O le ā e Manaomia ina ia Faafiafia ai Oe?

UA TAUMAFAI le au faipolotiki e faafiafia tagata o loo palota ia i latou. Auā o loo faalagolago i ai a latou galuega. Peitai, o loo tautala se mekasini e uiga i tagata palota i Polani “e faameo ma faaesea ai i latou.” Ua faamatala e se tusitala o nusipepa e faapea, o le Iunaite Setete, o se sosaiete “ua tumu i le lē faatuatuaina i faiga polotiki.” Ua taʻu mai e se tasi tusitala ia i tatou e uiga “i le tupu aʻe o se iʻuga faatalalē i faiga faapolotiki i Falani.” O le salalau atu o le faatalalē ma le leai o se faamalieina—e matuā lē faatapulaaina i nei atunuu e tolu—e taʻu atu ai ua lē taulau le au faipolotiki i a latou taumafaiga e faafiafiaina tagata.

O loo folafola mai foi e le au taʻitaʻi lotu le fiafiaga, afai e lē i lenei olaga, o se isi olaga i le lumanai. Ua faavae aʻe lenei folafolaga i le manatu e faapea, e iai se solu o tagata e lē mafai ona oti po o le suia o le nofoaga, o se manatu e tetee i ai le toatele o tagata, ona o mafuaaga eseese, ma e matuā manino le teena e le Tusi Paia. E faitau miliona tagata ua lē o toe faatāuaina ia i latou lotu faapea e maua ai se fiafiaga, e faamaonia lea i le faaitiitia o sui o le lotu ma le gaogao o falesa.—Faatusatusa i le Kenese 2:7, 17; Esekielu 18:4, 20.

E Lē Faamalieina Ē Mananao i Siliva

Afai e lē maua i faiga faapolotiki po o lotu le fiafiaga, o fea la e mafai ona maua ai? Pe atonu e maua i le faia o ni fefaatauaʻiga? O loo foliga mai foi e mafai ona maua ai le fiafiaga i lea. Ua faaalia mai i faamaoniga e ala i faasalalauga i le mau faamatalaga e faapea: E mafai ona maua le fiafiaga i le mauaina o mea faitino uma lava atoa ma mea e mafai ona faatauina i tupe.

E aliali mai ua faateleina le aofai o tagata ua sailia le fiafiaga i lenei auala. Na lipotia mai i le tele o tausaga ua mavae e faapea, o le ʻafa o tagata e ona aiga i Siamani sa matuā tetele a latou aitalafu. E letioa la faapea mai se nusipepa lauiloa na faasalalauina i Siamani o le Die Zeit: “o le toatele lava [o i latou nei] ua lē mafai ona toe ō ese mai le nofo aitalafu.” Ua faamatalaina: “E faigofie ona tuu mai e le faletupe le avanoa e talaina ai se tupe e tusa lava po o le ā le tele e te manao ai, ae e faigata ona e sola ese mai le mailei o le totogiina o aitalafu.”

E faapena foi le tulaga i isi atunuu e tele ai le tamaoaiga. I ni nai tausaga ua mavae, na masalomia ai e David Caplovitz, o se tagata suesue i mea o le vafealoaʻi o tagata i le Iunivesite o le Aai o Niu Ioka e faapea, i le Iunaite Setete, e i le va o le 20 miliona ma le 25 miliona i latou e ona aiga o loo matuā pagatia lava i aitalafu. Na faapea mai o ia: “Ua matuā faapopoleina lava tagata i le tele o aitalafu, ma ua āfaina ai o latou ola.”

E faigata ona maua ai se fiafiaga! Ae pe e ao ea ona tatou faatalitalia le lalolagi o faiga pisinisi na te faataunuuina le mea e lē o mafai ona faia e isi vasega e lua (polotiki ma lotu)? Na tusi mai le tupu mauoa o Solomona e faapea: “O le ua manao i le ario, e le mālie o ia i le ario; o le ua manao foi i le oloa tele, e leai sana mea e maua ai; o le mea faatauvaa foi lea.”—Failauga 5:10.

O le sailia o le fiafiaga i mea faitino ua pei lava o le faia o se ʻolo i luga o le ea. Atonu e te fiafia e faia na ituaiga o ʻolo, peitai o le a iai ni ou faafitauli pe afai e te taumafai e nofo ai.

 E Mafai ona Maua le Fiafiaga ae e Faapefea?

Ua taʻua e le aposetolo o Paulo Ieova o “le Atua manuia [“fiafia,” NW].” (1 Timoteo 1:11) Talu ai na faia e le Atua fiafia le tagata i lona lava faatusa, na ia tuuina atu ai ia te i latou le avanoa ina ia fiafia ai. (Kenese 1:26) Peitai, o lo latou fiafiaga sa faalagolago lea i lo latou auauna i le Atua, e pei ona faaali mai e le faisalamo: “Amuia le nuu e fai Ieova mo latou Atua!” (Salamo 144:15e) E mafai ona taʻitaʻiina atu i tatou i le fiafiaga moni e ala i le auala o loo tatou auauna atu ai i le Atua, ma maua ai se malamalamaga sili pe afai tatou te manatunatu i ni nai mau o loo taʻua ai upu nei o le “fiafia” ma le “fiafiaga” e faaselausefulu i le New World Translation.

Ia Iloa Manaoga Faaleagaga

Na faapea mai Iesu Keriso, le Alo o le Atua i lana Lauga taʻutaʻua i luga o le Mauga: “Amuia i latou o ē naunau i o latou manaoga faaleagaga.” (Mataio 5:3, NW) O loo taumafai le au faipisinisi a le lalolagi e taʻitaʻiseseina i tatou i mafaufauga faapea o le faatauina o mea taugata ua lava lena mo le fiafiaga. Ua taʻu mai ia i tatou e faapea o le fiafiaga o le iai lea o se masini komepiuta i le fale, o se meapuʻeata, o se telefoni, o se taavale, o mea tau taaloga ia ua aʻe mai nei, po o so o se ituaiga o aʻega fou o lavalava. O le mea e lē o taʻuina mai ia i tatou, o le faitau sefulu miliona o tagata i le lalolagi latou te lē o mauaina nei mea ae e lē o matuā faanoanoa tele ai. A o faia le olaga ina ia sili atu ona faamalieina ma aogā, e lē tāua la nei mea i le fiafiaga.

E pei ona sa faia e Paulo, o i latou o ē naunau i o latou manaoga faaleagaga ua faapea mai: “Afai ua maua e i tatou o mea e aai ai ma mea e oofu ai, ia gata ai o tatou manao.” (1 Timoteo 6:8) Aiseā? Auā o le faamalieina o manaoga faaleagaga e taʻitaʻiina atu ai i le ola e faavavau.—Ioane 17:3.

Pe sese le olioli i mea lelei pe afai tatou te maua ni tupe e faatau ai? Atonu e leai. E ui i lea e faamalosia ai pea lo tatou itu faaleagaga, ia aʻoaʻoina ai le aua le tosina i mea matalasi uma po o le faatau o se mea talu ai e lava a tatou tupe e faatau ai. Ua tatou aʻoaʻoina ai le loto malie ma le faatumauina o le fiafiaga, e pei ona sa faia e Iesu, e ui lava sa lē lelei tele lona tulaga tau tamaoaiga e tusa ai ma tulaga o le lalolagi. (Mataio 8:20) Ma sa lē faaalia mai e Paulo se lē fiafia ina ua ia tusi mai: “Auā ua aʻoaʻoina aʻu ia toʻa filemu loʻu loto i mea ua ia te au. Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua aʻoaʻoina ai aʻu ia ou maʻona, ma ou fia ʻai, ia faulai mai mea, ma ia oge mea.”—Filipi 4:11, 12.

Faatuatua ia Ieova

O le naunau o se tasi i ona manaoga faaleagaga e faaalia ai le loto malie ia faatuatua i le Atua. Ua faia lenei mea mo le fiafiaga, e pei ona faamatala e le tupu o Solomona: “O lē faatuatua foi ia Ieova, amuia o ia.”—Faataoto 16:20.

E ui i lea, pe lē moni ea e toatele tagata ua tuu atu le faatuatuaga sili i tupe ma mea faitino na i lo le Atua? I le mātauina mai i lenei manatu, e matuā lē fetaui la le tusiaina i tupe o le faaupuga “Matou te Faatuatua i le Atua,” e ui lava o lena faaupuga o loo i le tupe a le Iunaite Setete.

 Na iloa lelei e le tupu o Solomona o lē sa lē mativa i se mea e tasi o na mea e faapea, o le faatuatua i le oa ma le tamaoaiga e lē taʻitaʻia atu ai i le fiafiaga tumau. (Failauga 5:12-15) E mafai ona leiloa tupe o loo i le faletupe pe afai e gau le faletupe ia po o le sii foi i luga o le tau o mea. E mafai ona faaleagaina laufanua totino i ni matagi malolosi. O faatulagaga foi mo le toe totogia o ni mea ua leiloa, e lē mafai ona totogia ai tau o faalogona. O le a lē toe aogā oloa ma fefaatauaʻiga pe afai o le a paʻū i lalo le tulaga tau tamaoaiga. E oo foi i se galuega e lelei le totogi—mo le tele o mafuaaga—e mafai ona aogā mo na o se taimi lē tumau.

Ona o nei mafuaaga, o lē o loo faatuatua ia Ieova ua ia iloaina le atamai o le faalogo i le lapataiga a Iesu: “Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai.”—Mataio 6:19, 20.

O le ā le isi mea e mafai ona maua ai le lagona saogalemu ma le fiafiaga na i lo le iloaina faapea o lē o loo tuu atu lona faatuatuaga i le Atua e Ona le Malosi Uma Lava, o lē foai tele mai?—Salamo 94:14; Eperu 13:5, 6.

Talia Aʻoaʻiga Mai le Atua

Afai e aumaia e se uō moni se fautuaga, po o se aʻoaʻiga i le agaga o le alofa, ia taliaina ma le fiafia. Na faaleo atu e se uō pepelo faafiaamiotonu a le auauna a le Atua o Iopu i se tasi taimi e faapea: “Amuia le tagata ua aoaiina e le Atua.” E ui lava e moni le manatu, o le mea na fai atu ai Elifasa e ala i nei upu—e faapea o loo tigaina Iopu i se sese matuiā—sa lē saʻo. Pagā se ‘faamafanafanaga pepelo’! O lea, ina ua aʻoaʻia mulimuli ane e Ieova Iopu i se auala alofa, sa talia ma le loto maulalo e Iopu le aʻoaʻiga ma maua ai e ia le fiafiaga sili.—Iopu 5:17; 16:2; 42:6, 10-17.

I aso nei, e lē o fetalai tuusaʻo mai le Atua i ana auauna e pei ona sa ia faia ia Iopu. Na i lo lena, o loo ia aʻoaʻia i latou e auala mai i lana Afioga ma lana faalapotopotoga o loo taʻitaʻia e lona agaga. Ae peitai, o Kerisiano o loo faamuamuaina le tāua o mea faitino, e masani lava ona leai se taimi, se malosi, ma se uaʻi atu e suesue le Tusi Paia e lē aunoa, ma auai i sauniga uma ua saunia e le faalapotopotoga a Ieova.

O le tagata e aʻoaʻia e le Atua, e tusa ai ma le Faataoto 3:11-18, ua na iloaina le atamai o le taliaina o na aʻoaʻiga: “Amuia le tagata na te maua le poto, ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lea i le auro. E sili ona lelei o ia i penina; ma au mea faafiafia uma lava e le tusa ma ia. O loo i lona lima taumatau le ola tuluʻi; a o i lona lima tauagavale le oloa ma le viiga. O ona ala o ala matagofie; ma ona magāala uma o i ai le manuia. O ia o le laau o le ola i e tago atu ia te ia; amuia foi i latou o e taofi atu ia te ia.”

Ia Mamā ma Fiafia i le Filemu

Na faamatalaina e Iesu tagata fiafia e “loto mamā” ma “faatupuina le filemu.” (Mataio 5:8, 9) Ae i se lalolagi o loo faamalosia ai le ituaiga o olaga matapeapea i mea faitino, pagā le faigofie ona mauaʻa ai i o tatou loto le faanaunauga o le manatu faapito, atonu e tusa lava pe lē mamā! Afai e lē taʻitaʻia e le atamai mai le Atua, pagā le faigofie ona faaseseina o i tatou i le sailia o tupe ia tele i auala lē faamaoni o le a faaleagaina ai le faiā filemu ma isi! E mautinoa, o se mafuaaga tatau ua lapatai mai ai le Tusi Paia: “O le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tuʻia ai ua ati i latou e i latou i puapuaga e tele.”—1 Timoteo 6:10.

O le manao i tupe e faamalosia ai le vaaiga fia sili lena e faateleina ai le lē faamalieina, le lē loto faafetai, ma le matapeapea. Ina ia taofia lena ituaiga o agaga mai le tuputupu aʻe, o nisi Kerisiano ua latou fesili ifo ia i latou lava a o leʻi faia ni faaiʻuga i mea tau tupe e  faapea: Po o oʻu manaomia moni ea lenei mea? Po o oʻu manaomia ea lenei mea taugata po o lenei galuega e lelei lona totogi e faaalu ai le taimi e sili atu na i lo le faitau miliona o tagata latou te lē o mauaina? Pe atonu foi e sili ona lelei le faaalu o aʻu tupe po o loʻu taimi i le faateleina o loʻu sao i le tapuaiga moni, i le lagolagoina o le galuega talaʻi i le lalolagi aoao, po o le fesoasoani atu foi i tagata e lē tele ni a latou mea na i lo o aʻu?

Faaalia le Onosai

O le tasi o tulaga faigata na taumafai Iopu ina ia onosaia, o le aveesea lea o ana mea totino. (Iopu 1:14-17) E pei ona faaalia mai i lana faaaʻoaʻoga, e manaomia le onosai i vala uma o le olaga. O nisi Kerisiano e tatau ona onosai i lalo o sauāga; o isi e manaomia le onosai i tofotofoga; a o isi e tatau ona onosai i tulaga lē lelei tau le tamaoaiga. Peitai, e tauia e Ieova le tumau i so o se ituaiga o tofotofoga, e pei ona sa tusi mai ai le soʻo Kerisiano o Iakopo e faatatau ia Iopu: “Ua tatou taʻuamuia i e onosai.”—Iakopo 5:11.

O le faatamala i manaoga faaleagaga ona o le manatu ina ia faaleleia lo tatou itu tau tamaoaiga, atonu o le a maua ai se saolotoga lē tumau, ae pe o le a fesoasoani ai ea e faatumauina le manino o la tatou vaaiga i le saolotoga tumau i lalo o le Malo o le Atua? Pe o se mea lē mautinoa?—2 Korinito 4:18.

Mauaina o le Fiafiaga Nei ma le Faavavau

O nisi ua latou fesiligia le finagalo o Ieova i le mea e maua ai e tagata le fiafia. Ona o le lē vaaia o ni aogā totino i le faia o mea ua faatonuina e le Atua, ua lē faatāuaina ai e i latou aogā tumau e sili ona tāua. Ua lē taulau ona latou iloa e faapea, o le faatuatua i mea faitino e lē aogā ma e taʻitaʻiina atu ai i le lē mautonu. Na fesili mai ma le saʻo le tusitala o le Tusi Paia: “Pe a faateleina mea lelei, e faatoateleina foi o e aai ai; se a foi se mea ua maua ai e i latou e a latou ia mea, ua na ona vaai i ai o latou mata?” (Failauga 5:11; tagai foi i le Failauga 2:4-11; 7:12.) Pagā le vave ona mou ese o le fiafia i mea sa tatou manatu e tatau ona mauaina, ua iʻu ina aveesea ma ua galo!

O se Kerisiano moni e lē tatau ona omia o ia i le fia faatautavā i ona tuaoi. Ua ia iloa o lona aogā moni ua uma ona fuaina, e lē o iai i mea ua maua e se tasi, ae i le ituaiga o tagata e iai se tasi. E leai la se tau masalosalo i lona mafaufau e uiga i le mea e manaomia ina ia faafiafiaina ai se tasi—o le fiafiaga moni: o le olioli lea i se faiā lelei ma Ieova ma ia faaauau ona faia mea e tele i Lana auaunaga.

[Ata i le itulau 20]

E lē mafai i le mauaina na o mea faitino ona aumaia ai le fiafiaga tumau

[Ata i le itulau 22]

Fai mai le Tusi Paia: “Amuia i latou o e naunau i o latou manaoga faaleagaga”