Le Faaaogāina ma le Faaaogāseseina o Ata Faalelotu

O LE vaaiga e i totonu o St. Petersburg, i Rusia. O le aso na puʻeina ai lea vaaiga o le aso 2 o Aokuso, 1914. O ni tagata ua naunautai o loo faatasitasi ma talotalo i ata faalotu o loo i le maota o le Pule sili (Czar). O loo fausia ai se fata faitaulaga i le ogatotonu o se fale tele. O loo iai se ata o se fafine ma se tamaitiiti i ona lima o loo tū i luga o le fata faitaulaga. O lenei faatusa e taʻua o le “Vladimir Mother of God.” E vaai i ai le motu o tagata i lea faatusa o se oloa e sili ona paia i Rusia.

O le mea moni, e talitonu nisi e faapea, o lena ata faalelotu e mafai ona ia faia ni vavega. I le 1812, ina ua savavali atu le ʻau tau a Rusia e tau faasaga ia Napoleone, na tatalo ai le Taʻitaʻiʻau Sili o Kutuzov i luma o lena ata faalelotu. I le aso 2 o Aokuso, 1914, ina ua uma ona ioe Czar Nicholas II o le a tau lona atunuu, na ia tū ai foi i luma o le faatusa. Na sii i luga lona lima taumatau ma fai lana tautoga e faapea: “Ou te taʻutino atu e lē mafai ona ou faia se faaleleiga pe afai lava o iai pea se fili se toatasi e totoe i le laueleele o Rusia.”

I le lua vaiaso mulimuli ane na faia ai se asiasiga a le pule sili o le atunuu i Moscow e saili ai le faamanuiaga a le Atua i luga o ana fitafita. I le malumalu o le Cathedral of the Assumption, na ia tootuli ai ma tatalo i luma o le ata faalelotu ua teuteuina i maatāua feilafi tetele—o se pupuni o loo iai le ata o Iesu o loo tusia ai, o Maria, o agelu, ma “tagata paia.”

O nei gaoioiga faalotu sa lē taulau ona aveesea ai mala. E itiiti ifo i le fa tausaga, na feoti ai le sili atu i le ono miliona fitafita a Rusia ma fāoa ai le tele o laufanua. E lē gata i lea, o le pule sili, lana avā, ma le la fanau e toalima na fasiotia faamoʻamoʻa. Na suia le pulega a tupu i le faitau senituri, ina ua amata ona pulea le atunuu e pulega fouvale e tetee i le lotu. Na iʻuvale le faatuatua o Czar Nicholas i ata faalelotu.

Ae peitai, i Rusia ma isi atunuu e oo mai i taimi nei, e faitau miliona o loo faaauau pea ona faaaloalo i ata faalelotu. Ua lagā ai e lenei mea ni fesili tāua. Po o le ā le silasila a le Atua i gaoioiga o le tuutoina atu ua faia i luma o nei ata? Ae faapefea le masani o le faatautauina o ata faalelotu i puipui o fale?

O ā Fa a le Tusi Paia?

A o iai Iesu i le lalolagi, sa ia usitai i le Tulafono a le Atua na tuuina mai e auala ia Mose. E aofia ai i lenei mea le tulafono lona lua lea ua taʻua o Tulafono e Sefulu, o loo faapea mai: “Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua; aua e te ifo i ai, aua foi e te auauna i ai; auā o aʻu o Ieova lou Atua, o le Atua fuā.”—Esoto 20:4, 5.

E tusa ai ma lena itu, sa leʻi tapuai atu Iesu i le Atua faatasi ma le fesoasoani mai o ni ata po o ni faatagata e faia e lima o tagata. Na i lo o lena, o lana tapuaiga sa ōgatasi ma le faasilasilaga a lona Tamā: “O aʻu o Ieova, o loʻu igoa lea; o loʻu mamalu foi ou te le avatua lea i se tasi, ma loʻu viiga ou te le avatua i tupua ua ta.”—Isaia 42:8.

E lē gata i lea, sa faamalamalamaina e Iesu le mafuaaga e ao ai ona tapuai atu i le Atua e aunoa ma le fesoasoani a ni mea faitino. Na ia fetalai mai: “A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni; auā o loo saili le Tamā i e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.”—Ioane 4:23, 24.

I le pei o Iesu, na aʻoaʻoina ai e ona soʻo moni isi i le auala saʻo e tapuai ai. Mo se faaaʻoaʻoga,  i se tasi taimi na tautala atu ai le aposetolo o Paulo i se motu o tagata popoto Eleni o ē na faaaogāina faatusa e tapuai ai i lo latou atua e lē iloa. Na ia taʻu atu ia te i latou e uiga i Lē na faia le tagata ma faapea atu: “E le tatau ona tatou manatu ua tusa le Atua i se auro, po o se ario, po o se maa, ua talaʻia i le faiva ma le fuafua o le tagata.” Mulimuli ane, na toe faamalamalama atu foi e le aposetolo lava lea e tasi e faapea o Kerisiano ‘e savavali i le faatuatua, a e le o le tino mai o mea’ ma e tatau ai i Kerisiano ona “sosola ese ai i le ifo i tupua.”—Galuega 17:16-31; 2 Korinito 5:7; 1 Korinito 10:14.

O le mea sa tupu i le olaga o le aposetolo o Peteru ua faaalia ai sa vave lava ona ia faasaʻoina so o se gaoioiga e ono taʻitaʻiina atu ai i le ifo i tupua. Ina ua faapaʻū ifo le taʻitaʻi ʻau Roma o Konelio i ona vae, sa teena e Peteru. Na ia faatūina Konelio, ma fai atu: “Ina tu ia i luga; o aʻu nei lava o le tagata.”—Galuega 10:26.

Sa faateʻia le aposetolo o Ioane e ala i faaaliga mai le Atua, o lea na ia faapaʻū ifo ai i vae o se agelu. Na fautua atu le agelu ia te ia: “Ia oe, aua lava; auā o aʻu o lou uso a auauna, ma lo le au perofeta ou uso, o lo latou foi o e tausi i upu o lenei tusi; ia e ifo i le Atua.” (Faaaliga 22:8, 9) Na talisapaia e le aposetolo lenei fautuaga. Ma le alofa tele, na ia tusia ai lenei mea na tupu e aogā mo i tatou.

Ae faapefea i mea na tutupu o loo taʻua i luga ona fesootai ma le faaaogāina o ata faalelotu? Ia, afai sa sese mo Konelio ona ifo atu i se tasi o le au aposetolo o Keriso, e faapefea la le tapuai atu i ata o “tagata paia” e leai ni ola? Ma afai sa sese mo se tasi o le au aposetolo o Keriso ona tuu faatauvaaina o ia i luma o se agelu ola, e faapefea la le tapuai atu i ata o agelu e leai ni ola? E mautinoa, o nei gaoioiga ua eseese ma le lapataiga a Ioane: “Le fanau e, ia leoleo outou ia te outou ia taumamao i tupua.”—1 Ioane 5:21.

O ni Fesoasoani e Faamanaia ai le Aʻoaʻoga

E lē o le uiga o lenei mea e faapea, i le na o le iai lava o se ata o ni vaaiga faale-Tusi Paia, ona faapea ai lea ua ifo i tupua. E faaaogāina e lenei  mekasini nisi o ata o mea na tutupu i taimi o le Tusi Paia o ni fesoasoani e aʻoaʻoina ai. E lē gata i lea, o vaaiga i mea na tutupu i taimi o le Tusi Paia e mafai ona faaaogā e faamatagofie ai puipui o fale ma fausaga. Peitai, o se Kerisiano moni na te lē manao e faaalia atu se ata ua lauiloa o loo faamamaluina e isi, e lē tautauina foi i lona fale se ata e faauigasese ai le Tusi Paia.—Roma 14:13.

O le tele o ata faalelotu a Kerisinetoma ua latou faia ai se ata o le malamalama e faataaliʻoliʻo i le ao o Iesu, o Maria, o agelu, ma “tagata paia.” Ua taʻua lea mea o le liʻo pupula (halo). O fea na pogai mai ai le liʻo pupula? “O lona amataga e lē faa-Kerisiano,” e pei ona taʻutino mai e le Catholic Encyclopedia (lomiga 1987), “auā sa faaaogāina e tagata faapaupau o ē sa tusia ata ma vaneina faatusa e faaatagia mai ai tulaga faafaatusa o le mamalu silisili ma le malosi o atua e tele.” Ae e lē gata i lena, ua iai i le tusi The Christians, a Bamber Gascoigne, se ata na aumaia mai le Falemataaga i Capitoline i Roma o se atua o le lā faatasi ma le liʻo pupula. O lenei atua sa tapuaia e tagata Roma faapaupau. Mulimuli ane, na faamatala e Gascoigne e faapea, “o le liʻo pupula o le lā” sa “nonō mai e le Faa-Kerisiano.” Ioe, o le liʻo pupula e fesootai ma tapuaiga faapaupau i le lā.

Pe e fetaui ona faatautauina ata na e fefiloi faatasi ai mea na tutupu i le Tusi Paia ma faatusa o tapuaiga i tupua faapaupau i puipui o fale o Kerisiano? E leai. Ua fautua mai le Tusi Paia: “Pe faapefea foi ona loto faatasi o le malumalu o le Atua ma tupua? . . . O lea ia o mai ai outou nai totonu ia te i latou, ma ia outou vavae mai, ua fetalai mai ai le Alii [Ieova], aua foi tou te papai atu i se mea leaga; ona ou talia ai lea o outou.”—2 Korinito 6:16, 17.

A o faagasolo le taimi, na amata ai ona lafoaia e i latou ua taʻua o Kerisiano lenei fautuaga. Na tupu aʻe le faaaposetasi, e pei ona sa uluai taʻua mai e Iesu ma ona aposetolo. (Mataio 24:24; Galuega 20:29, 30; 2 Peteru 2:1) I le amataga o lona fa o senituri T.A., na faia aʻe ai e le emeperoa Roma o Konesetatino le Faa-Kerisiano aposetate ma lotu a le Setete. Ma na amata ai e le toatele o tagata faapaupau ona faalauiloa i latou lava o “Kerisiano.” O le gaoioiga taatele ia i latou o le tapuai lea i faatusa o le emeperoa. Sa faapena foi ona latou faatautau ata o o latou tupuaga ma isi tagata taʻutaʻua. Na faamatala mai e John Taylor i lana tusi Icon Painting e faapea: “Ina ia tusa ai ma le lotu a le emeperoa, sa tapuai tagata i le ata o lana emeperoa sa tusitusia i luga o ie mafiafia ma laau, ma mai tapuaiga i le emeperoa i le tapuaia o ata faalelotu o faatusa e lē o se mea mamao.” O lea la, o ata na tapuaia e tagata faapaupau na suia ae tapuai i ata o Iesu, o Maria, o agelu, ma “tagata paia.”

E Faapefea ona Faafealofaia Lenei Gaoioiga e Taʻitaʻi Lotu?

E tusa ai ma le Encyclopedia of Religion, na faaaogā ai e taʻitaʻi lotu le finauga lava lea e tasi ua leva e pei ona sa faia e tagata popoto faapaupau. O tagata e pei o Plutarch, Dio Chrysostom, Maxim o Turo, Celsus, Porphyry, ma Julian na latou taʻutino mai o faatusa e leai ni ola. Ae o nei tagata faapaupau ua latou faafealofaia le faaaogāina o faatusa e ala i le finau mai e faapea, o nei mea o ni fesoasoani i le tapuaiga i o latou atua e lē o vaaia. Na taʻua e se tusiata Rusia o Leonid Ouspensky i le tusi The Meaning of Icons e faapea: “O Tamā o le Lotu na latou faaaogāina faavae o aʻoaʻoga a tagata fai mafaufau Eleni, i le suia o le malamalama ma le gagana ina ia fetaui ma aʻoaʻoga faa-Kerisiano.”—Faatusatusa i le Kolose 2:8.

E toatele tagata na latou iloaina e faapea o le faafealofaia faalotu mo le tapuaiga i faatusa e faigata ona malamalama i ai. Na faapea mai John Taylor i le Icon Painting: “O le eseesega i le va o le tapuai i le mea o faaatagia mai e le ata faalelotu, ma le tapuai saʻo atu i le ata lava ia . . . e lē mafai ona iloa ma le mautinoa seʻi vagana ē e maualuga le aʻoaʻoina.”

I le vaaiga i se isi itu, o le mea ua fai mai ai le Tusi Paia e uiga i faatusa i lotu e faigofie ona malamalama i ai. Manatu ia Emilia, o loo ola i Johannesburg, i Aferika i Saute. O ia o se Katoliko faamaoni ma sa masani ona tootuli ma tatalo i luma o ata. Ia, ona tuʻituʻi atu loa lea o se tasi o Molimau a Ieova i lona faitotoa. Sa  naunau o ia ma le fiafia e vaai i le Tusi Paia faa-Potukale lena o loo iai le suafa o le Atua, o Ieova. (Salamo 83:18, Almeida) I le faaauau pea o lana suesuega faale-Tusi Paia, na ia fesili ai: “O le ā e tatau ona ou faia ina ia alofia ai le lē fiafia o Ieova?” Ona faasino lea e le Molimau i ata o loo tautau i lona fale ma fai atu ia te ia e faitau mai le Salamo 115:4-8. I lena po ina ua sau le tane a Emilia i le fale, sa ia taʻu atu ia te ia ua manao e aveesea ana ata faalelotu. Na ioe i ai lana tane. I le aso na sosoo ai, na fai atu ai i lana fanau tama e toalua, o Toni ma Manuele, e taei ninii ata ma susunu uma. I le taimi nei, i le 25 tausaga mulimuli ane ai, pe sa iai ea sina faanoanoa o Emilia e uiga i lenei mea? E leai. O le mea moni, sa ia fesoasoani atu i le toatele o ona tuaoi ina ia avea ma ni tagata tapuai fiafia o Ieova, faatasi ma lona aiga.

Sa tutupu soo mea faapena i le tele o taimi. O le iʻuga o le galuega o le faia ma soʻo i le lalolagi aoao a Molimau a Ieova, e faitau miliona ua aʻoaʻoina ina ia tapuai i le Atua ‘i le agaga ma le upu moni.’ E mafai foi ona e olioli i faamanuiaga mai lenei auala silisili o le tapuaiga, ona e pei ona fetalai Iesu, “o loo saili le Tamā i e tapuai faapena ia te ia.”—Ioane 4:23, 24.

[Ata i le itulau 26]

Na faamanuiaina e Czar Nicholas II ana fitafita i se ata faalelotu

[Ē Ana le Ata]

Ata mai le C.N.