Lipoti a Ē Faalauiloa le Malo

Taʻuleleia la Tatou Faiva e le Faamaoni

O LE faamaoni o se manaoga autū lea mo Kerisiano. Sa tusia e le aposetolo o Paulo i le Eperu 13:18 e faapea: “O loo taofi i matou ua ia te i matou le loto fuatia ifo lelei, o loo loto i matou e amio lelei i mea uma lava.” O lo tatou faia o le faamaoni ‘e viia ai le mataupu a le Atua, lo tatou Faaola, i mea uma lava.’ (Tito 2:10) O le faamaoni ma le talaʻiga o le Malo e ni Kerisiano se toalua i le malo o Toga i le Pasefika i Saute, ua avatuina ai se molimau malosi. Ua faamatalaina e le ofisa o le lālā a le Sosaiete o le Olo Matamata i Samoa i Sisifo e faapea:

“E tele ni tausaga na talanoa atu ai se ulugalii Molimau i tagata o ni nuu se fa e i lo la motu e uiga i le Malo o le Atua peitai, e aunoa lava ma ni iʻuga mautinoa. O lea, a o gasegase lana tane, sa tatau ai ona vaaia e le avā le la faatoaga niu, taei ma faamamago popo, auā e na o le pau lea o le la ālā tupe. Ina ua alu le fafine e fua ana popo e tagata faatau, na fefiloi faatasi ai ana taga popo e lima ma se taga a se tasi tagata. Sa uunaia o ia e tagata o le nuu e taofi pea le taga faasili lea, ma manatu i ai o se faamanuiaga mai le Atua. E ui i lea, sa teena e le tuafafine, ma ina ua avatu foi ia te ia le totogi mo taga e ono, sa ia taliaina lava na o le tau saʻo o ana taga popo e lima. Na mātauina le faamaoni o le fafine.

“Mulimuli ane, ina ua alu malaga le tane i le isi motu, sa talosaga atu i ai le faatauoloa pe mafai ona ia faia mai se faatau mo ia. Sa faia e le Molimau e pei ona talosagaina ma sa ia toe faafoi atu i le faatauoloa lana sui na totoe. Na matuā faateʻia le faatauoloa. Na fai mai o ia o se taimi muamua lea ua toe faafoi ane ai e se tagata sana sui. O isi tagata e masani ona ia talosaga i ai latou te faia mai sana faatau, e masani lava ona latou taofia ma i latou le sui. I se isi taimi, ina ua manaomia e le Molimau lenei se mea mai le faleoloa o le tamaloa lea, na tuu atu i ai e le faatauoloa le ki o le faleoloa ma faatonuina o ia e ave uma mea o loo ia moomia ae tuu ai le tau i le faleoloa. O isi tagata sa iai i lea taimi, sa latou tuufesili i le faatauoloa pe aiseā ua ia ave ai le ki o le faleoloa i le Molimau ae lē avatua ia i latou. Sa faamatala atu e le faatauoloa, ona e na o le Molimau lava lenei le tagata o le nuu e na te faatuatuaina.

“Ua talanoa uma tagata o le nuu i le amio lelei a lenei ulugalii. Ua lauiloa Molimau i lo latou faamaoni, lo latou solitū i faiga faapolotiki, ma la latou molimau e uiga i le Malo o le Atua lea, e faaalia ai le eseesega o talitonuga o tagata o le nuu ma aʻoaʻoga a le Tusi Paia. I le taimi lenei pe afai e tulai mai ni fesili e uiga i le Tusi Paia, e masani ona ō atu tagata o le nuu i Molimau mo ni tali. E oo foi i le tane, e masani ona toe ala aʻe i le po ma alu atu i se fono a le nuu ma tali ai fesili e lāgā i se mataupu faale-Tusi Paia. Pe a auai i ni falelauasiga a le nuu, e masani lava ona talosagaina le tane e faailoa atu le manatu o le Tusi Paia e uiga i le oti, ma e taliaina lava ona manatu.”

O lea, o le faamaoni o lenei ulugalii Molimau ma le la talaʻiga o le Malo ua avatu ai se molimau lelei i lenei motu matagofie o le Pasefika i Saute. La te faamoemoe o le a suesue foi e isi le Tusi Paia ma tutū maumauai mo le upu moni. Afai latou te faia faapea, e mautinoa o le a faamanuiaina i latou e Ieova le Atua.—Ioane 8:32.