Ia Leoleo ma le Alofa Mamoe Pele a Ieova

SA FAALOGOLOGO ma uaʻi atu toeaina. Sa latou malaga pe tusa ma le 30 maila [50 kilomita] mai Efeso i Meleto ina ia maua faatonuga mai le aposetolo o Paulo. A o lea ua latou matuā faanoanoa ina ua faalogo atu e faapea o le taimi mulimuli lea latou te toe vāai ai ia te ia. O lea na latou iloa ai e faapea o upu o loo mulimuli mai e sili atu ona tāua: “O lenei, ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma leoleo, ia leoleo atu i le ekalesia a le Atua, ua faatauina e ia mona i [“le toto o lona lava Alo,” NW].”—Galuega 20:25, 28, 38.

O faamatalaga pupuu a Paulo i leoleo mamoe e mautinoa sa faaoo atu ai le tele o faamatalaga i toeaina i Efeso. Sa latou masani ma le galuega o le leoleoina o mamoe i le laufanua. Sa masani foi i latou ma le tele o faamatalaga i leoleo mamoe i le Tusi Paia Eperu. Ma sa latou iloa foi na faatusaina e Ieova ia lava o se Leoleo Mamoe o ona tagata.—Isaia 40:10, 11.

Na taʻua e Paulo i latou o ni ‘ovasia’ (“leoleo”) o loo iai i le “lafu mamoe,” ma o ni ‘leoleo mamoe’ o le ‘faapotopotoga.’ O le upu ‘ovasia’ e faailoa mai ai po o le a lo latou tofiga, a o le upu ‘leoleo mamoe’ ua faamatala mai ai pe faapefea ona latou tauaveina lena galuega. Ioe, e ao i ovasia ona taulai atu i sui taitoatasi o le faapotopotoga i le manatu alofa lea e pei ona vaaia ai e se leoleo mamoe lana lafu mamoe.

I aso nei, e toaitiiti lava toeaina o loo iai le poto masani i le tausia o mamoe faitino. Ae ua taʻu mai e le Tusi Paia le tele o faamatalaga i mamoe ma leoleo, ae maise lava i se uiga faafaatusa, lea e faatatau tonu i ai upu a Paulo. Ma o le tele lava o mea e mafai ona aʻoaʻoina mai i tala e uiga i leoleo mamoe ia sa sili ona fiafia i ai le Atua i taimi anamua. O a latou faaaʻoaʻoga aogā e mafai ona fesoasoani i toeaina i aso nei ina ia latou iloa po o ā uiga e manaomia ona atiina aʻe ina ia leoleoina ai le faapotopotoga a le Atua.

Le Leoleo Mamoe Lē Fefe o Tavita

Pe a tatou mafaufau i leoleo mamoe i taimi o le Tusi Paia, o le toatele lava o le a manatua Tavita, lea na amata lava lona olaga i le avea ma leoleo o mamoe. O se tasi o lesona muamua tatou te aʻoaʻoina mai le olaga o Tavita e faapea o le avea ma leoleo mamoe e lē o se tulaga maualuga. O le mea  moni, ina ua sau le perofeta o Samuelu e faauu se atalii o Iese e avea ma tupu mo Isaraelu, sa leʻi amanaia muamua lava le talavou o Tavita. Ae na faatoʻā taʻua lava Tavita ina ua teena e Ieova ona uso matutua e toafitu, o lē sa i le fanua o loo “leoleo ia i mamoe.” (1 Samuelu 16:10, 11) Ae ui i lea, o tausaga na faaaluina e Tavita e avea ai o se leoleo mamoe na sauniunia ai o ia mo le galuega fitā o le leoleoina o le nuu o Isaraelu. Fai mai le Salamo 78:70, 71: “Na filifilia foi [e Ieova] Tavita lana auauna, ma na aumaia o ia nai lotoā mamoe; . . . ina ia fafaga lava e ia ia Iakopo lona nuu.” Ua fetaui lelei ai le tusia e Tavita o le Salamo e 23 e matagofie ma lauiloa, e amata i upu nei: “O Ieova, o loʻu leoleo mamoe o ia.”

I le pei o Tavita, e ao i toeaina i le faapotopotoga Kerisiano ona auauna ma le loto maulalo i le leoleoina o le lafu, ae lē o le saili e fia lauiloa. E pei ona tusi le aposetolo o Paulo ia Timoteo, o i latou uma o ē aapa atu mo lenei avega tauave o le leoleo mamoe e “manao o ia i le galuega lelei,” ae lē o le fia lauiloa.—1 Timoteo 3:1.

E ui ina faatauvaa le galuega a Tavita o se leoleo mamoe faaletino, ae e iai taimi sa manaomia ai le lototele. Mo se faaaʻoaʻoga, i se tasi taimi ina ua ave e le leona faapea foi ma le urosa mamoe a lona tamā, sa lē fefe Tavita e alu atu ma fasi mate na manu feai. (1 Samuelu 17:34-36) O se faailoaga mataʻina lenei o le lototele pe a manatu faapea e mafai e se leona ona faaumatia le tele o manu e lapopoa atu ia te ia. Ma e faapena foi i le urosa enaena mai Suria lea sa masani ona nofo i Palesitina, e tusa lona mamafa ma le 310 pauna, e mafai ona ia faaumatia se aila i sina tamai sasau atu lava o lona alofilima.

O le manatu mamafa o Tavita i mamoe a lona tamā o se faaaʻoaʻoga sili lea mo leoleo mamoe i le faapotopotoga Kerisiano. Na lapatai atu le aposetolo o Paulo i toeaina i Efeso e uiga i “luko saua” o ē e “le faasaoina le lafu mamoe.” (Galuega 20:29) I aso nei, e iai foi taimi e manaomia ai ona faaalia e leoleo mamoe Kerisiano le lototele ina ia puipuia ai le lelei faaleagaga o mamoe a Ieova.

A o manaomia ona puipui maluina mamoe, e ao foi ona tausia i latou i le alofa e sili atu, i le faataʻitaʻi i le leoleo mamoe alofa o Tavita ma le Leoleo Mamoe Lelei, o Iesu Keriso. (Ioane 10:11) I le iloa faapea o le lafu e ā Ieova, e lē tatau ai i toeaina ona faamamafa atu avega i mamoe, “aua foi neʻi faapei o e faamalo i le tofi o le Atua.”—1 Peteru 5:2, 3; Mataio 11:28-30; 20:25-27.

Tala atu le Tala

O le tasi leoleo mamoe lauiloa o le augatamā lea o Iakopo. Sa ia manatu ua ia te ia lava le avega tauave totino mo le vaaia o mamoe ua tuuina atu na te tausia. O lea sa ia tausia ai ma le faamaoni le lafu a le tamā o lana avā o Lapana, ma ina ua mavae le 20 o tausaga o lana auaunaga, sa mafai e Iakopo ona faapea atu: “Ua le papā au mamoe fafine ma au ʻoti fafine, ua ou le ʻai foi i mamoe poa o lou lafu. O le na saeia ou te lei avatua ia te oe; na ou tauia lava; o le na gaoi i le ao po ua gaoia i le po na e sue mai ia te au.”—Kenese 31:38, 39.

E faaalia foi e ovasia i le faapotopotoga le manatu mamafa e sili atu mo mamoe a le Leoleo Mamoe Sili, o Ieova le Atua, ‘na faatauina e ia mona i le toto o lona lava Alo.’ (Galuega 20:28; 1 Peteru 5:4) Na faamamafa e Paulo lenei avega tauave tāua ina ua ia faamanatu atu i Kerisiano Eperu e faapea o tane o loo taʻimua i le faapotopotoga “o loo leoleo i latou mo o outou agaga, latou te tala atu le tala i ai.”—Eperu 13:17.

Ua faaalia foi i le faaaʻoaʻoga a Iakopo e faapea o le galuega a le leoleo mamoe e leai se taimi faatapulaaina. O se galuega faifai pea ma e masani ona manaomia ai le faataulagaina totino. Na ia taʻu atu ia Lapana: “Na faapea ai aʻu; na puapuagatia aʻu i le vevela i le ao, ma le maalili i le po; na le iloa foi sina moe e oʻu mata.”—Kenese 31:40.

 E matuā moni lenei mea i le toatele o toeaina Kerisiano alolofa i aso nei, e pei ona faataʻitaʻia i se mea na tupu o loo mulimuli mai. Na taofia se uso i le falemaʻi ina ua uma ona faia sailiiliga ia te ia ma iloa ai ua matuā aafia lava lona faiai. Ona fuafua lea e lona aiga ina ia aufaatasi ma ia i le falemaʻi i le ao ma le po. Ina ia saunia le lagolagosua moni ma faalaeiauga, na toe fetuunai ai e se tasi o toeaina lana faasologa ina ia mafai ai ona ia asiasi atu i le uso maʻi ma lona aiga i aso uma. Ae ona o le faasologa a le falemaʻi mo togafitiga, sa lē mafai ai ona ia asiasi atu i le ao. O lona uiga sa tatau i le toeaina lenei ona iai i le falemaʻi i le leva o le po. Peitai sa olioli o ia e alu atu i le falemaʻi i leva o le po. Fai mai le toeaina: “Sa ou iloa e tatau ona ou asiasi atu i le taimi e fetaui lelei ma le tagata maʻi, ae lē o le taimi e talafeagai ma aʻu.” Ina ua lava le malosi o le uso e toe sii atu ai i le isi vaega o le falemaʻi, sa faaauau pea e le toeaina ana asiasiga faalaeiau e lē aunoa.

Le Mea na Aʻoaʻoina e Mose i le Avea o se Leoleo Mamoe

Ua faamatala mai e le Tusi Paia Mose o sē “na matuā agamalu lava . . . e sili lava i tagata uma o i le lalolagi.” (Numera 12:3) Peitai, ua faaalia i faamaumauga e faapea sa lē tumau ai pea lena tulaga i taimi uma. A o talavou o ia, sa ia fasiotia se tagata Aikupito ona o le fasia o se tagata Isaraelu. (Esoto 2:11, 12) Sa lē o se gaoioiga lea a se tagata agamalu! Ae mulimuli ane, na faaaogā e le Atua Mose e taʻitaʻia se nuu e faitau miliona i le vaomatua agaʻi i le Nuu o le Folafolaga. Ma le manino lava la, sa manaomia e Mose ni toleniga atili.

E ui ina ua uma ona aʻoaʻoina Mose “i le poto uma lava o Aikupito,” ae sa manaomia atili ona toe aʻoaʻoina o ia mo le leoleoina o le lafu a Ieova. (Galuega 7:22) O le ā le ituaiga o toleniga e tatau ona faia? Ia, na faatagaina e le Atua Mose ina ia auauna e avea o se leoleo mamoe faatauvaa i le nuu o Mitiana mo le 40 tausaga. A o ia vaaia le lafu a le tamā o lana avā o Ietero, na atiina aʻe ai e Mose ni uiga lelei e pei o le onosai, agamalu, loto maulalo, ma le lē gaoiā. Sa ia aʻoaʻoina foi le faatalitali ia Ieova. Ioe, o le mafai ona leoleoina o mamoe faaletino sa agavaa ai Mose e avea o se leoleo mamoe faatuatuaina o le nuu o Isaraelu.—Esoto 2:15–3:1; Galuega 7:29, 30.

Pe lē o uiga sili ea nei e manaomia ona maua e se toeaina ina ia mafai ai ona tausia tagata o le Atua i aso nei? Ioe, e pei ona faamanatu atu e Paulo ia Timoteo e manaomia e “le auauna a le Alii . . . ia agamalu i tagata uma, ia mafaia ona aʻoaʻo atu, ma ia onosai, ia aʻoaʻo atu ma le agamalu i e o finau mai.”—2 Timoteo 2:24, 25.

E iai taimi atonu e lagona ai e se toeaina le lē fiafia ia te ia lava ona o le faigata ona ia atiina aʻe atoatoa nei uiga. Peitai, e lē tatau ona ia faavaivai. E pei o Mose, atonu e faaaluina ai se taimi umi ina ia atiina aʻe atoatoa ai e se tasi nei uiga manaomia ina ia avea o se leoleo mamoe lelei. Peitai i le faagasologa o le taimi, o le a tauia ai na taumafaiga naunautai.—Faatusatusa i le 1 Peteru 5:10.

I le avea ma toeaina, atonu o le a lē faaaogāina atoatoa ai oe e pei o isi. Pe lē ona o loo faatagaina oe e Ieova e pei o Mose ina ia atiina aʻe atoatoa na uiga tāua? Aua neʻi galo o loo ‘manatu mai ia te oe’ Ieova. Peitai, e ao foi ona teu i o tatou mafaufau e manaomia ona ‘tatou oofu i le loto maulalo; auā, e tetee atu le Atua i ē faamaualuga, a e foaiina mai le alofa tunoa i ē faamaulalo.’ (1 Peteru 5:5-7) Afai e te faatatauina ma talia le toleniga ua tuuina mai e Ieova, o le a sili atu ona e aogā ia te Ia, e pei foi o Mose.

E Tautele Mamoe Uma a Ieova

Sa iai i leoleo mamoe alolofa ma maufaatuatuaina i taimi o le Tusi Paia se uiga o le manatu mamafa i mamoe taitoatasi. E ao foi ona moni lena mea i leoleo mamoe faaleagaga. E manino lenei mea i upu a Paulo: “Ina tausi ia . . . i le lafu mamoe uma lava.” (Galuega 20:28) O ai e aofia ai i le “lafu mamoe uma lava”?

 Na tuuina mai e Iesu se faataʻitaʻiga e uiga i se tagata sa iai mamoe e selau peitai na ia tuua ae alu atu vave e saili mai le mamoe e tasi na leiloa ina ia toe faafoi mai i le lafu. (Mataio 18:12-14; Luka 15:3-7) E ao foi i se ovasia ona manatu faapena i sui taitoatasi o le faapotopotoga. O le lē toe auai i le faiva po o le lē toe auai i sauniga faa-Kerisiano e lē faapea ai ua lē toe avea lena mamoe ma vaega o le lafu. O loo tumau pea ona avea o ia ma vaega “o le lafu uma lava” lea e tatau i toeaina ona “tala atu le tala” i le Leoleo Mamoe Sili, o Ieova.

Sa manatu mamafa se au toeaina i nisi sa auai i le faapotopotoga, a ua amata ona tafetafea mālie ese atu ma ua lē toe auai mai. Ona saunia loa lea o se lisi o tagata taitoatasi, ma faia se taumafaiga faapitoa ina ia asiasi atu ia i latou na ma fesoasoani i ai ina ia faafoi mai i le lafu mamoe a Ieova. Maeu le loto faafetai o nei toeaina i le Atua ina ua mavae se vaitaimi pe tusa o le lua ma le afa tausaga, sa mafai ona latou fesoasoani atu i le silia i le 30 tagata ina ia toe maelega i le auaunaga ia Ieova. O se tasi o i latou na sa fesoasoani i ai sa lē toe talaʻi pe a ma le 17 tausaga!

O le tāua o lenei avega tauave ua faamamafa mai i ovasia e ala i le mea moni e faapea, o mamoe sa ‘faatauina i le toto o lona lava Alo.’ (Galuega 20:28) E leai se tau e sili ona maualuga e mafai ona totogia mo nei mamoe tautele. Ma seʻi manatu i le taimi telē, atoa ma taumafaiga sa faaaluina i le faiva i le fanua ina ia maua ma fesoasoani ai i tagata taitoatasi o ē pei ni mamoe! Pe lē o taumafaiga foi faapena e ao ona faia ina ia faatumauina ai i latou i totonu o le lafu mamoe a le Atua? O le mea moni, o mamoe taitoatasi uma lava i le faapotopotoga e tautele.

E tusa lava pe aafia se sui o le lafu i le faia o se sese matuiā, e lē suia ai fua le avega tauave a le au toeaina. E faaauau pea ona latou manatu mamafa o ni leoleo mamoe, i le alofa ma le agamalu ina ia faasaoina mai lē ua fai mea sese pe afai e mafai ai. (Kalatia 6:1, 2) Ma le faanoanoa lava, i tulaga faapena ua faamaonia ai faapea e iai ni sui o le faapotopotoga e lē faaalia le faanoanoa moni ona o agasala matuiā ua ia faia. Ua iai la i leoleo mamoe alolofa le avega tauave mai le Tusi Paia e puipuia ai isi o le lafu faasaga i lenei taaʻiga leaga.—1 Korinito 5:3-7, 11-13.

Peitai, ua faataatia e Ieova le Atua le faaaʻoaʻoga lelei atoatoa o le faalautele atu o lona alofa mutimutivale i mamoe ua leiloa. Ua fetalai mai ma le alofa mutimutivale lo tatou Leoleo Mamoe Sili: “Ou te sailia foi le ua sē, ou te aumaia le ua tulia, ou te fusia le ua gau, ou te faamalosia le ua vaivai.” (Esekielu 34:16; Ieremia 31:10) I le faataʻitaʻi i lenei faaaʻoaʻoga sili, ua faia ai se fuafuaga alofa mo leoleo mamoe faaleagaga i aso nei ina ia asiasi atu i tagata faateʻaina, o ē atonu e tali mai nei i la latou fesoasoani. O nei taumafaiga e tumu i le alofa ua faia ina ia toe faafoi mai ai mamoe na leiloa, ua maua mai ai ni fua lelei. Na faapea mai se tuafafine ua toe faaeaina: “Ina ua toe asiasi mai toeaina, o le faalaeiauga lea sa ou manaomia ina ia toe foi mai ai.”

E aunoa ma se taumasalosalo, o upu a Paulo i toeaina i Efeso sa i Meleto, sa matuā uigā—mo i latou ma mo ovasia i aso nei. O lana faamatalaga i leoleo mamoe o se faamanatuga lena o uiga e ao ona faaalia e ovasia—o uiga e pei o le loto maulalo ma le lototele, e pei ona faataʻitaʻia mai e le tupu leoleo mamoe o Tavita; o se uiga totino o le manatu mamafa i avega tauave ma manatu mo le puipuiga, e pei ona faaalia i le auaunaga a Iakopo i le ao ma le po; faatasi ai ma se loto naunau e talia atili toleniga ma le onosai, e pei ona sa faaalia e Mose. O le mea moni, o nei faaaʻoaʻoga faale-Tusi Paia o le a fesoasoani i toeaina i le faapotopotoga ia atiina aʻe ma faaalia uiga manaomia ina ia mafai ai ona latou ‘leoleoina le faapotopotoga a le Atua, ua faatauina i le toto o lona lava Alo.’