Galuega Faateleina i le Taimi o le Faatasi mai o Keriso

“Ona fai atu ai lea o le Tupu i e o i lona itu taumatau, O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.”—MATAIO 25:34.

1. I le ā le itu ua tutusa pau ai le faatasi mai, pa·rou·siʹa o Keriso, ma “ona po o Noa”?

LE FAATASI mai o Keriso—o le mea ua loa ona faatalitalia! O le taimi e pei o “ona po o Noa,” lea na fetalai ai Iesu e fesootai ma le ‘faaiʻuga o le faiga o mea,’ na oo mai i le tausaga e 1914. (Mataio 24:3, 37) Ae o le ā o le a uiga i ai le faatasi mai o Keriso, po o le pa·rou·siʹa, mo le vaega totoe faauuina o “le auauna faamaoni ma le mafaufau”? (Mataio 24:45) Ia, e tatau ona faateleina atili lo latou filigā o ni ē faasusulu atu le malamalama! E iai ni mea ofoofogia sa tatau ona tutupu! Sa leʻi mamao ae amataina le galuega o le aoaoina e leʻi faapea ona faia muamua.

2. O le ā le faamamāaga ua faia e faataunuu ai le Malaki 3:1-5?

² Ae e ui i lea, sa manaomia ona faamamāina muamua nei Kerisiano faauuina. E pei ona valoia mai i le Malaki 3:1-5, na asiasi mai Ieova le Atua ma lana ‘sāvali o le feagaiga,’ o Iesu Keriso, i le malumalu faaleagaga i le tau e totogo ai mea o le 1918. Sa tatau ona amataina le faamasinoga i “le aiga o le Atua.” (1 Peteru 4:17) Na valoia mai i le Malaki 3:3: “E nofo foi o ia [Ieova], o lē tunu ma faamamā  i le ario; na te faamamāina le fanauga a Levi, na te faateʻa ese foi le eleele ia te i latou e pei o le auro ma le ario.” Na avea lea o se vaitaimi e tunuina ai ma faamamāina ai.

3. Aiseā sa matuā tāua ai le faia o se faamamāaga faaleagaga?

³ I le oo atu ia i latou o lena faamasinoga, na faaiʻuina i le 1918, na faamamāina ai le vaega totoe o le vasega o le auauna, mai mea leaga uma faalelalolagi ma faiga faalotu lē mamā. Aiseā na faamamāina ai i latou e Ieova? Ona sa aafia ai lona malumalu faaleagaga. O le faatulagaga lenei pei se malumalu mo le tapuaiga ia Ieova, ua faavae i le taulaga talafeagai a Iesu Keriso. Sa finagalo Ieova ina ia iai i se tulaga mamā lona malumalu, auā pe a oo ina faapotopoto ai i inā se vaega toatele o tagata tapuai o loo iai le faamoemoe faalelalolagi, o le a latou iloa ai le nofoaga o loo faamamaluina ai lana pule silisiliese aoao, le nofoaga o loo faapaiaina ai lona suafa tauatua, ma o le nofoaga o loo usiusitai ai i ana tulafono amiotonu. O lea la, latou te talisapaia ai Ieova ma faatasi atu ai i le faalauiloaina o ana fuafuaga sili.

Faaeaga Faaopoopo

4, 5. (a) Ua faapefea ona avea le fesili a Iesu Keriso ma luʻi i tagata taitoatasi o le vasega a le auauna i aso nei? (e) O ā auala ua faamalamalamaina ai faaupuga “auauna faamaoni ma le mafaufau” ma ana “auauna”? (i) O le ā le tofiga na tuu atu e Iesu i le auauna?

⁴ I le 1919 sa mafai ai e le vasega o le auauna ua faamamāina ona tulimataia, nisi galuega matuā faateleina. I tuā i le 1914, na mauaina ai e Iesu Keriso, lo latou Matai se Malo faalelagi. Ina ua ia toe taliu mai i lona auaiga e asiasia ana “auauna” uma, sa faapaleina ai o ia i le mamalu tautupu, lea sa ia leʻi mauaina a o iai i inei i le lalolagi. O le ā na ia mauaina? Pe sa tele ea ni galuega na faia e le vasega o le auauna mo manaoga o le Matai? E pei ona faamauina i le Mataio 24:45-47, sa fesiligia ai e Iesu se fesili na luʻia ai soʻo faauuina taitoatasi ina ia iloiloina lo latou lava tuutoina atu  i le Mesia a Ieova e faapea: “O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso? Amuia lea auauna, pe a sau lona alii e maua o ia o loo faapea ona fai. E moni, ou te fai atu ia te outou, e tofia o ia e pule i ana mea uma.”

⁵ E manino lava, e lē taitai ona fetaui le faamatalaga a Iesu e uiga i lenei auauna faamaoni i se tagata e toatasi. Leai, peitai ua faamatalaina ai le faapotopotoga faamaoni ua faauuina a Keriso o se vaega atoa. O auauna a le Matai, o loo faasino lea i na soʻo faauuina taitoatasi o Keriso. Sa silafia e Iesu, o le a na faatauina nei soʻo faauuina i lona lava toto, o lea sa talafeagai ai ona ia faasino atu ia te i latou ua tuufaatasia o sana auauna. Ua faapea mai le 1 Korinito 7:23 e uiga ia te i latou: “Ua faatauina outou i le tau, aua neʻi avea outou ma pologa [a] tagata.” Sa poloaia e Iesu lana vasega o le auauna ina ia faasusulu atu lo latou malamalama ina ia tosina mai ai ma aumaia nisi soʻo ma ia fafagaina faasolosolo ai ana auauna e ala i le faasoasoaina atu ia i latou o a latou meaʻai faaleagaga e tatau mo le aso.

6. O le ā le taui o le auauna ina ua asiasia e Iesu?

⁶ Mai le taimi na amata ai le faatasi mai o Keriso seia oo atu i le 1918, e ui lava ina sa lē talileleia ma sauāina le vasega o le auauna, e oo foi i ni lē maopoopo sa iai, ae sa latou taumafai pea e avatu ni meaʻai e tatau mo le aso mo ana auauna. O le mea lena na iloa e le Matai ina ua amataina lana asiasiga. Sa fiafia le Alii o Iesu, ma i le 1919 na ia faaamuia atu ai i lea vasega o le auauna. O le ā la le taui matagofie o le auauna, ona o le faia o le mea na tofia ai o ia e lona Matai e fai? Sa siitia ai lona tulaga! Ioe, sa tuuina atu i ai ni avega tauave tetele i le faaauilumaina o manaoga o lona Matai. Ona ua avea nei le Matai ma Tupu faalelagi, ua atili ai foi la ona faatāuaina ana mea i le lalolagi.

7, 8. (a) O ā ‘mea totino uma’ a le Matai? (e) O le ā ua manaomia ona faia e le auauna i le vaavaaia o nei mea totino?

⁷ O ā la “ana mea uma”? O mea faaleagaga uma lava ua avea ma mea totino a Keriso i le lalolagi, e uiga i lana pule o se Tupu faalelagi. E mautinoa e aofia ai i nei mea le poloaiga ina ia faia soʻo o Keriso, ma le faaeaga sili o le avea ma sui o le Malo ua faavaeina o le Atua i atunuu uma o le lalolagi.

⁸ O lena tulaga siitia ina ia vaavaaia mea uma lava a le Matai, sa manaomia ai ona tuuina atu e le vasega o le auauna se taimi tele ma uaʻi atu ai i le faia o le galuega o le Malo, ioe, ia atiina aʻe ni fale tetele mo lena galuega. Ua iai nei la i le vasega o le auauna se fanua e sili ona telē e galue ai—le lalolagi ainā atoa.

Le Aoaoina o Mamoe

9. O le ā ua iʻu i ai ona o le faalauteleina o galuega a le auauna?

⁹ O lea la, ma le usiusitai, ua faateleina ai e le vasega o le auauna faamaoni ma le mafaufau a Keriso ana galuega. O le ā le iʻuga? Sa aoaoina ai i latou o totoe o le 144,000 faauuina. Ona amata ai lea ona avea ma mea moni le faaaliga mataʻina faamafanafana loto a Ioane, e pei ona tusia i le Faaaliga 7:9-17. Ae maise lava talu mai le 1935, sa olioli ai le vasega o le auauna i le molimauina o le tatalaina mai ma le mautinoa o le faataunuuga o lenei faaaliga. Ua lolofi atu nei le faitau miliona o “le motu o tagata e toatele” mai tafā uma o le lalolagi, i lotoā o le malumalu faaleagaga o Ieova e fai ma ona tagata tapuai. Na taʻu atu e le agelu a Ieova ia Ioane e faapea, e lē mafaia e se tagata ona faitauina le aofai o lenei motu o tagata e toatele. O le uiga o lenei mea, e lē o faatapulaaina le aofaiga o tagata o ē e aumaia e le vasega o le auauna i le malumalu faaleagaga o Ieova. A o tatalaina pea le ala, o le a faaauau pea le galuega o le aoaoina mai o i latou i totonu.

10. O le ā le galuega alofa o loo aafia ai le auauna i aso nei?

¹⁰ Ua iai i le vasega o le auauna faamaoni se  avega tauave mamafa i le tausia o le aofaiga o loo faateleina pea o “isi mamoe,” i le iloaina, e matuā faapelepele lava le Matai, o Iesu, ia te i latou nei e pei ni mamoe mai atunuu uma. O i latou moni lava o lana lafu mamoe. (Ioane 10:16; Galuega 20:28; 1 Peteru 5:2-4) O lea, ona o le alofa mo le Matai atoa foi ma mamoe, ua tausia ai ma le fiafia e le vasega o le auauna, manaoga faaleagaga o le motu o tagata e toatele.

11-13. O le ā le manatu talafeagai na fai mai ai le peresitene sa iai i lena taimi o le Sosaiete a le Olo Matamata, e faatatau i le galuega a le auauna?

¹¹ Ioe, o le vaega tele o le tofiga a le auauna i le faasusuluina atu o le malamalama, e aofia ai le aoaoina o nei tagatanuu faalelalolagi o le Malo o le Atua. I le talanoaina o galuega tuputupu aʻe e leʻi faapea ona iai muamua a le auauna faamaoni, sa faapea mai ai le peresitene o le Sosaiete o F. W. Franz, a o toetoe lava oo i lona maliu ia Tesema 1992 e faapea:

¹² “Ua faaaogāina e Iesu Keriso le faalapotopotoga i se auala e silisili atu ona ofoofogia i taimi uma, e tusa ai ma mea na tutupu i tausaga e 99 o loʻu olaga. Ua lē na o se tagata o loo faatonutonuina le faalapotopotoga, ae o le Alii o Iesu Keriso. Auā ua faateteleina le silisili ma le ofoofogia o lona galueaiina na i lo le mea na tatou manatu i ai. Ua ia i tatou se faalapotopotoga ua faalauteleina atu i le lalolagi atoa i aso nei. O loo auauna lena faalapotopotoga i itu uma e fa o le lalolagi. E na o le toatasi lava lē ua mafua ai lenei faatelega mataʻina—o le Alo lea o le Atua, o lē o loo pulea le vasega o le auauna faamaoni ma le mafaufau. Ua mafai ona ia ausiaina ana avega tauave, ma o le mea lena ua mafua ai lenei faatelega sili sa tatou molimauina.

¹³ “E lē faataunuuina e se tagata e toatasi lenei mea. Ua ia i tatou se faalapotopotoga e faatiokarate, ma e faagaoioia i se auala faatiokarate, le auala lea ua taʻitaʻia e le Atua. E leai ma se tagata, e oo foi i lē na faavaeina le Watch Tower Bible and Tract Society, e mafai ona faia pe tofia i ai le avega tauave ua faataunuuina i le lalolagi atoa. E matuā ofoofogia lava.” Pe e lē ioe ea ma le loto atoa i latou uma lava o le motu o tagata e toatele i na upu a le Uso o Franz ua mavae atu nei? Ioe, o le mea  moni, ua sili atu lo latou loto faafetai mo galuega ua faalauteleina a le auauna faamaoni.

Tagatanuu o le Malo

14, 15. (a) O le ā na faataʻitaʻia e Iesu i le faataoto i taleni (Mataio 25:14-30)? (e) I se tulaga talafeagai, o le ā ua sosoo mai ai i le mataupu e 25 o le Mataio?

¹⁴ I le Mataio mataupu e 25, ua faamatalaina ai e le faataoto a Iesu e uiga i mamoe ma ʻoti, lenei galuega tele o le aoaoina o tagatanuu faalelalolagi o le Malo o le Atua. I le faataoto o loo muamua teisi i lena, le faataoto e uiga i taleni, ua faaalia ai e Iesu faapea e tatau i soʻo faauuina o ē o loo faamoemoe e pule faatasi ma ia i lona Malo faalelagi ona galulue ina ia faateleina atu ana mea totino i le lalolagi. Ua talafeagai ai la, i lana faataoto o loo sosoo ane ai, ona faailoa mai ai e Iesu le mea e manaomia e i latou o ē mananao e avea ma tagatanuu o lona Malo faalelagi.

¹⁵ Mātau ana upu i le Mataio 25:31-33: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale.”

16. Ua aoaoina faapefea nuu ma tuueseeseina tagata?

¹⁶ Na oo atu Iesu i lona mamalu i le 1914. I le taʻimua i le galuega, na ia faia ai ma ana agelu se osofaiga ma tuliesea ai ona fili faatemoni mai le lagi. O le galuega e sosoo ai e pei ona taʻua i lana faataoto, ua fesoasoani lea ia i tatou e talisapaia faapea, o le nofoia e Iesu o le nofoalii mamalu ua faaatagia mai ai se tulaga o le faamasinoga i le taimi o lona faatasi mai. O le aoaoina o atunuu uma i ona luma o lona uiga pe a tautala faafaatusa, ua gaoioi atu ai Iesu i atunuu uma, o ē atonu o le a avea mulimuli ane ma ana lafu mamoe. E aofia ai i le lafu, o mamoe ma ʻoti. Atonu pe na o se vaega o se aso e alu i le tuueseeseina o mamoe mai ʻoti i se lafu faaletino, peitai e sili atu ona umi le tuueseeseina o tagata i le lalolagi aoao o ē o loo saoloto e filifili i le mea latou te faia. O le pogai, ona e faavae lo latou tuueseeseina e ala i a latou gaoioiga taitoatasi.

17. Aiseā ua matuā sili ai ona faatāuaina mo tagata uma tulaga i aso nei?

¹⁷ I le faataoto, o loo tofia ai e le Tupu Leoleo Mamoe, i latou e pei ni mamoe i lona itu taumatau, ae o ē pei ni ʻoti i lona itu tauagavale. O le iʻuga, o ē o loo i le itu taumatau o se faamasinoga logoleleia lea e iʻu—i le ola e faavavau. O le itu agavale e faaatagia mai ai se faasalaga e lē logoleleia—o le faaumatiaga e faavavau. E iai ni iʻuga mautinoa o le maumaututū o le Tupu i le mataupu.

18. Aiseā ua lē avea ai ma faamolemolega mo so o se tasi le tulaga lē vaaia o le Tupu?

¹⁸ O le lē vaaia o le Atalii o le tagata lea o loo pule i le taimi o lona faatasi mai, po o le pa·rou·siʹa, e lē avea lea o se faamolemolega mo so o se tasi. O loo faateleina pea ē e pei ni mamoe i aso nei, ua aufaatasi atu i le vasega o le auauna, i le talaʻia o le tala lelei o le Malo o le Atua i le lalolagi aoao, o loo faasusulu atu lo latou malamalama. O le mea moni, ua oo atu la latou molimau i tuluʻiga uma o le lalolagi atoa.—Mataio 24:14.

19. O ā uiga o le vasega o mamoe ua faataʻitaʻia i le faataoto i mamoe ma ʻoti?

¹⁹ Aiseā ua tauia ai i se lumanai faamanuiaina e le Tupu Leoleo Mamoe i latou o i le vasega o mamoe? Ona o la latou lagolagosua ma le loto atoa i le galuega talaʻi o le Malo ma lo latou agalelei ua faaalia i ona uso faauuina, lea ua manatu ai Iesu e pei lava ua faia ia te ia. O lea ua fai atu ai le Atalii tautupu o le tagata ia i latou: “O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.”—Mataio 25:34; 28:19, 20.

Fesoasoani atu i le Tupu

20, 21. (a) Ua faapefea ona mātaulia uso o Iesu? (e) O le ā le faamaoniga e avatu e mamoe e faaalia ai o loo latou tutū i le itu o le Malo?

²⁰ Ia mātau, pe a valaaulia e le Tupu i latou  ia e pei ni mamoe, ina ia fai ma o latou tofi le nofoaga faalelalolagi o le Malo o le Atua, sa latou faaalia le māofa. Ua latou fesili atu ia te ia: ‘Le Alii e, o anafea na matou faia ai nei mea uma ia te oe? Ona tali atu lea o ia: “E moni, ou te fai atu ia te outou, auā na faia e outou i le tasi o e aupito itiiti o oʻu uso nei, o aʻu lea na outou faia i ai.” (Mataio 25:40) Ina ua faaali atu Iesu ia Maria le Makatala i le aso o lona toetu, sa ia fetalai ai e faatatau i ona uso faaleagaga ina ua ia fetalai atu ia te ia: “Ia e alu i oʻu uso.” (Ioane 20:17) I le taimi o lona faatasi mai lē vaaia, e na o se vaega totoe toaitiiti lava o ona uso faaleagaga e 144,000 e iai pea i la le tino i le lalolagi.

²¹ Talu ai ona ua iai Iesu i se tulaga lē vaaia i le lagi, ua na o se auala lē tuusaʻo la ua mafai ona faia ai nei galuega alofa ia te ia, e tagata e pei ni mamoe. E na o o latou mata o le faatuatua ua latou vāai ai ia te ia i lona nofoalii. Ua talisapaia e Iesu taumafaiga uma lava ua latou faia e fesoasoani ai i ona uso faaleagaga, o ē o le a avea ma ona suli faalelagi. O mea ua faia i ona uso, ua ia manatu i ai faapea ua faia totino lava ia te ia. Ua faia ma le loto i ai e i latou e pei ni mamoe mea lelei i uso o Keriso, ona ua latou mātauliaina i latou ia. Ua latou talisapaia faapea o uso faaleagaga o Iesu o ni sāvali ia o le Malo o Ieova, ma ua latou mananao ai e avatu ni faamaoniga maumaututū e iloa ai, ua latou faia se filifiliga ina ia tutū faatasi ma i latou i le itu o lena Malo.

22. Ua tauia faapefea le vasega o mamoe? (Faatusatusa i le Faaaliga 7:14-17.)

²² Sa muai silafia e Ieova, o le a aliali mai lenei vasega e pei ni mamoe i lenei taimi o le faatasi mai o lona Alo, ma ua ia teuina ai se taui faamanuiaina mo i latou! O le a fai ma tofi o le motu o tagata e toatele faamanuiaga o le filemu i inei i le lalolagi i le taimi o le Pulega fiafia Faa-Meleniuma a le Tupu a Ieova, o Iesu Keriso.

23. O ā auala ua iloa ai le fesoasoani o mamoe ma le loto atoa i uso o le Tupu?

²³ A tatou manatunatu i valoaga o le Tusi Paia e faatatau i le taimi o le faatasi mai o Keriso, faatasi ma le faataoto a Iesu e uiga i mamoe ma ʻoti, o le ā ua tatou iloaina ai? O lenei: E lē faapea o le faia ma le lē iloa po o le faia faafuaseʻi o mea lelei i se tasi o uso faaleagaga o le Tupu o le a avea ai se tagata e pei o se mamoe ua taʻuamiotonuina i luma o le Atua ma lana Tupu. Ua iloa e i latou o le vasega o mamoe le mea o loo latou faia, e ui ina latou te lē o vāai atu i le Tupu o loo pule nei i o latou mata faaletino. Ua latou taumafai e fesoasoani atu i uso o le Tupu, e lē gata i se auala faaletino ae faapea foi i se auala faaleagaga. E faapefea? E ala lea i lo latou fesoasoani atu ia te i latou i le talaʻia o le tala lelei o le Malo o le Atua ma i le faia o suesuega faale-Tusi Paia ina ia maua ai ni soʻo mo Keriso. O le mea lea, ua sili atu ai i le fa miliona i latou e folafolaina le Malo o le Atua o ni ē o loo faasusuluina atu le malamalama i aso nei.

Galuega ua Faalauteleina

24. O ā auaunaga alofa ua avea ai le vasega o le auauna ma tagata e sili ona fiafia i le lalolagi i aso nei?

²⁴ Seʻi o tatou toe autaluina la le tele o galuega lelei a le vasega o le auauna faamaoni. Muamua, ua tofia le vasega o le auauna i mea  uma lava a le Matai—o manaoga ia o lona Malo i le lalolagi—ma ua faaauau pea ona faateleina nei mea. Lona lua, ua fafagaina e lena vasega i meaʻai faaleagaga e lē gata o ana lava auauna faauuina, ae faapea foi ma se motu o tagata e toatele o isi mamoe e leʻi faapea ona iai muamua. Lona tolu, o loo taʻimua le vasega o le auauna i le faasusuluina atu o le malamalama o le Malo. Lona fa, o ana galuega ua sili atu ona faateleina, o le aoaoina mai lea o le motu o tagata e toatele o isi mamoe, ma aumaia i latou i le malumalu faaleagaga a Ieova. Lona lima, ua saunia e le vasega o le auauna, faatasi ma le lagolagosua ma le loto atoa a ē pei ni mamoe, ni fale tetele mo le faamaopoopoina o lālā i le lalolagi atoa, faapea ma ofisa ulu i le Iunaite Setete. O na auaunaga alofa ua avea ai le vasega o le auauna ma tagata e sili ona fiafia i le lalolagi i aso nei, ma ua latou faapogaia ai foi le fiafia o le faitau miliona o isi tagata. O i latou uma nei ua faafetai atu ia Ieova le Atua ma Iesu Keriso, o ē o loo faatonutonuina galuega ua faateleina a le auauna faautauta!

25. E mafai faapefea ona faaauau pea le lagolagosua a mamoe i le auauna, faatasi ma le ā o loo latou faamoemoe atu i ai?

²⁵ Ua sili atu nei ona galue mamafa le vasega o le auauna i ona tiute na tofia ai e le Atua na i lo o so o se isi lava taimi muamua. Ua toeitiiti lava maeʻa le taimi o loo totoe a o leʻi pa mai le “puapuaga tele”! (Mataio 24:21) Maeu la le matuā tāua ona tutumau ai pea o i latou ia, o mamoe a le Atua, i le itu taumatau o le finagalo malie o lo latou Tupu Leoleo Mamoe! O lea la, seʻi faaauau pea ma le maelega e i tatou uma lava ona lagolagoina le auauna faamaoni ma le mafaufau. Ua na o le faia lava o lenei mea, o le a mafai ai i se aso e lē o toe mamao ona faalogoina e ē pei ni mamoe nei upu fiafia e faapea: “O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.”

Pe e Mafai ona E Tali?

□ O le ā le uluai faamasinoga na sosoo atu i le faanofotupuina o le Tupu?

□ Ua faapefea ona iai se faataunuuga faaonaponei o le Mataio 24:45-47?

□ E tusa ai ma galuega ua faalauteleina, o ā mea ua sili ona loto faafetai ai le vasega o le auauna ma le motu o tagata e toatele?

□ Ua faataunuuina faapefea le Mataio 25:34-40 i le taimi o le pa·rou·siʹa?

[Fesili mo le Suʻesuʻega]

[Ata i le itulau 16]

Ua tuuina atu e le matai i le auauna faamaoni ana mea totino uma

[Ata i le itulau 18]

Ua nofoia e Iesu lona nofoalii mamalu ina ia faamasino atu i tagata