Ia Leoleo e Tetee atu i Musika lē Mamā!

“Ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga.”—EFESO 5:15, 16.

1. Aiseā e mafai ai ona taʻua musika o “se meaalofa mai le Atua”?

“O MUSIKA . . . o se meaalofa mai le Atua.” O upu na sa tusia e Lulu Rumsey Wiley i lana tusi o le Bible Music. Mai lava i uluai taimi, na ioeina ai lenei manatu e tane ma fafine o ē sa matataʻu i le Atua. O musika, ua mafai ai e le tagata ona ia faaleoina atu ona faalogona loloto—le olioli, le faanoanoa, le lotoa, ma le alofa. Sa faia moni la e musika se vaega tāua i taimi o le Tusi Paia, o le pogai lena ua taʻua ai i le faagasologa atoa o lena tusi paia.—Kenese 4:21; Faaaliga 18:22.

2. Na faapefea ona faaaogāina musika e vivii atu ai ia Ieova i taimi o le Tusi Paia?

² Sa matuā faatinoina musika i le auala mamalu i le tapuaiga ia Ieova. * O nisi o faaupuga sili ona faaviivii sa na o Ieova le Atua lava na fai atu i ai, sa muai aumaia i ni fatuga faamusika. Na tusia e le faisalamo o Tavita: “Ou te vivii atu i le suafa o le Atua i le pese.” (Salamo 69:30) Pe a iai se tasi i se tulaga ua tuua toatasi, sa aogā musika e faaleo atu ai ana tatalo. Na tusia e Asafo faapea: “Ou te manatua laʻu pese i le po; ou te mafaufau i loʻu loto; e tausailiili foi loʻu agaga.” (Salamo 77:6) I le malumalu o Ieova, sa faamaopoopo lelei ai musika i se faatulagaga e sili atu ona lelei. (1 Nofoaiga a Tupu 23:1-5; 2 Nofoaiga a Tupu 29:25, 26) I nisi taimi, sa faamaopoopo ai ni aufaipese tetele, e pei o le taimi na faaulufaleina ai le malumalu, lea na faaaogā ai ni tagata se 120 e iliina pu. (2 Nofoaiga a Tupu 5:12, 13) E lē o iai ni tala e taʻu mai ai ia i tatou pe faapeī leo o nei musika tetele, peitai ua faapea mai le tusi The Music of the Bible: “O le a lē faigata ona tatou faaataina se manatu e tusa ai ma se aafiaga tele na faia e musika o le Malumalu i faatasiga taualoa . . . Ana faapea e mafai e se tasi o i tatou ona faimalaga atu i le taimi lava lena ma auai i lena vaaiga, e mautinoa lava le lē mataofiofia o le lagona o le faaneeneega ma le olioli tele.”

Le Faaaogāseseina o Musika

3, 4. Na faapefea ona faaaogāsese e tagata o le Atua ma o latou tuaoi faapaupau, le meaalofa o musika?

³ Peitai, sa leʻi faaaogāina tatau pea lava i taimi uma musika. I le Mauga o Sinai, sa faaaogā musika e uunaia ai le tapuaiga ifo i tupua i le tamai povi auro. (Esoto 32:18) Sa faaaogā foi musika i ni faatasiga na taʻitaʻiina atu ai i le onanā ma fai ai faiga faatalitane. (Salamo 69:12; Isaia 23:15)  Sa matuā agasala tuaoi faapaupau o Isaraelu i lo latou faaaogāseseina o lenei meaalofa mai le Atua. Ua faapea mai le Interpreter’s Dictionary of the Bible: “I Foenisia ma Suria, e toetoe lava o musika lauiloa uma sa faaatagia mai ai le tapuaiga ia Ishtar, le atua fafine o le fanautama. Ioe, sa masani lava ona avea pese lauiloa e faatomua mai ai ni poula o faiga faaleituaiga.” Sa faapena foi le faaaogāina e tagata Eleni anamua o musika e faia ai “siva taʻutaʻua e uunaia ai faiga faaleituaiga.”

⁴ Ioe, ua iai i musika le malosi e uunaia ai, e pueina ai le naunau, ma aafia ai. I le faitau sefulu tausaga ua tuanai, na oo lava ina faapea atili mai le tusi a John Stainer, o le Music of the Bible: “E leai lava se isi taleni e sili atu ona malosi sona aafiaga i tagata i le taimi lenei, na i lo le taleni o Musika.” Ua faaauau pea e musika ona malolosi ana faaaafiaga i aso nei. O lea la, o le ituaiga o musika e leaga e mafai ona avatu ai se lamatiaga mataʻutia i talavou o ē matataʻu i le Atua.

E Manaomia le Faaeteete

5. (a) O le ā le tulaga o musika i olaga o le toatele o talavou? (e) O le ā le silafaga a le Atua e uiga i tagata talavou o loo latou faafiafiaina i latou lava?

⁵ Afai o lena e te talavou, ua e iloa lelei lava la le tāua o musika—ae maise lava ituaiga eseese o musika pop po o musika o le rock—i le toatele o talavou tou te tupulaga. Ua oo foi ina taʻua musika o se “mea tāua i le au talavou.” Ua iai se fua faatatau e faapea, o tausaga mulimuli e ono o se talavou o le Iunaite Setete i lana aʻoga, o le a ia faalogologo ai mo le sili atu i le fa itula o i aso taitasi, i musika rock! Ua matuā faamaonia ai lava le leai o se paleni. E lē faapea e sese le faafiafiaina i se mea e mafai ona e maua ai ni faalogona lelei po o le fiafia. E mautinoa lava, e lē finagalo Ieova, o Lē na Foafoaina musika mālie, ina ia foliga faasiasia ma foliga faanoanoa atu tagata talavou. O le mea moni, ua ia poloaiina ona tagata: “Ina fiafia ia ia Ieova, ma olioli o outou o e amiotonu; ina alalaga ia ma le fiafia o outou uma o e ua faamaoni o outou loto.” (Salamo 32:11) Ua faapea mai lana Afioga i ē talavou: “Le taulealea e, ina olioli ia i lou tama itiiti, ia fiafia foi lou loto i aso o lou taulealea.”—Failauga 11:9.

6. (a) Aiseā e manaomia ai i talavou ona faaeteete i le filifiliga o a latou musika? (e) Aiseā ua sili ai ona lē manuia le tele o musika o aso nei na i lo o musika i tupulaga ua tuanai?

⁶ Ae peitai, ua iai se pogai talafeagai e ao ai ona e faaeteete i lau filifiliga o musika. Na faapea mai le aposetolo o Paulo i le Efeso 5:15, 16: “Ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga.” Atonu e tetee  mai nisi talavou, e pei ona sa faia e se tasi teine e faapea: “Ae sa faalogologo foi o matou mātua i a latou musika a o talavou. Aiseā la ua lē mafai ai ona matou faalogologo matou ia i a matou musika?” Atonu foi sa iai ni vala lē manuia i musika sa fiafia i ai ou mātua i o la taimi talavou. E tusa ai ma se iloiloga maeʻaeʻa, o le tele lava o faatulagaga taʻutaʻua sa iai faatoʻā iloa mulimuli ane, ua suia i le iai o le anoanoai o le lē mafaatusalia o faaupuga i faiga faaleituaiga ma faamatalaga auiliili i amioga lē mamā. Ae o upu sa na ona tau faaalaala atu i taimi anamua, ae i le taimi nei, ua matuā auiliili mai lava i luma o latou uiga. Ua mātauina e se tasi tusitala e faapea: “Ua matuā faotuʻi i mafaufau o fanau le anoanoai o feau tuusaʻo sa leʻi iai muamua lava i a tatou tū ma aganuu.”

Musika Rap—Musika o le Fouvale

7, 8. (a) O le ā le musika ua taʻua o le rap, ma aiseā ua taʻutaʻua ai? (e) O le ā e ono mātaulia ai se tasi ua fiafia i le ituaiga o olaga o tagata rap?

⁷ Mo se faaaʻoaʻoga, seʻi manatunatu i le aʻega fou mai o musika rap. E tusa ai ma le mekasini o le Time, o musika rap, ua avea o “se fatiga o ni lagona lotoa ma le fouvale” ma o loo matuā taʻutaʻua i Pasili, Europa, Iapani, Rusia, ma le Iunaite Setete. E masani ona toetoe lava leai se fati, o ona upu e lē usuina ae e faatalanoa le avatuina, faatasi ma se tuʻituʻi malosi atu i tua. Peitai, o lena tuʻituʻi e foliga mai o le mafuaaga tāua lena o loo taulau manuia ai le faalauiloaina atu o musika rap. Ua faapea mai se tasi talavou mai Iapani: “Pe a ou faalogologo i musika rap, ou te lagonaina le fiafia, ma a ou siva, ou te lagonaina se faalogona saoloto.”

⁸ O fatiga o musika rap—e masani o se suifefiloi o upu taufaifai ma gagana taatele lē faaaloalo—e aliali mai o le isi lena pogai ua lauiloa ai le rap. I le lē pei o fatiga rock, lea sa tele ina faaautū atu i le mataupu o faigauō a le au talavou, ae o fatiga rap ua masani ona mataʻutia se feau o loo faaauala mai ai. O nisi musika rap e tautala tetee atu i le lē faamasinotonu, i faiga faailogalanu, ma sauāga faamoʻamoʻa a leoleo. O nisi taimi, o tali o na pese ua taʻua ai ni gagana sili ona palapalā, ma matagā e matuā ofo ai. O musika rap e foliga foi e faaleo mai ai se fouvalega e tetee ai i faiga o lavalava, i teuga, ma i amioga mamā faaleituaiga. E lē o se mea la e ofo ai, ua avea musika o le rap o se isi vala taualoa i olaga o ē fiafia i ai. Ua mataulia tagata o loo fiafia i na musika i o latou uiga faaalialia, gagana lē faaaloalo, ma e ese faiga o o latou lavalava—o ofuvae uumi e fefete vae, o seevae uumi e lē nonoaina, o filifili auro, o pulou mo taaloga pesipolo, ma matatioata pāauli.

9, 10. (a) O ā vala e ao i talavou ona manatunatu i ai i le faamautinoaina po o musika o le rap ma lona ituaiga o olaga e “fiafia i ai le Alii”? (e) O ā mea e foliga mai o loo manatu māmā i ai nisi talavou Kerisiano?

⁹ I le Efeso 5:10, ua faatonuina ai Kerisiano ina ia “suesue outou pe se a se mea e fiafia i ai le Alii.” Seʻi manatunatu i le talaaga ua faia e musika rap, pe e te manatu ea o le a “fiafia i ai le Alii” ina ia e faaaafia i na musika? Pe manao ea se talavou Kerisiano e faitaulia o ia i le ituaiga o olaga lena e matuā lē taliaina, e oo lava i le toatele o tagata i le lalolagi? Seʻi mātau pe na faapefea ona faamatalaina e se tasi tagata na ia toe autaluina mai se koneseti o musika o le rap na faia: “Sa tauvā tagata pepese o musika o le rap po o ai e sili ona mataʻina e ala i a latou  fatiga o upu taufaifai ma fatiga o gagana auiliili faaleituaiga. . . . Na faaalialia mai e tama ma teine sisiva faiga faaleituaiga i luga o le malae faafiafia.” E tusa ai ma se tasi o gaoioiga na matuā faamatilatila mai, na faapea mai se tasi tamaloa o lē na taʻitaʻi i le koneseti: “E toetoe lava o upu uma latou te tautatala mai ai o (upu masoā).”

¹⁰ E oo lava i le musika sa tā i lena po, sa manatu nisi o se musika lava e masani ai lea e taʻua o le rap. Na faapea mai le pule o le fale sa fai ai le koneseti: “O musika na tou te faalogologo mai i ai, o musika masani lava, e taʻua o rap—e tutusa lava ma musika na e faatau e talavou mai faleoloa.” Pagā le faanoanoa e taʻua faapea, mai le silia i le 4,000 o le aofia i lena koneseti, sa aofia ai foi ma nisi o ē o loo faapea mai o ni Molimau a Ieova! E foliga mai ua manatu mamā nisi i le mea moni e faapea o Satani o le “taʻitaʻi o le au faipule i le va nimonimo.” Ua ia puleaina ‘le agaga [po o uiga sili faalemafaufau fia pule] lea ua iai i tagata lē usiusitai.’ (Efeso 2:2) O manaoga o ai lena o le a e faafiafiaina pe a e aafia i musika rap po o ana tifiga o le olaga? Ua ioeina, o nisi musika rap atonu e lē matuā leaga nauā ona o upu o iai. Ae pe talafeagai ea ona faatupuina se manao mo so o se ituaiga o musika lena e matuā teena ai tapulaa faa-Kerisiano i le tele o taimi?

Heavy Metal—Faiga Faaleituaiga, Faiga Faasauā, ma Faiga Faa-Satani

11, 12. O le ā le musika ua taʻua o le heavy metal, ma o ā itu e leaga ma lē manuia o loo mātaulia ai?

¹¹ O le isi ituaiga lauiloa o musika o le heavy metal. O le heavy metal e sili atu lona malosiaga na i lo le hard rock leoleoā. Ua faapea mai se lipoti i le The Journal of the American Medical Association: “O musika heavy metal . . . e faatomua mai i se fatiga e tuʻituʻi leotele ma upu e matuā faaviiviia ai le inoino, le faataumaʻoi, amioga faaleituaiga e lē talafeagai, ma i nisi taimi o faiga faasatani.” E oo lava i na o igoa o nisi o le tele o aufaaili lauiloa, ua faamaonia mai ai le matuā leaga o lenei ituaiga o musika. Latou te faaaogā upu e pei o le “faaoona,” “fana,” ma le “oti.” Peitai e tau feololo mai le tulaga manaomia o musika heavy metal, pe a faatusatusa atu i tulaga sili ona leaga paʻū maulalo o thrash metal ma death metal—o ni ituaiga o faiga faamusika faaopoopo ua mafua mai ona o heavy metal. O igoa o nei aufaaili ua faaaogā ai taʻu e pei o le “sauʻai tagata” (cannibal) ma le “faaaliga o le oti” (obituary). Atonu e lē o iloa e talavou i le tele o isi atunuu le matagā o nei igoa, talu ai o loo tusia i le gagana faa-Peretania po o se isi foi gagana latou te lē malamalama ai.

¹² Ua faifaipea ona aofia atu musika o heavy metal i amioga a talavou e pei o le pule i le ola, le loto mafatia, ma le faaaogāina o vailaau oona. O lona sootaga i amioga faasauā na mafua ai ona faaigoa e se tasi tagata faasalalau i le letiō e faapea “o le musika e fasioti ai ou mātua.” Ona o le fesootaiga ma faiga faa-Satani, ua faapopoleina ai le tele o mātua—ma alii leoleo. Na faapea mai le faamatalaga a se tasi tagata suesue, o nisi talavou ua teʻi lava ua taaʻina atu i tapuaiga faasatani, na amata ona auai i nei faiga faaagaga e ala i lenei musika. Ua ia faaiʻu mai ana upu i le faapea mai: “Latou te lē o iloa le mea lea ua latou oo atu i ai.”

13. O le ā le lamatiaga o le aafia i musika heavy metal?

¹³ Peitai ane, e lē tatau i talavou Kerisiano ona ‘ʻoleʻolegia i togafiti a Satani.’ (2 Korinito 2:11) Ae maise, ‘o loo tatou tau e tetee atu i agaga leaga i nofoaga o i le lagi.’ (Efeso 6:12) Pagā le valea pe afai ua avea le filifiliga o musika a se tasi e fai ma auala ua valaauliaina ai temoni i lona olaga! (1 Korinito 10:20, 21) Peitai, e toatele ni talavou Kerisiano ua mautinoa le fiafia i nei musika. O le iʻuga mo nisi ua oo lava ina latou faia ni togafiti ina ia faamalieina ai o latou manaoga i musika. Ua taʻutino mai e se tasi teine talavou: “Sa masani ona ou faalogologo i heavy metal, o nisi taimi e toetoe lava o le po atoa. Ou te faatauina mai mekasini o loo iai tala ma ata o tagata e pepese i heavy metal ma nanā i pusa sa aumai ai seevae, ina neʻi iloa e oʻu mātua. Sa ou pepelo i oʻu mātua. Na ou iloa sa lē fiafia Ieova ia te aʻu.” O se mataupu i le Awake! na toe faasaʻoina ai ona mafaufauga. E toafia nisi talavou o loo maileia pea e na ituaiga o musika?

 Seleseleina le Mea na E Lūlū

14, 15. Aiseā tatou te mautinoa ai, o le faalogologo atu i musika lē mamā o le a iai sona aafiaga leaga? Faataʻitaʻi.

¹⁴ Aua le manatu māmā i lamatiaga e mafai ona aumaia e na musika. E moni, atonu e te lē o mafaufau e fasioti se tagata pe ia faia ni amioga lē mamā faaleituaiga i le na o lou faalogologo atu i se pese. Peitai, ua faapea mai le Kalatia 6:8: “O sē lulu i la lona tino, e selesele mai ai e ia i la le tino le mea e pala.” O le faalogologo i musika faalelalolagi, e aunoa ma ni lagona faaletagata na o lagona faamanu, ma faatemoni foi, e na o uunaiga sese e aumaia ai ia te oe. (Faatusatusa i le Iakopo 3:15.) Ua siitia mai le faamatalaga lenei a le polofesa o musika o Joseph Stuessy e faapea: “So o se ituaiga lava o musika, e aafia ai o tatou mafaufau, lagona ootia, uiga ma a tatou amioga uma e iʻu i ai . . . So o se tasi lava e fai mai, ‘E mafai ona ou faalogologo i heavy metal, ae ou te lē āfaina ai,’ ua matuā sese lava. E aafia ai tagata eseese i tulaga eseese ma i fua eseese.”

¹⁵ Ua ioe mai se tasi talavou Kerisiano e faapea: “Sa matuā leaga lava loʻu aafiaga i thrash metal, auā na suia atoa ai oʻu uiga.” E leʻi umi ae amata ona iai ni ona faafitauli ma temoni. “Na iʻu lava ina ou tiaʻiina aʻu lipine ma sa ou saoloto mai ai loa i temoni.” Ua taʻutino mai e le isi talavou: “O musika sa masani ona ou faalogologo i ai sa faatatau a lē i faiga faataulaitu, o vailaau oona, po o faiga faaleituaiga. E toatele talavou ua faapea mai e lē āfaina ai i latou, peitai  o le mea moni lava e āfaina ai. Na toetoe lava a ou palasi ese ai mai le upu moni.” Ua fesili mai faapea le faataoto: “E ave ea e se tasi le afi i lona fatafata, a e le mu ai ona ofu?”—Faataoto 6:27.

Ia Faaeteete Pea

16. O le ā e mafai ona taʻua e faatatau i ē o loo fatuina ma faatinoina le tele o musika i aso nei?

¹⁶ Na tusi atu Paulo i Kerisiano anamua i Efeso: “O lenei, ou te fai atu ia te outou, ma taʻutino atu lenei mea i luma o le Alii, aua tou te toe savavali faapei o isi nuu faapaupau uma, o e savavali i le valea o latou loto, o loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto.” (Efeso 4:17, 18) Po ua lē tatau ea ona fai atu lenei faaupuga i le au tusipese ma le au sisiva o musika i aso nei? I le sili atu na i lo o se isi lava taimi, o ituaiga uma lava o musika ua faaatagia mai ai le taaʻiga a “le atua o le lalolagi nei,” o Satani le Tiapolo.—2 Korinito 4:4.

17. E mafai faapefea e talavou ona latou suesueina, pe tofotofoina, ni musika?

¹⁷ E tusa ai ma “aso e gata ai,” na valoia e le Tusi Paia: “O tagata amio leaga ma e taupelopelo, e alualu pea lava lo latou leaga.” (2 Timoteo 3:1, 13) I le sili atu na i lo o se isi lava taimi, e manaomia ona e matuā mataala i ituaiga o musika e te filifilia. E masani lava, o le ulutala matagā o loo faatomua ai se lipine ua faamautinoa ai lava lona leaga. Ua fesili mai le Iopu 12:11: “E le faamasino ea e le taliga i upu? e le tofotofo ea foi e le gutu i ana mea e ʻai?” E faapena foi la ona mafai ona e tofotofoina musika e ala i le faalogologo atu i le na o sina faatomuaga ma fai ai sau filifiliga. O ā ou faalogona o le a tutupu aʻe ona o le fatuga? Pe e faamalosia ai ea uiga sili ona leaga ma matagā—le agaga o le faasoloatoa e lē pulea? (Kalatia 5:19-21) Ae faapefea i upu o le pese? Po o faaviiviia ai ea amioga lē mamā faaleituaiga, le faaaogāina o vailaau oona, po o isi amioga sese na “ua matagā lava ona tautalatala i ai?” (Efeso 5:12) Ua faapea mai le Tusi Paia e lē gata ina lē tatau lava ona “taʻua” na mea i talanoaga a tagata o le Atua, ae ua matuā lē tatau foi ona pepese ai ma toe taʻua soo. (Efeso 5:3) Ae faapefea le ata lena e i le pusa o le lipine? Po o tusi ai ea ni faaupuga faataulaitu po o ni ata e faagaee ai amioga faaleituaiga?

18. (a) O ā ni suiga atonu e ao i nisi talavou ona fai e uiga i musika? (e) E mafai faapefea e talavou ona atiina aʻe se manaoga mo musika e sili atu ona taʻumamāina?

¹⁸ Atonu e manaomia ona e suia ituaiga o musika e te filifilia. Afai o iai ni au lipine, kaseti, ma isi ituaiga o lipine e taʻua o disc na e aumaia ai faaupuga o amioga lē mamā ma faatemoni, e ao nei loa ona vave ona e faatamaʻiaina. (Faatusatusa i le Galuega 19:19.) E lē faapea o le a lē mafai ona e olioli i musika; auā e lē o musika taatele uma e leaga. Ua aʻoaʻoina e nisi talavou le faalautele atu o a latou filifliga o musika, ma ua olioli ai nei i musika classical, folk, light jazz, ma isi ituaiga o musika. O kaseti o Kingdom Melodies ua fesoasoani i le toatele o talavou e faatupu ai se manaoga i musika faaaufaipese na e faalaeiauina ai.

19. Aiseā e tāua ai le faatulaga tatau o musika?

¹⁹ O musika o se meaalofa mai le Atua. E ui i lea, ua avea musika o se faalavelave e leai se aogā i le toatele. Ua pei i latou na o tagata Isaraelu anamua, o ē na olioli i le tāina o “kitara, ma le napeli, ma le topa, . . . [sa] latou le mafaufau i le galuega a Ieova.” (Isaia 5:12) Ia fai ma ou sini le faatulaga tatau o musika, ae ia avea le galuega a Ieova ma itu e sili ona e manatu mamafa i ai. Ia filifili lelei ma ia faaeteete i ituaiga o musika e te filifilia. Ona mafai ai lea ona e faaaogā—ae lē o le faaaogāsese—o lenei meaalofa mai le Atua.

[Faaopoopoga i lalo]

Po o E Manatua?

□ Aiseā e mafai ai ona taʻua musika o se meaalofa mai le Atua?

□ Na faapefea ona faaaogāseseina musika i taimi anamua?

□ O ā lamatiaga e aumaia e musika o le rap ma le heavy metal i talavou Kerisiano?

□ E mafai faapefea ona faaeteete talavou Kerisiano i le filifiliga o a latou musika?

[Fesili mo le Suʻesuʻega]

[Ata i le itulau 23]

I taimi o le Tusi Paia, sa masani ona faaaogā musika e vivii atu ai ia Ieova