E Maufaatuatuaina Faapeī Valoaga o le Tusi Paia?

UA IAI le tele o tusi o talafaasolopito i aso nei. O nei tala o mea na tutupu i le taimi ua mavae ua avea ma mea e matuā ofoofogia. A o tatou faitauina, atonu tatou te vaaia ai faalemafaufau i tatou i faatulagaga i aso ua mavae. E mafai ona tatou vaaia faalemafaufau tagata, o nofoaga, ma mea na tutupu a o tatou faitau i ai mai o latou itulau.

O le Tusi Paia o se tusi e faapena—o se tusi e tumu i tala fiafia o talafaasolopito. E ala i ona itulau, ua mafai ai ona tatou masani i tamaloloa ma fafine e pei o Aperaamo, o lana avā o Sara, le Tupu o Tavita, le Masiofo o Eseta, ma le Faiaʻoga Sili o Iesu Keriso. O le iʻuga, e mafai ai ona tatou savavali faatasi ma i latou, faalogo i mea na latou fai mai ai, ma vāai i mea na latou vāai i ai. Peitai, o le toatele lava o loo manatu i le Tusi Paia o se tusi e sili atu na i lo na o se tusi o talafaasolopito. Ua latou talitonu, o loo iai i le Tusi Paia le mea ua taʻua o talafaasolopito na muai tusia. Aiseā ua faapea ai? Talu ai ona o loo tumu le Tusi Paia i valoaga.

Peitai, o le ā le tele o le maufaatuatuaina o valoaga o le Tusi Paia? Afai na faataunuuina valoaga o le Tusi Paia i mea na tutupu i le taimi ua teʻa, pe tatou te lē faatalitalia foi la le moni o na valoaga e uiga i mea o le a tutupu i le lumanai? Seʻi o tatou iloiloina nei la nisi o faaaʻoaʻoga e iloa ai pe maufaatuatuaina valoaga o le Tusi Paia.

Le Tulaga o Isaraelu ma Asuria i le Lalolagi

Na muai taʻua e le perofeta a le Atua o Isaia, o lē na amata ona vavalo mai pe tusa ma le 778 T.L.M. e faapea: “E solia i vae le palealii e faamaualuga o e onā o Efaraima [Isaraelu]; o le fuga foi e mamae o lo latou matagofie e faamananaia aʻi i latou, o le ua i le ulu o le vanu lafulemu, e avea ia e pei o mati ua muai otatā  a o lei oo i le tausaga vevela; ua iloa ai e le ua vaai atu i ai, a maua i lona lima, ona folo loa lea.” (Isaia 28:3, 4) E pei ona valoia mai, i le ogatotonu o lona valu o senituri T.L.M., na pei ai le laumua o Isaraelu o Samaria o se mati ua otā ua oo i le taimi e tau ai ma foloina e ala i autau a Asuria. O le mea tonu lava lena na tupu ina ua faatoilaloina Samaria e autau a Asuria i le 740 T.L.M.—2 Tupu 17:6, 13, 18.

Mulimuli ane, na avea Asuria ma malo malosi i talafaasolopito. O lona laumua o Nineva, ona sa lauiloa i le soona sauāina o tagata o taua po o pagota, sa taʻua “o le aai o e [“faamasaatoto,” NW]!” (Nauma 3:1) Na faatonuina e Ieova le Atua lava ia le faafanoina o Nineva. Mo se faataʻitaʻiga, e ala i le perofeta o Nauma, na fetalai atu ai le Atua: “Faauta, ou te fai oe moʻu fili . . . ou te inosiaina foi oe, ma ou faia oe ma mataaga. Ona oo ai lea ina sosola ese ia te oe o i latou uma o e vaai atu ia te oe, ma latou faapea ane, Ua faatafunaina Nineva!” (Nauma 3:5-7) Na valoia foi e Sefanaia le faaumatiaga o Asuria ma le faatafunaina o Nineva. (Sefanaia 2:13-15) Na faataunuuina uma nei valoaga i le 632 T.L.M., ina ua faafuaseʻi ona vetea ma olopalaina e autau a le tupu o Nabopolassar o Papelonia ma Cyaxares o Metai ia Nineva—na matuā faatamaʻia atoatoa e oo lava i le mea sa iai le aai ua matuā lē iloa lava mo le sili atu i le 2,000 tausaga. Na sosoo ai loa ma le avea o le Emepaea o Papelonia ma malo malosi i le lalolagi.

Valoia le Faafanoina o Papelonia

Na valoia mai e le Tusi Paia le faatoilaloina o le Emepaea o Papelonia ma na muai taʻua ai le auala o le a faatoilaloina ai lona aai laumua o Papelonia. I le toetoe lava lua senituri muamua atu, na lapataia ai e le perofeta o Isaia e faapea o le a faapaʻumatūina le Vaitafe o le Eufirate. E tafe atu lena vaitafe agaʻi i Papelonia, ma sa avea ala tatala i autafa o le vaitafe ma vaega tāua i le puipuiga o le aai. Na taʻu mai e le valoaga e faapea o lē manumalo o Kuresa, ma ia mātau o le a lē tapunia faitotoa e lua i ē osofaia. (Isaia 44:27–45:7) E tusa ai ma lena mea, na faamautinoa ai e le Atua sa matala pea faitotoa e lua o Papelonia i autafa o le Eufirate i le taimi o se tausamiga i le po na osofai mai ai au a Kuresa le Sili. O lea, e aunoa ma se faigata, na latou ulu atu ai i le aai e ui atu i le ilitivai ma faatoilaloina Papelonia.

Na tusia e le tusitala o talafaasolopito o Herodotus e faapea: “Sa . . . faatutūina e Kuresa se vaega o lana autau i le mea na tafe atu ai le vaitafe o le Eufirate i totonu o [Papelonia] a o isi o i latou i le faatausiusiuga o le isi itu e feagai ma le mea o tafe ese atu ai le vai, ma sa faatonuina nei vaega e lua ina ia latou ulu faamalosi atu i totonu o le aai pe a latou vaaia ua papaʻu le vai. . . . E ala i le eliina o se isi alavai, na ia faatafe atu ai le vaitafe i totonu o le vaituloto (lea sa avea muamua o se taufusi), ma i lenei auala na matuā faaitiitia ai le loloto o le vai, ma na faigofie ai ona āsā e autau a Peresia ia na tuua i Papelonia mo lea fuafuaga, e ui atu i le ilitivai lea ua papaʻu e gata i luga aʻe o tuli, ma ō atu ai i le aai. . . . Sa faia ai pea i inā se tausamiga, ma e oo lava i le taimi na faatoilaloina ai le aai, sa faaauau pea ona latou sisiva  ma olioli lava i latou, seia oo ina latou iloaina le mea ua tupu.”—Herodotus—The Histories, faaliliuina e Aubrey de Selincourt.

I lena lava po, na lapataia ai e le perofeta a le Atua o Tanielu le pule o Papelonia e uiga i se mala o le a oo i ona luga. (Tanielu mataupu 5) Sa iai pea se malo vaivai o Papelonia mo ni nai senituri mulimuli ane. Mai i inā, mo se faataʻitaʻiga, na tusia ai e le aposetolo o Peteru lana uluai tusi faagaeeina i le uluai senituri T.A. (1 Peteru 5:13) Peitai na taʻua i le valoaga a Isaia e faapea: “O Papelonia foi . . . e avea lava lea e pei o le faaumatiaga o Sotoma ma Komoro e le Atua. E le toe āinaina e faavavau.” Na fetalai mai foi le Atua: “Ou te tineia foi i Papelonia o le igoa, ma e o totoe, o le atalii atoa ma le atalii o le atalii.” (Isaia 13:19-22; 14:22) E pei ona valoia, na avea mulimuli ane Papelonia ma faatafunaga. Afai e mafai ona toe faafoisia lena aai anamua, atonu o le a tosina ane i ai tagata maimoa, peitai o le a tumau pea ona lē toe iai ona ‘atalii ma atalii o ona atalii.’

O Tanielu—o le perofeta a Ieova na iai i Papelonia ina ua paʻū—na ia iloa se faaaliga e uiga i le faatoilaloina o Metai ma Peresia. Na ia iloaina se mamoe poʻa e lua ona nifo ma se ʻoti poʻa e iai se nifo tele i le va o ona mata. Na osofaʻia e le ʻoti le mamoe ma taia i lalo, ua gaugau ai ona nifo e lua. Mulimuli ane ona gau ai lea o le nifo tele o le ʻoti, ae suitulaga mai ai nifo e fa. (Tanielu 8:1-8) E pei ona valoia mai e le Tusi Paia ma faamaonia e talafaasolopito o le mamoe poʻa e lua ona nifo ua fai lea ma sui o Metai ma Peresia. O le ʻoti poʻa ua faaatagia ai Eleni. Ae faapefea lona “nifo tele”? Ua faamaonia o lena nifo tele ua fai ma sui o Alesana le Sili. Ina ua gau lena nifo tele faafaatusa, ona suitulaga ai lea o isi nifo faafaatusa e fa (po o malo). E moni e tusa ai ma le valoaga, ina ua maliu Alesana, ona tutū mai lea o le toafā o ona taʻitaʻiau e sui aʻi i o latou lava malosi—o Ptolemy Lagus i Aikupito ma Palesitina; o Seleucus Nicator i Mesopotamia ma Suria; o Cassander i Maketonia ma Eleni; ma Lysimachus i Thrace ma Asia Itiiti.—Tanielu 8:20-22.

Valoaga o se Lumanai Pupula

O valoaga o le Tusi Paia e faatatau i na mea na tutupu e pei o le faatafunaina o Papelonia ma le faatoilaloina o Metai ma Peresia, ua na o ni faaaʻoaʻoga na o le tele o valoaga faale-Tusi Paia na faataunuuina i taimi ua mavae. Ua iai foi i le Tusi Paia le tele o valoaga e uiga i le lumanai pupula lea o le a oo mai ona o le Mesia, Lē ua Faauuina a le Atua.

O nisi valoaga faa-Mesia o loo i Tusitusiga Eperu sa faatatauina ia Iesu Keriso e tusitala o Tusitusiga Kerisiano Eleni. Mo se faataʻitaʻiga, na faasino atu e tusitala o le Evagelia e faapea, na fanau Iesu i Peteleema, e pei ona valoia e le perofeta o Mika. (Mika 5:2; Luka 2:4-11; Ioane 7:42) I le faataunuuga o le valoaga a Ieremia, sa fasiotia ai pepe ina ua mavae le fanau mai o Iesu. (Ieremia 31:15; Mataio 2:16-18) Na faataunuuina upu o loo i le Sakaria (9:9) ina ua tietie atu Keriso i le tamai asini i Ierusalema. (Ioane 12:12-15) Ma ina ua tufatufaina e fitafita ofu o Iesu ina ua uma ona faasatauroina o ia, sa faataunuuina ai i lenei mea upu a le faisalamo e faapea: “Ua latou tufatufa oʻu ofu mo i latou, ma latou fai le vili i loʻu ofu tino.”—Salamo 22:18.

Ua faapena foi ona faasino atu isi valoaga faa-Mesia i se taimi fiafia mo tagata. I se faaaliga, na vaaia ai e Tanielu “Lē e pei o le Atalii o le tagata” ua foaiina atu i ai le “pule ma le viiga ma le malo” mai ia Ieova, “Lē ua mai anamua ona aso.” (Tanielu 7:13, 14) E faatatau i le pulega faa-Mesia a lena Tupu faalelagi o Iesu Keriso, na folafola mai ai e Isaia e faapea: “E igoa foi o ia, . . . o le Faipule, o le Atua malosi, o le Tamā o le faavavau, o le Alii o le filemu. E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausali i le faamasinoga ma le amiotonu, e afua mai i ia ona po e oo i le faavavau; e faia lea mea i le maelega o Ieova o ʻau.”—Isaia 9:6, 7.

A o leʻi faataunuuina atoatoa le pulega amiotonu a le Mesia, e tatau ona taunuu muamua se isi mea moni e sili ona tāua. O loo faapea foi ona valoia mai lenei mea i le Tusi Paia. Na pese  le faisalamo e faatatau i lenei Tupu faa-Mesia e faapea: “Ina fusi ia lau pelu i lou vae, o oe na le toa . . . O lou mamalu foi ia e tietie ai i le manu ma le manuia, ona o le upu moni, ma le agamalu, ma le amiotonu.” (Salamo 45:3, 4) I le faasino mai i o tatou aso, ua faapena foi ona valoia mai e le Tusi Paia: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”—Tanielu 2:44.

Ua saunia e le Salamo e 72 se uluai vaaiga matagofie o le tulaga o le a iai i lalo o le pulega faa-Mesia. Mo se faataʻitaʻiga ua faapea mai, “o lana nofoaiga e tupu olaola mai ai le ua amiotonu; e manuia tele ai seia leai se masina.” (Fuaiupu 7) O le a lē toe iai ni lutiaga po o faiga sauā. (Fuaiupu 14) E lē toe iai foi se tasi e fia ʻai, auā “e taumafa o saito i le nuu i tumutumu lava o mauga.” (Fuaiupu 16) Ma seʻi tau ina manatunatu! E mafai ona e olioli i nei faamanuiaga ma isi foi faamanuiaga i le parataiso faalelalolagi pe a suia lenei faiga o mea i le lalolagi fou na folafolaina mai e le Atua.—Luka 23:43; 2 Peteru 3:11-13; Faaaliga 21:1-5.

E mautinoa la, e aogā ona e sailiili i valoaga o le Tusi Paia. O lea, aiseā e te lē fesili ai i Molimau a Ieova mo nisi faamatalaga? O le suesueina o valoaga a le Tusi Paia o le a mafai ona fesoasoani ai ia te oe e te iloaina le taimi ua tatou ola ai. Atonu foi o le a oo ai i lou loto se talisapaia loloto mo Ieova le Atua ma ana fuafuaga ofoofogia mo le faamanuiaina e faavavau o i latou uma lava o ē alolofa ma usiusitai ia te ia.

[Ata i le itulau 5]

E te iloa ea le uiga o le faaaliga a Tanielu e aofia ai le ʻoti poʻa ma le mamoe poʻa?

[Ata i le itulau 7]

Pe o le ā e iai i inā e olioli i le faataunuuga o valoaga a le Tusi Paia e faatatau i le olaga fiafia i luga o le lalolagi parataiso?