Loto Faafetai mo le Lagolagosua Malosi a Ieova

E PEI ONA FAAMATALAINA E SHARON GASKINS

SE PARATAISO i le lalolagi! Sa ou vaaia ai aʻu o loo taaloalo i le mutia, tutuli pepe, taaalo faatasi ma tamai leona. O se lagona e ese le manaia! Peitai sa iai masalosaloga. Pagā le tele ina lē taulau oʻu faamoemoega!

I le mamao e mafai ona ou manatuaina, sa avea ai le nofoa faataavalevale ma aʻu paga moni. Mai i le taimi na ou fanau ai, na aveesea ai e se maʻi i loʻu faiai le olioli o loʻu talavou. Sa taaalo fiafia mai isi tamaiti i o latou seevae faasee ma uila, peitai sa ou nofonofo lava na o aʻu, e lē mafai ona ou savali. Sa feaveai solo aʻu e loʻu tinā i le mau tagata fai faamalōlōga ma lo matou faamoemoe lava ma le naunautai mo se vavega. O lea, ina ua mavae le tele o taumafaiga, sa ma lē toe ō loa i se isi faamalōlōga auā e leai lava se faamalōlōga na faamanuiaina. Sa ou faanoanoa, ae pagā se loto nutimomoia sa i loʻu tinā!

I le faanaunau atu mo se faamoemoe moni, sa amata ona suesue loʻu tinā ma Molimau a Ieova i le amataga lava o le 1964. E tusa lena faatoʻā ono ma le ʻafa oʻu tausaga.

Sa o se mea ofoofogia le iloaina e faapea sa iai muamua se parataiso matagofie i luga o lenei lalolagi. O se mea e faanoanoa ai, ona ua leiloa i le uluai tagata o Atamu le parataiso, ae sa ou naunau e faalatalata atu i le Atua o le a ia faia se isi parataiso e olioli ai. Pe faapeī le olioli i se faiā ma le Atua? Po o le ola a o femaliuaʻi lona lava Alo i le lalolagi? Sa faapena foi ona oo atu oʻu manatunatuga i le Parataiso i le lumanai. E oo lava i na uluai tausaga, sa manino lelei lava ia te aʻu o lea ua matou maua le upu moni.

Na amata ona ave e loʻu tinā lo matou aiga i le Maota o le Malo o Molimau a Ieova. E matuā eseese lava a latou sauniga mai mea na ou vaaia i isi lotu! Na uunaia loloto aʻu ona o tagata ma le siomaga sa iai.

Sa faigata i loʻu tinā le aveina o i matou i le Maota o le Malo. E lē gata o aʻu, ae e toatolu foi le fanau laiti, e leai foi sa matou taavale. E totogi sa matou tamai taavale pe a lava le tupe. Ou te manatuaina pea lona tauivi i le tasi Aso Sa. E leai se taavale. Ae na faafuaseʻi lava e leʻi faatalitalia, ona ui mai le tasi tamaloa i lana loli ma matou ō ai loa. Sa matou tuai i le sauniga, ae na matou taunuu lava i inā. Maeu so matou loto faafetai ia Ieova!

E leʻi leva lava ae faia loa e o matou uso ma tuafāfine pele faaleagaga e iai a latou taavale se faasologa alofa i le aumaia o i matou i sauniga ma le toe momoliina i le fale. O le faalaeiauga a loʻu tinā ia aua neʻi misia se sauniga, seʻi vaganā lava ua matou matuā mamaʻi, e faamanatu mai ai pea i loʻu mafaufau laitiiti le ‘tāua o le faapotopotoina faatasi o i tatou.’ (Eperu 10:24, 25) I le uunaia e ala i mea ua ia aʻoaʻoina, na tuuina atu ai e loʻu tinā lona ola mo Ieova ma papatisoina i le 1965.

I le taimi lena, ua lava loʻu matua e talisapaia atili ai sauniga. I le Faapotopotoga i Cypress Hills i Brooklyn, i Niu Ioka, sa iai Papalagi, tagata uli, Hispanics, ma isi tagata e ō mai e tapuai faatasi. E foliga mai e ese le saʻo e faapea, o tagata e matataʻu i le Atua e ao ona ola i lenei alofa moni faaleuso.—Salamo 133:1.

Na aʻoaʻoina aʻu e loʻu tinā pe faapefea ona  sauniuni mo sauniga. Sa leai se faafitauli i le mafaufau, ae o le tulaga i le tino. O le maʻi i le faiaʻi na faaliliuina ai ni gaoioiga faigofie i ni galuega faigata. Sa tumau pea ona faigata mo aʻu ona vase se laina saʻo ina ia faailogaina ai tali i a matou lomiga faale-Tusi Paia. Ae peitai, ona o le faataʻitaʻi pea, na iʻu ai ina faaleleia le vaseina o aʻu tali.

Na faatumuina loʻu mafaufau i mea e tautala atu ai. Ae o le auala e tautala atu ai loʻu gutu, e lē manino le taʻuina o upu. E tāua tele malōlōga ina ia aua ai neʻi iai se lagona popole po o le lē mautonu i oʻu musele. Sa ou taumafai foi e uaʻi atu i le faaleoina o upu taitasi i le manino e mafai ai. Ou te lagona le faaletonu i totonu ia te aʻu pe afai e lē o saʻo le faaleoina atu o saʻu tali i le auala e tatau ona iai, ia pe afai foi ou te iloaina e lē o malamalama tagata i aʻu upu. Ae ina ua latou masani ia te aʻu, sa mafai loa e uso ma tuafāfine i le faapotopotoga ona malamalama i laʻu tautala. Ae e ui i lea, o loo tumau pea ona iai aso e lelei ai ma aso e leaga ai lena faafitauli.

Masina Faigata e Ono

I le valu o oʻu tausaga, sa tupu ai se mea mo le ono masina o loo aafia ai aʻu seʻi oo mai i le taimi nei mai. E tusa ai ma togafitiga i le tino, o gaoioiga faamalositino, ma le faamalositino mo le tautala ua uma ona fai ia te aʻu, na auina atu aʻu i se falemaʻi e fai ai faamalositino i West Haverstraw i Niu Ioka. Sa matuā faanoanoa lava i maʻua ma loʻu tinā. I tausaga muamua atu ina ua manatu sese fomaʻi faapea e leaga loʻu mafaufau, na fai atu ai loa loʻu tinā ia i latou, o le a lē toe aveina aʻu i se falemaʻi tau le mafaufau. E oo lava foi i sina tuueseesega o i maʻua mo sina taimi puupuu, sa faigata foi mo loʻu tinā. Ae peitai, sa ia iloa e faapea, o le taʻitaʻiina o aʻu i se olaga e fua mai, e tutoatasi ai mai ia te ia ma loʻu tamā, o lona uiga, i le malosi atoatoa i le tino e tatau ai.

Sa manaia le falemaʻi, peitai sa ou lagona ua tuulafoaiina aʻu. O le tagi ma le faanoanoa na manino lelei ai i loʻu mafaufau le nofoaga lea. Sa seāseā ona asiasi atu oʻu mātua ia te aʻu i se malaga e tolu itula a le pasi, ae maise lava le taimi a o tō loʻu tinā i lana tama lona lima. Ona o loʻu faanoanoa tele pe a la sauni e toe foi, na fai mai ai le fomaʻi e tatau ona faaitiitia le asiasi mai. E na o le faalua ona faataga aʻu ou te alu i le aiga.

Sa aʻoaʻoina aʻu e tagata faamalositino ina ia ou savali e ala i le faaaogāina o seevae faapipii ma tootoo uamea. Sa foliga mai e ese le mamafa o tootoo. Peitai, sa fesoasoani tele le mamafa ia te aʻu e faapaleni ai laʻu savali ma fesoasoani foi e taofia aʻu mai le paʻū. O le laasaga muamua lenei agaʻi i le savali e aunoa ma tootoo.

O le tipiina o meaʻai, le faamauina o ofu—so o se gaoioiga e manaomia ona faaaogā ai tamatamailima—sa faigata pe sa le mafai foi ona ou faia. Ae ona o le fai soo sa mafai ai ona ou ʻai lava aʻu ma faia oʻu ofu. Na fesoasoani mulimuli ane lenei mea i laʻu auaunaga i le Atua.

Ua uma nei laʻu aʻoga, ma ua oo i le taimi ou te toe foi ai i le aiga. Sa tuu aʻu e loʻu tinā i se galuega e faaaogā ai loʻu poto fou. Sa o se taua i oʻu faalogona le faia faapea, talu ai ua ou manao e faia mea mo aʻu lava, o le faataunuuina o na mea sa lē taulau, e alu ai se taimi umi, ma sa ou vaivai foi. Ioe, o le faia o oʻu lava ofu mo le sauniga, o se galuega e lua itula e fai ai!

Ina ua matou siitia saʻo atu i le isi itu o le auala e faafeagai ma le Maota o le Malo, sa mafai ona ou savalivali lava aʻu ia. Sa ou manumalo ai!

Le Aso e Sili ona Fiafia i Loʻu Olaga

Sa taumafai loʻu tinā e faamautinoa o loo paleni lelei le itu faaleagaga o le aiga. Sa ma suesue ma loʻu tinā, ma sa ia faatonuina aʻu e faitau uma lomiga taitasi o Le Olomatamata ma le Awake! E tatau ona ou sauniuni mo sauniga ma ia auai. Ina ua goto lenei poto i loʻu mafaufau ma loʻu loto, na ou mafaufau loloto ai loa, e pau lava le mea o loo i tua o nei mea uma, o le tuuina atu lea o loʻu ola mo Ieova, e ala i le papatisoga. Na fesoasoani mai loʻu tinā ia te aʻu ina ia ou iloa faapea, e ui lava i loʻu tino vaivai, ae e fesoasoani mai lava le Atua ia te aʻu i le itu faaleagaga. Ou te leʻi faatalitalia e ulu atu i le lalolagi fou ona o loʻu tinā, pe faalagolago ia te ia e faasaoina atu ai i le lalolagi fou.

Ou te alofa i le Atua, peitai ona o loʻu tulaga na faaesea ai aʻu mai isi—o se vaaiga tiga mo se tagata talavou. Sa faigata ona talia oʻu tapulaa. Sa masani ona ou ita, ma sa ou taumafai pea e pulea lenei tulaga a o lumanai ona ou papatiso.  (Kalatia 5:19, 20) Ae faapefea pe afai e lē mafai ona ou ola e tusa ai ma loʻu tuuina atu ia Ieova?

Ona sa molimanao i ai loʻu tinā, o lea na talanoa mai ai se toeaina o le faapotopotoga ia te aʻu. Sa ia siiina mai le fesili a le perofeta o Elia i tagata Isaraelu e faapea: “Pe tou te faaletonu i manatu e lua seia afea?” (1 Tupu 18:21) Ma le manino lava, sa lē fiafia le finagalo o Ieova i loʻu lē mautonu.

Sa faafouina faaleagaga aʻu ma sa ou tatalo atu ma le naunautai mo le fesoasoani a Ieova, faatasi ma le maumauai e tuuina atu loʻu ola ia te ia. Sa ma suesue ma se tasi o tuafafine i le faapotopotoga. E laitiiti ia te aʻu ma sa maliu lona tinā a o laitiiti o ia. E ui i lena mea, ae sa ia faia le tuuina atu i le Atua a o laitiiti.

I le 17 o oʻu tausaga, sa faia loa laʻu faaiʻuga. Ua ou manao e auauna ia Ieova i le mea e sili ou te mafaia. Ia Aokuso 9, 1974—ina ua ou papatiso, sa o se aso sili atu lea ona fiafia i loʻu olaga.

Olioli i le Faiva

O le auai i le faiva sa fetaiai ai ma ni faigata e pei o ni mauga. O le luʻi sili sa ma feagai, o loʻu taumafai lea ia ou malamalama i isi. E mafai ona ou tautala i le manino ou te mafaia. Ma, so o se tasi lava ma te galulue i le faiva i le fanua, pe afai ou te faia le lauga pe a talafeagai ma aʻu, e toe faia uma lava e laʻu paga aʻu faamatalaga ina ia faamautinoa ua malamalama le tagata o le aiga. O nisi e tali mai i se tulaga lē mautinoa, e ala i le vaai mai ia te aʻu e faapea o se tasi o loo faafaigaluegaina e Molimau. Peitai, o le talaʻiga, o loʻu faanaunauga saʻo lea mai loʻu loto.

O le savali mai lea fale i lea fale sa matuā faavaivaia ai aʻu e tusa lava pe na o se tasi se poloka o talaʻi ai. O le tele o fale i le oganuu o loo matou molimau atu ai e iai faasitepu, e faigata ona ou aea. E lē mafai ona ou galue i le galuega mai lea fale i lea fale pe a oo i le taumalūlū i oganuu aisā. (Galuega 20:20) Ae peitai, sa fesoasoani malosi mai oʻu uso faaleagaga ia te aʻu, ma i le taimi nei, ua faamanuiaina ai aʻu e Ieova i se nofoa faataavalevale, ina ia faafaigofie ai laʻu auaunaga.

Sa amata ona ou molimau atu e ala i le meli. Sa lē mafai ona tusi ni tusi ona o le toatele o tagata e faigata ona faitau i laʻu tusitusi. O lea na avea ai le masini lomitusi eletise ma aʻu failautusi. E tuai laʻu lomitusi ona o le leaga o oʻu lima. O le tele lava o taimi e sese ai le ki ou te oomia. Atonu e alu se itula po o le sili atu foi e tā ai se itulau se tasi o le pepa.

Mai lea taimi i lea taimi, e ui lava i le lē lava o le malosi, ae sa ou auauna lava o se paeonia lagolago, i le tuuina atu lea o le 60 itula po o le sili atu foi i le faiva i masina taitasi. E manaomia ai i lenei mea se faasologa lelei, ni taumafaiga faaopoopo, ma le lagolagosua a uso talitonu. O lo latou agaga faapaeonia na faamalosia ai aʻu. Sa faapena foi i loʻu tinā, sa ia faataatia se faaaʻoaʻoga lelei e ala i le auauna o se paeonia sauatoa po o se paeonia lagolago e ui lava ina fesagaʻi ma tulaga faigata, le lē lelei o le soifua malōlōina, faatasi ai ma le luʻi o le tausia o le fanau e toafitu i totonu o se aiga e lē upu moni uma.

Ola na o Aʻu Lava

I le 24 o oʻu tausaga, sa ou filifili ai loa ou te ola na o aʻu lava. O loʻu siitia atu i Bensonhurst o se vaega o Brooklyn, sa faamaonia o se faamanuiaga. Sa pei le Faapotopotoga i Marlboro o se aiga e tasi. Maeu le faamalosia o le faatuatua sa iai i le faatasi ai ma i latou! E ave aʻu e uso faaleagaga i sauniga uma e ui lava e na o le lua pe tolu foi taavale e avanoa i le faapotopotoga. Peitai e leʻi umi ona ou nofo ai i inā.

I le lagona e pei ua lē aogā aʻu taumafaiga, sa ou toe foi ai i loʻu aiga ma matuā loto mafatia ai mo tausaga e tolu. Ua toe oso foi loʻu ita. Ma sa oo mai ai se lagona o le pule i le ola, ma sa faia ni taumafaiga se tele ina ia faia ai. Sa pei ua latalata mai le oti ia te aʻu. Peitai na ou faalagolago i le Atua ma ou folafola atu le faaalia o le talisapaia mo lana meaalofa o le ola. O faamafanafanaga ma fautuaga na aumaia e toeaina. O nei mea uma, faatasi ma le tatalo, o suesuega totino, le onosai o loʻu aiga, ma ni fesoasoani o fomaʻi, na faamalosia ai loʻu mafaufau.

E ala i Le Olomatamata, ua saunia ai ma le alofa e Ieova faamatalaga e alofia ai faanoanoaga matuiā. E manatu mai o ia i ona tagata ma e malamalama foi i o tatou faalogona. (1 Peteru 5:6, 7) I se taimi sa toe sologa lelei ai le lagona o faanoanoaga loloto. Sa fesoasoani mai pea Ieova ia te aʻu i le sefulu tausaga mulimuli ane a o feagai ai ma faanoanoaga ma mafatiaga. Na toetoe lava manumalo ia te aʻu i nisi taimi le lagona ua ou lē toe aogā. I na mea uma, o le tatalo, o le suesueina o le Tusi Paia, faatasi ai ma loʻu aiga faaleagaga, o fesoasoani faasaoola sili ia.

Ina ua mavae se sailiga lē manuia mo se isi fale, sa ou faaiʻua ai e nonofo faatasi ma loʻu aiga i loʻu olaga o totoe. Peitai ane na tali mai Ieova i aʻu tatalo. O se nofoaga o loo avanoa i le vaega o Bedford-Stuyvesant i Brooklyn. I le faaiʻuga o le taumafanafana o le 1984, na ou siitia ai i inā, ma o loo oʻu nofo ai pea.

E feaveaʻi aʻu ma le agalelei e sui o le Faapotopotoga i Lafayette i sauniga. O le mea o loo ou manatua lelei, o le Suesuega Tautusi a le faapotopotoga sa ou auai muamua. E faia i le fogafale lona fā ae e leai se lifi e feaveai ai tagata mai i lalo agaʻi i luga. Peitai ona o le fesoasoani mai ia Ieova na mafai ai ona ou alu i luga ma toe sau i lalo. Peitai na iʻu ina faia le suesuega i se nofoaga e talafeagai lelei. Ma i le taimi nei ua faamanuiaina aʻu e Ieova i se faaeaga o le faia o se Suesuega Tautusi a le Faapotopotoga i loʻu fale.

O se agaga matagofie faapaeonia o loo faatumulia ai lenei faapotopotoga. I le taimi na ou taunuu ai i lenei faapotopotoga, e tusa ma le toʻa 30 paeonia ma nisi sa latou tausia aʻu. O le uiga maelega o nei paeonia na uunaia ai aʻu e avea ma paeonia lagolago e lē aunoa.

Ia Aperila 1989, na fausia ai e Faapotopotoga i Lafayette ma Pratt se Maota fou o le Malo i le auala lava lea ou te nofo ai. Ma sa faia tonu lava lenei gaoioiga i le taimi tonu o loo manaomia ai, auā o le taimi lea ua toe faaletonu ai foi le tulaga o loʻu tino, sa toe avea foi le savali o se faafitauli ia te aʻu. Ae peitai, o loʻu nofoa faataavalevale faatasi ma le fesoasoani a uso ma tuafāfine faaleagaga sa avea ai le alu ma le toe foi mai i sauniga o se fiafiaga ia te aʻu. Maeu soʻu talisapaia loloto o nei fesoasoani alofa!

Loto Faafetai mo le Lagolagosua a le Atua

E ui lava e lē lelei oʻu vae, ae o loʻu loto e maumauai. O le lelei o aʻoaʻoga na faafaigofieina ai mea i le olaga, ioe ua faamalieina aʻu e le Atua. I nisi taimi, ou te lē iloa po o fea o le a maua mai ai se isi aʻu meaʻai, peitai na lagolagoina aʻu e Ieova ma o Lē e Saunia Mea ma le faamaoni. O le mea moni, e pele ia te aʻu upu a Tavita: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou.”—Salamo 37:23-25.

Sa fesoasoani Ieova ia te aʻu i nisi taimi ina ia ou tumau i tulaga faale-Tusi Paia e teena ai le taliaina o se tuiga toto i se taʻotoga. (Galuega 15:28, 29) E leʻi leva, ae maliu loʻu tamā. O le maliu o sē e sili ona e latalata i ai o se faanoanoaga tele lea. Sa na o le fesoasoani lava mai ia Ieova na faamalosia aʻu ma tumau ai i lenei mea ma isi tofotofoga.

Atonu e ono faaauau pea ona lē taulau loʻu malosi faaletino, peitai o loʻu faatuatua i le Atua ma laʻu faiā ma ia o loo faatumuina ai loʻu olaga. Maeu le fiafia i loʻu faatasi ma tagata o Ieova ma maua lana lagolagosua malosi!