Le Sailiga mo Valoaga Maufaatuatuaina

“O IA lē e mafai ona muai iloaina ni mea o le a tutupu i aso e tolu o loo lumanai, o le a mauoa o ia mo le faitau afe o tausaga.” O se muāgagana lena faa-Saina.

E fia iloa e tagata po o le ā le mea o le a tupu i le lumanai, ma o le toatele lava o le a olioli e totogi atu se tau tele mo na ituaiga o faamatalaga maufaatuatuaina. Ua latou saili mo ni valoaga maufaatuatuaina. E pei ona faaalia mai i tala o le tau ma tala e uiga i tupe, o loo tatou naunau e fia iloa mea o le a tutupu i le lumanai. E lē gata i lena, o le poto maufaatuatuaina mo le lumanai o le a mafai ai ona tatou faatulagaina o tatou olaga.

Ona o se naunau e fia iloa le mea o le a tupu i le lumanai, ua uunaia ai le toatele e fesili atu i tagata vavalo o ē e mafai ona taʻu maia mea o le a tutupu i le lumanai, o ē taʻitaʻi i faiga faaagaga, tagata e saili i fetu, ma fomaʻi faataulaitu. Ua faatumulia faletusi ma fata o mekasini i tusitusiga o aso anamua ma aso nei a i latou o ē ua faapea mai, e mafai ona latou taʻuina mai mea o le a tutupu i le lumanai. Peitai e masalomia tele nei ituaiga o valovaloga. Na lipotia mai se faamatalaga a se tagata e fai ma fofoga o le malo o Roma o Cato e faapea: ‘Ou te ofo ona o le lē ʻata o le isi tagata fai valovaloga i le isi tagata fai valovaloga i so o se taimi la te fevāaiai ai.’

O le mea moni, o loo iai le tele o ituaiga o valoaga. I le 1972, na lomia ai e se vaega faavaomalo o ē iloiloina talaaga o tagata faatasi ma le au faipisinisi e taʻua o le Kalapu a Roma, se faamatalaga e valoiaina ai e faapea, ua lē o toe umi ae uma le tulaga tau tamāoaiga o le lalolagi. O le a lē toe iai se auro i le 1981, o le mercury i le 1985, o le zinc i le 1990, o le suāuu i le 1992, ma isi lava mea faapena. Ua tatou iloaina nei le lē moni o na valoaga.

O le tele o valoaga e faavae aʻe i manatu faalelotu. Mo se faataʻitaʻiga: Na talitonu le epikopo o Saxon Wulfstan e faapea, o le osofaiga o Egelani e Tenemaka i le tau amataga o lona 11 o senituri, o se faailoga lena e iloa ai ua latalata mai le iʻuga o le lalolagi. I le 1525, na taʻitaʻia ai e Thomas Münzer se fouvalega a tagata i le vaomatua i Siamani talu ai ona na ia vaaia se faaaliga e faapea, o loo faamata e agelu a latou selesaito mo le mea na ia manatu i ai o se seleselega tele. Ma le manino la, o nei valoaga uma e lē saʻo.

 E pei ona e iloa, o loo tusia valoaga i le Tusi Paia. E lē gata i lea, e taofi tusitala o le Tusi Paia faapea sa faagaeeina i latou e le Atua. Fai mai le aposetolo Kerisiano o Peteru: “Ua leai se valoaga o i le Tusi e faamatalafuaina. Auā e le o le loto o tagata na tuu mai ai le valoaga anamua, a o tagata paia o le Atua na talatalaina mai ina ua osofia mai e le Agaga Paia.”—2 Peteru 1:20, 21.

Faatasi ai ma isi mea, na uluai taʻu mai e le Tusi Paia le tele o mea e tutupu e iloa ai le tupulaga o le a malamalama i le faatasi mai o Iesu Keriso i le mana o le Malo faalelagi. O le faateleina o taua, o oge, o mafuie, ma le paʻū maulalo o le mamā tauamio, o le faailoaga lena o le mea ua faamatalaina mai e le Tusi Paia o “aso e gata ai.” (2 Timoteo 3:1-5; Mataio 24:3-14, 34) E tusa ai ma le Tusi Paia, o le aveeseina o lenei faiga o mea, o le a faaāva ai le ala mo le fiafiaga o tagata i faamanuiaga e lē uma i le lalolagi fou.—2 Peteru 3:13; Faaaliga 21:1-4.

O le ā lau vaaiga i na valoaga o le Tusi Paia? Pe e pei ea o le tele o isi valoaga, po ua na o ni taumatematega? E mafai ona tatou tofotofoina le moni o valoaga o le Tusi Paia e leʻi faataunuuina e ala i le iloiloina o valoaga o le Tusi Paia e uiga i mea ua uma ona tutupu pe sa maufaatuatuaina. O le a tatou iloiloina nisi o na valoaga i le mataupu o loo sosoo ai.

[Ē Ana le Ata i le itulau 3]

Courtesy National Weather Service