Vaaiga Mai le Nuu o le Folafolaga

Peresepa—Sa Iai se Vaieli mo le Ola

“MAI Tanu i Peresepa.” O le faaupuga lena ua masani ai tagata faitau o le Tusi Paia. O loo faamatalaina ai Isaraelu atoa, mai Tanu, e latalata i le tuaoi i matu e oo i Peresepa i le itu i saute. Sa faaataina ai le filemu o le pulega a Solomona e faapea: “Sa nonofo ma le filemu o Iuta ma Isaraelu; e taitasi ma nofo i lalo o lona vine, ma lalo o lona mati, e gata mai i Tanu, e pau mai i Peresepa, i ona po uma o Solomona.”—1 Tupu 4:25; Faamasino 20:1.

O eseesega i le va o Tanu ma Peresepa, e aofia ai mea e sili atu na i lo le na o le mamao ese o le tasi mai le isi. Mo se faaaʻoaʻoga, sa timuga tetele Tanu; e tafe mai vai i le laueleele ma agaʻi atu i le Vaitafe o Ioritana, e pei ona vaaia i le ata o loo i le itu taumatau. Maeu se eseesega ma Peresepa, ona e tū i se vaipanoa matūtū e leai ni vai, i le va o le talafatai ma le faatausiusiuga i saute o le Sami Mate.

I le oganuu o Peresepa, i tausaga taitasi e na o le ono i le valu inisi [15 i le 20 senitimita] le loloto o timuga. I le iloaina o lena mea, seʻi mātau le ata o loo i luga o le maupuepue, o Peresepa. * O le lanu meamata lena e te tagai atu i ai e taʻu mai ai sa puʻeina le ata ina ua uma ni timuga o le tau malulu, si taimi puupuu lava lena na lanu meamata atoa ai laufanua na siomia ai Peresepa. O vaipanoa laugatasi e latalata ane—o loo tumau pea ona—lelei mo laau totō.

Ua faamatilatila e faamaumauga a le Tusi Paia vaieli ma vai o Peresepa, ona o le matūtū o lena laufanua. E tū latalata le aai i auala e femalagaai ai ina ia sopoia le toafa i le vaomatua e mamao i le itu i saute. E pei ona e mātauina, e masani ona fepasiaʻi ai tagata femalagaai po o le malōlō ai foi i inā pe a manaomia ni vai mo i latou lava ma a latou manu. O nei vai e lē pupuna mai i le eleele, e pei ona iai i Tanu, peitai e mafai ona maua mai i vaieli. O le mea moni, o le upu Eperu beʼerʹ e faasino i se lua e eliina seia oo ina tau tonu i lalo i le mea e sau ai le vai. O Peresepa o lona uiga o le “Vaieli o le Tautoga” po o le, “Vaieli o le Toafitu.”

Sa nonofo ai Aperaamo ma lona aiga mo se taimi umi i autafa o Peresepa, ma sa latou iloaina ai le tāua o vaieli. Ina ua sola le auauna fafine a Sara o Akara i le vaomatua, atonu sa ia fuafua e maua ni vai mai vaieli pe mai tagata Bedouin ia na faaaogāina vaieli—e pei o le fafine Bedouin i le itulau o sosoo mai o loo asuina aʻe ai vai mai le  vaieli i le Penisula o Sinai. Ina ua mulimuli ane faatonu atu e Aperaamo Akara ma lana tama taufaifai ina ia ō ese, na ia avatu ai ma le agalelei ni vai se tele mo i laʻua. O le ā le mea na tupu ina ua uma a la vaiinu? “Ua faapupulaina e le Atua ona mata, ona iloa ai lea e ia o le vaieli; ona alu lea o ia, ua utu ai le fagu paʻu i le vai, ma faainu ai le tama.”—Kenese 21:19.

O fea na maua mai ai e Aperaamo vai e faatumu ai fagu paʻu a Akara? Atonu na maua mai le vaieli na ia eliina, e latalata i le mea na ia totōina ai se ulu laau. (Kenese 21:25-33) E mafai ona faapea atu ua iloa nei e saienitisi le talafeagai lelei o le filifilia e Aperaamo o le ulu laau, ona o lenei laau e ninii ona lau e susū pea, ina ia mafai ai ona olaola pea e ui lava i le matūtū o lenei laufanua.—Tagai i le ata o i lalo.

Na taʻua le eliina e Aperaamo o le vaieli ona o se finauga i lo la va ma le tupu o Filisitia. O le vaieli o se mea tāua tele ona sa tau lē maua ni vai, atoa ma le fitā o le eliina o se vaieli loloto. O le mea moni i tuā i inā, o se sopo tuaoi i le laufanua pe a faaaogāina le vaieli e aunoa ma se faatagaga.—Faatusatusa i le Numera 20:17, 19.

Afai e te asiasi i le Maupuepue o Peresepa, e mafai ona e vaaia ai se vaieli loloto i le itu i saute sasae. E leai se tasi na te iloaina po o anafea na uluai eliina ai na papa malō faatasi ma lona pito i luga (o loo vaaia i lalo) lena o loo faamalosiina i maa. Sa toe eliina e le au suesue i le palapala i ona po nei ma iloa ai e selau futu [30 mita] le loloto i lalo o le vaieli ae e leʻi pāʻia le taʻele o le vaieli. O se tasi o i latou na faapea mai: “O se mea faigofie ona faaiʻua e faapea o lenei vaieli . . . o le ‘Vaieli o le Tautoga’ lea na osia ai e Aperaamo ma Apimeleka le la feagaiga.”—Biblical Archaeology Review.

E mautinoa sa faalauteleina mulimuli ane Peresepa i taimi o le Tusi Paia, e avea ma nuu malosi faatasi ai ma se faitotoa tele. Peitai o le autū o lona iai ma lona manuia, o vai tāua mai ona vaieli loloto.

[Faaopoopoga i lalo]

[Ē Ana le Ata i le itulau 24]

Pictorial Archive (Near Eastern History) Est.

[Ē Ana le Ata i le itulau 25]

Pictorial Archive (Near Eastern History) Est.