava i le senituri lona 17, na tusia ai e le tagata tusitala o William Temple: “E iai [mau] o loo tautala i le lafoina i le afi e mumū pea. Ae peitai, afai tatou te lē taliaina nei mau ma le uluai manatu e faapea o le mea ua lafoina i totonu e lē mafai ona faaumatia, o le a tatou mauaina la se faaiʻuga e faapea, o le mea o loo i totonu o le a lē mū e faavavau, ae o le a faaumatia.” O lena iloiloga saʻo e tumau pea lona moni, auā o le mea moni lena o loo aʻoaʻo mai e le Tusi Paia.

Ma le leai o se faafitia, e iai ni mafuaaga malolosi e tatau ai ona e fesiligia le manatu o le faapuapuagatiaina e faavavau o le tagata i hele. Pe atonu e te manao e te oo i tala atu o na fesili ma mulimuli i le fautuaga a le polofesa i aʻoaʻoga faafaifeau o Pinnock, o lē na faapea mai: “O talitonuga uma e faatatau ia hele, e aofia ai le faapuapuagatiaina e lē uma, . . . e ao ona lafoaia ona o aʻoaʻoga ua faamaonia.” Ioe, o amioga mamā, faamasinotonu, ma—le mea e sili ona tāua—o le Afioga a le Atua, le Tusi Paia, o lena ua taʻu atu ai ia te oe ina ia faia lena mea.

Afai e te faia, ona e iloa ai lea, o le uiga moni lava o hele e faigofie ona taltitonu i ai. E mafai ona e mauaina ni faamatalaga e fesoasoani ia te oe ina ia e malamalama i lenei mataupu, i le tusi E Mafai ona E Ola e Faavavau i Parataiso i Le Lalolagi. * Faamolemole ia e fesili atu mo lenei tusi pe afai e te feiloai ma ni Molimau a Ieova. Ia faitau le mataupu “O Le Ā e Tupu Pe a Oti?” ““Hele” (“Seoli”)—Pe e i Ai Moni Ea?” ma le “Toe Tutū—Mo Ai, ma I Fea?” O le a e mauaina ai le uiga moni o hele, ua lē na o se mea e moni, ae o se folafolaga foi mo le faamoemoe.

[Faaopoopoga i lalo]

[Pusa i le itulau 8]

LE FAAMATALAINA O FAAUPUGA

I lenei mataupu o le faaupuga “hele” ma le “afi i hele” e pei ona faaaogāina ai e faifeau o Kerisinetoma e faasino i le upu Eleni geʹen·na, lea e aliali mai faa 12 taimi i le “Feagaiga Fou.” (Mataio 5:22, 29, 30; 10:28; 18:9; 23:15, 33; Mareko 9:43, 45, 47; Luka 12:5; Iakopo 3:6) E ui lava i le tele o faaliliuga o le Tusi Paia ua faaliliu ai lenei upu Eleni o “hele,” o isi faaliliuga ua faaliliuina ia “Kēna.” Ua fetaui lelei atu i “le oti faalua, le lepa afi,” o se faatusa o le faaumatiaga e faavavau o loo maua i le tusi mulimuli o le Tusi Paia.—Faaaliga 20:14, NW.

E tusa ai ma isi upu e lua i nisi taimi e faaliliuina “hele”, fai mai le A Dictionary of the Bible (1914), sa faatonuina e William Smith e faapea: “O hele . . . o se upu taatele ma ua masani ona faaaogā sese e a tatou au faaliliu tusi e fetaui ma le upu Eperu Sheol. Atonu e sili ona lelei le faaaogā o le upu Eperu Sheol, po o le faaliliuina, ‘o le tuugamau’ po o ‘le lua’. . . . I le Feagaiga Fou, o le upu Heitisi, e pei o Sheol, i nisi taimi e uiga ‘o le tuugamau’ . . . I lenei uiga e faapea o aʻoaʻoga tau lotu ua faapea mai i lo tatou Alii ‘Na alu o ia i lalo i hele,’ o lona uiga o le tulaga lautele o ē ua oti.”

I le lē pei o Kēna, lea e faaatagia ai le faaumatiaga e faavavau, o Seoli ma Heitisi e faasino i le oti i le tuugamau taatele o tagata, ma le faamoemoe o le toe faafoisia mai i le ola.—Faaaliga 20:13.

[Ata i le itulau 9]

Na fafagu e Iesu Lasalo mai le moe i le oti