Puapuaga e Faavavau—Aiseā o se Aʻoaʻoga e Faapopoleina Ai?

“Ua ou faalogo ua tou faateʻaina la outou faifeau. O le ā le mea sese na tupu?”

“Talu ai sa ia taʻu mai pea lava pea ia i matou faapea o i matou uma lava e ō i hele.”

“A o le ā se tala a le faifeau fou?”

“Fai mai le faifeau fou e matou te ō foi i hele.”

“Ia, o le ā la le eseesega?”

“Ioe, o le eseesega ona pe a taʻu mai e le faifeau muamua lena mea, e foliga mai i lona leo e fiafia i ai; ae a fai mai le faifeau fou, e foliga mai e momomo ai lona loto.”

I LE faatulagaina mai i se tusi o faataʻitaʻiga, ua faaalia mai ai i lenei tala i lona lava tulaga e faapea, e lē fiafia le toatele o faiaʻoga o le Tusi Paia ma isi tagata lotu i le aʻoaʻoga o hele. I se uiga sili, o loo faapena foi ona toe faamautinoa mai ai lea lava faamatalaga e le faifeau i Kanata o Clark H. Pinnock e faapea: “I mataupu uma o suesuega faalelotu ia ua faaletonu ai loto fuatiaifo o tagata mo le tele o senituri, ou te manatu e itiiti lava nisi mataupu ua faatupuina ai se popolega tele na i lo o le faamatalaga ua maua e uiga ia hele lea e faapea, o se faasalaga e faavavau i le tino ma le agaga (solu).”

Aafiaga Tauamio

Aiseā la ua tele ai le lē malilie e uiga i vaaiga i se nofoaga e faapuapuagatia ai e pei ona tuuina mai e Kerisinetoma? (Tagai i le pusa.) Na faasino mai e le polofesa o Pinnock e faapea: “E matuā faapopoleina lava le manatu e faapea, e ao ona faapuapuagatiaina i le tino ma le mafaufau se  tagata soifua e faavavau lava, ua ou matuā faanoanoa ai tele ona e lē fetaui ma le mea ua ou talitonu i ai e uiga i le alofa o le Atua, i le manatu e faapea, ua faia nei mea ia i latou ona o se poloaiga mai le Atua.”

Ioe, o le aʻoaʻoga o le faapuapuagatiaina e faavavau ua aumaia ai se faafitauli tauamio. Mo se faataʻitaʻiga, o loo manatuaina e Kerisiano loto faamaoni fesili na lāgā e le faifeau Katoliko o Hans Küng e faapea: “Pe ao i le Atua o le alofa . . . ona silasila mai e faavavau i nei mea uma e leai se iʻuga, e leai se faamoemoe, e leai se alofa mutimutivale, e leai se alofa, le faataugāina faaletino ma faalemafaufau o ana foafoaga ola?” Ua faaauau mai Küng: “Po o ia ea o se tasi e totogi atu i ai a tatou aitalafu e aunoa ma ni ona faalogona alofa? . . . O le ā so tatou manatu i se tagata soifua o lē ua faamalieina lona manaoga mo se taui ma sui e faaauau pea ona fai e aunoa ma le taofia?” * O le mea moni, e mafai faapefea e le Atua o lē taʻu maia ia i tatou i le Tusi Paia e faapea e ao ona tatou alolofa atu i o tatou fili, ona manao e faapuapuagatiaina ona fili e faavavau? (1 Ioane 4:8-10) E lē o se mea la e ofo ai, ua faaiʻua e nisi tagata e faapea, o le uiga o hele e lē tutusa ma le tulaga o le Atua, o lenei la aʻoaʻoga e lē mafai ona fetaui ma le tulaga tauamio.

O le toatele o isi tagata talitonu latou te taumafai e faatoʻatoʻa o latou loto fuatiaifo e ala i le alofiaina o nei fesili. E ui lava i se taumafaiga e faagalogalo nei fesili, ae e lē mafai lava ona aveeseina ai nei mea faigata uma. O lea, seʻi o tatou sagaʻi atu i lenei fesili. O ā ni aafiaga tauamio e sootaga atu i lenei aʻoaʻoga? I le Criswell Theological Review, na tusia ai e Polofesa Pinnock e faapea: “Mai le vaaiga i le tulaga tauamio, e lē talafeagai ai le faapuapuagatiaina e faavavau, auā o le a e manatu ai i le Atua e pei o se tagata tinoese e faamasaa toto o loo pulea se nofoaga e pei o le falepuipui i Auschwitz mo tagata o ē na te lē faatagaina ia feoti.” Ua fesili mai o ia e faapea: “E mafai faapefea e se tasi e iai le alofa ma le agalelei ona tumau ma toʻafilemu lona loto i le manatu i [le aʻoaʻoga masani o hele]? . . . E mafai faapefea e Kerisiano ona faamatalaina atu sea atua sauā ma le mataʻutia?”

I le faaalia o taaʻiga leaga atonu ua mafai e lenei aʻoaʻoga ona tuu i mafaufau o tagata, ua faaopoopo mai ai Pinnock e faapea: “Ua oo lava ina ou tau mānatu po o ā ni mea leaga ua faia e i latou o ē talitonu i se Atua o lē na te faapuapuagatiaina ona fili?” Ua ia faaiʻu mai e faapea: “Pe lē o se popolega sili ea lenei e manaomia ona toe manatunatu atili i ai?” Ioe, afai ua faatatauina nei amioga sauā i le Atua, e lētioa la a toe iloiloina e tagata lotu mataalia ma sogāsogā le mataupu e uiga ia hele. Ma o le ā ua latou vaaia? O se isi lenei faafitauli ua faafetaiaia ai foi le manatu o le faapuapuagatiaina e faavavau.

Hele ma le Faamasinogatonu

O le toatele o ē ua tuu atu o latou manatu i le aʻoaʻoga masani o hele ua latou manatu o loo faia e le Atua se gaoioiga lē tonu, ma ua lē talafeagai ma lo latou malamalamaga e uiga i le faamasino tonu. I le ā le auala?

 E te mauaina se tali e ala lea i le faatusatusa o le aʻoaʻoga o le faapuapuagatia e faavavau ma le tulaga o le faamasinogatonu lea na tuuina mai e le Atua: “O le mata e sui aʻi le mata; o le nifo e sui aʻi le nifo.” (Esoto 21:24) I le tulaga o le finauga, ia faatatau la le aʻoaʻoga o le afi i hele i le tulafono a le Atua lea na tuuina atu ia Isaraelu anamua, o se tulafono o se taui talafeagai lelei. O le ā le faaiʻuga e te ono mauaina? E faapea e na o i latou lava e faia agasala ua mafua ai le faapuapuagatiaina e faavavau e tatau ona toe taui atu i ai i le faapuapuagatiaina e faavavau—faapuapuagatiaina e faavavau mo le faapuapuagatiaina e faavavau. Ae peitai, talu ai o tagata (e tusa lava po o le ā le leaga) e mafai lava ona latou faapogaia na o se puapuaga lē tumau, ae afai ua faasalaina i latou i le faapuapuagatiaina e faavavau, ua faapogaia ai la se tulaga lē tutusa i le va o a latou solitulafono ma le faasalaga e faavavau o le afi i hele.

I se faaupuga puupuu, o le faasalaga o le a sili ona mamafa. O le a sili atu na i o lo le “mata i le mata, nifo i le nifo.” O le manatunatu i aʻoaʻoga a Iesu na sa suia ai le manatu e uiga i le taui ma sui, e mafai la ona e ioe faapea e faigata mo le Kerisiano moni ona faafetaui atu le faamasinogatonu i le faapuapuagatiaina e faavavau.—Mataio 5:38, 39; Roma 12:17.

Taumafai e Faaalia le Saʻo o le Aʻoaʻoga

E ui lava i lea, e toatele tagata talitonu o loo taumafai pea e faaalia le saʻo o le aʻoaʻoga. E faapefea? Ua tautala le tusitala Peretania o Clive S. Lewis e fai ma sui o le toatele o ē puipuia le aʻoaʻoga i lana tusi The Problem of Pain e faapea: “E leai se aʻoaʻoga ua sili atu ona ou naunau e aveesea mai le Faa-Kerisiano na i lo lenei, pe ana fai o loo i lalo o laʻu pulega. Peitai ona ua lagolagoina malosi e le Tusi Paia ma, ae maise lava, o fetalaiga a lo Tatou lava Alii.” O lea, o ē lagolagoina ua latou taʻutino mai e faapea, o le faapuapuagatiaina e faavavau e inosia lava, ae i le tulaga lava e tasi, ua latou taofi e faapea, o le aʻoaʻoga o se faatonuga maumauaʻi ona ua latou manatu e faapea o loo aʻoaʻo mai i le Tusi Paia. Mātau le manatu na fai mai ai le faifeau o Pinnock: “E ala i le ioeina o lona tulaga lē lelei, ua latou faamoemoe ai e faamaonia lo latou faamaoni lē maluelue i le Tusi Paia, ma se maumauai i lo latou talitonuga i sea upu moni matagā talu ai o loo aʻoaʻo mai e le Tusi Paia. Ua latou taumafai e faapea mai o lenei finauga e faalagolago i ai le moni aʻiaʻi o le Tusi Paia. Ae pe e moni ea lenei mea?”

Atonu e te tau mānatu foi e faapea o le faatuatuaina o le Tusi Paia o le a e lē toe faia ai se isi filifiliga ae na o le taliaina loa o lana aʻoaʻoga. O le ā la le mea moni ua fai mai ai le Tusi Paia?

[Faaopoopoga i lalo]

[Pusa i le itulau 5]

TOLU TALITONUGA E TALI TUTUSA

O le taʻutinoga o le faatuatua o le Westminster Confession of Faith, na taliaina e le toatele o Porotesano, ua faapea mai o i latou e lē o i le lagi “e tatau ona faapuapuagatia e faavavau, ma ia faasala i le faaumatiaga e faavavau.” Na faamatalaina e le The Encyclopedia of Religion e faapea: “I le Faa-Kerisiano o le Lotu Katoliko Roma, ua talitonu e faapea o hele o se nofoaga o le faasalaga e leai sona gataaga . . . e faailogaina . . . e ala i le faatigaina i le afi ma isi puapuaga.” Ua faaopoopo mai lenei tusi e faapea, ua saosaolaumea atu i ai le Faa-Kerisiano o Lotu i Sasae “i le aʻoaʻoga e faapea, o hele o se nofoaga o le afi e faavavau ma o se faasalaga o loo faatalitali mai mo tagata amioleaga.”—Tusi 6, itulau 238-239.