Kerisiano ma le Sosaiete o Tagata i Aso Nei

“E inosia foi outou e nuu uma ona o loʻu igoa.”—MATAIO 24:9.

1. O le ā sa fai ma faailoga e matilatila ai le Faa-Kerisiano?

O LE vavae ese mai le lalolagi o se faailoga lea sa matilatila ai uluai Kerisiano. Ina ua tatalo Iesu i lona Tamā faalelagi o Ieova, sa ia taʻua e uiga i ona soʻo: “Ua ou tuu atu lau afioga ia te i latou; ua ʻinoʻino foi le lalolagi ia te i latou, auā e le ni o le lalolagi i latou, faapei o aʻu, ou te le so le lalolagi aʻu.” (Ioane 17:14) Ina ua molia atu ia Ponotio Pilato, na taʻua ai e Iesu: “E le mai le lalolagi nei loʻu malo.” (Ioane 18:36) O le vavae ese o le uluai Faa-Kerisiano mai le lalolagi ua faamaonia mai e Tusitusiga Kerisiano Eleni ma tusitala o talafaasolopito.

2. (a) Pe o le a iai ea se suiga i le faiā a soʻo o Iesu ma le lalolagi a o faagasolo taimi? (e) Po o le a oo mai le Malo o Iesu e ala mai i le faaliliuina o atunuu?

² Pe sa faaalia ea mulimuli ane e Iesu faapea o le a iai se suiga i le faiā a ona soʻo ma le lalolagi, ma o le a oo mai foi lona Malo e ala i le faaliliuina o le lalolagi i le Faa-Kerisiano? E leai. E leai se mea na faagaeeina ona soʻo e tusia ina ua mavae le maliu o Iesu, e oo foi lava i sina tau ataata mai o lea mea. (Iakopo 4:4 [na tusia a o toeitiiti oo i le 62 T.A.]; 1 Ioane 2:15-17; 5:19 [na tusia pe tusa o le  98 T.A.]) I le tuufaafeagai, ua faafesootai atu e le Tusi Paia le “faatasi mai” o Iesu ma le taunuuga o le “maliu mai” i le mana o le Malo ma “le gataaga o le faiga o mea,” e faatumutumu i lona “iʻuga,” po o le faaumatiaga. (Mataio 24:3, 14, 29, 30; Tanielu 2:44; 7:13, 14) I le faailoga lea na tuuina atu e Iesu mo lona pa·rou·siʹa, po o le faatasi mai, na ia fetalai ai e faatatau i ona soʻo moni: “Ona latou tuuina atu ai lea o outou i le puapuaga, ma latou fasiotia outou; e inosia foi outou e nuu uma ona o loʻu igoa.”—Mataio 24:9.

Kerisiano Moni i Aso Nei

3, 4. (a) Ua faamatalaina faapefea uluai Kerisiano e se encyclopedia faa-Katoliko? (e) O ā faaupuga tutusa ua faamatalaina ai Molimau a Ieova ma uluai Kerisiano?

³ O le ā le vaega faalelotu i aso nei ua onomea i ai le talaaga o le faamaoni i mataupu silisili faa-Kerisiano ma le vavae ese mai lenei lalolagi, ma o loo itagiaina ma sauāina ona sui? Ae, o le ā le faalapotopotoga faa-Kerisiano i le lalolagi aoao ua fetaui i ai so o se vala o faamatalaga faatalafaasolopito o uluai Kerisiano? E tusa ai ma i latou nei, ua faamatala mai e le New Catholic Encyclopedia e faapea: “E ui lava sa manatu i le taimi muamua e faapea o le uluai vaega o Kerisiano e faatatau i ai, ae ua iai nei se isi lotu i totonu o tagata Iutaia, ua faamaonia le tutasi i ana aʻoaʻoga faalelotu, ae maise o le maelega o ona sui, o ē ua auauna o ni molimau mo Keriso ‘i Iutaia uma ma Samaria e oo atu lava i tuluʻiga o le lalolagi’ (Galuega 1.8).”—Tusi 3, itulau 694.

⁴ Seʻi mātau faaupuga “sa manatu . . . ae ua iai nei se isi lotu,” “tutasi i ana aʻoaʻoga,” “maelega . . . o ni molimau.” Ae mātau la le faamatalaina o Molimau a Ieova e lena lava tusi e faapea: “O se lotu . . . e talitonu maumauai Molimau e faapea ua toe lava o ni nai tausaga ona oo mai lea o le iʻuga o le lalolagi. O lenei talitonuga olaola e foliga mai o se uunaiga ua sili ona malosi o loo uunaia ai lo latou maelega lē maluelue. . . . O le tiute tauave autū a sui taitasi o le lotu o le molimau atu lea ia Ieova e ala i le faasilasilaina o Lona Malo ua latalata mai. . . . Latou te manatu i le Tusi Paia ua na o lea le puna o lo latou talitonuga ma na te pulea amioga . . . Ina ia avea o se Molimau moni, e tatau i se tasi ona talaʻi atu ma le uigā i so o se auala.”—Tusi 7, itulau 864-865.

5. (a) O ā itu ua tutasi ai aʻoaʻoga a Molimau a Ieova? (e) Aumai ni faaaʻoaʻoga e faaalia ai o loo ōgatusa talitonuga o Molimau a Ieova ma le Tusi Paia.

⁵ O ā vala ua tutasi ai aʻoaʻoga a Molimau a Ieova? Ua taʻua e le New Catholic Encyclopedia nisi o na vala: “Latou [o Molimau a Ieova] te matuā tetee i le (Tolutasi) ona o se ifoga i tupua faapaupau . . . Latou te manatu ia Iesu o le Molimau silisili lea a Ieova, o ‘se atua’ (o la latou faaliliuga lena i le Ioane 1.1), ua na o Ieova e maualalo ifo ai o ia. . . . Na maliu o ia o se tagata ae toe faatūina aʻe o se Atalii agaga e lē mafai ona oti. O ona Mafatiaga ma lona maliu o tau ia na ia totogi atu ina ia toe maua ai e tagata le aiā mo le ola e faavavau i le lalolagi. O le mea moni, o le ‘motu o tagata e toatele’ (Ap 7.9) o Molimau moni o loo faamoemoe i se Parataiso faalelalolagi; e na o le 144,000 o ē faamaoni (Ap 7.4; 14.1, 4) e mafai ona olioli i le mamalu faalelagi faatasi ma Keriso. O le a faaumatia atoatoa ē amio leaga. . . . O le papatisoga—lea e faatino e Molimau e ala i le faatofuina . . . [o se] faailoaina atu i fafo o lo latou tuuina atu i le auaunaga ia Ieova le Atua. . . . Ua mataʻina Molimau a Ieova i le lautele i lo latou teena o tuiga toto . . . O a latou amioga i le liʻo o le faaipoipoga ma amioga faaleituaiga e matuā maumaututū.” Atonu e tutasi Molimau a Ieova i nei vala, ae o lo latou tulaga i nei itu uma ua faavae mausalī i le Tusi Paia.—Salamo 37:29; Mataio 3:16; 6:10; Galuega 15:28, 29; Roma 6:23; 1 Korinito 6:9, 10; 8:6; Faaaliga 1:5.

6. O le ā le tulaga ua tausisia e Molimau a Ieova? Aiseā?

⁶ Ua faaopoopo mai lenei tusi a le Katoliko Roma e faapea i le 1965 (e foliga o le tausaga lea na tusia ai le mataupu) “sa leʻi manatu ai  Molimau o i latou o se vaega o le sosaiete lea sa latou ola ai.” E foliga mai na manatu le tusitala e faapea, a o faagasolo taimi ma faatuputeleina le aofai o Molimau a Ieova, ma “faatuputupulaia uiga e avea ai o se lotu ua faamaonia na i lo o se lotu mavae,” o le a oo ai lava ina avea i latou ma vaega o lenei lalolagi. Peitai ua lē faamaonia lena tulaga. I aso nei, i le silia i le faafāina o le aofai o Molimau na i lo le aofai sa iai i le 1965, ua tausisia ai pea e Molimau a Ieova lo latou tulaga e tusa ai ma lenei lalolagi. “E le ni o le lalolagi i latou,” e faapei o Iesu foi sa “le so le lalolagi.”—Ioane 17:16.

Vavaeesea ae Lē Inoino i Ai

7, 8. E pei ona moni i uluai Kerisiano, o le ā foi la ua moni e uiga i Molimau a Ieova i aso nei?

⁷ I le siiina mai o le faamatalaga a le tagata faaaposetolo o le senituri lona lua o Justin Martyr, i lona puipuia o uluai Kerisiano, na tusia ai e Robert M. Grant i lana tusi o le Early Christianity and Society e faapea: “Ana faapea sa fouvale Kerisiano, semanū latou te lalafi ai pea ina ia mafai ona faataulau lo latou sini. . . . O i latou o ni tagata galulue e sili ona fiafia i ai le emeperoa ona o le fifilemu ma le maopoopo.” Ua faapena foi ona lauiloa Molimau a Ieova i aso nei i le lalolagi atoa, o ni tagatanuu e tausi i le filemu ma le maopoopo. Ua iloa e so o se faiga malo, e aunoa ma se mea latou te matataʻu ai i Molimau a Ieova.

⁸ Na tusia e se faatonu o se nusipepa i Amerika i Matu e faapea: “Ai seʻiloga o ni manatunatuga faualuga ona faatoʻā talitonuina lea faapea o loo taufaamataʻu atu Molimau a Ieova i so o se faiga malo faapolotiki; o i latou moni lava o se vaega faalelotu e lē taumafai e tetee i pulega a malo, ma e tausisi i le filemu.” I lana tusi o le L’objection de conscience (Teteega a le Loto Fuatiaifo), ua tusia ai e Jean-Pierre Cattelain e faapea: “E gauai atoatoa atu Molimau i faipule silisili ma usiusitai i tulafono; latou te totogia a latou lafoga ma e lē sailiili foi ina ia fesiligia, suia pe faaleagaina faiga malo, auā latou te lē faapopoleina i latou i mataupu a lenei lalolagi.” Ua faaauau pea ona faaopoopo mai Cattelain e faapea, seʻi vaganā lava ua tāpā e le Malo o latou ola ia ua latou tuutoina atu i le Atua, ona lē usiusitai loa lea o Molimau a Ieova. I lenei itu, ua latou matuā faataʻitaʻi ai i uluai Kerisiano.—Mareko 12:17; Galuega 5:29.

Tuuaʻiga Sese Mai Ē o i Pulega a Malo

9. E tusa ai o le vavae ese mai le lalolagi, o le ā se eseesega mataʻina i le vā o uluai Kerisiano ma tagata Katoliko o ona po nei?

⁹ O le toatele o emeperoa a Roma sa latou tuuaʻia sese uluai Kerisiano ma faasauā ia i latou. I le faaalia o le pogai, ua taʻua ai e le tusi o le Epistle to Diognetus se manatu o nisi mai le senituri lona lua T.A. e faapea: “O loo aumau Kerisiano i le lalolagi, ae ua lē faia sa latou vaega i le lalolagi.” I le isi itu, na taʻua e le Fono Lona Lua a le Vatikana, i lana Tulafono i Talitonuga o Lotu e faapea, e ao i tagata Katoliko ona “sailia le malo o le Atua e ala i le auai i ana meafai faalelalolagi” ma “ia galulue foi i latou lava mo le faapaiaina o le lalolagi.”

10. (a) O le ā le manatu a ē sa i pulega a malo, e faatatau i uluai Kerisiano? (e) O le ā le manatu e masani ona iai e uiga i Molimau a Ieova, ma o le ā la latou tali atu i ai?

¹⁰ Ua faapea mai le tusitala o talafaasolopito o E. G. Hardy, sa manatu emeperoa o Roma i uluai Kerisiano “atonu ua na o ni ē e aasavale e lē aogā.” Ua tautala le tusitala Falani o talafaasolopito o Étienne Trocmé e uiga i “le lē aogā lea sa manatu ai tagata Eleni e tausisi i aganuu, ma tagata Roma sa i tulaga pule e faapea, o le mea na latou vaaia sa uigaese lea i se lotu i atunuu i Sasae [o Kerisiano].” O fetusiaiga i le vā o Pliny le Itiiti, le kovana Roma o Bithynia, ma le Emeperoa o Trajan ua faaalia ai sa matuā lē malamalama lava i latou sa i pulega a malo, i le uiga moni o le Faa-Kerisiano. I le pei foi o aso nei, e masani lava ona tuuaʻia sese ma taʻuleagaina Molimau a Ieova e i latou o loo i pulega a malo  o le lalolagi. Peitai, e lē o se mea lenei e faateʻia pe matataʻu ai Molimau.—Galuega 4:13; 1 Peteru 4:12, 13.

‘Ua Taʻuleagaina i Nuu Uma Lava’

11. (a) O ā ni faamatalaga sa faia e faatatau i uluai Kerisiano, ma o ā faamatalaga ua faia e faatatau i Molimau a Ieova? (e) Aiseā e lē faia ai se sao o Molimau a Ieova i faiga faapolotiki?

¹¹ Na taʻua e uiga i uluai Kerisiano e  faapea: ‘Ua iloa e i matou ua taʻuleagaina lenei lotu i nuu uma lava.’ (Galuega 28:22) I le lona lua o senituri T.A., na manatu ai le tagata faapaupau o Celsus e faapea e na o tagata vālea ma le lē taualoa i le sosaiete a tagata e taulia ai le Faa-Kerisiano. Ua faapena foi se faaupuga e faatatau i Molimau a Ieova, “o le toatele o i latou, e ō mai i vaega e matitiva ma e leʻi lelei ni aʻoaʻoga i lo tatou sosaiete.” Na taʻua e le tusitala o talafaasolopito a lotu, o Augustus Neander e faapea “sa fai Kerisiano ma sui o tagata e lē faitaulia i le lalolagi, ma e lē aogā i meafai uma o le olaga; . . . ma na fesiligia ai, po o le ā se mea aogā i le olaga pe ana fai e pei uma tagata o i latou?” Ona o le lē auai o Molimau a Ieova i faiga faapolotiki, ua masani ai foi ona tuuaʻia i latou o ni mea e lē aogā i le sosaiete a tagata. Ae faapefea ona avea i latou o ni tagata faapolotiki ae i le taimi foi e tasi o loo avea ma ē lagolagoina le Malo o le Atua, ua na o lea le faamoemoe e tasi mo tagata? E teuloto e Molimau a Ieova upu a le aposetolo o Paulo e faapea: “Ia e onosai i mea e tiga ai, faapei o se tagata tau e lelei a Iesu Keriso. E leai sē tau i le taua na te faalavelavea e ia ia te ia i mea a lenei olaga, ina ia faafiafia o ia i lē na filifili ia te ia e fai ma tagata tau.”—2 Timoteo 2:3, 4.

12. O le ā le vala tāua o le vavae ese mai o Molimau a Ieova ua latou faataʻitaʻi ai i uluai Kerisiano?

¹² I le tusi o le History of Christianity, a Polofesa K. S. Latourette, ua ia tusia ai: “O se tasi o mataupu sa feeseeseai ai uluai Kerisiano ma le malo sosoo o Eleni ma Roma o le auai lea i taua. Mo uluai senituri e tolu, e leai se tusitusiga faa-Kerisiano o iai pea i aso nei o faatagaina ai le auai o se Kerisiano i taua.” Ua taʻua i le tusi a Edward Gibbon o le History of the Decline and Fall of the Roman Empire e faapea: “Sa lē mafai e Kerisiano ona latou faafitia se tiute e sili atu ona paia, ina ia mafai ai ona avea o ni fitafita, ni ofisa maualuluga o malo, po o ni perenise.” Ua faapena foi ona matuā solitū Molimau a Ieova, ma mulimuli atu i mataupu silisili a le Tusi Paia o loo otooto mai i le Isaia 2:2-4 ma le Mataio 26:52.

13. O le ā le tuuaʻiga ua faia i Molimau a Ieova, ae o le ā ua faaalia e mea moni?

¹³ Ua tuuaʻia Molimau a Ieova e o latou fili faapea ua latou faamalepelepeina aiga. E moni e iai ni aiga ua fevaevaeai pe a iai se isi po o nisi o le aiga ua avea ma Molimau a Ieova. Na valoia e Iesu o le a tupu lenei tulaga. (Luka 12:51-53) Peitai ua faaalia i faamaumauga o fuainumera e faapea, e lē o faitauliaina ai nisi o talagā faaipoipoga ona o lenei mafuaaga. Mo se faataʻitaʻiga, i Molimau a Ieova i Falani, e tasi se ulugalii faaipoipo mai ulugalii faaipoipo e tolu o loo iai se paaga faaipoipo e lē o se Molimau. Peitai, o le numera o talagā faaipoipoga i nei tulaga ua itiiti mai na i lo le tuufaatatau o talagā faaipoipoga i le atunuu atoa. Aiseā? Auā sa tuuina atu e aposetolo o Paulo ma Peteru se fautuaga atamai ma faagaeeina i Kerisiano ua faaipoipo atu i ē lē talitonu, ma ua taumafai Molimau a Ieova e mulimuli i a laʻua upu. (1 Korinito 7:12-16; 1 Peteru 3:1-4) Afai e malepe se faaipoipoga a ē e lē tutusa talitonuga, e toetoe lava ma e masani foi ona mafua mai i le paaga e lē o se Molimau. I se isi itu, e faitau afe faaipoipoga ua manuia ona ua avea paaga faaipoipo ma Molimau a Ieova ma amata ai ona faatatauina i o latou olaga mataupu silisili o le Tusi Paia.

O ni Kerisiano, ae Lē o ni Ē Talitonu i le Tolutasi

14. O le ā le tuuaʻiga sa faia i uluai Kerisiano, ma aiseā e lē talafeagai ai?

¹⁴ E lē talafeagai i le Emepaea o Roma, ona ia faia se isi tuuaʻiga tetee i uluai Kerisiano e faapea o i latou o ni tagata e lē talitonu i le Atua. Ua tusi mai Dr. Augustus Neander e faapea: “O i latou e faafitia atua faapaupau, o ē e lē talitonu i le Atua, . . . o se taʻu taatele lea sa faaigoa ai Kerisiano e tagata.” Pagā le uigaese o le taʻua o Kerisiano o ē sa tapuai atu i Lē soifua na Foafoaina Mea ae lē i ni atua se tele, o ni ē e lē talitonu i le Atua, e tagata faapaupau sa tapuai i mea “e le ni atua i latou, a o mea na faia e lima o tagata, o laau ma maa.”—Isaia 37:19.

15, 16. (a) O ā faamatalaga a nisi tagata lotu e uiga i Molimau a Ieova, ae o le ā le fesili ua mapuna aʻe ai? (e) O le ā e faaalia ai o Molimau a Ieova o ni Kerisiano moni lava?

¹⁵ Ua faapena foi le lē talafeagai o le mea moni e faapea, ua faafitia e nisi faipule silisili o Kerisinetoma i aso nei Molimau a Ieova e lē o ni Kerisiano. Aiseā? Ona o le teena e Molimau o le Tolutasi. E tusa ai ma se faamatalaga faaituau a Kerisinetoma, “O Kerisiano o i latou ia e manatu ia Keriso o le Atua.” I le faaeseesega ma lenei itu, ua faamatala mai ai e se lomifefiloi faaonaponei le nauna “Kerisiano” e faapea o “se tagata o lē talitonu ia Iesu Keriso ma o lē e mulimuli atu i ana aʻoaʻoga” ma o le “Faa-Kerisiano” e faapea o “se lotu ua faavae aʻe i aʻoaʻoga a Iesu Keriso ma le talitonuga e faapea o ia o le alo o le Atua.” O le ā le vaega ua sili atu ona fetaui i ai lenei faamatalaga?

¹⁶ Ua talia e Molimau a Ieova le molimau a Iesu lava ia i le po o ai o ia. Na ia taʻua: “O aʻu nei o le Atalii o le Atua,” ae lē, “O aʻu o le Atua le Atalii.” (Ioane 10:36; faatusatusa i le Ioane 20:31.) Latou te taliaina le fuaitau faagaeeina a le aposetolo o Paulo e faatatau i le Keriso: “O ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua.” * (Filipi 2:6) Ua taʻua e le tusi o le Paganism in Our Christianity e faapea: “Sa leʻi taʻua lava e Iesu Keriso lea talitonuga [o se Tolutasi e tutusa], ma e leai se mau o le Feagaiga Fou o aliai mai ai le upu ‘Tolutasi,’ O lena manatu sa faatoʻā faaaogā e le Lotu i le tolu selau tausaga ina ua mavae le maliu o lo tatou Alii; ma o le amataga o le talitonuga e matuā faapaupau lava.” E talia e Molimau a Ieova le aʻoaʻoga faale-Tusi Paia e uiga ia Keriso. O i latou o ni Kerisiano, ae lē o ni ē talitonu i le Tolutasi.

E Lē Auai i Lotu Tuufaatasi

17. Aiseā ua lē lagolagosua ai Molimau a Ieova i faiga lotu tuufaatasi, po o se gaoioiga e amo ai faalegatasi?

¹⁷ E lua nisi faitioga sa faia e uiga i Molimau a Ieova e faapea latou te mumusu e auai i faiga a lotu tuufaatasi, ma latou te auai i se faiga ua taʻua o le “faaliliu faamalosi o se faatuatuaga.” Sa lafo atu foi nei faitioga uma i uluai Kerisiano. Ua matuā faamaonia o Kerisinetoma ma ona tagata lotu Katoliko, Orthodox, ma Porotesano, o se vaega o lenei lalolagi. E “le ni o le lalolagi” Molimau a Ieova e faapei o Iesu. (Ioane 17:14) E faapefea ona latou auai atu ina ia amo faalegatasi i faiga a faalapotopotoga faalelotu, ia o loo uunaia ai amioga ma talitonuga lē faakerisiano?

18. (a) Aiseā e lē mafai ai ona faitioina Molimau a Ieova i lo latou faapea atu, ua na o i latou lava o loo faatinoina le lotu moni? (e) E ui ina talitonu tagata Katoliko Roma o i latou o le lotu moni, ae o le ā le mea latou te lē o mauaina?

 ¹⁸ O ai e mafai ona fia tonu i le faitioina o Molimau a Ieova ona o le talitonu e pei ona talitonu ai uluai Kerisiano e faapea, ua na o i latou lava o loo faatinoina le lotu moni? E oo lava i le Lotu Katoliko, a o latou pepelo mai faapea o loo lagolagosua i faiga a lotu tuufaatasi, ae ua faapea mai foi: “Matou te talitonu ua faaauau pea e lenei lotu moni e tasi ona iai i le Lotu Katoliko ma le Lotu Aposetolo, lea na tuu atu i ai e le Alii o Iesu le galuega o le faasalalau atu i tagata uma ina ua ia fetalai i ona aposetolo: ‘O lenei, ia ō atu ma fai nuu uma lava ma soʻo.’” (Fono II a le Vatikana, “Faalauiloaga o le Saolotoga Faalelotu”) Ae ui i lea, e foliga mai ua lē lava lena talitonuga e uunaia ai i Katoliko se maelega lē maluelue i le ō atu e faia soʻo.

19. (a) O ā mea ua maumauai Molimau a Ieova e fai, ma o le ā le mafuaaga? (e) O le ā o le a iloiloina i le mataupu o sosoo mai?

¹⁹ Ua iai i Molimau a Ieova lena maelega. Ua latou maumauai e molimau atu pea i le po o le ā lava le umi e finagalo le Atua latou te faia ai faapea. (Mataio 24:14) E maelega la latou molimau atu, ae e lē faatauanauina. E uunaia e le alofa mo tuaoi, ae lē ona o le inoino i tagata. Latou te faamoemoe ina ia toatele ni tagata e mafai ona faasaoina. (1 Timoteo 4:16) I le pei o uluai Kerisiano, latou te taumafai ina ia “nofo lelei [“fifilemu,” NW] ma tagata uma lava.” (Roma 12:18) O le a talanoaina i le mataupu o loo sosoo mai le auala latou te faia ai lenei mea.

[Faaopoopoga i lalo]

I se Tulaga Faaautaluga

◻ O ā uiga ua iloa ai uluai Kerisiano, ma ua faapefea ona faataʻitaʻia maia i latou e Molimau a Ieova?

◻ I ā vala ua faaalia ai e Molimau a Ieova o i latou o ni tagatanuu lelei?

◻ O le ā le manatu sa iai i ē o i pulega a malo e faatatau i uluai Kerisiano, ma e iai ea se eseesega i aso nei?

◻ O le ā ua uunaia Molimau e fai, ona o lo latou talitonuga maumauai e faapea, ua ia i latou le upu moni?

[Fesili mo le Suʻesuʻega]

[Ata i le itulau 12]

Ua maumauai Molimau a Ieova e molimau atu pea i le po o le ā lava le umi e finagalo le Atua latou te faia ai faapea

[Ata i le itulau 17]

Na faapea mai Pilato: “Faauta i le tagata!”—o Lē sa leai sana vaega i le lalolagi.—Ioane 19:5

[Ē Ana le Ata]

“Ecce Homo” by A. Ciseri: Florence, Galleria d’Arte Moderna/Alinari/Art Resource, N.Y.