Auauna ia Ieova i se Agaga o le Faataulagaina Totino

“Ai se tasi e fia mulimuli mai ia te au, aua neʻi usiusitai o ia ia te ia, a ia ave e ia lona satauro, i le mulimuli mai ai ia te au.”—MATAIO 16:24.

1. Na faapefea ona taʻu atu e Iesu i ona soʻo lona maliu ua lata mai?

I LE vaega o le Mauga o Heremoni o loo ufitia i le kiona, na ausia ai e Iesu Keriso se tulaga e sili ona tāua i lona soifuaga. Sa lē o toe atoa se tausaga e soifua ai pea o ia. Na ia silafia lea mea; ae sa lē iloa e ona soʻo. Ua oo nei la i le taimi e tatau ai ona latou iloa. E moni, i le taimi muamua sa faauiga ai e Iesu le taʻuina atu o lona maliu ua lata mai, ae o lea la sa ia faatoʻā taʻu saʻo atu loa. (Mataio 9:15; 12:40) O le faitauina lenei o le tala a Mataio: “O ona po ia na amata ai e Iesu ona faailoa atu i ona soo, e tatau ona alu o ia i Ierusalema, e faatigaina foi i mea e tele e toeaina ma le au faitaulaga sili, ma le au tusiupu, e fasiotia foi o ia, e faatuina foi o ia i le aso tolu.”—Mataio 16:21; Mareko 8:31, 32.

2. O le ā le tali atu a Peteru i fetalaiga a Iesu e faatatau i Lona puapuaga o le a iai, ma na faapefea ona tali mai i ai Iesu?

² Sa leʻi toe umi ni aso o totoe o le soifuaga o Iesu. Ae e ui i lea, na tetee atu Peteru i lea manatu e foliga e leʻi fia faalogo i ai. Na te lē fia taliaina le faapea o le a fasiotia moni lava le Mesia. O lea la na matuā aʻoaʻi atu ai Peteru i lona Matai. I le uunaia e ona faanaunauga malolosi, na ia soona aioi atu ai faapea: “Le Alii e, ia mamao [“agalelei,” NW] ia te oe lea mea; e le oo lena mea ia te oe.” Ae na vave ona teena e Iesu lena fia agalelei o Peteru, na matuā pei lava o sē o le a tuʻimomomoina le ulu o se gata ūogo ma fetalai atu e faapea. “Satani e, ina alu ia oe i oʻu tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.”—Mataio 16:22, 23.

3. (a) Na faapogaia faapefea e Peteru ia lava e fai ma sui o Satani, e aunoa ma lona iloaina? (e) Na avea faapefea Peteru ma mea e tausuai ai e tusa ma le faataulagaina totino?

³ Sa faapogaia e Peteru le avea o ia e ia lava ma sui o Satani, e aunoa ma lona iloaina. O le talisā atu i ai a Iesu sa pei lava lona maumauai o lana tali atu ia Satani i le vao. O i inā na taumafai ai le Tiapolo e tofotofo Iesu i se olaga faigofie, o le avea ma tupu e aunoa ma ni puapuaga. (Mataio 4:1-10) O lenei la ua faalaeiauina o ia e Peteru ina ia aua lē soona inainā ia te ia lava. Ua silafia e Iesu e lē o le finagalo lenei  o lona Tamā. E tatau ona faataulaga lona lava soifua, ae lē o le faafiafiaina totino. (Mataio 20:28) Na avea Peteru ma mea e tausuai ai i lea tulaga; o lona faanoanoa lea na pei e pogai mai i se mafuaaga lelei, sa avea ma mailei. * Ae peitai, ua silafia lelei e Iesu, afai o le a faafiafiaina o ia i so o se vala o le olaga lea e lē faia ai ni faataulagaina, o le a na lē maua la le finagalo malie o le Atua, e ala i le puʻea i le mailei a Satani ma oti ai.

4. Aiseā sa lē fetaui ai mo Iesu ma ona soʻo se ituaiga o olaga faataigalemu ma faamalieina totino?

⁴ Sa manaomia ai la ni fetuutuunaiga i mafaufauga o Peteru. O ana upu ia Iesu ua na o ni mafaufauga faaletagata, ae lē o ni mafaufauga o le Atua. O se olaga o le faataigalemu ma le faamalieina totino, se auala faigofie e aunoa ma ni puapuaga, sa leʻi finagalo Iesu e soifua ai; sa leʻi finagalo foi o ia e ola ai ona soʻo, auā na sosoo le fetalai atu o Iesu ia Peteru ma le isi vaega uma o le au soʻo e faapea: “Ai se tasi e fia mulimuli mai ia te au, aua neʻi usiusitai o ia ia te ia, a ia ave e ia lona satauro, i le mulimuli mai ai ia te au.”—Mataio 16:24.

5. (a) O le ā le luʻi i le ola i se olaga faa-Kerisiano? (e) O ā mea manaomia e tolu e tatau ona nofo sauni i ai se Kerisiano?

⁵ O le tele lava o taimi e tautū ai Iesu i lenei manatu autū: le luʻi o le ola i se olaga faa-Kerisiano. Ina ia avea ma soʻo o Iesu, e tatau ai i Kerisiano ona faapei o lo latou Taʻitaʻi, i le auauna atu lea ia Ieova i se agaga o le faataulagaina totino. (Mataio 10:37-39) Ona ia lisiina lea o mea manaomia se tolu e tatau i se Kerisiano ona sauniuni e fai: (1) aua neʻi toe usiusitai ia te ia lava, (2) ia ave lona satauro, ma lona (3) ia mulimuli atu pea ia te Ia.

“Ai se Tasi e Fia Mulimuli mai ia te Au”

6. (a) E faapefea ona lē usiusitai se tasi ia te ia lava? (e) O ai e tatau ona tatou muai faafiafia na i lo o i tatou lava?

⁶ O le ā le uiga o le aua neʻi usiusitai se tasi ia te ia lava? O lona uiga e ao i se tagata ona matuā faafitia o ia lava, e pei ua ia fasiotia o ia. O le uiga moni o le upu Eleni ua faaliliuina i le “aua neʻi usiusitai” o le “ia fai atu leai”; o lona uiga “ia matuā faafitia.” O lea la, afai e te taliaina le luʻi o le olaga faa-Kerisiano, e te loto malie la e faatoʻilalo ou lava faanaunauga fiasili, ou tulaga sologalelei, ou faanaunauga, ou fiafiaga. O lona uiga, e te tuuina atu lou olaga atoa ma mea uma o aofia ai, ia Ieova le Atua i taimi uma. O le lē toe usiusitai o se tasi ia te ia lava e tele nisi ona uiga na i lo le na o le faafitia e se tasi o ia lava mai ni faafiafiaga i nisi taimi. Ae na i lo o lea, e faauiga faapea ua tatau ona faaliliu atu e se tagata lana pule sa iai ina ia pule mai ai Ieova ia te ia. (1 Korinito 6:19, 20) O le tagata ua lē toe usiusitai ia te ia lava e ola ina ia lē faafiafiaina o ia, a o le Atua. (Roma 14:8; 15:3) O lona uiga, o taimi uma lava o lona olaga, e leai atu ai i ni faanaunauga manatu faapito, ae ioe atu ia Ieova.

7. O le ā le satauro o se Kerisiano, ma e faapefea ona ia amoina?

⁷ O le aveina la o lou satauro, e iai ni ona faatatauga uigā. O le tauaveina o se satauro o se amo mamafa ma o se faailoga o le oti. E loto malie se Kerisiano e puapuagatia pe afai e manaomia, po o le faamasiasiina pe faasatauroina pe oo lava ina oti ai, ona o le avea ma soʻo o Iesu Keriso. Na fetalai Iesu: “O se le ave lona satauro, ma le lē mulimuli mai ia te au, e le aoga foi lea ia te au.” (Mataio 10:38) E lē faapea o tagata uma o loo puapuagatia, o loo latou amoina se satauro. E tele “mea tiga” e mafatia ai tagata amioleaga, ae latou te lē o amoina se satauro. (Salamo 32:10) Peitai, o le olaga o se Kerisiano, o se olaga o le amoina o le satauro o le auaunaga faataulagaina ia Ieova.

8. O le ā le auala o le olaga na faataatia e Iesu mo ona soʻo?

⁸ O le tulaga faaiʻu lava na taʻua e Iesu, o le faaauau pea lea ona tatou mulimuli atu ia te ia. O le finagalo o Iesu e lē gata ina ia tatou talia ma talitonu i mea na ia aʻoaʻo mai, ae ia tatou mulimuli atu pea i lo tatou olaga atoa i le faaaʻoaʻoga na ia faataatia. Ma o ā nisi o vala autū ua vaaia i lana faaaʻoaʻoga o le olaga? Ina ua ia  tuuina atu i ona soʻo lo latou tofiga faaiʻu, na ia fetalai atu e faapenei: “O lenei, ia outou o atu e fai nuu uma lava ma soo, . . . ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) Na talaʻi ma aʻoaʻo atu e Iesu le tala lelei o le Malo. Sa faapena foi ona faia e ona soʻo sa latou vavalalata, ma o le mea moni, sa faapea foi i le uluai faapotopotoga Kerisiano atoa. O le galuega maelega lenei atoa ma lo latou lē avea ma vaega o le lalolagi, na faapogaia ai ona itagia ma teena i latou e le lalolagi, lea na iʻu ai i le satauro e sili atu ona mamafa sa latou amoina.—Ioane 15:19, 20; Galuega 8:4.

9. Na faapefea ona faafeagai Iesu ma isi tagata?

⁹ O le isi faaaʻoaʻoga lauiloa na mātauina i le soifuaga o Iesu, o lana auala na ia faafeagai ai ma isi tagata. Sa agalelei o ia ma “agamalu ma le loto maulalo.” O lea na lagona ai e lana au faalogologo se faafouina o o latou agaga ma faalaeiauina i lo latou faatasi ai ma ia. (Mataio 11:29) Na te leʻi faafefeina i latou ina ia mulimuli atu ia te ia, pe faia ni tulafono se tele i le auala latou te faia ai faapea; sa ia leʻi faatiga i o latou loto fuatiaifo, ina ia faamalosia ai le avea o i latou o ni ona soʻo. E ui lava i lo latou olaga faataulagaina totino, ae sa faaali atu pea lo latou olioli moni. Pagā se matuā eseese ma i latou o loo iai le agaga faalelalolagi o le manao tele, lea ua faailogaina ai “aso e gata ai”!—2 Timoteo 3:1-4.

Ia Atiina aʻe ma Tausisia le Agaga Faataulagaina Totino o Iesu

10. (a) E tusa ai ma le Filipi 2:5-8, na faapefea ona lē usiusitai Keriso ia te ia lava? (e) Afai o i tatou o soʻo o Keriso, o le ā le uiga faalemafaufau e ao ona tatou faaalia?

¹⁰ Na faataatia e Iesu le faaaʻoaʻoga o le lē usiusitai ia te ia lava. Sa ia amo lona satauro ma faaauau pea ona faia le finagalo o lona Tamā. Na tusi atu faapea Paulo i Kerisiano i Filipi: “Ia ia te outou foi lea lava manatu sa ia Keriso Iesu, o ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata; na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.” (Filipi 2:5-8) O ai e mafai ona lē usiusitai ia te ia lava e sili atu na i lo o lea? Afai o Keriso Iesu e ana oe, ma o oe foi o se isi o ona soʻo, e tatau la ona e tausia lea lava uiga faalemafaufau.

11. O le ola i se olaga e faataulagaina totino, o lona uiga ia ola mo le finagalo o ai?

 ¹¹ Ua taʻu mai ia i tatou e se isi aposetolo, o Peteru e faapea talu ai sa puapuagatia ma maliu Iesu mo i tatou, e tatau ai la i Kerisiano ona faaauupegaina i latou, e pei o ni fitafita ua lava saunia, ma ia iai foi lea lava agaga e tasi sa iai ia Keriso. Ua ia tusi mai e faapea: “O lenei, ua tigaina Keriso i le tino o le sui o i tatou, ia fai ai ma auupega ia te outou foi lea lava loto, auā o le ua tiga i le tino, ua tuu e ia le agasala; ina ia le toe usiusitai o ia i tuʻinanau o tagata, i ona tausaga ua totoe i le tino, a ia usiusitai i le finagalo o le Atua.” (1 Peteru 3:18; 4:1, 2) O le olaga faataulaga totino o Iesu sa faaalia manino ai ona lagona e uiga i le faia o le finagalo o le Atua. Sa tuu tasi atu lona mafaufau i lona tuutoina, i le faamuamua pea lea o le finagalo o lona Tamā na i lo o ona lava manao, seia oo lava i se maliu e sili ona matagā.—Mataio 6:10; Luka 22:42.

12. Pe sa faanoanoa ea Iesu i le ola i se olaga faataulagaina totino? Ia faamatala.

¹² E ui lava o le soifuaga faataulagaina totino o Iesu sa o se auala faigata ma o se luʻi foi mo ia ina ia mulimuli i ai, ae sa ia leʻi faanoanoa ai. Na i lo o lea, sa fiafia Iesu i le gauai atu o ia lava i le finagalo o le Atua. Sa manatu o ia, o le faia o le galuega a lona Tamā sa pei o se meaʻai. Sa matuā faamalieina ai o ia, e pei lava ona laulelei o se tasi mai se taumafataga manaia. (Mataio 4:4; Ioane 4:34) Afai la e te fia maua le faamalieina atoatoa i lou olaga, e leai se isi mea e sili atu ona lelei, na i lo o lou mulimuli i le faaaʻoaʻoga a Iesu, e ala i le atiina aʻe o lona uiga faalemafaufau.

13. Ua avea faapefea le alofa o se uunaiga malosi o loo i tua o le agaga o le faataulagaina totino?

¹³ O le ā moni lava le malosi e uunaia ai lea o loo i tua o le agaga o le faataulagaina totino? O le malosi lea ua taʻua, o le alofa. Na fetalai Iesu e faapea: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i lē lua te tuaoi, ia pei o oe lava ia te oe.” (Mataio 22:37-39) E lē mafai e se Kerisiano ona saili ona lava manaoga, ae i le taimi foi e tasi o loo ia usitaia ai nei upu. E tatau ona silisili ona muai puleaina ona lava fiafiaga ma ona manaoga, e lona alofa ia Ieova ma lona alofa i tuaoi. O le auala lena na soifua ai Iesu, ma o le auala foi lena o loo ia faatalitalia ina ia ola ai ona soʻo.

14. (a) O ā avega tauave ua faamatala mai i le Eperu 13:15, 16? (e) O le ā ua uunaia ai i tatou ina ia talaʻi atu ma le maelega le tala lelei?

¹⁴ Sa malamalama le aposetolo o Paulo i lenei tulafono o le alofa. Na ia tusi mai: “O ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa. Aua le galo ia te outou ona agalelei ma alolofa atu; auā o taulaga faapena e fiafia ai le Atua.” (Eperu 13:15, 16) E lē ofoina atu e Kerisiano ni taulaga o manu po o nisi mea faapena ia Ieova; latou te lē manaomia foi la ni ositaulaga faaletino i se malumalu faaletino ina ia aloaiaina ai la latou tapuaiga. O la tatou taulaga o le viiga e ofoina atu e ala ia Keriso Iesu. Ma o le taulaga tonu lava lena o viiga, le faalauiloaina i le lautele o lona suafa, ua faaalia atu ai lo tatou alofa i le Atua. O se agaga lē manatu faapito ua faamautūina e le alofa ua faamalosia ai i tatou ina ia talaʻi le tala lelei ma le maelega, ina ia matuā sili atu ona tauivi na i lo so o se isi lava taimi, e ofoina atu ai i le Atua le fua o o tatou laugutu. O le auala foi lenei tatou te faaalia atu ai le alofa i tuaoi.

O le Faataulagaina Totino e Aumaia ai le Anoanoai o Faamanuiaga

15. O ā fesili mo iloiloga e mafai ona tatou fesiligia ai i tatou lava e faatatau i le faataulagaina totino?

¹⁵ Seʻi faatali teisi ma toe mafaufau i fesili nei o loo sosoo mai: Po o faailoa atu ea e loʻu olaga i le taimi nei se tulaga o le faataulagaina totino? Po o faaautū atu i ai oʻu sini i lena olaga? Po o maua e tagata o loʻu aiga ni aogā faaleagaga ona o laʻu faaaʻoaʻoga? (Faatusatusa i le 1 Timoteo 5:8.) Ae faapefea i ē ua mātua oti ma fafine ua oti a latou tane? Pe aogā foi ia i latou loʻu agaga faataulagaina totino? (Iakopo 1:27) Pe e mafai ona ou faateleina le taimi e faaalu i laʻu taulaga o viiga i le lautele? Po o mafai ea ona ou aapa atu i le faaeaga o le  auaunaga paeonia, i Peteli, po o le faamisionare? Pe e mafai ona ou siitia atu e auauna i se vaipanoa o loo manaomia tele ai ni tagata e faalauiloaina le Malo?

16. E mafai faapefea ona fesoasoani ia i tatou sina tomai, ina ia tatou ola ai i se olaga o le faataulagaina totino?

¹⁶ O nisi taimi, e itiiti lava sina tomai tatou te manaomia ina ia ausia ai lo tatou agavaa atoatoa i le auauna atu ia Ieova ma se agaga o le faataulagaina totino. Mo se faaaʻoaʻoga, o Ianeta, o se paeonia sauatoa i Ecuador, sa faigaluega faasauatoa i le lalolagi. E leʻi umi, ae faafaigata ia te ia ona o lana faasologa ona maua ai sona fiafia a o taumafai e ausia itula manaomia o lana paeonia sauatoa. Sa ia filifili e faamatala atu i lona pule le faafitauli ma faatalosaga i ai ina ia faaitiitia ona taimi faigaluega. Talu ai sa leʻi malie le pule e faaitiitia ona taimi faigaluega, ona ia avatu lea i ai o Maria, o lē sa saili mo se galuega faavaitaimi ina ia mafai ai ona paeonia. Sa la tau fai malilie uma e galulue faaʻafa aso, ina ia maua uma ai itula o le aso faigaluega. Sa malie le pule i le ofo. I le taimi la lenei ua paeonia sauatoa uma tuafāfine e toalua. Ina ua mātauina e Kaffa lenei iʻuga matagofie, o lē sa matuā lē lavā foi ona o le faigaluega faasoloatoa i lea lava kamupanī ma sa tauivi ina ia sologa lelei itula o lana galuega paeonia, ona ō atu ai lea o Kaffa ma Magali ma fai atu lena lava ofo. Sa taliaina foi. Ona mafai ai lea ona paeonia tuafāfine uma e toafā, na i lo le toalua lea na toetoe lava tuua le auaunaga faataimi atoa. O le iai o se tomai ma le taulamua sa iʻu i ni iʻuga aogā.

17-21. Na faapefea ona toe fetuutuunai e se ulugalii a la fuafuaga o le olaga, ma o ā iʻuga na maua?

¹⁷ Seʻi manatunatu foi i le ala o le faataulagaina totino lea na uia e Ivona i le sefulu tausaga ua tuanai. Na ia tusi atu i le Sosaiete o le Olo Matamata ia Me 1991 le faamatalaga o loo sosoo mai:

¹⁸ “Ia Oketopa 1982, sa matou malaga asiasi ai ma loʻu aiga i le Peteli i Brooklyn. O le vaai i ai, na faatupuina ai loʻu manao ina ia ou tauofo e galue i inā. Sa ou faitauina se pepa talosaga, ma sa iai se fesili na taia ai aʻu e faapea, ‘O le ā le tuufaatatau o ou itula i le auaunaga i le fanua i le ono masina ua tuanai? Afai e i lalo ifo o le sefulu le tuufaatatau o itula, ia faamatala mai le mafuaaga.’ Sa leai se mafuaaga aloaia na ou manatua, o lea na ou faataatia ai se sini ma sa ausia mo le lima masina.

¹⁹ “E ui lava sa ono mafai ona ou faia ni nai faamolemolega mo le lē paeonia, ae ina ua ou faitauina le 1983 Yearbook of Jehovah’s Witnesses, sa ou mautinoa ai, na mafai e isi ona foia ni toʻatugā e sili atu ona tetele na i lo o oʻu toʻatugā, ina ia mafai ai ona latou paeonia. O lea, ia Aperila 1, 1983, sa ou lafoai ai loa laʻu galuega faasoloatoa sa ou maua ai ni tupe se tele, ae avea aʻu o se paeonia lagolago, ma ou ulu atu ai i le paeonia sauatoa ia Setema 1, 1983.

²⁰ “Mulimuli ane, o se fiafiaga ia te aʻu loʻu faaipoipo atu i se auauna o le faiva sa sili ona lelei, ia Aperila 1985. I le tolu tausaga mulimuli ane, o se lauga i se tauaofiaga itumalo e faatatau i le galuega paeonia, na teʻi ai ua sōsō mai laʻu tane ma fesili mai, ‘Po o e iloa se mafuaaga e lē tatau ai ona ou amata paeonia ia Setema 1?’ Ona ma galulue faatasi ai lea i lenei galuega mo le lua tausaga na sosoo ai.

²¹ “Sa tauofo foi laʻu tane ina ia galue i le faugāfale i le Peteli i Brooklyn mo le lua vaiaso, ma talosaga ai loa mo le Polokalama o Faugāfale Faavaomalo. O lea, ia Me 1989, sa ma ō atu ai i  Nikeria mo le masina e tasi ina ia fesoasoani i le fausiaina o le lālā. O taeao o le a ma malaga ai i Siamani, o i inā o le a saunia ai o ma pemita mo le ulu atu i Polani. Ua matuā faafiafiaina i maʻua ina ua ma aofia ai i lea galuega mataʻina tau faugāfale, ma avea ai ma vaega o lenei vala fou o le auaunaga faataimi atoa.”

22. (a) E faapefea ona ono pei i tatou o Peteru, i le avea ma mea e faatausuai ai e aunoa ma lo tatou iloaina? (e) O le ā e lē faalagolago i ai lo tatou auauna atu ia Ieova i se agaga o le faataulagaina totino?

²² Afai ua lē mafai ona e paeonia, pe mafai ea ona e faalaeiauina i latou o ē o loo i le auaunaga faataimi atoa ina ia tumau ai pea i lo latou faaeaga po o lou fesoasoani atu foi ia i latou ina ia faia faapea? Po o pei ea oe o nisi sui o le aiga po o ni uō na e pei o Peteru, e mafua mai i le alofa a latou fautuaga, atonu e fai atu i se auauna faataimi atoa ina ia faifai malie, ma ia fai fuafua i lona malosi, ae galo ai le avea o lena mea ma tulaga e tausuai ai? E moni, afai o iai i se tulaga lamatia le soifua malōlōina o se paeonia, po ua ia faatamala foi i ona avega tauave faa-Kerisiano, atonu la e tatau ai ona ia tuua le auaunaga faataimi atoa mo sina vaitaimi. O le auauna ia Ieova i se agaga o le faataulagaina totino e lē faalagolago i se taʻu faapea, o se paeonia, se tagata o le Peteli po o se isi lava tofi. Ae na i lo o lea, e faalagolago i le po o ā ituaiga o tagata e iai i tatou—po o ā o tatou mafaufauga, po o ā a tatou auaunaga o fai, po o faapefea ona tatou faafeagai ma isi, po o faapefea ona tatou faafoeina o tatou olaga.

23. (a) E mafai faapefea ona tatou faaauau i le olioli i le avea ma se tasi e faigaluega faatasi ma le Atua? (e) O le ā le faamautinoaga ua tatou maua i le Eperu 6:10-12?

²³ Afai o iai moni lava ia i tatou le agaga o le faataulagaina totino, o le a tatou olioli ai i le avea o ni ē e faigaluega faatasi ma le Atua. (1 Korinito 3:9) O le a faamalieina i tatou i le iloa faapea ua tatou faafiafiaina le finagalo o Ieova. (Faataoto 27:11) Ma ua ia i tatou foi le faamautinoaga e faapea, o le a lē faagaloina i tatou e Ieova, na te lē tuulafoaia foi i tatou pe afai tatou te tumau pea i le faamaoni ia te ia.—Eperu 6:10-12.

[Faaopoopoga i lalo]

O ā ni Ou Manatu?

□ Na avea faapefea Peteru ma mea e faatausuai ai e aunoa ma lona iloaina o se auala i le faataulagaina totino?

□ O le ā le uiga o le aua neʻi usiusitai se tasi ia te ia lava?

□ E tauamoina faapefea e se Kerisiano lona satauro?

□ E faapefea ona tatou atiina aʻe ma tausisia se agaga o le faataulagaina totino?

□ O le ā le uunaiga malosi o loo i tua o le agaga o le faataulagaina totino?

[Fesili mo le Suʻesuʻega]

[Ata i le itulau 10]

Pe ua e loto malie ea e te lē toe usiusitai ia te oe lava, ae o le a ave lou satauro, ma mulimuli atu pea ia Iesu?