Pe E te Faaaloalo i Lou Nofoaga o le Tapuaiga?

“Mai le amataga lava o le tala lelei, sa masani ona faataatia ma filifilia lelei e Kerisiano le nofoaga mo le tapuaiga i le Atua.”—“Primitive Christianity,” a William Cave

E MASANI ona maua e tagata o le Atua le fiafiaga pe a potopoto faatasi mo le tapuaiga. Sa moni lenei mea i tuā i le uluai senituri, e pei foi ona iai i aso nei. O uluai tusitala ma tagata aʻoga faafaifeau, e pei o Lucian, o Clement, o Justin Martyr, ma Tetuliano, na ioe uma i latou e faapea, sa iai nofoaga faapitoa e tatau ona faapotopoto faatasi ai Kerisiano mo le tapuaiga i se faavae faifai pea.

Ua faailoaina mai e le Tusi Paia lea mea i le tele o faamatalaga o sauniga e lē aunoa sa faia i vaega eseese o Kerisiano. Sa taʻua nei vaega o ni faapotopotoga. Ua talafeagai lelei lenei mea auā o le upu ‘faapotopotoga’ i le uluai gagana a le Tusi Paia o lona uiga, o se vaega o tagata ua potopoto faatasi mo se fuafuaga faapitoa po o se galuega.

Uluai Nofoaga o le Tapuaiga faa-Kerisiano

O le ā le mea sa faia e Kerisiano o le uluai senituri ina ua latou potopoto faatasi? Ua faamatala mai e le Tusi Paia le tele o na sauniga, ma faaalia ai e faapea, sa avea le aʻoaʻo atu o sona vaega tāua. (Galuega 2:42; 11:26; 1 Korinito 14:19, 26) Sa fuafuaina polokalama faaleaʻoaʻoga, o lauga, le faailoaina o mea na tutupu e faalaeiau ai ma iloiloina ai ma le faaeteete tusi sa maua mai i le vaega pule i Ierusalema pe mai se aposetolo.

I le Galuega 15:22-35, ua tatou faitau ai e faapea, ina ua uma ona faitauina e Iuta ma Sila se tasi o na tusi i le vaega o Kerisiano i Anetioka, ona la “faamalosi atu lea i le au uso i upu e tele.” O le tasi tala o loo faamauina e faapea, ina ua oo atu Paulo ma Panapa i Anetioka, “ona la faapotopotoina lea o le ekalesia, ma faamatalaina atu mea uma na faia e le Atua e i laua.” O le tatalo foi ia Ieova o se tasi lea o vaega tāua o sauniga faa-Kerisiano.—Galuega 14:27.

Sa lē avea nofoaga e potopoto faatasi ai mo le tapuaiga i le uluai senituri o ni fale e sili ona tetelē e pei o falesa ua faia e le tele o lotu a Kerisinetoma i aso nei. Mo le tele lava o vaega, sa potopoto ai uluai Kerisiano i ni fale totino o aiga. (Roma 16:5; 1 Korinito 16:19; Kolose 4:15; Filemoni 2) Sa masani lava ona faaaogā se potu e pito i luga o le fale o se aiga. E pei lava ona faaaogā le potu pito i luga o le fale o se aiga mo le Talisuaga Afiafi a le Alii. Sa faapena foi ona faauuina le au soʻo e toʻa 120 i le agaga paia i le aso Penetekoso a o iai i le potu aupito i luga.—Luka 22:11, 12, 19, 20; Galuega 1:13, 14; 2:1-4; 20:7, 9.

O loo mulimuli Molimau a Ieova i aso nei i le faatulagaga lava lea e tasi na faataatia e le au aposetolo. Latou te faaaogāina nofoaga mo sauniga e pei ona silafia ai o Maota o le Malo. O i inā e aʻoaʻoina ai i latou o ni tagata talaʻi o le tala lelei o le Malo o le Atua. (Mataio 24:14) I le Maota o le Malo, latou te suesueina ai foi le Tusi Paia, e fai ai tatalo, ma faalaeiau ai le tasi i le isi. Ua ōgatasi lenei ma le faamatalaga ua taʻua i le Tusi Paia i le Eperu 10:24, 25 e faapea: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.”

Ia Faaaogā Lelei lo Tatou Nofoaga mo le Tapuaiga

Po o e manatua upu a le aposetolo o Paulo: “Auā o le Atua, e le o le Atua ia o le faasoesa, a o le filemu” ma “Ia faia mea uma lava ma le matagofie ma le sauni lelei”?  Afai e te suesueina le faalauteleina o nei upu, o le a e iloaina ai e faapea, sa talanoaina e Paulo le tomai e tatau ona faia ai sauniga faa-Kerisiano. E pei ona iai i taimi o le au aposetolo, e ao i Kerisiano i aso nei ona faamautinoa o loo faia a latou sauniga i se auala faasolosolo lelei ma ia pulea.—1 Korinito 14:26-40.

O loo faapea mai le lomiga o le Watchtower o Oketopa 15, 1969: “O le siomaga faaleagaga i le Maota o le Malo e moni, e sau mai se faanaunauga saʻo mo le tapuaiga moni ma faatonuga mai le Tusi Paia. O loo siomia le maota i le malamalama, e faamalosia ai i latou o auai ina ia feofoofoaʻi ma faaleuō, ae lē o ni faasasaaga ona o ni tu faalilolilo faalotu.” O le mea moni, e ao foi ona faaalia le manatu mamafa ina ia faaaogāina ai le Maota o le Malo i se auala e atagia mai ai le faaaloalo ma le mamalu.

Ua faaalitino mai lava e Kerisinetoma le matuā leai o se faaaloalo i nei nofoaga. E faaaogāina e nisi faalapotopotoga lotu o latou nofoaga e avea ma ogatotonu o faafiafiaga faaleaganuu. Ua latou faia ni avanoa i totonu o na nofoaga e fai ai koneseti o musika rock, o potu mo siisiiga o uamea mamafa, o laulau piliati, o se potu e fai ai togafitiga faafomaʻi, ma potu mo tifaga. Sa faia e se tasi lotu se taaloga o piʻiga, o se vaega o la latou polokalama. E matuā lē talafeagai nei mea ma le faatulagaga na faataatia e le au aposetolo.

Afai sa iai se tasi o le faapotopotoga i le uluai senituri sa gaoioi ma le lē saʻo, sa tatau ona faasaʻoina. Mo se faaaʻoaʻoga, sa faaaogāina e nisi i le faapotopotoga Kerisiano i Korinito le faamanatuga o le Talisuaga Afiafi a le Alii ma avanoa e aai ma feinu ai. E ō mai ma aumai a latou meaʻai e aai ai a o leʻi faia le sauniga, ia po o le taimi foi a o faia le sauniga, latou te aai ai, e iʻu lava ina soona aai ma soona feinu ai nisi. E matuā lē fetaui lava lenei mea. O lea na tusi atu ai le aposetolo o Paulo ia i latou: “E leai ea lava ni o outou fale tou te aai ai ma inu ai?”—1 Korinito 11:20-29.

I le ōgatasi ma le fautuaga a Paulo, e taumafai Molimau a Ieova e tausia o latou tulaga totino i le aiga po o se isi mea na i lo le faia i le Maota o le Malo. E moni, o lo tatou auai e lē aunoa i a tatou sauniga, o le avanoa lelei lea e feiloai atu ai i le toatele o uō ia e seāseā e vaai i ai. Peitai, o le Maota o le Malo ua tuuina atu mo Ieova, o lea e tatau ona faaaogā atoatoa mo lana tapuaiga. Tatou te lē faaaogāina le avanoa lea tatou te auai ai i le sauniga e fai ai pisinisi faaletino po o le faia ai o ni fefaatauaiga tau tupe.

Ae lē gata i lea, e lē faaaogāina foi le Maota o le Malo mo polokalama o faafiafiaga a le faapotopotoga, galuega suʻe tupe, po o le auaunaga i le lautele, e pei o le vaaia o fanau. O loo iai isi nofoaga e mafai ai e se tasi ona faia na mea totino ma tulaga faapisinisi.

Na mātauina e toeaina e faapea, ua faaaogāina le Maota o le Malo e le faapotopotoga e fai ai a latou aisiga ma le fefaafoiaʻiga o mea i le taimi o sauniga. E lē gata i lea, ua fai ma a latou masani le fesuiaʻi o ata vitiō i le Maota o le Malo. E ui lava o lenei gaoioiga sa le masani ai, peitai sa fesoasoani le au toeaina ia i latou ia iloa le atamai o le vaaia o ia mea i le aiga ma so o se mea e talafeagai ai.

Ina ia alofia tulaga e ono aumaia ai faalogona sese ma ia mautinoa o loo faaaogāina tatau le Maota o le Malo, e ao i tagata taitoatasi ona fesili ifo ia te ia lava: ‘Po o iai ea ni mea totino ua ou faia i le Maota o le Malo, na e mafai ona ou faia i le aiga?’  Mo se faaaʻoaʻoga, pe a fuafua se evaga po o ni faatasitasiga i le lautele, pe lē sili ea ona lelei le talanoaina o na fuafuaga i le fale? Pe mafai ona tatou faaaogāina le telefoni po o le asiasi atu i fale o i latou ia tatou te mananao e faafesootai? O le aumaia o upu a Paulo, e mafai ai ona tatou faapea: “E mautinoa ua iai o tatou fale mo le taulimaina o na tulaga, a ea?’

Se Taimi Faapitoa ma le Nofoaga e Tapuai ai ia Ieova

Fai mai le Tusi Paia i le Failauga 3:1: “O le mea ma lona tausaga i mea uma, ma ona lava po i mea uma lava i lalo o le lagi.” Pe a auai i le sauniga i le Maota o le Malo, e mafai ona tatou uaʻi totoʻa atu i gaoioiga na e fesootai ma le faiva faa-Kerisiano. O le taimi faapitoa lena mo le tapuaiga ia Ieova.

Na avatu e le ʻafa uso o Iesu o Iakopo le fautuaga e faatatau i le faaalia o le faailoga tagata i totonu o le faapotopotoga Kerisiano. (Iakopo 2:1-9) E mafai faapefea ona tatou faatatauina lenei fautuaga i o tatou Maota o le Malo? E mafai ona faailoa atu le faailoga tagata pe a tufatufa atu ni valaaulia tusitusia mo ni faatasitasiga lautele o loo faia ai i inā. O le masani a se tasi faapotopotoga, o le tuu lea o na valaaulia i ato tusi po o Tusi Paia a i latou o loo auai. O le mea moni, e sili atu ona lelei lea na i lo le auina atu o le valaaulia i le meli po o le tufaina atu ia i latou i aiga taitasi. Ae peitai, o le ā se lagona o i latou e leʻi maua se valaaulia ina ua uma ona latou iloa faapea sa tufaina atu tusi valaaulia i isi tagata taitoatasi? Pe mafai e lenei mea ona faaalia ai le naunautai moni?

O le mea moni, e leai se tulafono o faapea mai e lē mafai e se tasi ona tufaina atu se feau faaletagata po o se afifi a o iai i le Maota o le Malo; e lē sese foi le talanoa i le Maota o le Malo e uiga i gaoioiga e masani ai po o mea tutupu, le valaaulia o se tasi i lou fale, po o le fai atu foi i se isi ina ia faatasi atu ma oe i ni faafiafiaga. Peitai, o nei mea uma e ao ona faia na o oulua, ma ia faia i se auala lelei ma le faautauta. O fuafuaga totino e lē tatau ona aveesea mai ai le faamoemoe moni o lo tatou aufaatasi i le Maota o le Malo, ae maise lava, ia atiaʻe ai faaleagaga.—Mataio 6:33; Filipi 1:10.

O Tane o Ē Faataatiaina le Faaaʻoaʻoga

O toeaina ma auauna o le faiva, e maelega i le faataatiaina o le faaaʻoaʻoga i le faaalia o le faaaloalo mo le Maota o le Malo. E masani lava e toatasi pe toalua toeaina ma auauna o le faiva e tofia e vaaia tulaga e faatatau i le tausia o le Maota o le Malo. I nofoaga e faaaogā ai se maota e tasi e le sili atu i le tasi le faapotopotoga, e vaaia la e se komiti o toeaina ia tulaga.

E ui lava ina tofia faapitoa tagata e vaaia nei tiute, ae e ao i toeaina ma auauna uma o le faiva ona faaalia le naunau moni i le maota. Ua latou iloa e faapea, o le Maota o le Malo ua uma ona tuuina atu ia Ieova ma ua faaaogā mo lana tapuaiga.

E lē tatau i toeaina ona tuuesea se mea o loo manaomia ona faia pe afai o loo manaomia ona toe faaleleia. (2 Nofoaiga a Tupu 24:5, 13; 29:3; 34:8; Neemia 10:39; 13:11) I nisi faapotopotoga, ua faia ai ni faasologa faifai pea mo le vaaia o le Maota o le Malo ina ia vaaia lelei ni mea o loo manaomia ona faaleleia. E faapea foi ona vaaia lelei pepa o faamaumauga mo tusi ina ia faamautinoa o loo lava ma totoe tusi ma lomiga. Afai o iai se nofoaga faapitoa e tuu ai tusi, o mea faigaluega, ma mea e faamamā ai le maota, e ao i toeaina ma auauna o le faiva ona faaalia atu le naunau i le tulaga o na mea, ma ia faamautinoa o loo tausia pea ia mamā. O i latou o loo galulue i le vaaia o tusi ma mekasini, e mafai ona faaalia le naunau e ala i le tagai i ai ua tiai uma atigipusa, ae lē o le faapaepae solo i totonu o le maota.

E ala i le faataatia o se faaaʻoaʻoga, e mafai ai e toeaina ma auauna o le faiva ona fesoasoani atu i le toatele o le faapotopotoga e faatinoina le maelega mo le Maota o le Malo. (Eperu 13:7) E mafai e tagata uma lava ona  faaalia le faaaloalo tatau i le faia o se vaega i le faamamāina o le maota e ala i le faaalia o le naunau moni i ona vaega eseese uma.

Na fetalai Iesu i le Mataio 18:20: “O le mea ua faapotopoto ai se toalua, po o se toatolu i loʻu igoa, ou te i ai faatasi ma i latou.” Ioe, e naunau Iesu i le mea tatou te faia pe a tatou potopoto faatasi e tapuai ia Ieova. E aofia ai i lenei mea so o se sauniga e faia i ni fale faapitoa ma sauniga tetele e pei o tauaofiaga ma fonotaga.

Mo le faitau miliona o Molimau a Ieova, e leai lava se isi nofoaga e sili atu ona latalata i o latou loto na i lo o latou nofoaga e tapuai ai e lē aunoa, le Maota o le Malo. Latou te faaalia le faaaloalo tatau mo lena nofoaga. Latou te faatinoina lo latou agaga tausimea i le vaaia faalelei, ma latou te taumafai pea lava pea e faaaogāina tatau. Tau ia ina ia e mulimuli i le faatulagaga ua tuuina mai e Ieova lava ia: “Ia e faaeteete i ou vae pe a e alu i le fale o le Atua.”—Failauga 5:1.