Fesili Mai le Au Faitau

Talu ai ona e lē pelē tupe Kerisiano, pe e mafai ea ona latou talia se pepa lūlū pe auai i se seʻigā pepa lea atonu e manumalo ai i ni faailoga?

O le fesili lenei ua lagā mai pea i lea taimi i lea taimi, o lea na lomia ai i a tatou lomiga. I nisi gagana, ua uma ona tatou saunia ai faasinotusi o a tatou lomiga, e pei o le Watch Tower Publications Index 1930-1985 (ma le isi foi tusi faapena o loo tāaofaia ai mataupu mai le 1986-1990). Afai o iai i se Kerisiano na faasinotusi i lana lava gagana, e mafai ona matuā aogā tele nei faasinotusi i le vave mauaina o ni tali faamalie loto.

O se faaaʻoaʻoga la o le fesili e pei ona lagā i luga. Afai e te tagaʻi i le Index o le 1930-1985 i lalo o le ulutala “Fesili mai le Au Faitau,” atonu e te mauaina ai le tamai ulutala “‘seʻigā pepa,’ pe e talia e ni Kerisiano ni pepa mo lena fuafuaga?” O loo faasino ai le tagata faitau i le vaega o “Fesili mai le Au faitau” i le Watchtower o Fepuari 15, 1973, itulau e 127. * E toatele Molimau a Ieova e iai a latou tuufaatasiga (po o kopi taitasi) o le Watchtower o le 1973, ia pe saili foi i potu tusi i le tele o Maota o Malo.

O le mataupu o loo lomia i le 1973 ua faasino mai ai le tatau i se Kerisiano ona alofia so o se taaloga fai tupe po o ni seʻigā pepa e aofia ai le faatauina o pepa e pei o pepa lūlū po o le totogiina o tupe ina ia manumalo ai i ni faailoga. Ina ia faafaigofie le manatu, tatou te alofia so o se ituaiga o pelēga tupe, ia e faaalialia moni ai le matapeapea.—1 Korinito 5:11; 6:10; Efeso 4:19; 5:3, 5.

E ui i lea, atonu e faaaogāina e se faleoloa po o se pisinisi seʻigā pepa o se auala lea mo faasalalauga. E pau lava la le mea e fai e se tagata o le auina atu lea o lona suafa pe tuuina atu foi se pepa faatumu (form po o se ticket), e aunoa ma le faatauina o se mea. O le seʻigā pepa o se vaega lea o le faasalalauga; ua fuafuaina o se auala e lē faailogaina ai le filifilia o se tagata o le a tuuina atu i ai se faailoga po o ni faailoga. O nisi Kerisiano atonu o le a manatu faapea e mafai lava ona latou taliaina se faailoga e maua mai i ni seʻigā pepa e lē aafia ai ni pelēga tupe, ae tau lava ina latou talia e pei lava o ni meaalofa e maua fua mai i se pisinisi po o se faleoloa i a latou polokalama tau i faasalalauga.

Peitai ane, o nisi Kerisiano e matuā alofia lava ia ituaiga o faiga, latou te lē mananao e faatausuai pe faaseseina isi ma latou te saili foi ina ia faamamao mai faatosinaga e faatuatuaina ai na ituaiga o manuia. E pei ona faaalia i le Isaia 65:11, e lē tatau i auauna a le Atua ona latou fesootai atu i “le ʻai mo Kato (le atua o Manuia)” po o “mea e inu mo Meni (le atua o Taunuuga Lelei).” Atonu foi latou te manatu faapea latou te lē mananao e avea ma vaega o le faasalalauga lautele o tagata lea e manaomia ona auai ē manumalo. O i latou o loo manatu faapea, e mautinoa le lē tatau ona faitioina se Kerisiano po o ni Kerisiano o loo faatagaina i latou e o latou loto fuatiaifo ina ia aafia i ia ituaiga o seʻigā pepa.—Faatusatusa i le Roma 14:1-4.

[Faaopoopoga i lalo]