Fesili Mai le Au Faitau

Po o le a toe faatutūina ea tagata pe afai latou te lē talia le Faa-Kerisiano moni i le taimi lenei ma maliliu a o leʻi oo i le amataga o le puapuaga tele?

E lelei mo i tatou uma lava ona tuu ese so o se uunaiga tatou te gaoioi ai e pei ni faamasino, i le iloaina faapea i le taimi e tatau ai, o le a faaoo mai ai e Ieova lana faamasinoga e auala ia Iesu Keriso. (Ioane 5:22; Galuega 10:42; 2 Timoteo 4:1) Peitai ua saunia e mau mai le Tusi Paia ni faamatalaga e fesoasoani i le taliina o le fesili e pei ona muai taʻua atu i luga.

O le talaʻiina o le tala lelei o le malo o le Atua i le lalolagi aoao o se vala tāua lea ‘o le faailoga o le faatasi mai o Iesu.’ Ua leva ona iloa lenei faailoga talu mai le amataga o lenei senituri. Ua iʻu le galuega talaʻi i le tuueseeseina o tagata o nuu uma e faataunuu ai le faataoto a Iesu e uiga i “mamoe” ma “ʻoti.” A faaiʻuina lenei galuega talaʻi ma le tuueseeseina o tagata, ona aumaia loa lea e le “puapuaga tele” le iʻuga o lenei faiga amioleaga o mea.—Mataio 24:3, 21, 22; 25:31-46.

O le a faamasinoina e Ieova faatasi ma lona Alo o Iesu po o iai se tasi na tetee i le feau o le Malo ma maliu a o leʻi pā mai le puapuaga tele ua faavasegaina o ni ʻoti. Na fetalai Iesu faapea o ʻoti o le a ō atu i “le sala e faavavau.” O lea, e mafai ai ona tatou faia se faaiʻuga faapea, o i latou ua faamautinoaina e le Atua o ni ʻoti, o le a lē toe faatutūina. E tutusa lava lo latou faasalaga ma le faasalaga o i latou e uia “le faasalaga faafaamasinoga o le fanoga e faavavau” i le taimi o le puapuaga tele.—2 Tesalonia 1:9.

Ae faapefea i latou o ē atonu e foliga mai sa lava so latou taimi e iloa lelei ai le feau o le Malo ina ia mafai ai ona faia se filifiliga poto e talia le upu moni pe teena foi a o leʻi maliliu i latou i nei “aso e gata ai”?—2 Timoteo 3:1.

O le toatele o ē maliliu a o agaʻigaʻi pea i luma le galuega talaʻi seia oo i le puapuaga tele e manino lava lo latou toe tutū. Ua faaalia lenei mea e ala i le manatu ua tatou faitau ai i le Faaaliga 6:7, 8 e uiga i tietiega a le au tietie solofanua faafaatusa. E toatele tagata e maliliu ona ua lavevea fua i taua, le lē lava o mea taumafa, ma ni mala e feoti ai. Ae talu ai o “Heitisi” o le nofoaga lea e ō i ai ē “maliliu” fua, o le a toe faatutūina mai ai i latou uma i le Pulega faa-Meleniuma a Keriso, pe a avaʻe e Heitisi ē uma na oti sa iai. (Faaaliga 20:13) O le toatele o i latou e toe faatutūina a’e i le ola atonu sa latou fesootai ma le feau o le Malo a o leʻi maliliu.

Maeu so tatou agaga faafetai ona ua lē tuuina e Iesu i tagata e faamasinoina po o ai ē pei o ni mamoe a o ai ē pei o ni ʻoti! E lē mafai e tagata lē lelei atoatoa ona faamasinoina ma le saʻo po o le ā le tele o le avanoa sa faalogo ai so o se tagata ma talia le tala lelei. Pe mafai ona tatou iloa le tulaga sa iai lona loto ma pe sa alofa moni ea o ia i le amiotonu? Pe mafai ona tatou fuaina le tele o lana tali mai atonu na aafia i lona aiga, lona talaaga faalelotu, po o isi aafiaga? O le mea moni e lē mafai. O lea, tatou te mautinoa, e mafai e Ieova le Atua ma Iesu Keriso ona faamasinoina na tulaga ma aumaia ni faaiʻuga e saʻo, e faamaoni ma e amiotonu.—Teuteronome 32:4; Isaia 11:1-5.

O lea, e leai se mafuaaga tatou te taumate ai fua po o ai o i latou faatoʻā maliliu atu o le a faatutūina, pe lē toe faatutūina.O se mataupu lenei e leʻi faatonuina i tatou e faia. (Faatusatusa i le Luka 12:13, 14.) O le mea la e sili atu ona poto mo i tatou, o le faatalitali lea i faaiʻuga a Faamasino amiotonu, o Ieova ma Iesu Keriso. O le a aumaia ai e lenei mea ia i tatou le tele o le filemu o le mafaufau o ni auauna a Ieova. O le a fesoasoani atili ai foi ia i tatou e matuā uaʻi atu i mea ua faatonuina ai i tatou e fai, o le ‘ō atu e fai nuu uma lava ma soʻo, ia aʻoaʻo ia te i latou ia tausi i mea uma na poloai mai ai Iesu.’—Mataio 28:19, 20.

[Ē Ana le Ata i le itulau 31]

Leicester sheep, Meyers