E Saʻo Faapeī Talafaasolopito o le Tusi Paia?

FAI mai se tasi tusitala o le Tusi Paia i lana uō talavou e faapea: “O le upu moni ou te fai atu ai, ou te lē tala pepelo.” (1 Timoteo 2:7) O faaupuga faapena o loo i tusi a Paulo ua aumaia ai se luʻi i ē e faitioina le saʻo o le Tusi Paia. * Ua sili atu nei i le 1,900 tausaga ua mavae talu ona tusia e Paulo ana tusi. Ina ua mavae lena taimi umi, e leai lava se isi na faatūina mai ma le saʻo se manatu e faamaonia ai se sese e tasi i ana tusi.

Na faaleo mai foi e le tusitala o le Tusi Paia o Luka se manatu i lona saʻo aʻiaʻi. Na ia tusia ni faamaumauga o le soifuaga o Iesu ma lana faiva, lea na mulimuli ane tusia i lana tala e taʻua o le Galuega a le au Aposetolo. Na tusia e Luka e faapea: “Ua ou matuā sue i mea uma lava talu le amataga.”—Luka 1:3.

Faamaoniga o le Saʻo Aʻiaʻi

I le amataga o lona 19 senituri, na fesiligia ai e ē na faitioina le Tusi Paia le saʻo aʻiaʻi o faamaumauga a Luka e avea o se tala o talafaasolopito. Ae e sili atu i lena, na latou finau mai e faapea, o le talafaasolopito i le Galuega na faatoʻā amata ona fafau aʻe i le ogatotonu o le senituri lona lua T.A. O se tasi o i latou na talitonu i lenei mea o le tagata Peretania e suesue i le palapala o Sir William Mitchell Ramsay. Ae ina ua mavae ona suesueina igoa ma nofoaga na taʻua e Luka, ona ia taʻutino mai lea e faapea: “Sa matuā uunaia moni lava aʻu ona o faamaoniga e tele o talafaasolopito ua faaalia ai le uigaese o le mea moni.”

Ina ua tusia e Ramsay le faamatalaga o loo taʻua i luga, sa tumau pea se finauga e uiga i le saʻo aʻiaʻi o le tala a Luka. Na uiga i le sootaga vavalalata o aai o Ikonio, Lusa, ma Teipe. Na manatu Luka e faapea, o Ikonio e tū ese mai Lusa ma Teipe, o aai ia e lua na taʻua mulimuli o “aai ia o Lukaonia.” (Galuega 14:6) Ae peitai, e pei ona faaalia mai i le faafanua i inei, sa latalata Lusa i Ikonio na i lo i Teipe. Na faamatalaina e nisi o tusitala o talafaasolopito anamua e faapea o Ikonio, o se vaega o Lukaonia; o le mea lea, na luʻia ai e le au faitio Luka ona o lona lē faia foi faapea.

Peitai i le 1910, na maua ai e Ramsay se maa faamanatu i mea na faaleagaina o Ikonio e faaalia ai e faapea, o le gagana a lena aai sa o le gagana Ferukia ae lē o le gagana Lukaonia. Na faapea mai foi Dr. Merrill Unger i lana tusi Archaeology and the New Testament: “E tele nisi o tusitusiga mai Ikonio ma mea o siomia ai e faamaonia ai le mea moni e faapea, o ituaiga o tagata sa nonofo i le aai sa mafai ona taʻua o ni tagata o Ferukia.” O le mea moni, o Ikonio i aso o Paulo sa iai ni tū ma aganuu faa-Ferukia, ma e tū ese mai ‘i aai o Lukaonia,’ le mea na tautatala ai tagata “i le gagana a Lukaonia.”—Galuega 14:6, 11.

Sa faapea foi ona fesiligia e tagata faitio o le Tusi Paia le faaaogāina e Luka o le upu “politarchs” mo ē na puleaina le aai o Tesalonia. (Galuega 17:6, faamatalaga i lalo) O lenei faaupuga sa leʻi iloa i tusitusiga Eleni. Ona mauaina ai lea o se maa faamanatu i le aai anamua, o loo tusia ai igoa o ē na avea ma pule o le aai na taʻua i latou o “politarchs”—e tutusa lelei lava ma le upu na faaaogā e Luka. Na faamatalaina e W. E. Vine i lana tusi o le Expository Dictionary of Old and New Testament Words e faapea: “O le saʻo aʻiaʻi o Luka ua faamaonia e ala i le faaaogāina o le upu.”

 Le Folauga a Luka i le Sami

Na iloiloina e tagata ua masani i folauga, faamatalaga i le vaa na faaleagaina o loo faamatalaina i le Galuega mataupu e 27. E tusa ai ma Luka, o le vaa telē na la malaga ai ma Paulo na taia i se matagi malosi i le itu i saute sasae e latalata i se tamai motu o Kalauta, ma sa matuā fefefe le auvaa neʻi lafoia lo latou vaa i le fagaoneone i le talafatai i matu o Aferika. (Galuega 27:14, 17, faamatalaga i lalo) Na mafai e tautai popoto ona toe faasaʻo la latou faigamalaga i le ō ese lea mai Aferika, ae agaʻi atu i le itu i sisifo. Sa faaauau pea le malosi o le matagi, ma na iʻu ai ina latalata atu le vaa i matafaga o le motu o Melita, ma o le mamao na latou faimalaga ai e tusa ma le 540 maila [870 kilomita]. Na fuafua e tagata ua masani i folauga e faapea, e 13 aso le umi e malaga ai se vaa telē i se matagi malosi i lena mamao. Ma o a latou faatatauga uma, ua ioe faatasi ma faamaumauga a Luka, lea o loo tusia e faapea, na faaleagaina le vaa i le aso lona 14. (Galuega 27:27, 33, 39, 41) Ina ua uma ona faia sailiiliga uma o le folauga a Luka i le sami, ona faaiʻu mai lea e se tagata folau o James Smith e faapea: “O se tala i mea moni lava na tutupu, na tusia e se tasi na iai faatasi ma aafia ai . . . Na o se seila lava e mafai ona ia tusia ma le saʻo atoatoa se tala o se folauga i le sami i ona vaega uma, mai ona auiliiliga moni maumaututū.”

Ona o na suesuega, ua naunau ai pea nisi faifeau e taʻu atu o Tusitusiga Kerisiano Eleni o se talafaasolopito saʻo. Ae faapefea i le uluai talafaasolopito na mauaina i le Tusi Paia Eperu? E toatele taʻitaʻi lotu ua gauai atu i le poto faaonaponei ma latou faasalalauina ai faamatalaga e faapea, o loo iai tala faafagogo. Ae peitai, o nisi faamatalaga o le uluai talafaasolopito o le Tusi Paia ua faamaonia le saʻo, ma ua faamāina ai ē faitio. Seʻi manatu mo se faaaʻoaʻoga, i le mauaina o le Emepaea o Asuria lea na leiloa.

[Faaopoopoga i lalo]

 [Faafanua i le itulau 3]

(Tagaʻi i le lomiga mo le ata atoa)

LUKAONIA

FERUKIA

Teipe

Lusa

Ikonio

SAMI METITIRANI

KUPERU