Mauaina o Oa Moni i Hong Kong

O HONG KONG o se nofoaga e mafai ona maua mai ai tupe e tele i sina taimi puupuu—pe afai e fetaui lelei tulaga uma. I le tusa ma le 40 tausaga ua mavae, na tupu aʻe ai lena kolone o Peretania mai se taulaga e tau leai ni galuega, e avea ma malo tamaoaiga e sili ona tāua, e lē gata i Asia i Saute Sasae, ae faapena foi i le vaaiga tau pisinisi i le lalolagi aoao.

O le paʻū maulalo o lafoga na tosina ane ai tagata fai pisinisi mai fafo, ma saunia ai se faamalosiauga mo tagata faigaluega mamafa na maua i le ono miliona o ē o loo nonofo i Hong Kong. E lelei foi le mea e tū ai lenei kolone e fai ma auala i le va o Saina i saute ma se vaega o le Pasefika i Asia ma ona tala atu. Ona o ala tau femalagaaiga ma fesootaiga faaonaponei atoa ma faleoloa ua lelei ona atiina aʻe i oloa siiatoa, ua sauni ai Hong Kong e tali vave atu i manaoga o fefaatauaiga faavaomalo.

Ua avea Hong Kong o se tasi o atunuu e sili ona maualuga le tulaga o le soifuaga i le lalolagi ona o le faamanuiaina i tulaga tau tamaoaiga. Ae peitai, po o aumaia ai ea e nei oa faaletino le faamalieina ma se fiafiaga tumau i ē o nonofo i Hong Kong? E leai, ae ua sailiili atu pea nisi ma ua mauaina ai se ituaiga o oa e sili atu ona lelei.

Na Latou Maua Oa Faaleagaga

O Alfred, o lē na fanau i Hong Kong o ia o se tasi o i latou o ē na mauaina oa faaleagaga e lē mafaatauina. Na faamanuiaina lana galuega o le avea ma faatonu i se pisinisi faavaomalo e fesootai ma le vaega e faauluulu i ai i Peretania. I le pei o le toatele o isi tagata i Hong Kong, o lona sini i le olaga o le fia mauaina lea o ni tupe se tele, ia iai sona lava fale, ia ʻai lelei, ma ia ola i se olaga lelei. Ona o lona tulaga ma le tele o tupe na ia maua, na foliga mai ai ua ia mauaina uma na mea. Ae pe sa fiafia ai o ia? Na tali mai Alfred ma le faanoanoa: “Sa ou aʻoaʻoina e ala i mea na tutupu e faapea, o tupe e iai ona tapulaa.” Sa popole pea lava o ia e uiga i le po o le ā le umi o le a faaaogā ai ana tupe teu pe afai e uma lana galuega. Ina ua faateleina lona taimi e tuutoina atu i lana galuega, sa amata ai loa ona mapuna aʻe faafitauli i totonu o lona aiga. Sa faanoanoa lana avā o Emily ina ua oti faafuaseʻi le la tama tama. Na faapea mai o ia: “Sa ou fia iloa po o fea na iai o ia ina ia ou faia se mea e fesoasoani atu ai ia te ia.” Talu ai sa leai se mea na te mafaia, na matuā mafatia tele ai lona loto.

A o laitiiti lava Justina sa maliu ai lona tamā. Ae ona o lona toʻaga i le aʻoga, na faauuina ai o ia mai se Iunivesite taʻutaʻua i Hong Kong. Ma na maua ai sana galuega lelei i le malo. E taʻua lea i le gagana Cantonese o le gum fan woon, o se pesini auro o araisa—ua puipuia le galuega ma e lelei foi le totogi. Peitai, sa leʻi fiafia ma e leʻi faamalieina ai foi Justina. Sa masani pea ona manatunatu o ia po o le ā le faamoemoe mo le ola ma po o le ā e tupu i le lumanai. Sa faapena foi ona manatu lana tane o Francis, e leai se faamoemoe o le olaga. Sa ia te ia le lagona e faapea, ua pei o ia o sina vaega itiiti e lē tāua i totonu o se masini telē, o se tagata faatauvaa ua lavelavea i se faasologa e lē uma.

E faapena foi Ricky, o le pule o se pisinisi. E ui lava sa tele ana tupe na maua, peitai sa amata  ona ia vaai i le isi itu o le olaga—i tauvaga soonafai i le va o tagata faigaluega ma faafitauli i lana faaipoipoga. Sa lē mafai e tupe ona fesoasoani ia te ia ina ia foia nei faafitauli. E tusa ai ma le mafaufau o lana avā o Wendy, o se galuega e faaaloalogia, e tele tupe, ma ola i se sosaiete mautū faapolotiki o lona uiga ua malu puipuia ai. Peitai o le ā le umi na tumau ai lona olaga na foliga mai e malu puipuia? Na avea lena o se faafitauli ia te ia talu ai o le iai moni o le oti na oo ai ia te ia se faalogona e faapea, e leai se uiga ma e leai foi se faamoemoe o lona olaga.

E iai se tala a Tavita e fia taʻu atu. O le aʻoaʻoina o ia i le iunivesite na ia maua ai se galuega lelei ma le malu puipuia tau tamaoaiga, peitai sa lē faamalieina ai o ia. Aiseā? Sa matuā loloto lona aʻoaʻoina i le faaevolusione ma le faafilosofia, ma na ia talitonu ai faapea, e na o le pau lava lenei o le olaga. Sa manatu Tavita ua leai se isi mea e toe faamoemoe i ai i le lumanai, ma sa lē mafai e lona tamaoaiga ona taofia o ia mai le lagona o le lē mafesoasoania.

E ui ina eseese talaaga o nei tagata, ae e iai le mea e tasi sa tutusa ai i latou uma. Sa maua e i latou uma lava le mea sa latou manatu e aumaia ai se olaga fiafia ma le loto malie. Ae peitai, ina ua latou ausia le mea na latou manatu o le a faataunuuina ai a latou miti, sa matuā leai se aogā i o latou olaga.

Ia Mauoa i la le Atua

O le tulaga o Alfred, o Justina, ma isi ia na faatoʻā taʻua, sa pei lava o le tagata mauoa i le faataoto a Iesu. Ua ia ‘faaputu oa mo ia lava ae lē mauoa i la le Atua.’ (Luka 12:21) E ui i lea, ma le fiafia lava, na latou mauaina se isi mea e sili atu ona lelei—se olaga e tumu i oa moni. O i latou uma lava o ē naunau i le fiafiaga moni ma le faamalieina moni e tatau ona “aua foi le faatuatua i le oloa e faaletumau, a o le Atua soifua, o loo foai tele mai ia i tatou mea uma lava e faafiafia ai.” (1 Timoteo 6:17) Ioe, o le iloaina o le Atua moni o Ieova, ma faatuatua ia te ia ua faia ai se eseesega i olaga o i latou ia taitoatasi sa taʻua. Seʻi o tatou vaai pe na faapefea ona tutupu o nei suiga uma.

Sa leai se faamoemoe o Alfred ma Emily ina ua faafuaseʻi ona oti le la tama, ma sa lē mafai e a la oa faaletino ona aveesea lo la tigā. Na la ō i le lotu peitai sa tumau pea ona leai se faamoemoe ma lē faamalieina ai. Peitai na asiasi atu se tasi o Molimau a Ieova i lo la fale ma fesili atu i ai: “O le ā le faamoemoe o tagata mo le lumanai?” Na tali atu Alfred e tusa ai ma mea na la aʻoaʻoina mai le lotu e uiga i le lagi ma hele. Peitai, sa faasino atu ia te ia mai le Tusi Paia e faapea, o ē ua oti ua “le iloa se mea” ma o i latou o i tuugamau taatele o tagata o loo manatuaina e le Atua o le a toe faatutūina mai. (Failauga 9:5, 10; Ioane 5:28, 29) Na moni ma maufaatuatuaina lea faamatalaga i le faalogo a Alfred. Sa ia iloaina ai e lē o faatigainaina lona atalii i se mea ae o loo moe i le oti, faatasi ai ma le faamoemoe o le toe faatasi ma lona aiga e ala i le toetu. Maeu se faamafanafanaga ma se mapusaga! Na talia e Alfred ma lana avā se suesuega faale-Tusi Paia i le aiga ma amata ai loa ona  agaʻi atu i le auala e taofimau ai i oa moni ua ofoina mai e le Tusi Paia.

Sa lē mautonu Justina ina ua ia lē mauaina mai i ē latou te faigaluega faatasi, se agaga o le loto fesoasoani mo le tausiga o tagata. O ia o se tagata Katoliko aʻiaʻi, na faateʻia o ia ina ua ia iloaina e ulaula le patele ma alu i siva, e pei lava o isi tagata. Ona ia fesootai loa lea ma Molimau a Ieova ma amata ai ona ia maua tali faamalieloto mai le Tusi Paia mo le tele o fesili. E leai se mea na ia maua mai le patele na o ona lava manatu totino, ma na te leʻi tatalaina lava se Tusi Paia mo le 16 tausaga, e ui lava o ia o se tasi e auai pea lava pea i le lotu ma sa faigaluega ai foi mo le 10 tausaga.

A o suesueina e Justina ma lana tane o Francis le Tusi Paia ma Molimau a Ieova, sa maofa lana tane ona o lo latou autasi i le lalolagi aoao i le talitonuga ma gaoioiga. Na talitonu Francis e iai moni lava le Atua. Ina ua mavae ona latou suesueina mea uma, sa iloa ai e na o le Atua soifua moni lava na te mafaia ona aumaia sea suiga i so o se vaega o tagata i atunuu uma. Maeu le fiafia ua iai i lenei ulugalii faaipoipo ina ua la mauaina oa moni!

Na iloa e Ricky ma Wendy e faapea, e tatau ona la faia se mea ina ua la vaaia ua amata ona fesouaina i laua i faafitauli totino matuiā. Talu ai ona o i laua uma na fetaui ma Molimau a Ieova i le taimi ua teʻa, o lea na la tau fai sailia uma ai i latou. E ala i taumafaiga naunautai, na maua ai e Ricky ma Wendy e lē gata o ni vaifofo moni lava mo o la faafitauli, ae ua la maua ai foi oa moni i se faiā totino ma le ‘Atua fiafia,’ o Ieova.—1 Timoteo 1:11.

Na suia foi le olaga o Tavita ina ua asiasi atu Molimau a Ieova ia te ia. Ona o le faanaunauga e fia faaaliali atu i ai o latou sese, na ioe ai o ia e toe foi atu i latou. Ae peitai, na ia iloa mulimuli ane e faapea, o le Tusi Paia e saʻo i le faasaienisi, e saʻo i talafaasolopito, ma isi mea. O nei mea uma na fesoasoani ia Tavita e vaai ai i le Tusi Paia o se tusi o le upu moni e avatua ai ia te ia le faamoemoe moni i le olaga. Maeu se fiafia ma se suiga faaoaina mo ia!

Fesoasoani i le Isi Toatele e Saili Oa Moni

I le toatele o le faitau aofai o tagata i Hong Kong, o Alfred, Emily, Justina, Francis, ma isi ua taʻua i inei ua na o se toaitiiti o i latou na sa mauaina oa moni o le upu moni o le Tusi Paia ma faatuatua ia Ieova le Atua. I le 1992, na faaaluina ai e Molimau a Ieova e toʻa 2,600, se aofaiga o itula e toeitiiti lava 900,000 i le asiasi atu i tagata Hong Kong ma faia suesuega faale-Tusi Paia i aiga e sili atu i le 3,800. E ui i lea, o le tulaga o le olaga i Hong Kong e vave tele, ma ua tele naunau ai galuega a tagata. O le mea lea, e faaopoopo atu i le asiasi atu mai lea fale i lea fale, ua faamanuiaina ai taumafaiga a ē faalauiloa le Malo i le molimau atu i magāala. Sa latou faafesootaia foi tagata i nofoaga  e faigaluega ai e ala i le asiasi atu i ofisa, i faatauoloa, i faifaatoaga, ma tagata o ē faifaiva i le Sami i Saute o Saina.

E mafai ona faapea atu ma le moni i Hong Kong, “e tele le saito e seleseleina, a o le au fai galuega e toaitiiti ia.” (Mataio 9:37) I le taimi nei, o le faatatau o Molimau i le faitau aofai o tagata, e tusa ma le toatasi le tagata talaʻi i tagata e 2,300. I le talisapaia o le faanatinati o le galuega o le seleselega, e toeitiiti lava 600 mai le au talaʻi o le Malo e 2,600 i inā ua avea o ni paeonia, po o tagata talaʻi faataimi atoa o le tala lelei. O Molimau a Ieova i Hong Kong e pei lava o isi atunuu, ua latou iloaina e faapea, ‘o le faamanuia a Ieova, o lea e faatamaoaiga aʻi.’ (Faataoto 10:22) O lea la, o loo latou galulue mamafa ai e fesoasoani atu i le toatele o tagata i lena atunuu tamaoaiga ina ia sailia oa moni.

[Faafanua i le itulau 23]

(Tagaʻi i le lomiga mo le ata atoa)

LE SAMI I SAUTE O SAINA

SAINA

Hong Kong

Kilomita

Maila

15

15