“O Aʻu Lenei! Ina Auina atu Aʻu”

E PEI ONA FAAMATALAINA E WILFRED JOHN

Na osofaia i maʻua e fitafita o le vaegaau a Burma mai itu e lua o le vaitafe. Sa latou ō mai ma tui ma fana, ma savavali mai i le vai e oo le maualuga i o latou puimanava ma siomia ai i maʻua i lalo o le auala laupapa.

NA MA fefefe tele ma laʻu paga. O le ā le uiga o nei mea uma? E ui lava ma te lē malamalama i le gagana, ae na ma malamalama mulimuli ane ua puʻeina faapagota i maʻua. E na o solo taele lava na sulu i o ma puimanava, a o ave i maʻua e aunoa ma se sauniunia mo le moliaga i le ofisa o leoleo e latalata ane, ma fesiligia loa e se leoleo e tautala i le gagana Peretania.

O le tausaga lea e 1941, i le taimi o le taua e lua a le lalolagi, sa masalosalo ai e faapea, o i maʻua o ni tagata e faatamaʻia mea. Ina ua uma ona ma faamatala atu la ma galuega talaʻi faa-Kerisiano, ona faamalieina loa lea o le leoleo, ma ia faapea mai ua faamanuiaina i maʻua ina ua faasaoolaina mai le fetaiaʻiga. Na ia fai mai, o le toatele lava e tafanaina e aunoa ma se fesiligia. Na ma faafetai ia Ieova ma ua ma amanaiaina le fautuaga a le leoleo ina ia aua neʻi ma toe feofeoai i auala laupapa.

Na faapefea ona ou oo i lenei tulaga i Burma (o Myanmar i aso nei)? Ia seʻi oʻu faamatalaina ma avatu ni nai faamatalaga e uiga ia te aʻu.

Le Filifiliga na Faia a o Oʻu Laitiiti

Na ou fanau i Wales i le 1917, ma i le ono o oʻu tausaga na matou ō atu ai ma oʻu mātua ma loʻu uso laitiiti i Niu Sila, le mea na ou ola aʻe ai i le faatoaga lafu povi a loʻu tamā sa maua ai le suāsusu. I se tasi aso na ia aumaia ai i le fale se faaputuga o tusi tuai na ia faatauina mai i se faleoloa taugofie. Sa aofia ai ni tusi se lua o le Studies in the Scriptures, na lomia e le Watch Tower Bible and Tract Society. Na avea ia tusi ma mea sa sili ona tautele i loʻu tinā, ma e pei o le tinā o Timoteo, o Eunike, na ia totōina i totonu ia te aʻu se manaoga ina ia faaaogāina loʻu talavou e auauna ai mo faanaunauga o le Malo o Ieova.—2 Timoteo 1:5.

I le 1937, e lua ni filifiliga na tulai mai ia te aʻu: o le vaaia lea o le faatoaga (dairy farm) a loʻu tamā, po o le fai atu ia Ieova e pei ona faia e le perofeta a le Atua o Isaia, “O aʻu lenei, ina auina atu aʻu.” (Isaia 6:8) Sa ou talavou, tino malosi, ma e leai lava nisi aʻu avega tauave. Sa ou tofo i le olaga o le faifaatoaga ma fiafia i ai. I le isi itu, e leai soʻu poto masani e avea ai o se faifeau sauatoa, po o se paeonia. O le ā nei la le mea e ao ona ou filifilia—o le galue i le faatoaga po o le auauna o se paeonia?

Sa avea failauga mai le ofisa o le lālā o Molimau a Ieova i Ausetalia o se puna o faalaeiauga. Sa latou asiasi mai i la matou oganuu i Niu Sila ma faamalosia aʻu ina ia faaaogā loʻu talavou e auauna ai i le Atua. (Failauga 12:1) Na matou talanoa ma oʻu mātua e uiga i le mataupu, ma na la ioeina ai le atamai o le faamuamua o le finagalo o le Atua. Sa ou mafaufau foi i upu a Iesu Keriso i lana Lauga i luga o le Mauga: “A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.”—Mataio 6:33.

Na iʻu laʻu filifiliga! Talu ai sa leai se lālā a Molimau a Ieova i Niu Sila i lea taimi, sa valaaulia  ai aʻu e auauna i le lālā i Sini i Ausetalia. O lea, i le 1937, na ou tuu vaa atu ai mo Ausetalia ina ia avea ma faifeau sauatoa a Ieova le Atua.

Sa ou tau manatunatu, Po o le ā le tofiga o le a ou mauaina?’ Peitai, aiseā e popole ai fua? O le mea moni, ua uma ona ou faapea atu ia Ieova, ‘O aʻu lenei. Ia faaaogāina aʻu i so o se mea e te finagalo i ai.’ Sa ou faigaluega mo le lua tausaga i le faiga o laau puʻeleo (phonographs) sa faaaogāina i aso na e Molimau a Ieova e faia ai lauga faale-Tusi Paia ua uma ona puʻeina i aiga. E ui i lea, o le matātā autū sa aʻoaʻoina ai aʻu i le lālā sa mo le nofoaga e teu ai lomiga eseese.

I Sigapoa

I le 1939, na ou mauaina ai se tofiga i Sasae Mamao—ina ia galue i le fale e teu ai tusi a le Sosaiete i Sigapoa. Sa avea lenei fale o se nofoaga autū mo le mauaina ma le felauaiga o tusi mai Ausetalia, Peretania, ma le Iunaite Setete i le tele o atunuu i Asia.

O Sigapoa o se aai e tele gagana auā o loo fefiloi faatasi ai le tele o aganuu e pei o tagata mai atunuu i Sasae ma Europa. O le gagana Malay, o le gagana taatele lena mo fesootaʻiga, ma le talaʻiga mai lea fale i lea fale, o le mea lea sa tatau ai ona aʻoaʻoina i matou o tagata papalagi i lena gagana. I le tele o gagana, sa iai ni a matou pepa e taʻua o le mau. O loo tusia i na pepa sina taulimaga puupuu o le feau o le Malo.

Na amata ona ou taulotoina mau i le pepa o loo tusia i le gagana Malay, ma na faateleina ai upu ou te iloaina i lena gagana. Ae matou te tauaveina foi lomiga faale-Tusi Paia i isi gagana e tele. Mo se faaaʻoaʻoga, sa iai ia i matou lomiga i le gagana Bengali, Gujarati, Hindi, Malayalam, Tamil ma le Urdu mo tagata Initia. O se mea fou ia te aʻu le feiloaʻi ma tagata o nei ituaiga o gagana eseese.

Ou te manatuaina pea le faasalalauga taufaafefe o le faalauiloaga o le taua i Europa ia Setema 1939. Sa matou tau mānatu, ‘Po o le a faateteleina ea ma aafia ai atunuu i Sasae Mamao? E foliga mai ia te aʻu o se faataimuaga lea mo Amaketo—ua oo tonu mai e pei ona ou manatu ai! Sa faamalieina aʻu e faapea, sa ou faaaogāina atoatoa ma tatau loʻu talavou.

Faatasi ai ma laʻu galuega i le faletusi, sa ou auai atoatoa foi i sauniga a le faapotopotoga ma le faiva i le fanua. Sa ou faia ni suesuega faale-Tusi Paia ma na tali mai nisi tagata taitoatasi ma tuuina atu i le vai o le papatisoga. Sa aveina atu i latou i se matafaga e latalata ane ma faatofuina ai i le vai mafanafana i le taulaga o Sigapoa. Na matou fuafuaina foi e faia se fonotaga, e valaaulia lemū ai nai tagata loto naunau. I lo matou olioli, e tusa ma le toʻa 25 na o mai i le fonotaga sa manatu i ai o la matou fonotaga mulimuli lea a o leʻi oo mai Amaketo.

Na matuā faasāina fesootaiga i le va o lālā a le Sosaiete ona o le taua. Mo se faaaʻoaʻoga, i lo matou faletusi i Sigapoa, sa mauaina ai se faasilasilaga puupuu e faapea, e toatolu ni paeonia Siamani e taunuu atu i se taimi i Sigapoa o loo malaga mai i se vaa e leʻi taʻua maia le igoa mo se tofiga e lē iloa. I ni nai vaiaso mulimuli ane, na taunuu mai ai i latou ma faaaluina le sefulu itula fiafia ma i matou. E ui lava sa avea le gagana ma faafitauli, ae sa mafai lava ona matou malamalama e faapea o le mea sa tofia i ai i latou o Shanghai.

Loʻu Tofiga i Shanghai

I se tausaga mulimuli ane ai na ou mauaina ai foi se tofiga e auauna i Shanghai. E leai se tuātusi o le aai, na o le numera o le pusa meli na ou maua. Ina ua uma ona faia ni aʻu auiliiliga i le fale meli, sa mafai ona ou faamaonia lava e aʻu, ua maua le tuātusi po o le nofoaga o le fale o le Sosaiete. E ui i lea, na faailoa mai ia te aʻu e le tagata Saina sa nofo ai i le fale lea e faapea, ua aveesea le lālā, ma ua leai la se tuātusi o toe iai.

Sa ou tau manatunatu, ‘O le ā nei la le mea o le a ou faia?’ Na ou ofoina atu loa se tatalo lēleoa mo se taʻitaʻiga. Ina ua ou ea aʻe i luga, sa ou iloa atu ai tagata e toatolu, e maualuluga atu na i lo o tagata lautele, ma e ese foi o latou  foliga mai. E mautinoa o i latou ia e pei uma lava o tagata Siamani e toatolu ia na ō atu i Sigapoa mo ni nai itula. Ma le faanatinati, sa ou oso atu loa i luma o i latou i le auala.

“Faamolemole lava,” sa ou tau nanunanu atu ai ma le popole tele. Sa latou tutū ma faataupupula mai ia te aʻu ma mata e pei e foliga mai o tau saili se mea. Na ou fesili atu, “Sigapoa. Molimau a Ieova. O outou manatua aʻu?”

Ina ua mavae sina taimi, ona latou tali mai lea: “Ioe! Ioe! Ioe!” E leʻi toe faatali ae ua matou feopogi loa, ma na maligi ifo loimata o le fiafia i oʻu foliga. Mai le faitau miliona o tagata, e faapefea e nei tagata e toatolu ona teʻi ua pasia lenei nofoaga i lena taimi faapitoa? Sa na ona ou faapea ifo: “Faafetai tele lava Ieova.” I lena taimi, e na o le toatolu lava aiga Saina, o tagata Siamani e toatolu ma aʻu o Molimau i Shanghai.

Hong Kong ma Mulimuli Ane i Burma

Ina ua mavae le auaunaga i Shangai mo ni nai masina, ona tofia lea o aʻu i Hong Kong. Ina ua lē taunuu ona sau laʻu paga mai Ausetalia ma te paeonia faatasi, na ou iloa mulimuli ane ai ua tuua nei na o aʻu lava le Molimau i le kolone o Hong Kong. Sa toe faamanatu mai ai foi ia te aʻu e faapea, ua uma ona ou faapea atu ia Ieova, “O aʻu lenei! Ina auina atu aʻu.”

O laʻu faiva sa faapitoa lava ona tuusaʻo atu i tagata Saina e tautatala i le gagana Peretania, ae sa ou iloaina le faigata ona laasia o faitotoa o tagata o loo nonofo ai, ona o auauna o loo tutū ai e na o le gagana faa-Saina lava e tautatala ai. O lea na ou aʻoaʻoina ai sina faa-Saina i gagana e lua na sa sili ona faaaogāina e tagata. Sa aogā! Sa mafai ona ou faalatalata atu ai i tagata leoleo faitotoa, tuuina atu i ai le pepa mo laʻu feau, tautala atu i ni nai upu i le faa-Saina, ma mulimuli ane ai fai mai loa ou te alu i totonu.

Ina ua ou asiasi atu i se tasi taimi i se aʻoga, sa ou mulimuli i lenei faiga i se taumafaiga ina ia talanoa atu i le pule o le aʻoga. Na faafetaui mai aʻu e se sui faiaʻoga tamaitai i le faitotoa. Na ou mulimuli atu ia te ia e ui atu i ni potu aʻoga se lua, ma iloa ai le faaaloalo o tamaiti aʻoga, ma sauni loa e faafeiloai atu aʻu i le pule aʻoga. Na tuʻituʻi atu le faiaʻoga, ma tatala le faitotoa, tū mai i tua, ma faasino mai aʻu agaʻi i luma. Na ou matuā teʻi ina ua ave atu aʻu ma le faaeteete i le fale lē taʻua! E foliga mai e lē malamalama i laʻu faa-Saina, ma ona o lena, na mulimuli ane taʻu mai e le pule aʻoga ia te aʻu, sa sese lo latou manatu, na faapea ai o aʻu o le tagata e asiasi vaipaipa ma otaota vale.

Na taʻu mai e leoleo Hong Kong ina ua mavae le fā masina o le galuega e faapea, ua faasāina la matou galuega talaʻi ma e ao ona ou filifili pe taofi laʻu talaʻiga po o le toe faafoi ese o aʻu. Sa ou filifili e toe faafoi ese aʻu, auā o loo avanoa pea isi nofoaga e faaauau ai le talaʻiga. A o iai i Hong Kong, sa ou tuua ai tusi e 462 ma sa fesoasoani i isi e toalua ina ia auai i le faiva.

Mai i Hong Kong, sa tofia aʻu i Burma. Sa ou paeonia ai i inā ma fesoasoani i le galuega o le felauaiga i faletusi i Rangoon (o Yangon i le taimi nei). O se tasi o tala sa sili ona faafiafiaina ai aʻu o le faasalalauina atu lea o le talaʻiga mai lea aai i lea aai ma nuu i vaega faapitoa mai Rangoon e oo i Mandalay ma tala atu o tuaoi i le aai o Lashio i le tuaoi ma Saina. Sa ma uaʻi atu ma laʻu paga i ituaiga o tagata e tautatala i le gagana Peretania, ma tufaina atu le faitau selau o tusiga o le Consolation (lea ua faaigoaina nei o le Awake!). I le ma lea, o lenei auala faapitoa mai Rangoon i Mandalay sa lauiloa o le Auala o Burma (Burma Road), o le auala na aauina atu ai tagata Amerika sa auai i le taua faatasi ma meatau i Saina.

O le auala na matou ui mai ai e matuā mafiafia le pefu na avea ma mea sa masani ona matou lagonaina ai se manaoga ina ia taeele. Ua mafai e lenei mea ona toe faafesootai atu i le amataga o lenei tala, ina ua puʻeina i maʻua a o taeele i le vaitafe i lalo o se auala laupapa. E leʻi leva lava mulimuli ane ae toe faamalosia i maʻua e toe foi atu i Rangoon ona o faiga a fitafita ae maise ua ma mamaʻi. Sa mafai ona ou nofo ai pea i Burma seia oo i le 1943, peitai na faamalosia aʻu e gaoioiga faateleina o le taua ina ia toe foi atu i Ausetalia.

 Toe Foi i Ausetalia

I lea taimi, sa taofia ai le galuega a Molimau a Ieova i Ausetalia. Ae peitai, e leʻi umi lava ae aveesea taofiofiga, ma e leʻi leva, ae toe valaauina aʻu e galue i le ofisa o le lālā. Mulimuli ane, i le 1947, na ou faaipoipo atu ai ia Betty Moss, o lē sa galue i le lālā a le Sosaiete i Ausetalia. Sa paeonia ai le tamā ma le tinā o Betty, ma sa faalaeiauina ai lava Betty ma lona tuagane matua o Bill ina ia avea le galuega paeonia o se la galuega. Na amata ona paeonia Betty i le aso na uma ai ana aʻoga, ina ua 14 ona tausaga. Sa ou mafaufau e mafai ona lelei pe a faia faatasi, e pei ona sa ia fai atu ai foi ia Ieova, i le uiga moni, “O aʻu lenei, ina auina atu aʻu.”

Ina ua mavae le tausaga talu ona ma faaipoipo, sa valaaulia ai aʻu mo le galuega matagaluega, o le asiasia lea o faapotopotoga o Molimau a Ieova. Sa o se luʻi moni le galue i oganuu tūese o Ausetalia. O lōlōga faafuaseʻi o timuga sa avea o se faafitauli i le femalagaai, ae maise lava i vaega maseesee o auala. I le tau mafanafana e oo atu i le 110 tikerī [43° C] le maualuga o le vevela i le paolo. I le nonofo i totonu o faleie lē tumau, na ma iloaina ai i le taumafanafana e matuā vevela lava, ae i le taumalūlū e matuā malūlū foi.

Sa o se fiafiaga le auauna o se ovasia itumalo a o na o le lua lava itumalo i Ausetalia. Sa auauna Donald MacLean i le tasi itumalo, a o aʻu i le isi. Ia ona fesuiai lea o ma itumalo. O se olioli le faitau atu e uiga i faapotopotoga ua faatutuina nei i le mea sa matou galulue ai. E mautinoa lava ua tupu aʻe le upu moni o le Tusi Paia ma ua fua mai!

Toe Foi i le Mea na Amata Uma mai Ai

I le 1961, sa mauaina ai soʻu faaeaga o le auai i le uluai aʻoga i Kiliata mo misionare ina ua mavae le toe siitia atu i Brooklyn i Niu Ioka. Sa ou mauaina nisi valaaulia muamua i le aʻoga, peitai sa lē mafai ona taliaina ona o mafuaaga tau le soifua malōlōina. I le faaiʻuga o le sefulu masina o le aʻoga, ona valaaulia lea o aʻu ina ia taliaina loʻu tofiga mo Niu Sila.

O lea talu mai Ianuari 1962, ua ma iai nei ma Betty i Niu Sila, i se tasi o atunuu i le itu i saute o le lalolagi. E masani ona faasino i ai e faapea o se tasi lea o penina i le Pasefika. Sa o se fiafiaga le galue ai i nei matātā e lua o le ovasia matagaluega ma le ovasia itumalo o ni matātā Faa-Tiokarate. Mo le 14 tausaga ua mavae, mai ia Aperila 1979, sa ma galulue ai ma Betty i le ofisa o le lālā i Niu Sila.

Ua ma iai nei ma Betty i le sili atu i le taʻi 75 tausaga, ma ua 116 nei o ma tausaga tuufaatasi o ma galulue sauatoa i le auaunga o le Malo. Na amata ona paeonia Betty ia Ianuari i le 1933, ae o aʻu na amata ia Aperila 1937. O le tele o lo ma fiafiaga ona o le ma vaai atu i a ma fanau faaleagaga ma fanau a a ma fanau o latou faia le mea sa ma faia a o ma laiti, ioe, o le utagiaina o le fautuaga a le Failauga 12:1: “O lenei, ia e manatua le na faia oe i ona po o lou taulealea.”

Maeu se faaeaga o le faaaluina o le toetoe lava o o ma olaga atoa i le talaʻiina o le tala lelei o le Malo o le Atua ma le faia o soʻo, e pei ona faatonuina e lo tatou Alii o Iesu Keriso! (Mataio 24:14; 28:19, 20) Ua matuā faafiafiaina i maʻua ona ua ma tali atu i le valaaulia a le Atua e pei ona sa faia e le perofeta anamua o Isaia, “O aʻu lenei, ina auina atu o aʻu.”