Pe Tatou te Manaomia le Tusi Paia?

O OXANA o se tamaitai talavou Rusia, sa fiafia tele ina ua ia vaai i se Tusi Paia na ofoina ane e se tagata faatau tusi i le auala i le aai o Moscow. O lana uō o Ioane, o se tasi e sau mai se atunuu e saoloto ai le faaaogāina o le Tusi Paia, sa maofa o ia i le maelega tele o Oxana. Fai mai Ioane: “O aʻu—ou te lē talitonu i le Atua—ae sa ou manao e faatau le Tusi Paia mo ia.” E ui lava sa tetee muamua Oxana, ae peitai na mulimuli ane ia taliaina le meaalofa a Ioane.

O le toatele, e pei o Oxana, e iai se faanaunauga malosi ina ia maua le Tusi Paia. E matuā moni lava lenei mea i atunuu na faasāina ai le Tusi Paia mo le tele o tausaga. Mo se faaaʻoaʻoga, o ē o loo faasalalauina lenei mekasini, o loo galulue mamafa ina ia faamalie ai le manaoga mo Tusi Paia i atunuu sa muai taʻua o le Soviet, ma isi foi vaega o le lalolagi. O le toatele o tagata i nei oganuu, faatoʻā latou maua lea o se avanoa e faia ai se suesuega talafeagai o le Tusi Paia—ma o le toatele o tagata ua tosina mai i ai e ala i le malosi o lana feau.

Tagata Faitio ma Masalosalo

I le faafeagai ma le mea o loo taʻua i luga, seʻi mātau faapitoa lava Europa i matu, e lē faitauina le Tusi Paia, ae na ona faapefua ai lava i luga o fatatusi. Fai mai nisi: “O se talafaasolopito ua mate! Sa tusia mo se isi tupulaga. E lē faatatauina i tagata i aso nei.” E oo lava i taʻitaʻi lotu taʻutaʻua ua latou faia ni faasalalauga faalauaitele e faaleagaina ai le Tusi Paia. Na lipotia mai se faamatalaga a le atiepikopō o le Lotu Egelani o Desmond Tutu i le The Star, o se nusipepa i Aferika i Saute e faapea: “E iai nisi vaega o le Tusi Paia e leai ni o latou aogā tumau.” O nei ituaiga o faamatalaga ua faapogaia ai ona tau mānatu le toatele po o le ā le tele e ao ona latou faatāuaina ai le Tusi Paia.

Se Manaoga mo Taʻitaʻiga

E tatau i tagata faitio ma ē talitonu ona taʻutino mai e faapea, ua manaomia e le lalolagi ni vaifofo e aogā, e sili atu na i lo o se isi lava taimi. Na tusi mai Alvin Toffler i lana tusi Future Shock e faapea: “Ua tatou iai nei i se tulaga matuā paʻū maulalo, seʻi vagana ua vave aʻoaʻoina e le tagata ina ia faia se suiga i ana lava mataupu totino, atoa foi ma mataupu i le sosaiete atoa o tagata.” O lena lapataiga na tuuina mai, ua sili atu nei i le 20 tausaga ua mavae. O le paʻū maulalo na tautala i ai Toffler, e aliali mai ua tupu i le taimi lava lenei.

A o latalata atu lenei senituri i lona iʻuga, ua lē taulau i atinaʻe o matātā eseese ma filosofia a tagata ona aumaia se tulaga e mausalī ai i le lalolagi. O faamoemoega talu ai nei mo se lalolagi fou, ua suia i gaoioiga iʻuvale, ma o ola o le toatele ua faaitiitia i se tauiviga i aso taitasi mo le faasaoina.

Ua faaalia i fuainumera faamaumauina e faapea, o fevaevaeaʻiga tau tamaoaiga i le va o ē matitiva ma ē mauoa ua avea o se feeseeseaʻiga lautele. I se suesuega talu ai nei ua faaalia ai e faapea, o le 82.7 pasene o le tamaoaiga i le lalolagi ua puleaina e le na o le 20 pasene o lona faitau aofai. Po ua lē avea ea taua, oge, faamaʻi, solitulafono taatele, ma le lē taupulea o ni mea ua masani ai i le tele o atunuu? O le omiga ina ia faafetaiaia le faaitiitia o uiga o le olaga, ua mafua ai le tele o le popole i faalogona ootia o tagata. O le iʻuga, e oo lava i le faavae e sili ona faigofie o le sosaiete, o le aiga, ua faaleagaina.

E ui lava o le toatele e pei o Toffler, ua fautua mai e faapea o le avega tauave a le tagata o le “saili atu atoatoa i ni auala fou e maua ai le mautū ma le saogalemu mo ia lava,” ae ua mautinoa i faamaoniga e lē mafai e tagata ona saunia e i latou lava ni vaifofo.

 Ua na o Lea le Filifiliga

E leʻi suia le Tusi Paia i gasologa o senituri, talu ona amata tusia pe tusa ua 3,500 tausaga ua teʻa. O loo tutusa pea ana mataupu silisili. O se faaaʻoaʻoga, ua faaalia le moni o upu o le Ieremia 10:23 i aso nei e sili atu i lo o taimi muamua: “E le o i le tagata lona ala, e le o i le tagata e savali ona faatonuina le mea e ui ai o ia.” Afai e lē mafai ona taʻitaʻia e tagata o latou ala, o ai e mafaia? E na o le pau le Puna moni o le taʻitaʻiga ua faasino i ai le Tusi Paia: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—Isaia 48:17.

Ua aʻoaʻoina i tatou e Ieova le Atua e ala i itulau o le Tusi Paia ina ia fesoasoani ia i tatou lava. Ua tumu i fautuaga e faaalia ai ia i tatou le auala e ao ona tatou savavali ai. Ua talafeagai lelei ona fautuaga i aso nei e pei o aso na tusia ai. O le mataupu ua sosoo mai o le a iloiloina ai le aogā moni o le Tusi Paia mo tupulaga i aso nei. I le tele o mataupu, mai le soifua malōlōina e oo i le tamaoaiga, o olaga faaleaiga, ma amioga a le tagata lava ia, o le a mafai ona e iloa faapea, ua pei moni lava le Tusi Paia o se papa mausalī, i oneone fetafeai solo o le lalolagi i aso nei.

[Ata i le itulau 4]

O le Tusi Paia o se taula mausalī mo tulaga faigata i le lalolagi i aso nei