Le Tusi Paia—O se Taʻiala Aogā mo Tagata i Aso Nei

“O tusi paia uma lava na faagaeeina e le Atua ma e mafai ona aogā pe a faaaogā . . . mo le taʻitaʻia o olaga o tagata.”—2 Timoteo 3:16, “The Jerusalem Bible.”

O LENEI mau ua faamatalaina ai le pogai autū ua aogā ai le Tusi Paia mo o tatou aso. Na faagaeeina lea e le Atua. Talu ai na foafoaina i tatou e le Atua, e leai la se tasi e sili atu sona iloa e uiga i o tatou tino, mafaufau, faalogona, ma manaoga na i lo o ia. Na faapea mai le tupu o Tavita e uiga ia Ieova le Atua: “Na silasila mai ou fofoga i oʻu tino uma ina o afuafua; ua tusia foi uma lava i lau tusi.” (Salamo 139:16) Afai e sili atu le silafia o Lē na Foafoaina i tatou e uiga ia i tatou, ma le manino lava la o ana fautuaga i le auala e mafai ona tatou fiafia ma faamanuiaina ai i le olaga, e mautinoa le tāua ona iloiloina.

 O mea ua tutupu e faaalia ai faapea, o mataupu silisili o le Tusi Paia e aogā ma tāua mo o tatou aso. E patino foi. O loo mulimuli mai ni faaaʻoaʻoga se fā e faataʻitaʻia ai le aogā o le Tusi Paia i aso taitasi.

Faiā a Tagata ma Amioga Totino: Ua faaalia mai e le Tusi Paia amioga lelei e mamā, e mafai ona taʻitaʻiina atu ai i ni faiā lelei ma le faamanuiaina ma isi. Mo se faaaʻoaʻoga, na faatonuina le nuu o Isaraelu e faapea: “Aua e te taui ma sui, aua foi le faamoemoe lou ita . . . a e te alofa atu i lē lua te tuaoi ia pei o oe lava ia te oe.” (Levitiko 19:18) E ui lava tatou te lē o toe iai i lalo o le tulafono a tagata Isaraelu, ae o le mulimuli i ana mataupu silisili faale-Tusi Paia e mafai ona fesoasoani ai ia i tatou ina ia tausia le filemu ma o tatou uso a tagata. Mo se faaaʻoaʻoga, seʻi manatu i le tele o faafitauli e mafai ona foiaina pe afai e taumafai tagata uma e atiina aʻe uiga faaleagaga o loo maua i le Kalatia 5:22, 23: “O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.”—Faatusatusa i le Roma 8:5, 6.

Ae o se mea e faanoanoa ai, ona pe afai e faafaupuʻe mai omiga o le olaga, e masani lava ona mapuna aʻe maseiga ma misa. I na tulaga, o le faatatauina o upu lapatai o loo maua i le Faataoto 29:11 e mafai ai ona faasaoina mai i tatou i le tele o faafitauli. “O le vale, e sasaa uma mai e ia lona loto; a o le tagata poto, e taofiofi e ia lona loto i tua.”—Faatusatusa i le Faataoto 15:1; Mataio 7:12; Kolose 3:12-14.

O se fautuaga poto lea—ae pe e aogā moni ea i le olaga? Seʻi aumai le tulaga o se tamaloa i Falani o lē na iai se faafitauli matuiā o le loto ita. E lē mafaitaulia le tele o taimi e iʻu ai lava o ia i faafitauli, e oo ai lava i le falepuipui, ona o le aafia i ni misa. O lona tomai i le avea ma tagata fusu sa lē mafai foi ona fesoasoani i le mataupu. I se tasi taimi na fai ai se finauga i le va o le tagata lenei ma lona tamā. O le mea na sosoo ai o le patatū i lalo o lona tamā i lana tuʻi. Na amata ai se matuā feitagai i le la faiā.

E leʻi leva lava, ae fesootaʻi loa lenei tamaloa ma Molimau a Ieova ma amata ai ona ia aʻoaʻoina mataupu silisili o le Tusi Paia. Na uunaia e lenei mea o ia ina ia vaai totoʻa i le auala na feagai ai o ia ma isi. O le tele o ana taumafaiga na amata ai ona suia ana amioga, ma avea ai o ia o se tagata e sili atu le filemu. Ma i se tasi aso na toe foi atu ai lenei tamaloa ina ia faalelei ma lona tamā. Na matuā faateʻia lona tamā ona o suiga i lona atalii, ma na toe faafoisia ai i le lelei le la faiā.

O se tasi lenei o faaaʻoaʻoga mai le tele o faaaʻoaʻoga ua molimauina ai le moni o upu a le aposetolo o Paulo e faapea: “Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga.”—Eperu 4:12.

Olaga Faaleaiga: Po o fiafia ea lou aiga? O le tele o aiga e lē o fiafia. Na faapea mai le Natal Witness, o se nusipepa i Aferika i Saute: “O le olaga faaleaiga ua uma ona faavaeina, e mautinoa ua faamataʻuina i le taimi nei. O fanau i aso nei ua fananau mai i totonu o se taamilosaga lautele.”

Ae e ui i lea, ua tumu le Tusi Paia i fautuaga aogā ua fuafuaina e fesoasoani i aiga ina ia manuia ai e ui lava i faafitauli e tulaʻi mai. Mo se faaaʻoaʻoga, mafaufau i le matafaioi a tane, ua fai mai le Tusi Paia: “O loo faapea ona tatau ona alolofa o tane i a latou lava avā, faapei o latou lava tino.” Pe afai e faataunuuina e le tane lenei manaoga, o se fiafiaga mo lana avā le toe taui atu e ala i le faaalia o le “ava [faaaloalo loloto, NW] o ia i lana tane.” (Efeso 5:25-29, 33) O le faiā i le va o mātua ma fanau o loo faamauina i le Efeso 6:4: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.” O le faia faapea, e fausia aʻe ai se siomaga i le aiga lea e faigofie ai mo le fanau ona mulimuli i faatonuga a le Tusi Paia ma usiusitai ai i o latou mātua.—Efeso 6:1.

O manatu e pei ona taʻua i luga, e na o ni faataʻitaʻiga faigofie ia o mea ua taʻua i le Tusi Paia mo olaga faaleaiga. E ala i le tali atu i taʻiala a le Atua, ua faamanuiaina ai le toatele ma olioli ai i le fiafiaga i le aiga. Ua faamatala  mai e Eteuati o lē e toalua lana fanau, ni aogā na ia olioli ai ona o le faatatauina o mataupu silisili o le Tusi Paia. Ua ia faapea mai: “Sa agaʻi ina malepe laʻu faaipoipoga. Sa leai soʻu taimi e maua ai se faiā uigā ma laʻu fanau. Na pau lava le mea na ia tuufaatasia i matou o le faatatauina lea o le mea o loo fai mai ai le Tusi Paia e uiga i le olaga faaleaiga.”—Faataoto 13:24; 24:3; Kolose 3:18-21; 1 Peteru 3:1-7.

Soifua Malōlōina Faalemafaufau, Faaletino ma Faalogona Ootia: Ua faaalia i sailiiliga e faapea, i se vaega tele, o le malōlōina o le tino o se tagata e fesootai lea ma le tulaga o le malōlōina o lona mafaufau ma ona faalogona ootia. Ua faapea mai le World Book Encyclopedia: “O faailoga masani o le loto popole, e aofia ai le vave o le tātā o le fatu, le toto maualuga, le tiga o musele, faanoanoaga o le mafaufau, ma le leai o se tomai e uaʻi atu ai.” Peitai, ua talitonu nisi e faapea, o le faamaiteina o gaoioiga sauā o se auala lea e aveesea ai puapuaga. Ua faapea mai se nusipepa i Aferika i Saute e taʻua o le Star: “O le fusu e mafai ona avea o se auala sili i le faamalōlōina o le loto popole.” O loo siiina mai ai ni upu a le fafine faufautua mo faamalositino o Jannie Claasens e faapea: “Afai e iai se aso e lē mautonu ai se fafine, e mafai ona ia foiaina lona popole e ala i le alu e tuʻi le polotuʻi.”

Peitai, pe lē o se mea ea e sili atu ona tāua le aʻoaʻo ina ia iloa le pogai o le lē mautonu? I le tusi faitau o le Stress—The Modern Scourge, fai mai Dr. Michael Slutzkin e faapea, o le “iloaina o le loto popole . . . e tāua, talu ai o le tele o mafuaaga e mafai ona togafitia.” Ua ia faaopoopo mai e faapea, o le “puleaina o le loto popole . . . atonu e oo ai lava ina maua se tulaga malōlōina i le tele o tulaga eseese.”

Ua faamatalaina e le Tusi Paia le auala e sili ona uigā e mafai ona foiaina ai le loto popole: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) O le puleaina o le loto popole i lenei auala e tele ona aogā—e oo lava i le faaletino. Ua faaupuina e se tasi faataoto a le Tusi Paia e faapea: “O le loto lelei, o le ola lea o le tino.” (Faataoto 14:30) O loo faapea mai se tasi faataoto: “O le loto fiafia, e fai ma vailaau aoga lea; a o le loto faanoanoa e mamago ai ivi.”—Faataoto 17:22.

I se taumafaiga ina ia aveesea le loto popole ma omiga, ua faalagolago ai le toatele i le tapaa, le ava malosi, ma vailaau faasāina. Ua manino lelei le taʻuina mai o le faaleagaina ua aumaia e nei mea uma. Ae peitai, ua fautuaina soo e le Tusi Paia le tausia o le mamā mai “mea uma e leaga ai le tino.” (2 Korinito 7:1; faatusatusa i le Faataoto 23:29-35.) E mautinoa, o le alofiaina o na gaoioiga e faaleagaina ai, o se puipuiga aogā lea mai le lalolagi i aso nei.

Galuega, Tupe, ma le Faamaoni: E lē aogā le paie i se tasi. Ua faapea mai le Faataoto 20:4: “E le suatia le eleele e le paie, ona o le tausaga maalili; e aiisi o ia i le tausaga e selesele ai saito, a e le maua.” O le galue mamafa i le isi itu, e aogā. E pei ona faapea mai le Efeso 4:28: “O lē gaoi aua neʻi toe gaoi.” Ua faaopoopo mai lenei mau e faapea, e sili atu ona lelei mo se tasi ona “faamalosi o ia i galuega a ona lima i mea aoga, ia maua e ia se mea e avatu i le ua mativa.”—Faatusatusa i le Faataoto 13:4.

Pe sa e iloaina o mataupu silisili o le Tusi Paia e mafai ona faatatauina e oo foi i faiā i totonu o galuega? O tagata faigaluega, e pei o ni “pologa” i taimi o le Tusi Paia, e lelei ona latou “faalogo i mea uma i o [latou] matai i la le tino.” O ē pule, po o “matai,” i le isi itu, “e ao ona latou avatu mea e tatau ma mea e tusa” i a latou tagata faigaluega.—Kolose 3:22-24; 4:1; faatusatusa i le 1 Peteru 2:18-20.

E tele mea ua fai mai ai le Tusi Paia e uiga i le faamaoni i faiga faapisinisi. E ui lava o se mea e faanoanoa ai le lē taulau i aso nei, ae ua masani lava ona amanaia ma talisapaia lenei uiga o le faamaoni e avea o se uiga manaomia. O le mea lenei ua faamamafa mai e le Tusi Paia. I se taimi na faapea mai ai Iesu: “O lē faamaoni i le mea itiiti, e faamaoni foi o ia i mea e tele; o lē amioletonu  i le mea itiiti, e amioletonu foi o ia i mea e tele.”—Luka 16:10; faatusatusa i le Faataoto 20:10; 22:22, 23; Luka 6:31.

I se tasi atunuu o Aferika, sa avea le fale e gaosi ai taimane ma taulaiga o gaoiga tetele ma le faaleagamea. Sa fuafua e tofia se isi tagata e avea ma pule. Na fesiligia minisita o le malo ina ia tuuina atu uma igoa o i latou ia latou te manatu ua talafeagai mo lea tulaga. Ina ua fono le kapeneta mo le faia o le filifiliga, na aveesea tai tasitasi ai igoa e faapitoa lava ona o le lē faamaoni. Mulimuli ane, na latou oo mai i le igoa mulimuli lava o le lisi—o le sui na faatū atu e le peresitene.

Na tetee atu le tasi minisita e faapea, “Ae e lē o ia o se sui o le vaega faapolotiki!”

Sa tali le peresitene e faapea, e lē o se tulaga faapolotiki lenei.

Na faapea mai le isi: “O ia o se tasi o Molimau a Ieova.”

Sa fai atu le peresitene: “Ma o le mafuaaga lena na maua ai lana galuega.” Ona ia faaopoopo mai lea: “Ua tatou iloa o i latou o ni tagata faamaoni, ma o le ituaiga o tagata lena tatou te manaomia. Ua tatou iloa tatou te mafai ona faatuatuaina o ia.”

Ioe, o i latou o ē faatatauina mataupu silisili o le Tusi Paia e masani lava ona latou iloa le aogā o lenei mea ia i latou e oo lava i le lalolagi i aso nei.

Faatāuaina le Atamai Aogā

Ua tatou iloiloina na o ni nai faaaʻoaʻoga o le uiga o le ‘maua o le poto i le Atua.’ (Faataoto 2:1-9) E tamaoaiga fautuaga e aogā ma fetaui o loo maua i le Tusi Paia. O mataupu silisili e uiga i le tumamā, o le galue toaga, o fesootaiga, faiga faaleituaiga, talagā faaipoipoga, le totogiina o lafoga, le feagai ai ma eseesega i uiga faaletagata, ma le feagai ai ma le mativa, o nisi na o vala o le olaga ua iloiloina i le Tusi Paia. E faitau miliona tagata ua latou iloaina e faapea, o eseesega i le va o le manuia ma le lē taulau i o latou olaga, e faalagolago lea i le tele ua latou faatatauina ai mataupu silisili o le Tusi Paia.

A o faamaonia le aogā o le Tusi Paia mo le taimi nei, ua faapena foi ona ia ofoina mai le tele o aogā mo se taimi umi. Mo se faaaʻoaʻoga, ua folafola mai e le Tusi Paia e faapea, o pogai autū o tigā ma puapuaga i le lalolagi i aso nei ua toeitiiti nei ona aveesea lea e ala i le faamutaina e le Atua.—Tanielu 2:44; 2 Peteru 3:11-13; Faaaliga 21:1-5.

O le mea lea, matou te faalaeiauina ai oe ina ia aʻoaʻoina le tele e te mafai ai e faatatau i le Tusi Paia. Afai e leai sau kopi o le Tusi Paia, ia mautinoa ua maua sau tusi. O le a fiafia tele i latou o loo lomia lenei mekasini e fesoasoani atu ia te oe. E pei lava ona maua e le toatele o isi aogā e ala i le faatatauina o fautuaga aogā mai le Tusi Paia, e mafai foi ona fesoasoani ia te oe ina ia e talisapaia le aogā o le Afioga a le Atua, i le taimi nei atoa foi ma le lumanai.

[Ata i le itulau 7]

O le Tusi Paia o se taʻiala aogā mo le faia o olaga faaleaiga ina ia fiafia