Sa Ia Tau mo Lona Faatuatua

I LE tolu tausaga ua mavae na manaomia faavavevave ai e Caridad Bazán Listán, o se tasi o Molimau a Ieova i Cádiz, i Sepania, se taotoga. O fatumaa na avea ma pogai o le fiva ma iʻu ai ina ‘ona lona toto. Ina ua taofia o ia i le falemaʻi o lo latou lava atunuu, sa ia faamatalaina i fomaʻi lona tulaga faale-Tusi Paia i le teena o so o se tuigā toto ia te ia. Sa malilie fomaʻi e faia le taotoga e aunoa ma se toto. E ui i lea, toe lava o sina taimi puupuu ona aveina lea o ia i le potu mo le taotoga, ae talosaga ane loa fomaʻi ina ia sainia se pepa faamaonia. O lea pepa e faaalia ai faapea ua latou naunau e faaaloalogia lana faaiʻuga e tusa ai ma le toto ae peitai afai o le a tulai mai se tulaga e manaomia faavavevave ai le toto, latou te manaomia sona maliega e taliaina ai so o se togafitiga ua talitonuina e talafeagai.

Sa iai se toeaina o le faapotopotoga ma le tama tama Molimau a Caridad i le falemaʻi, ma na la fautuaina Caridad e faatatau i aafiaga po o iʻuga e oo i ai pe a sainia se pepa faapea. O lona sainia o le pepa o le a faatagaina ai fomaʻi e tui le toto pe afai e tupu se faalavelave faafuasei. Ina ua ō mai tagata faigaluega o le falemaʻi e ave o ia i totonu o le potu tipitipi, sa ia faamatalaina i ai na te lē sainia le pepa. I lena lava taimi na toe ave faatopetope atu ai le tuafafine i lona potu ma ua faia i ai ni omiga matuā malolosi ina ia suia ai lona mafaufau.

Ina ua maeʻa ni nai talanoaga ona latou filifili lea e aami le faamasino na te faatalitonuina o ia ina ia suia ai lona mafaufau, peitai sa lē aogā la latou taumafaiga. Sa faamatalaina e Caridad o se agasala lenei mea i luma o le Atua pe afai o le a ia faatagaina i latou e tui mai se toto ia te ia. Sa ia faasino atu i latou i le Tulafono faa-Mose e faapea, afai e toso faamalosia se fafine, e lē mafai ona faapea ua agasala o ia pe afai na te teena lea gaoioiga e ala i le eē mo se fesoasoani. (Teuteronome 22:23-27) Sa fai mai o ia “O loo talituālimaina e fomaʻi oʻu manaoga ma latou taumafai e faaleagaina loʻu loto fuatiaifo, o lea e tatau ai ona ou teena e pei ua latou toso faamalosi ia te au.”

Na mavae ni nai itula, ma mulimuli ane ua malilie fomaʻi e fai lona taotoga e aunoa ma se toto. Sa talosagaina e Caridad se avanoa e tatalo ai ia Ieova. Na fai lana tatalo ma na iʻu manuia lona taotoga.

E ui i lea, na tigaina tele Caridad mulimuli ane ma na filifili ai loa fomaʻi e faaleaogāina lona manao ae faamalosi ona tui atu le toto ia te ia. O lea na sauni ai loa se fomaʻi ma se tamaitai fomaʻi e faia lea gaoioiga. E ui lava ina matuā tigaina Caridad, ae sa ia teena malosi le toto. Sa oo lava ina mafai ona ia ūina le faagaʻau lea e alu atu ai le toto i lona tino. Mulimuli ane, na matuā masiasi le fomaʻi i le mea ua latou faia ma na iʻu ai ina faamaamulu ma faapea mai: “E lē mafai ona ou faamaeʻaina lenei taotoga. Ua siliga aʻu taumafaiga!”

Na faasaoina Caridad mai nei fitā ma ua toe manuia e aunoa ma nisi faigata na toe tulai mai. E aunoa ma se faaletonu na faagaeetia uma fomaʻi ma tamaitai fomaʻi i le faatuatua o lenei tuafafine ma lona loto tele. O nei mea uma na tutupu ina ua 94 tausaga o Caridad.