Faamalamalamaina le Faatasi mai o Keriso
Faamalamalamaina le Faatasi mai o Keriso
“Pe a sau le Atalii o le tagata i lona mamalu, . . . ona tuueseeseina lea o i latou e ia.”—MATAIO 25:31, 32.
1. O le ā le mea ua faauiga i ai e taʻitaʻi lotu o Kerisinetoma upu o loo i le Mataio 24:3?
I LE toe tolu lava aso a o leʻi maliu Iesu, na faalatalata atu ai ona soʻo e toafā ia te ia ma fesili atu i ai ma le naunautai: “Ia e fetalai mai ia te i matou pe oo afea ia mea? pe se a foi le faailoga o lou faatasi mai [faa-Eleni, pa·rou·siʹa], ma le gataaga o le lalolagi?” Mo le tele o senituri, ua faamatalaina ai e taʻitaʻi lotu o Kerisinetoma ma tusitala nei upu a Iesu i le Mataio 24:3 (King James Version) e faapea, o le a toe faaali mai o ia i le tino ina ia vaaia ai e tagata uma. O lea, ua latou aʻoaʻoina ai e faapea, o le a toe afio mai Keriso ma se faaaliga tele ma se vaaiga ofoofogia. Ua latou faasino atu i lenei mea e faapea o le afio faalua mai lea o Keriso. Ae pe saʻo ea a latou taumatematega?
2, 3. (a) O le ā le faaeseesega maioio na faia e le Tusi lona 2 o Studies in the Scriptures, i le va o le upu “maliu mai” ma le “faatasi mai”? (e) O le ā le malamalamaga na oo i tagata o Ieova e faatatau i le uiga o le pa·rou·siʹa o Keriso?
2 E oo mai i le 1889, ua uma ona maua e ē faauuina a Ieova o ē ua faasusuluina atu le malamalama i le senituri lona 19, se faasaʻoga i le mataupu e uiga i le toe afio mai o Keriso. I le Tusi lona 2 o Studies in the Scriptures, i le itulau 158 e oo i le 161, na tusi mai ai Charles T. Russell, le uluai peresitene o le Watch Tower Bible and Tract Society, e faapea: “O le parousia . . . e faauiga lea i le faatasi mai, ma e lē tatau lava ona faaliliuina i le maliu mai, e pei ona taatele ai i le Tusi Paia faa-Peretania . . . Ua taʻua ma le saʻo le upu parousia i le ‘Emphatic Diaglott,’ o se faaliliuga tāua tele o le Feagaiga Fou o le faatasi mai . . . , ae lē o le maliu mai, e pei o loo sau, ae o le faatasi mai, e pei ona iai i le taunuu mai o [Iesu] i le faapea mai, ‘E pei o ona aso o Noa, o le a faapena foi le parousia [faatasi mai] o le Atalii o le tagata.’ Ia mātau, e lē o faia le faatusatusaga i le va o le maliu mai o Noa ma le maliu mai o lo tatou Alii . . . O le faaeseesega la, o loo faia i le va o le taimi o le faatasi ai o Noa ma tagata ‘a o leʻi oo mai le lolo,’ ma le taimi o le faatasi mai o Keriso i le lalolagi, i lona afio faalua mai, ‘a o leʻi oo i le afi’—o lona uiga o faafitauli sili ona ogoogo o le Aso o le Alii [o Ieova] lea e faaiʻuina ai lenei tupulaga.”—Mataio 24:37.
3 Sa malamalama ma le saʻo la tagata o Ieova o le senituri lona 19 e faapea, o le “pa·rou·siʹa” o Keriso o le a lē vaaia. Na latou malamalama foi e faapea o le iʻuga o Taimi o Nuuese o le a tupu i le tau e afu ai mea i le 1914. A o faasolosolo pea i luma le malamalama faaleagaga, na mulimuli ane ai latou malamalama faapea na nofotupu Iesu Keriso i le lagi e avea ma Tupu o le Malo i lena lava tausaga, 1914.—Faataoto 4:18; Tanielu 7:13, 14; Luka 21:24; Faaaliga 11:15.
“Le Faatasi mai o Lo Tatou Alii”
4. O le ā e faasino i ai “le faatasi mai o lo tatou Alii o Iesu Keriso”?
4 I o tatou aso la, o le ā ua uiga i ai le faaupuga a le Tusi Paia e faapea “le faatasi mai o lo tatou Alii o Iesu Keriso”? (1 Tesalonia 5:23, NW) Ua taʻua e se tasi o pule faapea o le faaupuga “faatasi mai,” pa·rou·siʹa, “na avea ma upu aloaia e faaaogā mo se asiasiga a se tagata e i se tulaga maualuga, ae [maise] lava o tupu ma emeperoa o ē asiasi atu i se itumalo.” O loo faasino atu la lenei faaupuga, i le faatasi mai o le Alii o Iesu Keriso o se Tupu, na amata mai i le 1914, ma mulimuli ane ai, ina ua faanofotupuina o ia i le lagi. Ua faatasi lē vaaia mai ai o ia ina ia ‘pule i totonu o ona fili,’ e pule ma le filigā o se Tupu ina ia faataunuuina ai lenei poloaiga faavaloaga. (Salamo 110:2) Mo le tusa ma le 79 tausaga, ua oo ai i tagata o le lalolagi āuga o le faatasi mai lē vaaia o Keriso i le tulaga tautupu.
5. O ā ni mea e tutupu i le vaitaimi o le pa·rou·siʹa o le a talanoaina i mataupu e tolu o suesuega i lenei mekasini?
5 I lenei faasologa o mataupu e tolu, o le a tatou toe autaluina ai faamaoniga mataʻina o mea ua faataunuuina e le Malo o Keriso i lenei vaitaimi. Muamua, o le a tatou talanoaina ni valoaga a le Tusi Paia o loo valoia ai mea ua uma ona tutupu po o loo faasolo nei lo latou faataunuuina. Lona lua, o le a tatou faamatalaina le galuega tele ua faataunuuina e le vasega o le auauna faamaoni ma le mafaufau, lea o loo faaaogāina e Iesu i lenei vaitaimi atoa o lona faatasi mai i le tulaga tautupu. (Mataio 24:45-47) I le mataupu lona tolu o le a faamatala mai ai ia i tatou le iʻuga silisili, le vaitaimi o le “puapuaga tele.” O le taimi lena e afio mai ai Iesu o le Faaoosala a Ieova ina ia faaumatiaina tagata amiolētonu ae faasaoina ē amiotonu. (Mataio 24:21, 29-31) Ua faamatalaina e le aposetolo o Paulo lena taimi o le faaumatiaga e pei o loo aumaia “ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu.”—2 Tesalonia 1:7, 8.
Le Faailoga
6. O le ā le faailoga tuufaatasi ua faamatalaina i le mataupu e 24 ma le 25 o le Mataio?
6 I le afe ivaselau tausaga ua mavae, na fesiligia ai Iesu e ona soʻo o ē na faasusulu atu le malamalama, mo se faailoga, po o ni faamaoniga, o lona faatasi mai i le mana o le Malo i le lumanai. Sa tusia lana tali i le mataupu e 24 ma le 25 o le Mataio, ua saunia o se faailoga tuufaatasi o mea uma na o loo faasolosolo nei ona faataunuuina i vaega uma lava o le lalolagi. Ua faailogaina e le faataunuuga o lena faailoga le taimi o puapuaga ma se tofotofoga tele. Na lapatai mai Iesu: “Ia outou, neʻi faaseseina outou e se tasi. Auā e toatele e o mai i loʻu igoa, ua faapea ane, O aʻu nei o le Keriso; latou te faaseseina foi tagata e toatele. E faalogo outou i taua ma tala o taua; ia outou, neʻi tou atuatuvale; auā e ao ona taunuu o nei mea uma, a e lei oo i le gataaga.”—Mataio 24:4-6.
7. O ā vala o le faailoga ua tatou vaaia le faataunuuina talu mai le 1914?
7 Na valoia atili e Iesu faapea o le a matuā oo taua i le lalolagi aoao. I sona faataunuuga, ua faavasegaina ai taua e lua o nei taua e faapea o taua a le lalolagi, o le tasi e mai le 1914 e oo i le 1918 ma le taua lona lua e mai le 1939 e oo i le 1945. E lē gata i lea, na ia fetalai e faapea o le a iai oge ma mafuie i lea mea ma lea mea. O le a matuā sauāina Kerisiano faamaoni. E faamaonia le moni o lenei valoaga, ona ua mafatia i sauāga mo le valusefulu tausaga ua tuanai atu Molimau a Ieova o ē sa faasusuluina atu le malamalama, a o latou talaʻiina atu le tala lelei o le Malo o le Atua “i le atu laulau uma, e fai ma molimau i nuu uma.” (Mataio 24:7-14) Ua faaopoopo mai i le Yearbook of Jehovah’s Witnesses i tausaga uma faamaoniga o le faataunuuina o nei vala o le faailoga.
8, 9. (a) O le ā e aofia ai i le faatasi mai o Iesu i le tulaga tautupu? (e) O le ā ua faamaonia mai i le valoaga a Iesu e faatatau i Keriso pepelo, e tusa ai o le nofoaga ma le auala o lona faatasi mai?
8 Talu ai ona e aofia atoa le lalolagi i le nofoaiga tupu a Iesu, ua faalauteleina atu ai le tapuaiga moni i konetineta uma o le lalolagi. O lona faatasi mai (pa·rou·siʹa) i le tulaga tautupu, o se taimi lea e asiasia ai le lalolagi atoa. (1 Peteru 2:12) Ae po o iai ea se aai autū, po o se laumua e mafai ona maua i ai Iesu? Na tali mai Iesu e ala i le valoiaina faapea o le a tutū mai Keriso pepelo a o faatalitalia lona faatasi mai. Na ia lapatai mai: “Afai latou te fai mai ai ia te outou, Faauta, o i le vao ia [Keriso], aua tou te o atu i ai; faauta, o i se afeafe ia; aua tou te faalogo i ai. Auā e pei ona emo mai o le uila i sasae, ma malamalama atu i sisifo; e faapea foi [le faatasi mai, NW, pa·rou·siʹa] o le Atalii o le tagata.”—Mataio 24:24, 26, 27.
9 E sili atu i lo so o se isi lava tagata i le lalolagi, e na o Iesu lava “le Atalii o le tagata,” na te silafia le nofoaga e maua i ai o ia i le taimi tonu e amata ai lona faatasi mai. Sa leʻi maua o ia i inei po o i inā po o se isi lava vaega patino o le lalolagi. Sa ia leʻi faaali atu i se nofoaga e mamao ese “i le vao,” ina ia mafai ai e i latou o ē sa saili i le Mesia ona faafesootaia o ia e aunoa ma le iloa e taʻitaʻi faalemalo o le atunuu, po o se nofoaga foi e mafai ona toleniina ai soʻo i lana taʻitaʻiga, ina ia sauniuni ai e osofai atu se teteega faapolotiki ma faatūina ai o ia o le Pule faa-Mesia i le lalolagi. Sa ia leʻi natia foi o ia i ni ‘potu faapitoa,’ ina ia iloa ai o ia e na o se vaega toaitiiti ua filifilia e faapea, o i inā, o le a ia fuafuaina faalilolilo ai faatasi ma ni ana fesoasoani, ni fuafuaga lilo e aunoa ma le mātauina pe masalomia, ina ia faatoʻilaloina ai faiga malo a le lalolagi ma faauuina ai o ia e avea ma Mesia folafolaina. E leai!
10. Ua susulu atu faapefea malamalama o le upu moni o le Tusi Paia i le lalolagi aoao?
10 I le tuufaafeagai, ua aunoa ma se mea e natia e uiga i le afio mai o Iesu o se Tupu, i le amataga o lona faatasi mai i le tulaga tautupu. E pei ona valoia e Iesu, i le lalolagi atoa, ua faaauau pea ona susulu atu le malamalama o le upu moni a le Tusi Paia i vaega tetele mai sasae e oo atu i sisifo. E moni, i le avea ma ē faasusuluina atu le malamalama i ona po nei, ua faamaonia ai le avea o Molimau a Ieova ‘e fai ma malamalama o nuu ese, ina ia oo atu ai le faaolataga a Ieova i tuluʻiga o le lalolagi.’—Isaia 49:6.
Galuega a Agelu
11. (a) Ua faapefea ona faaaogāina le au agelu i le faasusuluina atu o le malamalama o le Malo? (e) O anafea ma i le ā le vaega ua aoaoina atu i ai sui o le vasega o saito?
11 O isi mau e fesootai ma le faatasi mai o Iesu, o loo faamatalaina ai lona faatasi mai ma le au agelu po o loo ia ‘aauina atu i latou.’ (Mataio 16:27; 24:31) I le faataoto i le saito ma le titania, na taʻua ai e Iesu faapea “o le fanua, o le lalolagi lea” ma “o le seleselega, o le gataaga lea o le lalolagi; [a] o e selesele, o agelu ia.” Peitai, e lē o le uiga o lenei mea e faapea i le taimi o lona faatasi mai i le mana ma le mamalu o le Malo, na te faaaogāina ai na o ni agelu avefeau e tauaveina atu feau i le lalolagi. E amata mai i le 1919, na tuueseese ai e agelu e ala i le taʻitaʻiga a Iesu, le vasega o saito o ē faauuina e le agaga sa iai pea i le lalolagi, ia na faataapeapeina ona o mea na tutupu i le Taua Muamua a le Lalolagi, ma sauniunia ai i latou nei mo isi galuega i le suafa o le Tupu. (Mataio 13:38-43) I le 1920-1929 na filifili ai le isi faitau afe e tutū mo le Malo ua faavaeina o le Atua ma sa faauuina ai i le agaga o le Atua. Sa aogā le faaopoopo atu o nei tagata faauuina i vasega o le uluai vaega totoe. I le aotelega, ua faia aʻe ai ia i latou na le vasega o le auauna faamaoni ma le mafaufau i o tatou aso.
12. O le ā le galuega o le faamamāina o loo auai ai agelu, ma o le ā lona iʻuga mo le lalolagi?
12 O se isi faaaʻoaʻoga o le auai o agelu i le faatasi mai o Iesu ma mulimuli ane ai i lona nofotupu i le 1914 o loo faamauina lea i le Faaaliga 12:7-9: “Ua tau foi le taua i le lagi; o Mekaeli [Iesu Keriso] ma ana agelu ua latou tau ma le tarako, ua ʻau foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.” Ua na faamamāina nei la le lagi i lugā, ae ua tuua ai na o le nofoaga faalelalolagi o le Malo, lea ua toeitiiti ona faamamāina atoatoa lea mo le faapaiaina o le suafa o Ieova. I lenei tausaga e 1993, o loo faaauau ai pea ona faatatauina le lapataiga mai le Atua e faapea: “O i talofa ia te outou o e nonofo i le fanua ma le sami . . . auā ua alu ifo ia te outou le tiapolo ua lotoa tele, auā ua na iloa ua saasaa ona po.”—Faaaliga 12:12.
Le Toetu Faalelagi
13, 14. (a) O le ā ua faaalia e mau o le Tusi Paia, na amata talu mai le 1918 ma faasolo mai ai? (e) O le ā ua faaalia e Paulo ma Ioane e faatatau i le vaega totoe faauuina i aso nei?
13 O se isi mea ofoofogia ua tupu i le faatasi mai o Keriso o le amataina lea o le toetu faalelagi. Na faaalia mai e le aposetolo o Paulo, o na Kerisiano faauuina ua leva ona momoe i o latou tuugamau, o le a avea ma ē e toe faatutūina muamua e ola faatasi ma Keriso Iesu i le nofoaga o agaga. Ua faaalia i faamaoniga i le tele o tausaga e faapea, e foliga mai na tupu lenei mea talu mai le 1918 ma luma mai. Ua tusia e Paulo: “E faapea foi ona faaolaina uma ia Keriso. Ae peitai e taitoatasi ma lona tofi; o le faapolopolo o Keriso lea, mulimuli ane o e o ia Keriso e toe tutū i lona faatasi mai [pa·rou·siʹa].” (1 Korinito 15:22, 23) Ua faamautinoa mai le toetu o le au faauuina i le taimi o le faatasi mai o Keriso i le 1 Tesalonia 4:15-17: “Matou te fai atu foi lenei mea ia te outou i le afioga a le Alii [o Ieova], o i tatou o e ola ma totoe pe a [faatasi, NW] mai, [pa·rou·siʹa] le Alii, tatou te le muamua i e o momoe [i le oti, NW]. . . . E muamua foi ona toe tutū mai o e ua oti o ia Keriso; ona faafuasei lea ona aveina ae o i tatou o e ola ma totoe, faatasi ma i latou i ao, ina ia fetaiai ma le Alii i le va nimonimo.” E 144,000 i latou o ē ua fai mo Keriso ua avea ma ē faauuina, ua mautinoa le mauaina o lenei taui ofoofogia.—Faaaliga 14:1.
14 E pei ona faaalia e Paulo, o i latou o le vaega totoe o loo soifua pea i aso nei, e lē muamua ona latou ulu atu i le Malo na i lo o Kerisiano faamaoni ua faauuina, ma soʻo na fasiotia faamaturoina. Ua faamatala atili e le aposetolo o Ioane i latou o le au faauuina o ē ua maliliu i aso nei e faapea: “Amuia ē ua oti, o e ua oti o i le Alii e amata i nei ona po. O lea lava, ua fetalai mai ai le Agaga, ina ua latou malolo i a latou galuega tiga; o a latou galuega foi e mulimuli ia te i latou,” o lona uiga, o le taimi o lo latou toetu. (Faaaliga 14:13) Ma ua faapea mai Paulo: “Faauta mai, ou te taʻu atu ia te outou le mea lilo; e le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou.” (1 Korinito 15:51, 52) Maeu se vavega ofoofogia!
15, 16. (a) O le ā le faataoto na tuuina mai e Iesu i le Luka 19:11-15, ma mo le ā le mafuaaga? (e) Ua faapefea ona agaʻi ina faataunuuina lenei valoaga?
15 I se tasi taimi, ina o talaʻi atu Iesu i se vaega o ona soʻo e uiga i le Malo o le Atua, na ia faaaogāina ai se faataoto e fesoasoani ia i latou ina ia faasaʻo ai o latou manatu sese. E faapea ona faitauina le tala: “Fa te i latou o le a faaalia mai loa le malo o le Atua. O lea foi ua fetalai atu ai o ia, Na alu le tasi alii i le nuu mamao e maua ai sona ao e fai ai o ia ma tupu, i le toe foi mai. Ua valaau e ia i ana auauna e toasefulu, ua avatu ia te i latou mina e fuagafulu, ua fai atu foi ia te i latou, tou te faatau aʻi seia ou toe sau. . . . Ua toe foi mai o ia ina ua maua lona ao e fai ai o ia ma tupu, ona fai ane ai lea, ia valaauina ia auauna na ia avatu i ai tupe ia o mai ia te ia, ina ia iloa e ia taitasi a latou faatau po ua faapefea.”—Luka 19:11-15.
16 O le “alii,” e faatatau ia Iesu lea na afio atu i le lagi, “le nuu mamao” ina ia mauaina ai se malo. Na ia mauaina lena Malo i le 1914. E leʻi umi, ae toe faia se feiloaiga a le Tupu o Keriso ma ē ua taʻua o ona soʻo, ina ia iloa po o ā a latou mea na fai i le tausiaina o manaoga o le Malo, ia na tuu atu ia te i latou. Sa filifilia se vaega faamaoni e toaitiiti ina ia talia le faamālō a le matai e faapea: “Ua lelei ia, le auauna lelei e, ua e faamaoni i le mea itiiti lava, o lea ia e pule ai i aai e sefulu.” (Luka 19:17) O lenei vaitaimi o le faatasi mai o Keriso, sa aofia ai le matuā faaauauina o le galuega talaʻi o le Malo, e aofia ai foi le faalauiloaina o faamasinoga a le Atua i ē amioleaga, ma o le vaavaaiga o lenei galuega sa aofia ai i le pule lea na tuuina atu i le “auauna lelei.”
Talaʻiga i le Lalolagi Aoao
17. O le ā le olioli ua faailogaina ai le pa·rou·siʹa?
17 O ā isi mea o le a tutupu i le vaitaimi o lenei pa·rou·siʹa? O le a avea o se taimi o le olioli tele i le galuega talaʻi ma i le fesoasoani atu i ē fou ina ia sauniuni mo le faasaoina atu i le puapuaga tele o loo fotuai mai. O i latou nei o le “motu o tagata e toatele,” o ē e fesoasoani i le vaega totoe, ua avea ma “tusi e taʻulelei ai.” (Faaaliga 7:9; 2 Korinito 3:1-3) Ua taʻua e Paulo le olioli o lenei galuega o le seleselega ina ua ia faapea mai: “Auā se a ea so matou faamoemoe, ma se fiafia, ma se pale e mitamita ai? E lē o outou ea i luma o lo tatou Alii o Iesu Keriso, i lona [faatasi, NW] mai [pa·rou·siʹa]?”—1 Tesalonia 2:19.
Ia Tausia Pea le Mamā ma le Lē Ponā
18. (a) O le ā le tatalo a Paulo lea e iai sona sootaga ma le pa·rou·siʹa? (e) O le ā le agaga e ao ia i tatou uma ona faaalia i lenei taimi, ma i ā auala e faaali atu ai?
18 Sa tatalo foi Paulo ina ia faapaiaina i latou o loo ola i lenei vaitaimi o le faatasi mai o Keriso e faapea: “Ia atoatoa ona faapaiaina o outou e le Atua lava e ona le manuia; ia tausia lava lo outou agaga atoa uma, i le ma le loto, atoa ma le tino, ia le mataʻuleagaina, i le [faatasi, NW] mai [pa·rou·siʹa] o lo tatou Alii o Iesu Keriso.” (1 Tesalonia 5:23) Ioe, i aso nei, pe o i tatou o nisi o le vaega totoe faauuina po o le motu e toatele o isi mamoe, ae ua fusia faatasi i tatou ma le faamaoni e le agaga o le felagolagomai ina ia mafai ai ona faaauau pea ona tatou mamā ma ia lē ponā i lenei taimi uigaese. E faapena foi, ona tatou manaomia le faaalia o le onosai. Na tusia e Iakopo: “O lenei, le au uso e, onosai ia seia oo i le [faatasi, NW] mai, [pa·rou·siʹa] o le Alii. . . . ia faatumauina o outou loto, auā ua lalata le [faatasi, NW] mai, [pa·rou·siʹa] o le Alii.”—Iakopo 5:7, 8.
19. O le ā le lapataiga na faaleo atu e Peteru e faatatau i le pa·rou·siʹa, ma e ao faapefea ona tatou tali atu i ai?
19 Sa iai foi se mea na fia taʻu mai e le aposetolo o Peteru ia i tatou o ē o loo ola i lenei vaitaimi. Na ia lapataia i tatou e uiga i ē tauemu, ia ua anoanoai i itu uma o le lalolagi. Ua faapea mai Peteru: “Ua muamua, ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tuʻinanau; e faapea mai foi i latou, O ifea o i ai le upu na folafolaina ai lona [faatasi, NW] mai, [pa·rou·siʹa] auā talu ona momoe o le augātamā, ua tutumau pea o mea uma talu ona faatoa faia.” (2 Peteru 3:3, 4) E ui lava i le faatupulaia o ē tauemu i le taimi o le faatasi mai o Keriso, ae o loo faaauau pea ona susulu atu tagata o Ieova e pei o ni malamalama o le lalolagi, mo le faaolataga o le toatele.
Fesili o le Autaluga
□ Na faapefea ona faamalamalamaina atili tagata o Ieova e tusa ai ma le pa·rou·siʹa?
□ Ua faapefea ona faataunuuina le Mataio 24:4-8?
□ Ua lagolagosua faapefea agelu i le nofotupu o Keriso?
□ O le ā le vavega ofoofogia ua aliaʻe mai e fesootai atu i le pa·rou·siʹa?
□ O le ā le olioli lea ua tofo i ai i lenei vaitaimi, ma o ai o loo olioli ai?
[Fesili mo le Suʻesuʻega]