“Ina Aami atu ia i Toeaina”

“Ua maʻi ea so outou? ina aami atu ia i toeaina o le ekalesia.”—IAKOPO 5:14.

1, 2. (a) O le ā le tulaga sili ona mataʻutia ua iai auauna a Ieova i aso nei, ma atonu o ā o latou lagona o iai? (e) O ā fesili ua manaomia nei ona taliina?

UA OO mai “aso faigata.” Ua gaoioi ma le manatu faapito tagata, e matapeapea i mea faitino, e faamaualuluga, ma faatupuina le vevesi i nei “aso e gata ai.” (2 Timoteo 3:1-5) Ona o ni Kerisiano o loo ola i lenei faiga o mea amioleaga, ua faamataʻuina ai i tatou i ni lamatiaga sili se tolu: O Satani le Tiapolo, le lalolagi o tagata faalemataʻu, ma o tatou lava faanaunauga agasala na tuufaasolo mai.—Roma 5:12; 1 Peteru 5:8; 1 Ioane 5:19.

² Ona o le faamataʻuina i nei lamatiaga, tatou te lagona ai i nisi taimi le popole naʻuā. O fea la e mafai ona tatou maua ai se lagolagosua e fesoasoani ia i tatou ina ia tutumau ai ma le faamaoni? O ai e mafai ona tatou liliu atu i ai mo se taʻiala pe a fesagaʻi ma ni filifiliga e faatatau i a tatou galuega faa-Kerisiano ma la tatou tapuaiga?

O loo Iai se Fesoasoani

3. O ai e mafai ona tatou maua mai ai se faamautinoaga faamafanafana loto, ma e faapefea?

³ O le iloa faapea o Ieova o le Puna o lo tatou malosi, ua aumaia ai ia i tatou se faamautinoaga faamafanafana loto. (2 Korinito 1:3, 4; Filipi 4:13) Na faalauiloa mai e le faisalamo o Tavita, o lē na tofo i le fesoasoani a le Atua e faapea: “Ia e tuuina atu lou ala ia Ieova, ma  faatuatua ia te ia, ona faia lava lea e ia.” “Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia [“tautevateva,” NW].” (Salamo 37:5; 55:22) Maeu so tatou loto faafetai ona o lena lagolagosua!

4. Ua faapefea ona ofoina mai e Peteru ma Paulo ni faamafanafanaga?

⁴ E mafai foi ona tatou maua le faamafanafanaga i le iloa faapea e lē o tuulafoaiina i tatou a o fetaiai ma tofotofoga ma lamatiaga. Na uunaia e le aposetolo o Peteru uso Kerisiano: “Ia outou tetee atu ia [Satani le Tiapolo], ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi.” (1 Peteru 5:9) E mautinoa, e faanaunau Kerisiano uma ina ia tumau mausalī i le faatuatua. E moni, e masani ona tatou lagona le “puapuagatia . . . i mea uma,” e pei foi ona sa iai i le aposetolo o Paulo. Peitai, sa “le faaatuatuvaleina” ai o ia. I lo tatou pei o ia, atonu tatou te fememeai “a e le matuā fememeai.” E tusa lava pe sauāina i tatou, ae ua “le tuulafoaiina” i tatou. Afai e “lafotuina i lalo,” ae “le fano” ai i tatou.” O le mea lea, tatou “te le faavaivai ai.” Tatou te tauivi ina ia “le manatunatu i mea ua vaaia, a o mea e le vaaia.” (2 Korinito 4:8, 9, 16, 18) E mafai faapefea ona tatou faia lenei mea?

5. O le ā le fesoasoani vala tolu ua saunia e Ieova?

⁵ Ua saunia e Ieova, o le “faafofoga tatalo,” se fesoasoani e vala tolu. (Salamo 65:2; 1 Ioane 5:14) Muamua, ua ia ofoina mai taʻiala e ala i lana Afioga faagaeeina, le Tusi Paia. (Salamo 119:105; 2 Timoteo 3:16) Lona lua, o lona agaga paia ua aumaia ai ia i tatou le malosi e faia lona finagalo. (Faatusatusa i le Galuega 4:29-31.) Ma lona tolu, ua sauniuni pea le faalapotopotoga faalelalolagi a Ieova e fesoasoani mai ia i tatou. O le ā e ao ona tatou faia ina ia mauaina ai le fesoasoani?

“Mea Alofa i Tagata”

6. O le ā le fesoasoani na saunia e Ieova i Tapara, ma na faapefea ona faia?

⁶ O se mea na tupu i aso o le perofeta o Mose, e fesoasoani lea ia i tatou e talisapaia le manatu alofa mai o Ieova i le sauniunia o fesoasoani mo Ana auauna. Na tupu lea mea i Tapara, o lona uiga, “o se afi ua mumū saesae; ua matuā talalī aʻe; ma sasao malosi.” I lenei nofoaga i le vaomatua o Sinai, na faapogaia ai e le Atua se afi e sasao atu i tagata Isaraelu sa faitio. O “le vao tagata ese” na aufaatasi atu i tagata Isaraelu ina ua ō ese mai Aikupito, sa auai ma i latou i le taʻuina atu o lo latou lē faamalieina i meaʻai na saunia e le Atua. Ina ua ia iloa le toʻasa o le Atua, ma lona fiu i lana avega tauave o le vaaia o tagata ma o latou manaoga, na alaga atu ai Mose: “Ou te le lavā lava e aʻu e toatasi ona ave i le avega o lenei nuu uma, auā e mafatia ai aʻu. Afai foi e te fai faapea ia te au, ou te aioi lava, afai ua alofagia aʻu e oe, ia e fasioti lava ia te au, a e aua ou te iloa loʻu puapuaga.” (Numera 11:1-15) O le ā le tali a Ieova? Na ia tofia “tagata o toafitugafulu, o toeaina o Isaraelu” ma foaiina atu i ai lona agaga ia i latou, ina ia latou tofu sao ai ma le talafeagai ma Mose, i le galuega o le puleaina o le nuu. (Numera 11:16, 17, 24, 25) Ina ua tofiaina na tane agavaa, sa faateleina ai le fesoasoani na maua e tagata Isaraelu ma “tagata ese e toatele.”—Esoto 12:38.

7, 8. (a) Na faapefea ona saunia e Ieova “mea alofa mo tagata” i Isaraelu anamua? (e) O le ā le faatatauga o le Salamo 68:18 na faia e Paulo i le uluai senituri?

⁷ Ina ua mavae tausaga e tele o iai le fanauga a Isaraelu i le Nuu o le Folafolaga, na afio faafaatusa aʻe ai Ieova i le Mauga o Siona ma fai Ierusalema ma aai laumua o se malo faafaatusa, ma avea ai Tavita ma ona tupu. I le viiaina o le Atua, “o Le e ona le malosi uma lava,” na alaga ai Tavita e pese atu: “Na e afio ae i le mea maualuga, na e taʻitaʻi faatagataotaua i le tafeaga; na e maua mea alofa mo tagata.” (Salamo 68:14, 18) Ioe, o tane sa ave faatagataotauaina i le taimi na fāoa ai le Nuu o le Folafolaga, sa avanoa e fesoasoani atu i tagata sa Levī i o latou tiute.—Esera 8:20.

⁸ I le uluai senituri T.A., na tataʻi atu ai e le aposetolo Kerisiano o Paulo manatu i le faataunuuga faavaloaga o upu a le faisalamo. Na tusia e Paulo e faapea: “A ua au mai ia te i tatou taitoatasi o le alofa tunoa, e faatatauina  ma le mea foaifuaina mai e Keriso. O le mea lea ua fetalai mai ai o ia, Na afio ae o ia i luga, ma na taʻitaʻi faatagataotaua i le tafeaga; ua na foaiina foi mea alofa i tagata. Ia, o le upu lea, Na ia afio ae, se a lona uiga, pe afai e le o lea, ua muai ona afio ifo o ia i mea maulalo i le lalolagi? O le na afio ifo, o ia lava lea na afio ae i luga o lagi uma lava, ina ia faatumuina e ia o mea uma lava.” (Efeso 4:7-10) O ai “ia lava”? E leai lava se isi na i lo o le sui o Ieova, le Tavita Sili ma o le Tupu Faa-Mesia, o Iesu Keriso. O ia lea na faatūina aʻe e le Atua ma faaeaina i ‘se tofiga sili ona maualuga.’—Filipi 2:5-11.

9. (a) O ai sa avea ma meaalofa i tagata i le uluai senituri? (e) O ai ua avea ma meaalofa i tagata i ona po nei?

⁹ O ai la nei “mea alofa i tagata” (po o, “loo faia aʻe i tagata”)? Ua faamatala mai e Paulo faapea na tuuina atu e le Sui Sili a le Atua “nisi e fai ma aposetolo, o isi foi e fai ma perofeta, o isi foi e folafola le tala lelei, o isi foi e fai ma leoleo atoa ma aʻoaʻo; ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso.” (Efeso 4:11, 12) O soʻo uma lava o Keriso o ē na auauna o ni aposetolo, o ni perofeta, o ni faievagelia, o ni leoleo mamoe, ma o ni aʻoaʻo, sa latou faia uma lava e ala i le taʻitaʻiga faatiokarate. (Luka 6:12-16; Galuega 8:12; 11:27, 28; 15:22; 1 Peteru 5:1-3) I o tatou aso, ua tofia ai e le agaga paia tane matutua ua agavaa faaleagaga e auauna o ni ovasia i ni faapotopotoga e 70,000 o Molimau a Ieova i le lalolagi aoao. O i latou nā o a tatou meaalofa i tagata. (Galuega 20:28) Talu ai le faatuputupulaia pea o le faateleina o le galuega talaʻi o le Malo i le lalolagi aoao, ua toatele ai pea uso o loo ‘aapa atu’ ma soosoo tauʻau i avega tauave e faia i le ‘faiva o le ovasia.’ (1 Timoteo 3:1) Ona ua tofia, ua avea ai foi i latou ma meaalofa i tagata.

10. Ua faapefea i le faamatalaga a Isaia e faatatau i ‘aloalii,’ ona fetaui i le matafaioi a toeaina Kerisiano i aso nei?

¹⁰ O nei toeaina Kerisiano, po o meaalofa i tagata, ua fetaui tonu i ai le faamatalaga a le perofeta o Isaia ina ua ia valoiaina le matafaioi a ‘aloalii,’ o ē pule i lalo o le pulega a le Malo. E tatau i nei aloalii taitoatasi ona “pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.” (Isaia 32:1, 2) Ua faaalia ai i lenei mea le lagolagosua e tatau ona iai i le vaavaaiga alofa a nei tane tofia. E mafai faapefea ona matuā aogā atoatoa ia te oe lenei sauniuniga?

Ia Taulamua

11. Pe a vaivai faaleagaga, e mafai faapefea ona tatou maua se fesoasoani?

¹¹ Ua matuā alaga mai mo se fesoasoani se tagata ua tau malemo. E leai se faatautū. Pe afai foi la ua sili ona lamatia le ola, e leai se tasi e manao i se isi e faamalosia lona valaau atu mo se fesoasoani. Pe sa leʻi alaga soo atu ea le tupu o Tavita mo se fesoasoani mai ia Ieova? (Salamo 3:4; 4:1; 5:1-3; 17:1, 6; 34:6, 17-19; 39:12) Pe a vaivai le itu faaleagaga, atonu ua oo ifo i le loto mafatia, e faapea foi ona tatou liliu atu ia Ieova i le tatalo ma saili atu ia te ia ina ia taʻitaʻia i tatou e lona agaga paia. (Salamo 55:22; Filipi 4:6, 7) Tatou te saili i le Tusi Paia mo se faamafanafana loto. (Roma 15:4) Tatou te suʻe i lomiga faa-Kerisiano a le Sosaiete o le Olo Matamata mo fautuaga aogā. O lenei tulaga ua mafai ai pea ona tatou foia o tatou lava faafitauli. Peitai afai e foliga mai ua lofia i tatou i ni toʻatugā, e mafai foi ona tatou saili atu mo se fautuaga a toeaina tofia o le faapotopotoga. O le mea moni, e iai ni taimi tatou te manaomia moni ai lava ona “aami atu . . . i toeaina.” Aiseā e aami atu ai i toeaina Kerisiano? E mafai faapefea ona latou fesoasoani ia i latou o loo iai se manaoga mo se fesoasoani faaleagaga?

12-14. (a) O le ā le ala atamai ia mulimuli ai pe a maʻi se tasi? (e) E tusa ai ma le Iakopo 5:14, o le ā ua fautuaina Kerisiano ‘mamaʻi’ ina ia faia? (i) O le ā le ituaiga o maʻi o loo faasino i ai le Iakopo 5:14, ma aiseā ua e tali mai ai faapea?

¹² Pe a tatou mamaʻi, tatou te malōlō ina ia mafai ai ona toe maua e le tino le malosi e gaoioi ai. Ae afai e faaauau pea ona tatou mamaʻi, ua atamai loa ona tatou saili i se fesoasoani  faafomaʻi e agavaa. Pe ua lē o le tulaga ea foi lena e ao ona tatou faia pe a tatou vaivai faaleagaga?

¹³ Seʻi mātau le fautuaga a le soʻo o Iakopo ia i tatou e tusa ai ma lenei itu. Ua ia faapea mai: “Ua maʻi ea so outou? ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suāuu i le suafa o le Alii [“Ieova,” NW].” (Iakopo 5:14) O le ā le ituaiga o maʻi lea e faasino i ai Iakopo? Ua manatu nisi tagata faamatala upu o le Tusi Paia faapea o le maʻi faaletino, ona o le mafuaaga, sa taatele le faaaogāina o le suāuu i togafitiga faafomaʻi i na aso. (Luka 10:34) Latou te talitonu foi sa mafaufauina e Iakopo le faamalōlōina faavavega e ala i le meaalofa o le faamalōlōga. Peitai, o le ā o loo faamaonia mai i le aotelega o le mataupu?

¹⁴ E tuufaafeagai le “fiafia” ma le “tigaina.” E faamaonia ai la sa talanoaina e Iakopo le maʻi faaleagaga. (Iakopo 5:13) Sa tatau ona aami atu i “toeaina [“tane matutua,” King James Version] o le ekalesia,” ae lē o fomaʻi po o i latou sa iai le meaalofa faavavega o le faamalōlōga. Ma o le ā sa tatau ona latou faia? Na faapea mai Iakopo: “Ia latou tatalo mo ia. . . . O le tatalo foi e faia i le faatuatua e faaolaina ai le maʻi.” (Iakopo 5:14, 15; faatusatusa i le Salamo 119:9-16.) O le faamaoniga faaiʻu lava e iloa ai o loo faasino atu Iakopo i le maʻi faaleagaga, o le mea moni o lona faalaeiauina lea o le taʻutino o agasala ma le faamoemoe e faamalōlōina ai. Ua ia tusi mai faapea: “Ia fefaaaliai a outou agasala, ma tatalo le tasi mo le tasi, ina ia faamaloloina outou.” Afai o se agasala matuiā ua faapogaia ai se maʻi faaleagaga, e ono faatalitalia la le tagata maʻi e faatoʻā malosi lava pe afai na te talisapaia le timaʻiga ua faavae i le Afioga a le Atua, ia salamō, ma liliu ese mai lona ala agasala.—Iakopo 5:16; Galuega 3:19.

15. O le ā le ituaiga o gaoioiga ua taʻu mai i le Iakopo 5:13, 14 e ao ona faia?

¹⁵ E iai foi se isi mea e ao ona mātauina mai le fautuaga a Iakopo. Pe a mafatia se Kerisiano i ni mea leaga, e ao ona ia “tatalo” pea. Afai o iai o ia i se tulaga fiafia, “ina pese ia.” I tulaga uma lava—pe mafatia se tasi pe fiafia—e manaomia ni gaoioiga. I le tasi itu e manaomia ai le tatalo, ae i le isi itu o se alaga fiafia. O le ā la tatou te faatalitalia ina ua fesili mai Iakopo: “Ua maʻi ea so outou?” Ua ia toe fautuaina foi le faia o ni gaoioiga mautinoa, ioe, ia taulamua e gaoioi. “Ina aami atu ia i toeaina o le ekalesia.”—Salamo 50:15; Efeso 5:19; Kolose 3:16.

Le Auala e Fesoasoani ai “Toeaina”

16, 17. E faapefea ona fesoasoani toeaina ia i tatou ina ia faaaogāina mataupu silisili o le Tusi Paia?

¹⁶ E faigata foi ia i tatou i nisi taimi ona iloa  le auala e faatatauina ai mataupu silisili a le Tusi Paia i o tatou tulaga totino. O i inā la e faamaonia ai le avea o toeaina Kerisiano ma puna aogā o fesoasoani. Mo se faataʻitaʻiga, latou te tatalo mo se tagata ua maʻi faaleagaga ma ‘faauuina o ia i se suāuu i le suafa o Ieova’ e ala i le faatatauina ma le tomai o faatonuga mālū mai le Afioga a le Atua. Ona mafai ai lea e toeaina ona fai so latou sao tele i lo tatou toe malolosi faaleagaga. (Salamo 141:5) E masani lava, na pau le mea tatou te manaomia o se faamautinoaga, po o tatou faia mea i se tulaga saʻo. O le talanoaina la o mataupu ma se toeaina Kerisiano ua lava lona tomai o le a faamalosia ai lo tatou maumauai e faia le mea ua saʻo.—Faataoto 27:17.

¹⁷ Pe a asiasi atu toeaina Kerisiano, e manaomia ona latou “faamafanafana i e loto iti.” E faapena foi ona latou “fesoasoani i e o vaivai, [ma] ia . . . onosai i tagata uma lava.” (1 Tesalonia 5:14) O lena faiā mafana ma le femalamalamaai i le va o “toeaina” ma “e o vaivai” o le a faatelevaveina ai le toe faamalōlōina atoatoa mo le soifua malōlōina faaleagaga.

Avega Tauave Totino ma le Tatalo

18, 19. O le ā le matafaioi ua faia e toeaina Kerisiano e tusa ai ma le Kalatia 6:2, 5?

¹⁸ E ao i toeaina Kerisiano ona soosoo tauʻau i la latou avega tauave i le lafu mamoe a le Atua. E tatau ona latou lagolagosua. Mo se faataʻitaʻiga, na faapea mai Paulo: “Le au uso e, afai e maua se tagata i se tasi agasala, o outou o i la le Agaga ia outou faafoi mai le ua faapeaina ma le loto o le agamalu, ma ia faaeteete oe ina neʻi faaosoosoina foi oe. Ia outou fesui i a outou avega e ave, ma ia faapea ona outou faia le tulafono a Keriso.” Na tusi foi le aposetolo e faapea: “E taitasi ma ave i lana lava avega.”—Kalatia 6:1, 2, 5.

¹⁹ E mafai faapefea ona tatou faafesuiai i a tatou avega ae o loo tauaveina foi a tatou lava avega totino? E mafai ona maua le tali i le eseesega o uiga o upu faa-Eleni ua faaliliuina i le “avega,” i le fuaiupu e lua ma lea e iai i le fuaiupu e lima. Afai e fetaiai se Kerisiano ma se toʻatugā faaleagaga ua avea o se avega mamafa ia te ia, o le a fesoasoani la i ai toeaina ma isi uso talitonu, ina ia mafai ona ia amoina ana “avega.” Peitai, ua faatalitalia le tagata lava ia ina ia tauave lana lava “avega” o tiute tauave i le Atua. * E tauaveina ma le fiafia e toeaina ‘avega mamafa’ a o latou uso e ala i faalaeiauga, i fautuaga faale-Tusi Paia, ma tatalo. Peitai, e lē aveesea e toeaina a tatou lava “avega” totino o tiute tauave faaleagaga.—Roma 15:1.

20. Aiseā e lē tatau ai ona tuulafoaia le tatalo?

²⁰ E matuā manaomia le tatalo ma e lē tatau ona tuulafoaia. Ae ua matuā faigata i le toatele o Kerisiano o loo mamaʻi faaleagaga ona tatalo. Pe a faia e toeaina ni tatalo o le faatuatua e talosia ai lē o loo maʻi faaleagaga, o le ā le faanaunauga o loo iai? “E faatuina foi o ia e le Alii [“Ieova,” NW],” e pei ua aveesea mai i se faalogona o le matuā mafatia, ma o le a faamalosia o ia ina ia tulituliloa le ala o le upu moni ma le amiotonu. O se Kerisiano e maʻi faaleagaga atonu ua ia te ia se manatu sese ae na te leʻi faia se agasala matuiā, auā ua faapea mai Iakopo: “Afai foi ua agasala, e faamagaloina ia.” O fautuaga faale-Tusi Paia a toeaina e avatu faatasi ma se tatalo faatauanau, e matuā uunaia ai i nisi taimi le tagata ua vaivai faaleagaga ina ia taʻutino ni agasala matuiā atonu  ua ia faia ma ia faaalia atu lona agaga salamō. O le iʻuga, o le a maua ai le faamagaloga mai le Atua.—Iakopo 5:15, 16.

21. (a) Aiseā ua mumusu ai nisi Kerisiano e aami atu i toeaina? (e) O le ā o le a talanoaina i le mataupu o sosoo mai?

²¹ I le fesagaʻi ma le luʻi o le tausia o le anoanoai o ē fou o loo gasolosolo mai i le faapotopotoga Kerisiano, ua matuā tele ai galuega e faia e toeaina mataala, ina ia lava ma totoe le vaavaaiga e saunia. E moni, o nei meaalofa i tagata o se sauniuniga matagofie lea mai ia Ieova ina ia fesoasoani ia i tatou e onosai i nei aso faigata. Peitai, e mumusu nisi Kerisiano e saili atu i la latou fesoasoani, ona o le manatu faapea o nei uso o loo tele a latou galuega e fai po o loo matuā mafatia i faafitauli. O le a fesoasoani ia i tatou le mataupu o sosoo mai ina ia talisapaia ai faapea o loo fiafia nei tane e fesoasoani mai, auā o loo latou loto malilie e auauna o ni leoleo mamoe lagolago i le faapotopotoga Kerisiano.

[Faaopoopoga i lalo]

O le a Faapefea ona E Tali?

□ Pe a tatou manaomia se fesoasoani, o le ā le fesoasoani vala tolu ua saunia mai e Ieova?

□ O ai i aso nei ua avea ma meaalofa i tagata?

□ O le ā le taimi e ao ai ona tatou aami atu i toeaina?

□ O le ā le fesoasoani e mafai ona tatou faatalitalia mai toeaina Kerisiano?

[Fesili mo le Suʻesuʻega]

[Ata i le itulau 15]

Po o e olioli i aogā faaleagaga o tatalo, o suesuega faale-Tusi Paia, ma fesoasoani mai toeaina Kerisiano?