Aiseā e Fesiligia ai le Saʻo Aʻiaʻi o le Tusi Paia?

O le ā sou manatu i le Tusi Paia? Ua talitonu ma le mausalī nisi e faapea o le faaaliga lea a le Atua i tagata. O isi e talitonu ua na o se tusi e masani ai. Ae ua lē mautonu pea nisi. Afai o loo iai pea ni ou masalosaloga e uiga i le amataga o le Tusi Paia, o loo iai la mafuaaga malolosi e ao ai ona e suesue i ai ina ia faaleleia ai le finauga.

SA FAAALOALOGIA tele le Tusi Paia, o le Afioga a le Atua i atunuu Kerisinetoma seia oo i lona 18 o senituri. Ae mai le senituri lona 19 ma faasolo mai ai, na amata ai ona faatoateleina le aofai o tagata aʻoga, saienitisi, ma e oo foi i faifeau ma taʻitaʻi lotu ua latou faaalia i le lautele ni masalosaloga e uiga i le saʻo aʻiaʻi o le Tusi Paia.

O le iʻuga, ona o le matuā salalau solo o faitioga e uiga i le Tusi Paia, ua toatele ai i latou e faia faaiʻuga e aunoa ma le iloaina o mea o i totonu o le Tusi Paia. Na i lo le saili i le Tusi Paia, o le toatele o tagata i Kerisinetoma ua latou saili atu nei i filosofia a tagata. Ae ua lē aumaia ai lava e filosofia faaonaponei se lalolagi e sili ona fiafia ma saogalemu. O se tasi lena o mafuaaga lelei e ao ai ona suesueina le Tusi Paia ma tagai i ai pe iʻu ana taʻiala i le fiafiaga ma le manuia.

O se tasi mafuaaga e siligia ai le saʻo aʻiaʻi o le Tusi Paia, o le faamoemoe ofoofogia lea o loo ia ofoina mai mo tagata. Mo se faaaʻoaʻoga, ua faapea mai le Salamo 37:29: “E fai lava le nuu mo tagata amiotonu, e nonofo ai pea i latou.” (Faaaliga 21:3-5) O le ā le uigā o na folafolaga ia te oe? E mautinoa ua lava na folafolaga e fai ma mafuaaga e suesueina ai le Tusi Paia ma tagai i ai pe e mafai ona faatuatuaina.

E faasilisilia pea e lenei mekasini le moni atoatoa o le Tusi Paia ma ua masani ona aumaia ai faamaoniga o lona saʻo aʻiaʻi. E tele vaega e mafai ona siligia ai le saʻo aʻiaʻi o le Tusi Paia. O le a fesoasoani ia te oe lomiga eseese o Le Olomatamata e taliina nei fesili: Pe o tutusa ea mea moni taatele o talafaasolopito anamua ma le Tusi Paia? Pe e saʻo ea ona valoaga? Pe e aogā ana fautuaga, po ua faamaonia e tagata aʻoaʻoina ma le au faifilosofia i aso nei e faapea ua lē toe aogā le Tusi Paia?

O suesuega i vaipanoa uma o le lalolagi o se tasi lea o vaega e mafai ona e siligia ai le saʻo aʻiaʻi o le Tusi Paia. O talitonuga faapaupau po o tala faafagogo e masani lava ona feteenai ma tala i mea moni o le lalolagi. Mo se faataʻitaʻiga, e toatele tagata i aso anamua na latou taʻuina mai ni tala i faigamalaga i le nofoaga ua taʻua o le lalolagi o ē ua oti. E tusa ai ma tagata Eleni anamua, ua faamatala mai e le tusi o le Guide to the Gods e faapea: “Sa foliga mai le lalolagi o se mea mafolafola o loo siomia e se faaputuga o vai e taʻua o le Vasa. I ona tala atu o loo iai se isi Olaga, o se laufanua matagā e tumu i le pogisa ma laau e lē fua mai.” Ina ua faamaonia lenei mea o se tala faafagogo, sa toe suia ai loa e le au faifilosofia faapaupau le nofoaga sa latou  taʻua o se isi olaga. Fai mai le faamatalaga a le tusitala o Richard Carlyon: “Sa maua se nofoaga fetaui i lalo o le lalolagi, e fesootai ma lenei lalolagi e ala i ana eseese.” I aso nei, ua tatou iloa foi o se tala faafagogo lena mea. E leai lava se lalolagi faapena o i lalo po o se ala o i ai.

I le lē pei o tala faafagogo a tagata anamua, e lē o iai i le Tusi Paia le manatu taufaasese e faapea o le lalolagi e mafolafola. Na i lo o lena, o loo taʻua ai le mea moni faasaienisi e faapea, o le lalolagi e lapotopoto ma e leai se mea o tautau ai. (Iopu 26:7; Isaia 40:22) Ae faapefea isi faamatalaga o le lalolagi o loo taʻua i le Tusi Paia? Pe o ni talafatu ea, pe e mafai ea ona vaai faalemafaufau i le saʻo aʻiaʻi o mea o loo taʻua i le Tusi Paia pe a asiasi atu i Aikupito o aso nei, e aofia ai le Penisula o Sinai, ma Isaraelu o ona po nei?

[Ata i le itulau 3]

“O ia lē tietie i luga o le faataaliolio o le lalolagi.”—Isaia 40:22

“Ua ia . . . tautauina le lalolagi, a e leai se tautaulaga.”—Iopu 26:7