O E Faia le Mea Aupito Sili E te Mafaia?

“O LE A ou faia le mea e sili ona lelei ou te mafaia.” Pagā le tele o ni taimi e fai atu ai lenei faaupuga, ae sosoo atu i ai ma le upu “peitai,” ma se lisi umi o faamolemolega ona o le lē matuā faamalosi o se tasi i ana gaoioiga! Ae o faapefea lo tatou tuuina atu ia Ieova? Po o tatou faataunuuina ea la tatou folafolaga e tuuina atu ia te ia le mea e sili ona lelei tatou te mafaia?

O le faia o se tuuina atu o lona uiga ‘o le matuā tuutoina atu aʻiaʻi lea o se tasi i se auaunaga, po o se tapuaiga i se Atua po o ni galuega paia.’ Sa faia e Iesu le tele o galuega e faaalia ai mea e aofia i le tuuina atu ia Ieova i lona faapea mai: “Ai se tasi e fia mulimuli mai ia te au, aua neʻi usiusitai o ia ia te ia, a ia ave e ia lona satauro, i le mulimuli mai ai ia te au.” (Mataio 16:24) O se tasi ua le toe aiā o ia ia te ia lava ma tuuina atu o ia lava i le Atua, ua na avea le faia o le finagalo o le Atua o se mea e sili ona tāua o loo ia tulituliloaina i lona olaga.

Ona o ni tagata tuuina atu, e tatau ai ona tatou matuā suesue ifo ia i tatou lava ina ia vaai po o tatou ola e tusa ai ma lo tatou tuuina atu. Na faaali mai e Peteru le mafuaaga e ao ai ona tatou suesue ifo ia i tatou lava ina ua ia faalaeiau atu i Kerisiano faauuina e faapea: “Ia atili ai ona faamalolosi outou ia faamauina lo outou valaauina ma lo outou filifilia, auā pe a outou faia ia mea tou te le iu vale lava.” (2 Peteru 1:10) Ioe, afai tatou te faia le mea aupito sili tatou te mafaia, ona tatou lē iʻu lea e pei o ni ē ua lē taulau faaleagaga.

E Mafai ona Faateleina le Mea Aupito Sili Tatou te Mafaia

I se uiga lautele, o auauna tuuina atu uma lava a le Atua o loo faatalitalia latou te faia le mea aupito sili latou te mafaia, po o le mea e sili ona lelei ia i latou, ina ia faafiafiaina ai Ieova. E ui i lea, o mea e aupito sili tatou te mafaia i le faia o le finagalo o le Atua e mafai ona tuputupu aʻe. Mo se tamaitiiti e tolu tausaga le matua, na pau le mea e sili ona lelei na te mafai ona fesoasoani ai i lona tinā, o le fetamoʻeaʻi lea, peitai a o tuputupu aʻe lona matua, ona mafai lea ona ia faia nisi mea e  sili atu. E faapena foi i lo tatou tutupu aʻe faaleagaga—o le mea aupito sili sa mafai ona tatou faia i taimi ua mavae, atonu e lē o toe faapena i le taimi nei. Ua uunaia i tatou e faia nisi mea e sili atu mo Ieova.

O le faateleina o lo tatou talisapaia mo Ieova e faamalosia ai lo tatou lotomalie e faia nisi mea e sili atu. O le talisapaia o le mea sa ia faia mo i tatou e faamalosia lea e ala i le suesueina totino o lana Afioga, le Tusi Paia. Mo se faaaʻoaʻoga, pe a tatou auiliilia ma le faaeteete ma mafaufau loloto i le auala na auina mai ai e Ieova lona Alo e foaiina atu lona solu ina ia saoloto ai tagata mai le agasala, e uunaia ai i tatou e auauna i Lē na Faavaeina le fuafuaga o le togiola. (Ioane 3:16, 17; 1 Ioane 4:9-11) O le tele tatou te ‘tofotofo ai ia iloa e lelei Ieova,’ o le tele foi lena o le uunaia o o tatou loto e auauna atu ia te ia.—Salamo 34:8.

Sa iloatino e se faifeau galue faataimi atoa e igoa ia Jetter lenei mea. Ina ia suesue loloto i mea sa ia suesueina, sa ia faaavanoa ai se tamai potu o lona fale mo lena fuafuaga. Sa ia fuafuaina lena tulaga ina ia mafai ai ona ia uaʻi totoʻa atu a o faia ana sailiiliga. I lana fatatusi e iai ana Watch Tower Publications Index, faapea foi tuufaatasiga o le Watchtower ma le Awake! e mafai ona aapa atu iai i le fata tusi. Ua fai mai o ia: “Pe a ou maua ni faamatalaga faatupu fiafia, e lē mafai ona ou toe faatali i le fia tufaina atu i isi.”

Peitai, e pei lava o le taumafaina o se ʻaiga taugata e na o le faatasi mo sina taimi, ona lē faamalieina ai manaoga o se tagata mo meaʻai e masani ai i aso faisoo, e faapena foi i se suesuega loloto i le Tusi Paia mo na o se taimi se tasi, ona lē faamalieina ai manaoga i lea aso ma lea aso mo meaʻai faaleagaga. Sa talisapaia e Ruta lenei manaoga, auā po o le ā lava le leva, ae e mafai lava ona ia manatuaina le faitauina faatasi e lo latou aiga o le Tusi Paia i taeao taitasi ma afiafi foi pe a uma a latou taumafataga. I le taimi nei, ua 81 ona tausaga, na ia faaaluina ai le sili atu i le 60 tausaga i le faiva faasauatoa, o loo ia faitauina pea e lē aunoa le Tusi Paia pe a ala aʻe i le 6:00 i le taeao. O le taimi lava e maua ai e Ruta mekasini o Le Olomatamata ma le Awake!, e faaavanoa lava e ia le taimi e faitau ai. A itiiti mai e faatolu pe faafā taimi e faitau ai e Ruta se mataupu o loo i na mekasini a o leʻi suesueina i le faapotopotoga. Fai mai o ia, “O le mafaufau i le Afioga a le Atua o le mea lena e manaomia ina ia faamalosia ai pea le faatuatua.” Sa fesoasoani foi lea ia te ia e faaauau ai pea i le auaunaga faamisionare mo tausaga e tele.

Faia le Mea Sili Tatou te Mafaia e Fesoasoani ai i Isi

O lo tatou sini ina ia auauna i le Atua e faatupuina e ala i suesuega loloto ma faifai pea o le Afioga a le Atua, ma o se mea e i totonu o i tatou e uunaia i tatou e faia ni mea e sili ona tele. (Faatusatusa i le Ieremia 20:9.) O lena maelega na uunaia ai Hirohisa e faataunuuina atoatoa lana faiva. (2 Timoteo 4:5) Sa ola aʻe o ia i se aiga e na o se tinā, uso laiti ma tuafāfine se toafa. A o talavou lava o ia, sa ia lagolagosua i lo latou aiga e ala i le alapo i le tolu i le vaveao e tufa atu nusipepa. Sa manao o ia e faia ni mea se tele i le taʻuina atu i isi e uiga ia Ieova, o lea na talosaga ai loa Hirohisa mo le auaunaga paeonia, e pei ona taʻua ai le faiva faataimi atoa a Molimau a Ieova. I lona laitiiti sa iai, sa olioli pea o ia i le fesoasoani atu i isi ina ia faatasi ai ma ia i le faia o le mea aupito sili latou te mafaia e viia ai Ieova.

 O lo tatou faia o mea e sili ona lelei e fesoasoani ai i isi e avea ai i tatou o ni ē uigā i la tatou faiva. I se isi taimi na faalaeiau ai Iesu i ona soʻo e faapea: “Afai ua outou iloa ia mea, amuia outou pe a outou faia.” (Ioane 13:17) O Naomi o se faaaʻoaʻoga lelei o le faatatauina o fautuaga o loo aumaia i le faalapotopotoga a Ieova e faaleleia ai la tatou faiva. Sa feagai o ia ma ni taimi faigata i le talanoa atu i tagata ese mai lea fale i lea fale ma sa masani ona lē iloa e ia po o le ā sana faamatalaga e fai atu a o tū o ia i fasitepu o fale taitasi. Sa uunaia o ia e toeaina i le faapotopotoga ina ia faatatau fautuaga o loo maua i le tusi Reasoning From the Scriptures, i le vaega o “Faatomuaga e Faaaogā i le Faiva i le Fanua” (Introductions for Use in the Field Ministry). * Sa ia taulotoina faatomuaga o i lalo o le ulutala “Aiga/Fanau” (Family/Children) ma faataʻitaʻi i le tele o taimi. O le iʻuga, sa mafai ona ia faia se talanoaga ma se tinā tausiaiga pe ā ma le 30 i le 39 tausaga le matua. A o leʻi alu atu Naomi e asia lenei fafine, na sau lava le fafine i le Maota o le Malo. Sa fuafuaina loa se suesuega faale-Tusi Paia. Ua avea nei lenei tinā tausiaiga ma lona toalua ma ni Kerisiano papatisoina, o loo olioli i se olaga faaleaiga fiafia ma le la fanau.

Faia le Mea Aupito Sili Tatou te Mafaia i le Faaalia o le Naunau Totino

E mafai foi ona tatou faaaʻoaʻo i le aposetolo o Paulo o lē na faapea mai: “Ou te faia foi le mea nei ona o le tala lelei, ina ia tatou tofutofusia faatasi ma aʻu.”—1 Korinito 9:22, 23.

Ua faaatagia mai e Hatsumi lenei uiga. A o iai Hatsumi i le faiva i le lautele, sa fai ane ma le āva ia te ia se fafine e ala i se masini e tautala mai ai e faapea, sa pisi tele e lē mafai ai ona la talanoa. Na mālū le leo o le fafine i le faalogo a Hatsumi, o lea na faaauau ai pea e Hatsumi ona asiasi atu ia te ia. E na o le leo lava o le fafine e faalogoina ae lē taitai sau i fafo e feiloai ma Hatsumi. Sa faaauau pea lenei faiga mo le lua ma le ʻafa tausaga.

I se tasi aso, sa sui ai le taimi e asiasi ai Hatsumi i le fafine, ua alu i le afiafi. E leʻi tali mai se isi. Peitai, e liliu atu o ia o le a foi, ae ona faalogoina loa se leo e masani ai i ona tua, “O ai oe?” O le fafine lea faatoʻā foi atu i totonu o lona fale. I le faalogo mai o taʻu atu le igoa o Hatsumi, na maʻati mai lana tali e faapea, “Oi, o oe la lea sa e tuuasiasi mai. Faafetai lava mo le manatu mai pea ia te aʻu.” Talu ai na motusia le suesuega faale-Tusi Paia a le fafine ma Molimau a Ieova i se isi nofoaga sa iai muamua, o le ala lea o le matuā mā o le fafine e tatala le faitotoa ia Hatsumi. Na toe faia le suesuega faale-Tusi Paia ma o loo lelei le agaʻigaʻi i luma a lenei fafine. Pe o tatou manatu mamafa ea ia i latou ia tatou te fetaui i le faiva mai i lea fale i lea fale?

Ia E Faia le Mea Aupito Sili E te Mafaia

E talisapaia e Ieova a tatou taumafaiga ina ia auauna atu ia te ia i le mea aupito sili tatou te mafaia. E pei o ia o se tamā e sau i ai se atalii ma ni meaalofa. Pe a mavae ni tausaga, atonu e fesuisuiai nei meaalofa e faalagolago i tausaga o le atalii ma le malosi na te mafaia. E pei lava ona fiafia le tamā e talia ni meaalofa e tuuina atu ma le loto atoa e lona atalii ia te ia, e faapena foi ona maumauai Ieova e talia a tatou auaunaga e faia ma le loto atoa e tusa ai ma lo tatou tuputupu aʻe faaleagaga.

O le mea moni, e leai se pogai e ala ai ona faatusatusa atu fua i isi, mea aupito sili tatou te mafaia. E pei ona fai mai Paulo, o le a ia te i tatou se mea e mitamita ai ia te i tatou lava, ae “lē o le faatusatusa i isi.” (Kalatia 6:4, NW) Seʻi o tatou faaauau ona utagia le fautuaga a le aposetolo o Peteru e faapea: “Ia outou finafinau ai lava ina ia maua outou e ia ma le manuia, ua le ponā, ma le le mataʻuleagaina.”—2 Peteru 3:14.

[Faaopoopoga i lalo]

[Ata i le itulau 29]

Po o e faia ea le mea e sili ona lelei i le faatatauina o fautuaga mo le faiva i le fanua?