Aiseā e Auauna ai ia Ieova?

“UA I faitotoa le aso o Ieova! Ua latalata mai le ‘puapuaga tele,’ ma o le a lē faasaoina mai ai oe pe afai e te lē auauna i le Atua.” Afai na fai atu e se tasi na upu ia te oe, na faapefea ona e tali atu i ai?—Sefanaia 2:2, 3; Mataio 24:21.

E moni, e ao ona tatou manatua le aso o Ieova, ma o le faasaoina atu i le puapuaga tele ua lalata tele mai, e faalagolago lea i le auauna ma le faamaoni i le Atua. Ae pe tatau ea ona avea nei mea moni ma pogai autū e ala ai ona tatou tuuina atu le auaunaga paia ia Ieova le Atua? Aiseā e te auauna ai ia Ieova?

E Manaomia se Mafuaaga Saʻo

Afai e lē saʻo le mafuaaga e ala ai ona auauna se tasi i le Atua, e ono toe faamaamulu la o ia pe afai e lē faataunuuina ni mea sa ia faatalitalia i se vaitaimi patino. Mo se faataʻitaʻiga, na faatalitalia e nisi tagata le toe afio mai o Iesu Keriso i le 1843 po o le 1844, ma sa mavae atu na aso e aunoa ma le faataunuuina o mea sa latou faamoemoe i ai. Seʻi mātau le mea na tusia e George Storrs, o lē na lomia le Bible Examiner e faatatau i lenei mataupu, ma o lē sa mulimuli ane masani ma Charles Taze Russell, le uluai peresitene a le Sosaiete o le Olo Matamata. I le Bible Examiner o Setema 1846, na tusia ai e Storrs e faapea:

“O le matafaioi ina ia auauna i le Atua ua sili atu ona tāua na i lo na o se mea moni faapea ua toetoe lava uma le aso. . . . O le a matuā mataʻutia le tali mai o le a iai pe afai e teʻa le 1846 ma le 1847 e pei ona foliga mai ai, ae aunoa ma se molimauina o le afio faalua mai. Ua faamaonia e mea tutupu lenei tulaga—o le uiga o laʻu tala, o mea na tutupu i le 1843 ma le 1844. O fea o iai nei le vaega tele o i latou na, o ē sa faapea mai na ‘uunaia e auauna i le Atua’ e pei ona sa tatau ai ona latou faia e ala i lena alaga o le taimi mo le afio mai o le Alii? Ua faapea mai le siʻuleo—O FEA!!! E toaitiiti, pe tusa ma le toatasi mai le toasefulu o i latou na o loo iai pea ina ia faamamaluina la latou galuega faa-Kerisiano. Aiseā ua lē iai uma ai i latou? Ona sa faagaeeina i latou e ni mafuaaga sese. O lo latou manatu faapito sa avea ma uiga autū e faatosina ma faagaeetia ai. Sa pei moni lava i latou o le tagata agasala o lē na mafaufau pea ia te ia a ua latalata ina oti i lona maʻi pe ina ua āfātia i se matagi i le vasa. Ua ia mafaufau ana faapea na te mautinoa e tatau ona oti o ia, semanū o le a avea o ia ma Kerisiano. Pe ana fai na te mautinoa e faasaoina o ia mai i mea mataʻutia, semanū e lē fia uaʻi i ai.”

Auauna Ona o Mafuaaga Saʻo

O le manatu faapito ma le mataʻu i le faaumatiaga atonu e uunaia ai nisi e faia le finagalo o Ieova. O isi atonu ua matuā faagaeetia i le faamoemoe o le ola i le Parataiso, ua latou auauna ai i le Atua mo na o lena lava mafuaaga. Peitai, afai e manatu ifo tagata o loo uunaia e na mafuaaga e faapea e leʻi lata tele mai le aso o Ieova ma le puapuaga tele, atonu la o  le a latou lē naunau ai e auauna atu ma le maelega i le Atua.

E mautinoa, e lē o se manatu faapito le olioli i folafolaga ma faamanuiaga ua muai fetalaia mai e le Atua. E finagalo o ia ina ia tatou fiafia i faamoemoega ua saunia mo i tatou uma, o ni soʻo o lona Alo o Iesu Keriso. Na faapea mai le aposetolo o Paulo: “Ia olioli i le faamoemoe.” Na ia toe faaopoopo mai: “Ia onosai i le puapuaga, ia finafinau i le tatalo.” (Roma 12:12) O le tuufaatasi o le tatalo ma le “fiafia ia Ieova” e fesoasoani lea ia i tatou ina ia onosaia tofotofoga ma faatalitali ai ma le onosai i le faataunuuina o folafolaga a le Atua. (Neemia 8:10) I le taimi nei, e tele mafuaaga tatou te auauna ai ia Ieova. O ā nisi o na mafuaaga?

Tiute ma Faaeaga

Ona o Ieova o le Pule Silisiliese Aoao, ua onomea ai ona tuu atu ia te ia le tuutoina atoatoa. (Esoto 20:4, 5) E tutusa uma lava le matafaioi a Kerisiano taitoatasi i le Atua, e tusa lava pe amata le puapuaga tele taeao, po o le tausaga a sau, po i se isi taimi mulimuli ane. Ua ia te ia se matafaioi e auauna ai ma le lē manatu faapito ia Ieova, ona o le alofa i le Atua ma lona loto atoa, lona agaga atoa, lona mafaufau atoa, ma lona malosi atoa. (Mareko 12:30) Na manatu nisi uluai Kerisiano faapea sa lata tele mai le aso o Ieova, ae sa leʻi taunuu moni lo latou faamoemoega, ma na latou maliliu lava ae leʻi vaavaai i le mea sa latou faatalitalia. (1 Tesalonia 5:1-5; 2 Tesalonia 2:1-5) Peitai, afai sa latou faamaoni seia oo i le oti, e mulimuli ane la mauaina e na soʻo faauuina o Keriso le taui o le toetu i le ola faalelagi.—Faaaliga 2:10.

E ao i Molimau papatisoina a Ieova ona auauna ia te ia ma le faamaoni, auā ua latou loto malilie e taliaina le matafaioi o le faia o lona finagalo. Seʻi tau ina manatu! E mafai ona tatou faia le finagalo o le Pule Silisiliese Aoao e pei foi ona faia e agelu. (Salamo 103:20, 21) Sa matuā faasilisilia e Iesu lena faaeaga na mafua ai ona ia fetalai: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) Afai e ia i tatou foi lena agaga, o le a tatou faalauiloa atu ai la ma le maelega viiga o Ieova ma taʻu atu i isi ana fuafuaga, e pei ona faaalia mai i le Tusi Paia. O lena auala, ua faaeaina ai foi i tatou e fesoasoani atu i isi i le itu faaleagaga. Ma e mautinoa, o le faia o le finagalo o le Atua ona o le alofa mo ia, o se faaeaga sili lea ona ofoofogia, e tusa lava po o le ā le taimi e amata ai le aso o Ieova.

E Faatupulaia Uunaiga e le Loto Faafetai

O le loto faafetai mo le alofa i le Atua i le sauniunia o le taulaga togiola i lona Alo, e ao foi ona uunaia ai i tatou e auauna atu ia Ieova. Sa iai se taimi na faaesea ai i tatou mai ia Ieova le Atua ona o le agasala. Peitai na fetalai Iesu: “Ua faapea lava ona alofa mai o le Atua i le lalolagi [o tagata], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) Na taʻimua Ieova i lenei gaoioiga, e pei ona tusia ai e Paulo: “Ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.” (Roma 5:8) O le loto faafetai mo lenei faailoaga o le alofa o le Atua e  ao ona uunaia ai i tatou e auauna atu ia te ia ma le loto atoa.

O le talisapaia o sauniuniga faaleagaga ma faaletino a Ieova, o se isi lea mafuaaga e auauna ai ia te ia ma le faamaoni. O le Afioga a le Atua o se taʻiala mautinoa—o le malamalama i o tatou ala. O lomiga ua saunia e ala mai i le “auauna faamaoni ma le mafaufau” ua fesoasoani ia i tatou ina ia ōgatasi ai o tatou olaga ma le finagalo o le Atua. (Mataio 24:45-47; Salamo 119:105) Ma talu ai o loo tatou faamuamuaina le sailia o le Malo, ua saunia ai foi e Ieova mea faaletino mo i tatou. (Mataio 6:25-34) Po o e faaalia ea lou talisapaia mo nei mea?

O le loto faafetai i le saolotoga mai le Atua e ō ese ai mai lotu sese, o se isi foi lena mafuaaga e auauna atu ai ma le faamaoni ia Ieova. O le fafine talitane faalelotu a Papelonia Tele o loo “tietie i vai e tele,” po o “motu o tagata, ma atu nuu, ma gagana eseese.” (Faaaliga 17:1, 15) Peitai, e lē o tietie o ia i auauna a Ieova, o lona uiga, na te lē o taaʻina ma puleaina faalelotu i latou. Mo se faataʻitaʻiga, latou te teena le talitonuga sese faalelotu e faapea e lē mafai ona oti le solu faaletagata. Latou te iloa na foafoaina le tagata o se “tagata ola,” a o tagata oti “latou te le iloa se mea,” ma o le a iai foi se toetu. (Kenese 2:7; Failauga 9:5, 10; Galuega 24:15) O lea latou te lē fefefe ai, ma e lē tapuai foi i tagata oti. Po ua avea ea lou loto faafetai mo lena saolotoga faaleagaga ma itu e te teteeina ai le faaaposetasi ma gauai atu i le tapuaiga mamā ia Ieova?—Ioane 8:32.

O le talisapaia o le lagolago a Ieova i aso taitasi e ao ona faateleina ai lo tatou maumauai ina ia auauna ia te ia ma le faamaoni. Na faalauiloa mai e le faisalamo o Tavita: “Ia faafetaia le Alii [“o lē na te tauaveina a tatou avega,” NW] i lea aso ma lea aso.” (Salamo 68:19) I se isi foi mea na taʻua ai e le faisalamo: “E ui lava ina tuua aʻu e loʻu tamā ma loʻu tinā, a e talia aʻu e Ieova.” (Salamo 27:10) Ioe, o le tagata e auauna faamaoni ia Ieova e mafai ona lafo atu ia te ia ona mafatiaga faafaatusa, e pei o le tuu atu i le Atua o ona popolega ma mea e tofotofoina ai. Po o e faaalia ea le talisapaia mo le lagolagosua faifai pea a Ieova e ala i le auauna faamaoni atu ia te ia?—Salamo 145:14.

Faamanū atu ia Ieova ma Lona Tulaga Tautupu

O se faanaunauga e vivii ia Ieova e ao ona uunaia ai foi i tatou e auauna ia te ia. Ua auauna meafaiola faalelagi i le viviiina o le Atua i upu nei: “Le Alii e, [“Ieova e,” NW] e tatau lava oe ina ia tuu atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.” (Faaaliga 4:11) Na faamanū atu le tupu o Tavita i le Atua e ala i le faapea atu: “Ieova e, e ou le silisili ese, ma le malosi, ma le matagofie, ma le mamalu, ma le malualii; . . . Ieova e, e ou le malo, . . . Mai ia te oe le oloa ma le mamalu, o oe e te pule i mea uma lava; . . . O lenei, lo matou Atua e, ua matou faafetai atu ia te oe, ma vivii atu i lou suafa mamalu.” (1 Nofoaiga a Tupu 29:10-13) I le avea ma auauna a Ieova, po ua tatou lē lagona ea le tatau  ona tatou viiviia o ia i upu ma gaoioiga, a o tatou faatalitali atu i le faataunuuga o ana folafolaga?—1 Korinito 10:31.

O se uunaiga malosi ina ia tautala atu e uiga i le Malo o le Atua, o se isi foi lena faalaeiauga e auauna ai ia Ieova. Ua lelei ona faaleoina mai lena mafuaaga aogā i upu a le faisalamo e faapea: “Ieova e, e vivii atu ia te oe mea uma na e faia; e faafetai atu foi ia te oe ou tagata amio Atua. E tautalatala atu i latou i le mamalu o lou malo, ma taʻutaʻu atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo. O lou malo o le malo lea e faavavau lava; ma lau pule e āu tupulaga lava lea.” (Salamo 145:10-13) O le faalauiloaina o le feau o le Malo o se tofiga faa-Kerisiano ma o le galuega sili lea ona tāua ua faia i o tatou aso. (Mataio 24:14; 28:19, 20) Po o e matuā faanaunau ea e vivii atu ia Ieova ma taʻu atu i isi e uiga i lona Malo?

O le faapaiaina o le suafa o Ieova ma le taʻumamāina o lana pule silisiliese e ao ona tāua foi ia i tatou, lea ua tatou mananao ai e auauna faamaoni ia te ia. E mafai ona tatou tatalo atu mo le faapaiaina o le suafa o Ieova ma le taʻumamāina o lana pule silisiliese. (Mataio 6:9) E mafai ona tatou gaoioi e tusa ai ma a tatou tatalo e ala i le auai e lē aunoa i le faiva faa-Kerisiano, ma i le folafolaina atu o le tala lelei e uiga i ia mataupu e matuā tāua.—Esekielu 36:23; 39:7.

Olioli ma le Faamalieina

O le auauna faamaoni ia Ieova, e faamalieina ai i tatou ona ua tatou faafiafiaina lona finagalo ma faamaonia ai e pepelo le Tiapolo. E ui ina pepelo mai Satani faapea o ni mafuaaga manatu faapito e ala ai ona auauna tagata i le Atua, peitai o la tatou auaunaga faamaoni ia Ieova lea e faia ona o le alofa, ua faamaonia ai le sese o manatu o lē o loo faifai mai. (Iopu 1:8-12) O se mafuaaga lelei lenei ua tatou maua e tumau ai pea i le faia o le mea o loo taʻua i le Faataoto 27:11: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” E lē gata i lea, pe afai tatou te auauna faamaoni ia Ieova e ui lava i taumafaiga uma a Satani ina ia taofia i tatou, ae o le tausia o lo tatou ala faamaoni e avea lea ma faamalosiau i o tatou uso talitonu.—Filipi 1:12-14.

O le olioli ma le faamalieina i le faia o se sao i le seleselega faaleagaga e ao ona faamautūina ai foi lo tatou auauna faamaoni atu ia Ieova. Sa fiafia Iesu i lona fesoasoani atu i tagata, ae maise lava i le itu faaleagaga. Fai mai le Mataio 9:35-38: “Ua faataamilo Iesu i aai uma ma faoa aai, ua aʻoaʻo i o latou sunako, ma talaʻi i le tala lelei o le malo, ua ia faamalolo foi i maʻi uma, ma maʻi tiga uma o le nuu. Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo. Ona fetalai atu ai lea o ia i ona soo, E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” Afai ua fai sina umi o le taimi o le seleselega na i lo le umi sa tatou faatalitalia, ua tatou maua ai la nisi avanoa e tele e olioli ai ma faamalieina ai i le fesoasoani atu i isi i le itu faaleagaga. O se tasi foi lenei o auala e faaalia ai le alofa i tuaoi e pei ona tatau ona tatou faia.—Mataio 22:39.

Aiseā E te Auauna ai i le Atua?

Ua na o ni nai mafuaaga na ua tatou iloiloina mai le tele o mafuaaga malolosi e tatau ai ona tatou auauna faamaoni ia Ieova. E lelei pe a tatou tatalo ma manatunatu i mafuaaga totino mo le auauna atu i le Atua, auā o i tatou taitoatasi uma lava o le a tatau ona tuuina atu se tali ia te ia. (Roma 14:12; Eperu 4:13) Ma o i latou o loo faaauau pea ona iai ni mafuaaga manatu faapito, o le a latou lē olioli i le finagalo malie o le Atua.

O le ā e mafai ona tatou faatalitalia pe afai tatou te muai manatu mamafa i le faapaiaina o le suafa o Ieova ma tuuina atu le auaunaga paia i le Atua ona o ni mafuaaga lē manatu faapito? Ioe, o le a faamanuia mai Ieova ia i tatou ma la tatou faiva! (Faataoto 10:22) O le a tatou mauaina foi le ola e faavavau ona o lo tatou auauna faamaoni ia Ieova.

[Ē Ana le Ata i le itulau 8]

SIX SERMONS by George Storrs (1855)

[Ata i le itulau 9]

E faitau afe o loo auauna ia Ieova i Iapani

[Ata i le itulau 10]

Auauna atu ia Ieova i Côte d’Ivoire