Faasaoina i le Faaalia mai o Iesu Keriso
Faasaoina i le Faaalia mai o Iesu Keriso
“Ia outou olioli ai, ina ia fiafia outou ma le olioli tele pe a faaalia mai lona mamalu.”—1 PETERU 4:13.
1. Ua faapefea ona faatamaoaigaina e Ieova ana auauna?
UA FAATAMAOAIGAINA e Ieova ana Molimau i le tele o meaalofa. Ona o ia o lo tatou Faiaʻoga Sili, ua ia faamalamalama ai i tatou i le poto atoatoa i lona finagalo ma lana fuafuaga. E ala i lona agaga paia, ua ia atiina aʻe ai ia i tatou le tomai e faasusulu atu ai le malamalama ma le lototele. Ua taʻu mai e le aposetolo faagaeeina o Paulo ia i tatou i le 1 Korinito 1:6, 7: “Faapei ona faamaonia le molimau ia Keriso ia te outou; o lea ua outou le matitiva ai i se mea alofa e tasi; o loo faatalitali outou i le [faaalia mai, NW] o lo tatou Alii o Iesu Keriso.”
2. O le ā se faamoemoe olioli ua aumaia e “le faaalia mai o lo tatou Alii o Iesu Keriso”?
2 O le ā le uiga—o “le [faaalia mai, NW] o lo tatou Alii o Iesu Keriso”? Ua faatatau lea i le taimi e faaalia mai ai Iesu o se Tupu mamalu, ina ia gaoioi e tauia ona soʻo faamaoni ma ia faaoo mai le taui ma sui i ē faalēmataʻu. E pei ona faaalia i le 1 Peteru 4:13, o le a avea lea o se taimi e ‘fiafia ma olioli tele ai’ ē e tausisi i le faamaoni, o Kerisiano ia ua faauuina e le agaga ma a latou aumea faamaoni o le motu o tagata e toatele, auā o se faailoga lea o le faaiʻuga o le faiga o mea a Satani.
3. E tatau faapefea ona tatou tutū mausalī, e pei ona sa faia e o tatou uso i Tesalonia?
3 A o lalata tele mai lena taimi, o le a faateleina ai e Satani omiga ia i tatou ona o lona lotoa. I le pei o se leona tagi, ua ia taumafai ai e ʻaina i tatou. E tatau ona tatou tutū mausalī! (1 Peteru 5:8-10) A o fou i totonu o le upu moni o tatou uso i Tesalonia anamua, sa mafatia i latou i puapuaga e talitutusa ma puapuaga ia ua oo i le toatele o Molimau a Ieova i aso nei. O lea, ua matuā uigā ai ia i tatou upu o le tusi a le aposetolo o Paulo ia i latou. Na ia tusia: “Ua tonu i le Atua e taui atu le puapuaga i e ua faapuapuagaina ai outou; e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu.” (2 Tesalonia 1:6-8) Ioe, o le a oo mai le mapusaga!
4. Aiseā ua fetaui lelei ai i taʻitaʻi lotu le faamasinoga lea o le a faaooina mai i le faaalia mai o Iesu?
4 I ona po o Paulo, o le tele lava o puapuaga sa faapogaia lea e taʻitaʻi lotu o Iutaia. E faapena foi i aso nei, ua masani ona faamaiteina teteega i Molimau a Ieova o ē naunau i le filemu, e i latou o ē faapea mai o loo suitulaga i le Atua, ae maise lava taʻitaʻi lotu o Kerisinetoma. E faafoliga mai latou te iloa le Atua, ae latou te teena le “Ieova e toatasi” o le Tusi Paia, ma tuu ai i lona tulaga se Tolutasi lilo. (Mareko 12:29, NW) Latou te lē usiusitai i le tala lelei e uiga i lo tatou Alii o Iesu, ae latou te vaavaai atu i pulega a tagata mo se mapusaga ma teena ai le tala lelei o le Malo amiotonu a Keriso o loo fotuai mai. O lea ua tatau ai lava ona faaumatia nei tagata lotu tetee uma i le taimi o le ‘faaalia mai o le Alii o Iesu mai le lagi’!
Le “Maliu mai” o Iesu Keriso
5. Ua faapefea ona faaatagia manino mai le faaalia mai o Iesu i le Mataio 24:29, 30?
5 O loo faaalia manino mai lena faaaliga e Iesu i le Mataio 24:29, 30. I le faamatalaina o vala eseese o le faailoga o lona faatasi mai ma le faaiʻuga o le faiga o mea, na ia fetalai ai: “A mavae atu le puapuaga o ia ona aso, ona faapogisaina loa lea o le la, e le susulu mai foi le masina, e pauu foi fetu mai le lagi, e luluina foi ʻau a le lagi.” I lena taimi, o le a “iloa ai lea i le lagi o le faailoga o le Atalii o le tagata.” E ‘taufaitagituʻi foi atunuu o le lalolagi, latou te iloa atu foi le Atalii o le tagata [le Tupu Faa-Mesia a le Atua] ua sau i ao o le lagi ma le mana ma le mamalu tele.’ O loo faatatau lenei “maliu mai,” er·khoʹme·non i le faa-Eleni, i le faaalia mai o Iesu, o ia o Lē e Taʻumamāina Ieova.
6, 7. O le a faapefea ona “iloa atu foi o ia e mata o tagata uma,” ma o ai ua aofia ai i lenei mea?
6 Ua faamatalaina foi lenei “maliu mai” e le aposetolo o Ioane i le Faaaliga 1:7, i le faapea mai: “Faauta, o loo afio mai o ia ma ao.” Oi, o le a lē vāai moni na fili i o latou mata ia Iesu, auā o “ao” e faaalia ai lona maliu mai lē vaaia ina ia faaooina mai le sala faafaamasinoga. Afai e vaaia e tagata lona mamalu faalelagi i o latou mata faaletino, o le a faatauasoina i latou, e pei lava o Saulo a o iai i le ala i Tamaseko, sa taia o ia ma tauaso ai, ina ua faaali ane ia te ia Iesu ua faamamaluina, i se malamalama sili ona pupula.—Galuega 9:3-8; 22:6-11.
7 Ua taʻua i le tala a le Faaaliga e faapea, “e iloa atu foi o ia e mata o tagata uma, atoa ma e na tuʻia o ia; e taufaitagituʻi foi itu aiga uma o le lalolagi ona o ia.” O lona uiga o lenei mea, o ē tetee uma o loo i le lalolagi o le a malamalama i le faaumatiaga e faatotō ifo e Iesu ia i latou faapea, ua oo mai o ia i le mana ma le mamalu tele e avea ma Faaoosala a Ieova. Aiseā ua faamatalaina ai nei fili faapea o “e na tuʻia o ia”? Talu ai o lo latou uiga feita i auauna a Ieova i aso nei ua pei lava o uiga o ē na faasauā ia Iesu. O le a latou matuā ‘taufaitagituʻi lava ona o ia.’
8. O le ā le lapataiga ua faaleo atu e Iesu ma Paulo e faatatau i le faaumatiaga faafuaseʻi?
8 O le a faapefea ona oo mai lena aso o le taui ma sui a Ieova? I le valoaga i le Luka mataupu e 21, ua faamatalaina ai e Iesu le faasologa o mea mataʻutia o loo tutupu ua avea lea o se faailoga o lona faatasi mai talu mai le 1914. Ae i le fuaiupu e 34 ma le 35, ua lapatai mai ai Iesu: “Ia outou, neʻi faamamafaina o outou loto, ma le faaniniva, ma le onā, ma le popole i mea a le olaga nei, neʻi faafuasei mai lea aso ia te outou. Auā e pei o se mailei ona oo mai ai i e nonofo uma lava i le fogāeleele uma.” Ioe, e vave tele le oo mai o lena aso o le taui ma sui a Ieova, e matuā faafuaseʻi lava! Ua faamautinoa mai e le aposetolo o Paulo lenei mea i le 1 Tesalonia 5:2, 3 e faapea: “O le aso o [Ieova, NW] e pei o le gaoi i le po, e faapea ona oo mai ai; auā pe a latou fai ane, O loo filemu, [ma saogalemu, NW], ona oo lea ia te i latou o le fano faafuasei.” E oo foi i le taimi nei, o loo talanoa ai atunuu e uiga i le filemu ma le saogalemu, ma ua faamoemoe e faamalosia Malo Aufaatasi ina ia leoleoina nofoaga faatupu faalavelave e ala i le faaaogāina o malosi faavaegaau.
9. O ai o le a ‘faasusulu atu i ai le malamalama,’ ma aiseā?
9 Ua faaauau ona taʻu mai e le aposetolo ia i tatou i le fuaiupu e 4 ma le 5 e faapea: “A o outou, le au uso e, tou te le o i le pouliuli, ia maua mai ai outou e lena aso, pei o se gaoi. O tagata o le malamalama outou uma lava, ma tagata o le ao; tatou te le o i le po ma le pouliuli.” Ua tatou olioli ona o le avea ma fanau o le malamalama—o ni ē faasusuluina atu le malamalama i isi o ē o loo moomoo mo le filemu moni ma le saogalemu i le lalolagi fou a le Atua. I le Salamo 97:10, 11, ua tatou faitau ai: “Outou e ua alolofa atu ia Ieova, ia outou ʻinoʻino i mea leaga; o loo tausi e ia i agaga o ona tagata amio Atua; na te laveaiina i latou ai lima o e amio leaga. Ua luluina le malamalama mo lē amiotonu, ua luluina foi le olioli mo e ua loto faamaoni.”
Le Faasologa o Mea Tutupu
10. O le ā le faaaliga ua muai taʻu mai e ao ona tatou utagia e faatatau i le aso a le Atua e faaalia mai ai? (Faaaliga 16:15)
10 O le ā la le faasologa o mea tutupu pe a pa mai le puapuaga tele? Seʻi o tatou suʻe ane i le Faaaliga mataupu e 16. Mātau, e pei ona faamatalaina i le fuaiupu e 13 e oo i le 16 e faapea, ua faapotopotoina e na agaga leaga o temoni atunuu o le lalolagi ia Amaketo, le taua o le aso tele o le Atua e Ona le Malosi Uma Lava. Ua toe faamamafa ai foi i inei, le oo mai o le aso e faaalia mai ai, e pei o se gaoi, ma ua lapataia ai i tatou ina ia mataala pea—ia oofu pea i ofu faaleagaga na e faailogaina ai i tatou mo le faaolataga. Ua oo mai le taimi mo le faamasinoina o tagata o le lalolagi, o atunuu, atoa ma—se isi tagata. O ai lena tagata?
11. Ua faapefea ona faailoa mai e le fafine o le Faaaliga 17:5 ia lava?
11 O le fafine faafaatusa lea o lē o loo taumafai malosi lava ina ia avea o ia o ‘se tasi e tāua.’ Ua faamatalaina o ia i le Faaaliga 17:5 “o le mea lilo, Papelonia le Aai Tele, o le tinā o fafine talitane ma mea inosia i le lalolagi.” Peitai ua lē o toe avea o ia o se mea lilo i Molimau a Ieova. Ua manino ona ia faailoaina mai ia lava o le emepaea o lotu sese o le lalolagi, lea ua avea ai lotu a Kerisinetoma ma ona vaega autū. O se mea e inosia i fofoga o Ieova, lona lotolotoi ai i faiga faapolotiki, lona ‘onā i le toto o le au paia’ e ala i le sauāina o Kerisiano moni, atoa ma le tuuaʻia o ia i lona faamasaaina o toto “o i latou uma ua fasiotia i le lalolagi,” e aofia ai le sili atu i le selau miliona na fasiotia i taua i le na o lenei 20 senituri.—Faaaliga 17:2, 6; 18:24.
12. Aiseā ua taʻusalaina ai lotu eseese a Kerisinetoma?
12 Ae e sili atu ai ona leaga, ua aumaia e lotu eseese a Kerisinetoma le faalumaina i le suafa o le Atua o lē ua latou faapea mai ma le faagutugutulua o loo avea i latou ma ona sui. Ua latou aʻoaʻoina filosofia faa-Papelonia ma filosofia faa-Eleni na i lo le Afioga mamā a le Atua, ma ua faia so latou sao i amioga lē mamā a atunuu uma lava e ala i le faatagaina o auala e lē faatuaoia o le olaga ua faapea ona faaleaogāina ai mataupu silisili o le Tusi Paia. Ua taʻusalaina tagata sauā ma le matapeapea o loo ia i latou i upu a le Iakopo 5:1, 5 e faapea: “Outou e tamaoaiga, ia outou fetagisi ma uio ona o puapuaga o le a oo mai ia te outou. Ua outou nonofo i le nuu ma le sololelei, ma le fiafia i la le tino; ua fafagaina outou e outou, faapei o manu mo le aso e fafasi ai.”
Ua Paʻū Papelonia Tele!
13. E oo mai faapefea le vaega amata o le puapuaga tele, ma o le ā le faanatinati lea o loo faamamafaina i le Faaaliga 18:4, 5?
13 E ō mai faatasi le osofaiga amata i le puapuaga tele ma le faatotōina ifo o le faasalaga a Ieova ia Papelonia Tele. Ua faamatala auiliili mai i le Faaaliga 17:15-18, le “finagalo” o le Atua—ina ia faagaoioia ai ‘nifo e sefulu,’ o autau malolosi mai le “manu feai” o atunuu uma o Malo Aufaatasi, ina ia faatamaʻia ai Papelonia Tele. “O nifo foi e sefulu na e iloa i le manu feai, latou te ʻinoʻino i le fafine talitane, ma faasaunoa ia te ia, ma to ese ona ofu, latou te aai foi i lona tino, ma susunu ia te ia i le afi. Auā ua tuuina atu e le Atua i o latou loto ia faia lona finagalo.” E letioa la a fofogaina mai e le leo faalelagi se lapataiga faanatinati i le Faaaliga 18:4, 5: “Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala; auā ua paʻi atu ana agasala i le lagi, ua manatua foi e le Atua ana amioleaga.” O loo faaauau pea ona avatu o lenei valaau: Ia motusia uma fesootaiga ma lotu sese, a o leʻi tuai tele!
14. O ai o le a tagi auē i le faatamaʻiaga o Papelonia Tele, ma aiseā?
14 O le a faapefea ona manatu le lalolagi i le faatamaʻiaga o Papelonia Tele? Ua tutū mamao mai ‘tupu o le lalolagi’—o le au faipolotiki faapiʻopiʻo—ma faanoanoa ona o ia, auā sa latou mauaina ai mo le tele o senituri le fiafiaga fesuiai i lo latou faitaaga faaleagaga. Ua faapea foi ona taufaitagi, ma faanoanoa tagata matapeapea o loo faia fefaatauaiga, ‘le au faatauʻoa o ē na tamaoaiga ona o ia.’ E tutū mamao mai foi i latou ia ma faapea ane: “Aue, aue le aai tele, na ofu i le ie vavae ma le pāuli, ma le mūmū, na teteu foi i auro, ma maa tāua ma penina; auā o le itu aso e tasi ua faaumatia ai le oloa ua sili ona tele.” O le a mou atu e faavavau ofu e sili ona matagofie atoa ma le feilafi mai o malumalu tetele o le lalolagi! (Faaaliga 18:9-17) Ae po o le a faanoanoa ea tagata uma ona o Papelonia Tele?
15, 16. O le ā le pogai o le olioli o le a iai i tagata o le Atua?
15 Ua tali mai le Faaaliga 18:20, 21 e faapea: “Ia e olioli ona o ia, le lagi e, atoa ma outou aposetolo paia ma perofeta; auā ua faasalaina o ia e le Atua ona o le faasalaina o outou e ia.” E pei o se maa olo tele, ua lafoina i le sami, “e faapea ona lafotuina o Papelonia le aai tele, e le toe iloa lava.”
16 Maeu se mafuaaga mo le olioli! Ua faailoa mai e le Faaaliga 19:1-8, (NW) le mea lenei. E faafā ona sau o le alaga mai le lagi e faapea, “Ia vivii atu ia Ioa, outou uma.” O Aleluia muamua e tolu o loo vivii atu ai ia Ieova ona o lona faaooina mai o lana faasalaga amiotonu i le fafine talitane amioleaga, o Papelonia Tele. E lē toe iai se emepaea o lotu sese a le lalolagi! Ua faapea mai se leo mai le nofoalii o le Atua: “Ia vivii atu i lo tatou Atua, o outou ana auauna uma, ma outou o e matatau ia te ia, o tagata nuu atoa ma alii.” Maeu se faaeaga o le a tatou maua o le auai i lena pese!
Le Faaipoipoga a le Tamai Mamoe
17. Pe a faatusatusa atu le Faaaliga 11:17 i le 19:6, o ā aotelega e lua ua amata ona pule ai Ieova o se Tupu?
17 Ua faailoa mai e le Aleluia lona fa se isi matua e faapea: ‘Ia vivii atu ia Ioa, outou uma, auā ua fai ma tupu Ieova lo latou Atua, o Lē Ona le Malosi Uma Lava.’ Ae pe e lē faapena ea foi se fuaiupu o le pese o loo sii mai i le Faaaliga 11:17? Ua tatou faitau ai i inā: “Le Alii e, le Atua e ou le malosi uma lava, ua matou faafetai atu ia te oe, . . . ina ua e tago i lou mana tele ma ua fai oe ma tupu.” Ioe. Peitai, o le aotelega o le Faaaliga 11:17 o loo faatatau lea i le aumaia e Ieova o le Malo faa-Mesia i le 1914 ina ia “pule i nuu uma i le tootoo uamea.” (Faaaliga 12:5) O loo taʻua i le aotelega o le Faaaliga 19:6 le faaumatiaga o Papelonia Tele. Pe a aveesea lotu e pei o se fafine talitane, ona taʻumamāina loa lea o le tulaga tauatua o Ieova. O le a faaauau pea ona tupu olaola le tapuaiga ia te ia o le Pule Silisiliese ma o ia o le Tupu i le taimi nei seia oo lava i le faavavau!
18. O le aveesea o Papelonia Tele ua tatala atu ai le ala mo le ā le faasilasilaga fiafia?
18 O lea, ua mafai ai ona alagaina le faasilasilaga fiafia e faapea: “Ia tatou fiafia ma olioli, ma tuu atu le viiga ia [Ioa]; auā ua oo mai le tausamaaga a le Tamai mamoe, o lona faletua foi ua saunia o ia e ia. Ua tuuina atu foi ia te ia ina ia ofu o ia i le ie vavae e mamā ma le pupula; auā o le ie vavae o le amiotonu lea a le au paia.” (Faaaliga 19:7, 8) E lē o taʻua maia le taimi tonu e mauaina ai e le vaega faauuina o loo totoe pea i le lalolagi lo latou toetu i le lagi. Ae ua tatou mautinoa mai i le aotelega i inei e faapea, o lo latou auai i le faaipoipoga a le Tamai Mamoe, o Iesu Keriso, o le a avea o se taimi fiafia, ma o le tulaga mautinoa lena o le a iai auā o le a latou muai molimauina le faamasiasiina o le fafine talitane amioleaga, o Papelonia Tele.
Faaumatia le Lalolagi a Satani
19. O le ā le isi mea na tupu o loo faamatalaina i le Faaaliga 19:11-21?
19 Ua toe vaaia nei foi le solofanua sinasina o loo muai taʻua i le Faaaliga 6:2. Tatou te faitau ai i le Faaaliga 19:11 e faapea: “O lē tietie ai foi [i le solofanua sinasina] ua igoa ia o le Faamaoni ma le Moni, o le amiotonu foi na te faamasino ai ma tau ai le taua.” O lea ua alu atu ai le “Tupu o tupu, ma le Alii o alii” ina ia taia e ia o atunuu ma soli i “le soligāvine o le toasa mamafa o le Atua e ona le malosi uma lava.” Ma le leai o se aogā, ua ‘faapotopoto ane ai tupu o le lalolagi ma a latou ʻau’ ina ia tau le taua ia Ha-Maketo. Ona faaiʻuina ai lea e Lē Tietie i le solofanua sinasina lona manumalo. E aunoa ma se mea e totoe o le faalapotopotoga faalelalolagi a Satani.—Faaaliga 19:12-21.
20. O le ā e oo i le Tiapolo lava ia?
20 Ae faapefea le Tiapolo lava ia? I le Faaaliga 20:1-6, o loo faamatalaina ai Iesu Keriso e faapea o le “agelu ua alu ifo [mai, NW] le lagi, ua ia te ia le ki o le to e le gata, ua i lona lima foi le maea uamea tele.” Ua ia puʻea le tarako, le Gata tuai, o le Tiapolo lea ma Satani, ua saisaia o ia, ua lafo ifo o ia i le tō e lē gata, ma pupuni ma faamaufaailoga ai i ona luga. Ina ua aveesea Satani ma ua lē mafai ai ona ia toe faaseseina atunuu, ona faagasolo ai loa lea o le Pulega o le Meleniuma ua faamamaluina, a le Tamai Mamoe ma lana faatoanofo tane. E lē toe iai ni loimata o le faanoanoa! E lē toe iai se oti ona o le agasala tuufaasolo mai ia Atamu! E lē toe iai se tigā, po o se auē, po o se puapuaga! “Auā ua mavae atu mea muamua.”—Faaaliga 21:4.
21. A o tatou faatalitali atu ma le naunautai i le faaalia mai o Iesu Keriso, o le ā e ao ona tatou maumauai i ai?
21 A o tatou faatalitali atu ma le naunautai i le faaalia mai o lo tatou Alii o Iesu Keriso, seʻi o tatou faaalia ia le maelega i le taʻuina atu i isi e uiga i folafolaga alofa a le Malo o le Atua. Ua latalata mai le faasaoina! Talosia ia tatou savavali i luma, ia agaʻi pea i luma, o ni fanau ua faamalamalamaina a le Alii Pule Silisiliese o Ieova!
I le Autaluga
□ O le ā e faamaonia ai ua latalata le faaalia mai o Iesu Keriso?
□ O le a oo mai faapefea le aso o le taui ma sui a Ieova?
□ E ao faapefea i “e ua alolofa atu ia Ieova” ona manatu i le tulaga ua iai le lalolagi i aso nei?
□ O le ā le faasologa o mea tutupu o le a iai pe a gāpā le puapuaga tele?
[Fesili mo le Suʻesuʻega]
[Ata i le itulau 23]
E ‘afio mai i ao’ Iesu, e lē vaaia, ina ia faaoo mai le sala faafaamasinoga
[Ata i le itulau 25]
E lē o toe umi, ona faaumatia uma lea o lotu sese, le faiga o mea amioleaga a Satani, ma Satani lava ia