Vaaiga Mai le Nuu Folafolaina

Sinai—Le Mauga o Mose ma le Alofa Mutimutivale

PE A e manatunatu i le Mauga o Sinai, atonu o le a tau ane ai lou mafaufau ia Mose. Aiseā? Auā o luga o se mauga i le Penisula o Sinai na tauaaoina ane ai ia Mose le Tulafono a le Atua. O lē fea mauga? E tau manino mai o le mauga lena o loo faaalia mai i luga. *

I le itu i saute o le penisula, pe tusa o le ogatotonu o ālavai laiti o le Sami Ulaula, o loo iai se tuasivi e lua ona tumutumu. O lona tulaga ua fetaui lea ma tala a le Tusi Paia ia e aofia ai Mose. O le tasi tumutumu ua faaigoa o Jebel Musa, o lona uiga, o le “Mauga o Mose.”

E ioe nisi tala o le Tusi Paia i le talafeagai o lena igoa. Po o e manatua sa leoleo e Mose le lafu mamoe a Ietero i le taimi na faaali ane ai se agelu i le vaomatua lea na sasao aʻe ai le afi? O fea lena mea? Ua taʻua i le Tusi Paia o ‘le mauga o le Atua moni, le mauga o Horepa,’ lea foi sa igoa o le Mauga o Sinai. (Esoto 3:1-10; 1 Tupu 19:8) Ina ua taʻitaʻi ese nai e Mose tagata o le Atua mai Aikupito, o i inei na ia aumaia i ai i latou. Ua faapea mai le Esoto 19:2, 3, “ua to lauapi ai Isaraelu i le laulata o le mauga. Ona alu ae lea o Mose i le Atua; ona valaau mai lea o Ieova ia te ia ai le mauga.”

O le faatoʻā aʻe lava lena o Mose i le Mauga o Sinai, ma sa umi se ala na savali atu ai o ia, na i lo le taloto atu i ala ʻalo e ui atu i malifa. Tatou te faitau ai: “Ona afio ifo lea o Ieova i luga o le mauga o Sinai, i le tumutumu o le mauga; ua valaau foi Ieova ia Mose e alu ae i le tumutumu o le mauga.”—Esoto 19:20.

E faitauafe tagata matamata i aso nei, ua matuā taumafai malosi e feaʻei i le po ina ia oo atu i le tumutumu, ma nonofo ai i inā seʻi vāai i le oso aʻe o le lā, ona toe ō ifo lea i lalo i le aoauli. Ae sa leʻi faapena Mose. Na fetalai atu le Atua ia te ia: “Ina sau ia oe i luga nei ia te au i le mauga, ma e nofo ai; ou te avatu ai ia te oe papamaa, ma le tulafono.” I lena taimi, “sa i ai Mose i le mauga i ao e fagafulu ma po e fagafulu.”—Esoto 24:12-18.

Ua malamalama la, e fesootai atu le igoa o Mose ma lenei mauga, ae aiseā ua fesootai atu ai le “alofa mutimutivale” ma le mauga? Auā a o iai Mose i inā e taliaina le Tulafono, sa faia ai e tagata na faatali atu i lalo i le laugatasi (atonu o le Laugatasi o er-Raha lea o loo i le ata) se gaoioiga valea. Na latou uunaia le uso o Mose ina ia faia se atua. Na faapea atu Arona: “Ia outou motusi ese o mama auro o i taliga . . . ma aumaia ia te au.” Ona latou faia ai lea o se tamai povi auro mo le tapuaiga. Na toasa le Atua moni i lenei mea, ma na iʻu ai i le fasiotia o le faitauafe. (Esoto 32:1-35) Ae sa faaalia ia Arona le alofa mutimutivale ma faasaoina ai o ia. Aiseā?

 O upu a le Atua i le Esoto 32:10 ua taʻu mai ai e faapea, e leʻi manatu o ia faapea o Arona na mafua ai mea sese a Isaraelu. Ma ina ua oo mai le faasaʻoga o mea, sa filifilia e “le fanauga a Levi uma lava” le itu a le Atua, lea e mautinoa sa aofia ai ma Arona. (Esoto 32:26) E ui lava la i ni masei o Arona na iai, ae na ia maua le alofa mutimutivale o le Atua i le ʻauvae o le Mauga o Sinai.

Mulimuli ane, na faaleo mai e Mose lona faanaunauga ina ia matuā iloa lelei Ieova ma matamata i Lona mamalu. (Esoto 33:13, 18) A o lē mafai e Mose ona vaai atu i fofoga o le Atua, sa faaali mai i ai e Ieova se vaega o Lona mamalu, ma sa faamamafaina i ai le manatu faapea o le a Ia “alofa mutimutivale i e [Na te] fia alofa mutimutivale i ai.” (Esoto 33:17–34:7) Sa sili ona talafeagai mo le Atua ona matuā faamamafa mai lona alofa mutimutivale, auā ua faaaogā e le Tusi Paia le “alofa mutimutivale” i le tele o tulaga e fesootai atu ma feutagaiga a le Atua ma Isaraelu, o i latou na ia osia i ai se feagaiga i Sinai.—Salamo 103:7-13, 18.

Ua maua e tagata tafafao i le ʻauvae mauga o le Mauga o Sinai i aso nei se monaseri, lea e faigata ona faamanatu mai ai i se tasi le tapuaiga moni na aʻoaʻoina e Mose i le mauga o loo faaalia i luga. Ae na i lo o lea, o loo faaautū atu tapuaiga o loo faia i le monaseri i faatusa faalotu. O le faatusa o loo faaalia i inei o “Le Apefaʻi i le Parataiso.” E faavae mai i le tusi a le monike Byzantine o John Climacus. Ina ua mavae le 40 tausaga sa tuu ai o ia i se tamai potu o le monaseri, ona avea lea o ia ma faauluuluga o le monaseri ma ia tusia ai se faamatalaga e faatatau i le apefaʻi faafaatusa i le lagi. Ae seʻi mātau, o nisi ata vane o taʻitaʻilotu o loo faaalia mai ai le tosoina o i latou e temoni i le afi o hele e faapuapuagatia ai e faavavau. O se ata na matuā manino mai, peitai e lē faale-Tusi Paia!—Failauga 9:5, 10; Ieremia 7:31.

I le faaeseesega ma lena aʻoaʻoga sese, o le upu moni e faapea, o Lē Ona le Malosi Uma Lava o “le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6) Sa lalata le mafutaga a Mose ma lenei Atua alofa mutimutivale i le Mauga o Sinai.

[Faaopoopoga i lalo]

[Ē Ana le Ata i le itulau 8]

Pictorial Archive (Near Eastern History) Est.

[Ē Ana le Ata i le itulau 9]

Pictorial Archive (Near Eastern History) Est.

[Ē Ana le Ata i le itulau 9]

Pictorial Archive (Near Eastern History) Est.