Pe Faapefea ona Tatou Faaopoopo atu le Amio Lelei i lo Tatou Faatuatua?

“Ia outou matuā faamalosi ai lava, ina ia faaopoopoina le amio lelei i lo outou faatuatua.”—2 PETERU 1:5.

1, 2. Aiseā e ao ai ona tatou faatalitalia tagata o Ieova ina ia latou faia le amio lelei?

E GAOIOI pea Ieova i se auala amio lelei. Na te faia le mea ua tonu ma lelei. O lea na mafai ai e le aposetolo o Peteru ona tautala e uiga i le Atua e faapea o lē na ia valaauina Kerisiano faauuina ‘e ala i Lona mamalu ma le amio lelei.’ O le poto saʻo e uiga i lo latou Tamā faalelagi amio lelei sa faaali atu ai ia i latou le mea sa manaomia ina ia tuliloaina ai se olaga o le tuutoina moni i le Atua.—2 Peteru 1:2, 3.

² Ua uunaia e le aposetolo o Paulo Kerisiano ina “ia faaaʻoaʻo . . . i le Atua, faapei o le fanau pele.” (Efeso 5:1) Ina ia pei o lo latou Tamā faalelagi, e ao i tagata tapuai o Ieova ona faia le amio lelei i so o se itu. Ae o le ā le amio lelei?

Le Uiga o le Amio Lelei

3. Ua faamatalaina faapefea le “amio lelei”?

³ Ua faamatalaina e lomifefiloi faaonaponei le “amio lelei” e faapea o se “tulaga silisili ona lelei tau amio; agalelei.” O se “gaoioiga tonu ma mafaufauga tonu; o le agalelei o uiga faaletagata.”  O le tagata amio lelei e amiotonu. Ua faamatalaina foi le amio lelei e faapea o le “maumauai mo faatulagaga tonu.” O le mea moni la, o le “faatulagaga tonu” mo Kerisiano, e filifilia e le Atua ma ua faamanino mai i lana Afioga Paia, le Tusi Paia.

4. O ā uiga ua taʻua i le 2 Peteru 1:5-7 e tatau i Kerisiano ona tauivi e atiina aʻe?

⁴ E pipiimau atu Kerisiano moni i faatulagaga amiotonu a Ieova le Atua, latou te tali atu foi i ana folafolaga tautele e ala i le faaalia o le faatuatua. Ua latou utagia foi le fautuaga a Peteru e faapea: “Ia outou matuā faamalosi ai lava, ina ia faaopoopoina le amio lelei i lo outou faatuatua, ia faaopoopo foi le poto i le amio lelei, ia faaopoopo foi le le gaoiā i le poto, ma ia faaopoopo le onosai i le le gaoiā, o le amio Atua foi i le onosai, ia faaopoopo foi le alofa i le au uso i le amio Atua, o le alofa foi i le alofa i le au uso.” (2 Peteru 1:5-7) E tatau i se Kerisiano ona tauivi ina ia atiina aʻe nei uiga. E lē lava ni nai aso, po o ni nai tausaga e faia ai lenei itu, ae e manaomia ai le olaga atoa o taumafaiga faifai pea. Ioe, o le faaopoopo atu pea o le amio lelei i lo tatou faatuatua o se luʻi foi lea!

5. O le ā le amio lelei e tusa ai ma le vaaiga a le Tusi Paia?

⁵ Ua faapea mai lē e tusia lomifefiloi o M. R. Vincent, o le uluai uiga taualoa lava o le upu Eleni sa faaliliuina i le “amio lelei” sa faailoa mai ai le “aupito sili ona lelei i so o se mea.” Na faaaogā e Peteru lona taʻu faanumera tele ina ua ia faapea mai sa tatau i Kerisiano ona faalauiloa atu i le lautele “ona lelei,” po o le amio lelei, o le Atua. (1 Peteru 2:9) I le vaaiga a le Tusi Paia, ua faamatalaina ai le amio lelei e lē o se uiga o le fifilemu, ae o se “uunaiga tau amio, se malosi tau amio, se maʻatiʻati o le solu.” I le taʻuaina o le amio lelei, sa mafaufau ai Peteru i le tulaga tau amio e sili ona lototele lea e tatau i auauna a le Atua ona faailoa atu ma tausisia. Peitai, talu ai lo tatou lē lelei atoatoa, pe mafai moni ea la ona tatou faia le amio lelei i le silafaga a le Atua?

E Lē Lelei Atoatoa ae Amio Lelei

6. E ui i lo tatou lē lelei atoatoa, ae aiseā e mafai ai ona faapea atu e mafai ona tatou faia le amio lelei i le silafaga a le Atua?

⁶ Ua tuufaasolo mai ia i tatou le lē lelei atoatoa ma le agasala, atonu la tatou te tau mānatu ai pe mafai faapefea ona tatou faia moni le amio lelei i le silafaga a le Atua. (Roma 5:12) Tatou te manaomia moni le fesoasoani a Ieova pe a tatou fia maua ni loto mamā, lea e mafai ona puna mai ai mafaufauga, o upu, ma gaoioiga amio lelei. (Faatusatusa i le Luka 6:45.) Ina ua uma ona faia e le faisalamo o Tavita le agasala ma Patesepa, sa ia salamō ma aioi atu: “Le Atua e, ia e faia se loto mamā mo aʻu; ma ia e faafouina se loto mau i totonu ia te au.” (Salamo 51:10) Na maua e Tavita le faamagaloga a le Atua ma le fesoasoani sa manaomia ina ia tuliloaina ai le ala o le amio lelei. O lea, afai ua matuiā so tatou sese, ae ua taliaina ma le loto salamō le fesoasoani a le Atua ma toeaina o le faapotopotoga, e mafai ona tatou toe foi atu i le ala o le amio lelei ma tumau ai.—Salamo 103:1-3, 10-14; Iakopo 5:13-15.

7, 8. (a) Afai tatou te fia tausisia le amio lelei, o ā mea e manaomia? (e) O le ā le fesoasoani ua maua e Kerisiano ina ia amio lelei ai?

⁷ Ona o le agasala tuufaasolo, ua tatau ai lava ona tatou tauina se taua faifai pea i totonu o o tatou loto ina ia faia le mea o loo manaomia e le amio lelei mai ia i tatou. Afai e ao ona tatou tausisi i le amio lelei, e lē mafai la ona tatou faataga i tatou e faapologaina e le agasala. Ae e tatau ona avea i tatou ma “auauna a le amiotonu,” e mafaufau pea, e tautatala pea, ma gaoioi pea i se auala amio lelei. (Roma 6:16-23) O le mea moni, e malolosi o tatou tuʻinanauga faaletino ma faanaunauga agasala, ma ua tatou fesagaʻi foi ma se tauiviga i le va o nei mea ma mea lelei o loo faatalitalia e le Atua mai ia i tatou. O le ā la le mea e ao ona faia?

⁸ O se tasi o mea, e manaomia ona tatou mulimuli i taʻitaʻiga a le agaga paia po o le malosi galue o Ieova. E ao ai la ona tatou utagia le fautuaga a Paulo e faapea: “Ia outou savavali i la le Agaga, ona le faia lea e outou o le tuʻinanau  o le tino. Auā o le tino ua tuʻinanau lea e tetee atu i le Agaga, ua tuʻinanau foi le Agaga e tetee atu i le tino; ua feteeinai foi ia mea, o le mea lea tou te le fai ai mea tou te loto i ai.” (Kalatia 5:16, 17) Ioe, ua ia i tatou le agaga o le Atua e fai ma uunaiga mo le amiotonu, ua ia i tatou foi lana Afioga e fai ma taʻiala i le amio saʻo. Ua tatou maua foi le fesoasoani alofa a le faalapotopotoga a Ieova, ma fautuaga a le “auauna faamaoni ma le mafaufau.” (Mataio 24:45-47) Ua mafai ai la ona tatou tau ma le manumalo i le taua e tetee atu i faanaunauga agasala. (Roma 7:15-25) Ioe, afai e oo ane i le mafaufau se manatu lē mamā, e tatau ona tatou vave faateʻaeseina ma tatalo atu mo le fesoasoani a le Atua ina ia teena ai so o se faaosoosoga ina ia faia se gaoioiga e lē amio lelei.—Mataio 6:13.

Le Amio Lelei ma o Tatou Mafaufauga

9. O le ā le ituaiga o mafaufauga e manaomia e amioga lelei?

⁹ E amata mai le amio lelei i le auala e mafaufau ai se tagata. Ina ia tatou olioli i le finagalo malie o le Atua, e tatau ona tatou mafaufau i mea e amiotonu, e saʻo, ma amio lelei. Na faapea mai Paulo: “Le au uso e, o le toe upu lenei; o mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.” (Filipi 4:8) E manaomia ona tatou mafaufau i mea e amiotonu ma mamā, ma ia aua neʻi o tatou fiafia i so o se mea e lē o iai le amio lelei. Na mafai ona faapea mai Paulo: “O mea foi ua aʻoaʻoina ai outou, ma outou talia, ma outou faalogo i ai, ma outou vaai mai ia te au, ia outou faia ia lava mea.” A pei i tatou o Paulo—i le lelei o mafaufauga, o faamatalaga, ma gaoioiga—o le a avea ai i tatou o ni aumea lelei ma o ni faaaʻoaʻoga lelei i le olaga faa-Kerisiano, ma ‘o le a faatasi mai foi le Atua o le filemu ia i tatou.’—Filipi 4:9.

10. O le a faapefea i le faatatauina totino o le 1 Korinito 14:20 ona fesoasoani ia i tatou ina ia tausisia le amio lelei?

¹⁰ Afai tatou te faanaunau ina ia tausisia le amio lelei i o tatou mafaufauga ma faafiafiaina ai lo tatou Tamā faalelagi, ua talafeagai la ona tatou faatatauina le fautuaga a Paulo e faapea: “Aua tou te faatamaiti i le mafaufau; peitai ane ia outou faatamameamea i le leaga, a ia outou tagata matutua i le mafaufau.” (1 Korinito 14:20) O lona uiga, e lē tatau ia i tatou ua avea ma Kerisiano ona fia iloa pe fia tofotofo i amioga leaga. Na i lo le faataga o o tatou mafaufau e faaleagaina i lenei auala, ia tatou filifili ma le atamai e tausisi ai pea i le lē iloa ma le mamā e pei o ni pepe i lenei itu. Ae i le taimi lava e tasi, o loo tatou matuā malamalama e faapea, o le amio lē mamā ma amioga sese o ni agasala i le silafaga a Ieova. O se faanaunauga mai le loto ina ia faafiafia o ia e ala i le amio lelei o le a aogā ia i tatou, auā o le a uunaia ai i tatou e alofia tulaga lē mamā o faafiafiaga, ma isi taaʻiga faaleaga mafaufau a lenei lalolagi o loo pulea e Satani.—1 Ioane 5:19.

Le Amio Lelei ma a Tatou Faamatalaga

11. O ā ituaiga o faamatalaga e manaomia e le amio lelei, ma e tusa ai ma lenei itu, o ā faaaʻoaʻoga ua tatou maua mai ia Ieova le Atua ma Iesu Keriso?

¹¹ Afai e lelei o tatou mafaufauga, e ao la ona matuā aafia ai mea tatou te tautatala ai. O le amio lelei e manaomia ai faamatalaga mamā, faamaoni, ma faalaeiau. (2 Korinito 6:3, 4, 7) O Ieova o “le Atua faamaoni.” (Salamo 31:5) E faamaoni o ia i ana feutagaiga uma, ma e mautinoa foi ana folafolaga auā e lē mafai ona pepelo o ia. (Numera 23:19; 1 Samuelu 15:29; Tito 1:2) O le Alo o le Atua, o Iesu Keriso, “ua tumu o ia i le alofa tunoa ma le faamaoni.” A o iai o ia i le lalolagi, sa ia tautala pea i le upu moni lea na foaiina i ai e lona Tamā. (Ioane 1:14; 8:40) E lē gata i lea, o Iesu “na le agasala lava, na le iloa foi se pepelo i lona fofoga.” (1 Peteru 2:22) Afai o i tatou moni o ni auauna a le Atua ma Keriso, o le a tatou faamaoni foi la i faamatalaga ma saʻo i amioga, e peiseai ua ‘fusia i sulugātiti o le faamaoni.’—Efeso 5:9; 6:14.

12. Afai e ao ona tatou amio lelei, o ā ituaiga o faamatalaga e tatau ona tatou alofia?

¹² Afai tatou te amio lelei, e iai ituaiga o faamatalaga o le a tatou alofia. O le a pulea i tatou  e le fautuaga a Paulo e faapea: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava.” “A o le faitaaga, ma mea leaga uma, ma le manumanu, aua neʻi taʻua lava ia te outou, e pei ona tatau i e ua paia. O le anovale foi, ma upu faatauvaa, ma le faaulaula, o mea ia e le tatau; a o le faafetai e lelei lava lea.” (Efeso 4:31; 5:3, 4) O le a lagona e isi le faafouina pe a auaumea faatasi ma i tatou, talu ai e uunaia i tatou e o tatou loto amiotonu ina ia alofia faamatalaga e lē faakerisiano.

13. Aiseā e tatau ai i Kerisiano ona pulea le laulaufaiva?

¹³ O se faanaunauga e faafiafia le Atua ma ia tautala i mea lelei, o le a fesoasoani ia i tatou ina ia pulea ai le laulaufaiva. Talu ai faanaunauga agasala o le loto, tatou te tausuai uma ai lava i nisi taimi ona o ni faaupuga. Peitai, ua faapea mai le soʻo o Iakopo, afai tatou te “avane faagutu i gutu o solofanua,” e usiusitai i latou ma ō atu i le mea tatou te faasino i ai. E ao ai la ona tatou tauivi ina ia pulea le laulaufaiva, ma taumafai e faaaogā e tau lava o auala lelei. O le laulaufaiva e lē pulea “o le faupuega o amio leaga.” (Iakopo 3:1-7) E auaumea faatasi le laulaufaiva e lē pulea ma ituaiga uma o mailei leaga a lenei lalolagi faalemataʻu. Ua faapogaia ai mea e faaleagaina ai se tasi e pei o le molimau pepelo, le agatele, ma le taufaaleaga. (Isaia 5:20; Mataio 15:18-20) Ma pe a faia e se laulaufaiva e lē mataofiofia ni faamatalaga tautuuaʻi, po o le taufaaleaga, ona faatumuina ai lea i le mea oona e oti ai.—Salamo 140:3; Roma 3:13; Iakopo 3:8.

14. O ā ituaiga o faamatalaga uigalua e tatau i Kerisiano ona alofia?

¹⁴ E pei ona faaalia e Iakopo, o se faagutugutulua le ‘vivii ia Ieova’ e ala i le tautala lelei e uiga i le Atua, ae toe faaaogāsese foi le laulaufaiva e “fetuu aʻi i tagata” e ala i le faamalaiaina o i latou. Pagā se agasala pe a pepese atu i viiga o le Atua i sauniga, ae ō atu i fafo ma tautatala taufaaleaga ai e uiga i isi uso talitonu! E lē mafai ona puna faatasi mai i se punāvai e tasi, vai suamalie ma vai oona. Afai o loo tatou auauna ia Ieova, ua tatau ai la i isi ona faatalitalia i tatou ina ia tautatala i mea lelei, na i lo o le tautatala i upu leaga. Seʻi o tatou matuā teena la faamatalaga leaga ae taumafai e tautatala i mea o le a aogā i a tatou aumea ma atiina aʻe ai faaleagaga i latou.—Iakopo 3:9-12.

Le Amio Lelei ma a Tatou Gaoioiga

15. Aiseā e tāua tele ai le aloese mai le agapiʻopiʻo?

¹⁵ Talu ai e tatau ona lelei mafaufauga ma faamatalaga faa-Kerisiano, ae faapefea la a tatou gaoioiga? E faatoʻā maua lava le finagalo malie o le Atua pe a lelei a tatou amio. E leai se auauna a Ieova e mafai ona ia lafoaia le amio lelei, faia ni togafiti leaga, ae mafaufau lava faapea o na mea o le a taliaina e le Atua. Ua faapea mai le Faataoto 3:32: “E inosia e Ieova  le tagata agapiopio; a e fefaauoai o ia ma e ua sao a latou amio.” Afai tatou te faapelepele i la tatou faiā ma Ieova le Atua, e ao la i na upu faatupu manatu ona taofia mai ai i tatou mai le fuafuaina po o le faia o so o se mea leaga. E letioa ona faaaofia ai i mea e fitu e sili ona inosia e Ieova, le “loto e manatunatu i togafiti leaga!” (Faataoto 6:16-19) Seʻi o tatou alofia la na gaoioiga ma ia faia le amio lelei, ina ia aogā mo o tatou uso a tagata, ma faamamaluina ai lo tatou Tamā faalelagi.

16. Aiseā e lē tatau ai i Kerisiano ona auai i so o se gaoioiga pepelo?

¹⁶ O le faaalia o le amio lelei e manaomia ai lo tatou faamaoni. (Eperu 13:18) O se tagata pepelo, e lē ōgatusa ana gaoioiga ma ana upu, e lē o amio lelei. O le upu Eleni ua faaliliuina i le “pepelo” (hy·po·kri·tesʹ) o lona uiga “o sē e tali atu” ma faafoliga mai i se tagata faifaaaliga. Talu ai sa faaaogā e tagata faifaaaliga o Eleni ma Roma ia matapulepule, o le pogai lea o le faaaogāina faafaatusa o lenei upu mo se tasi o lē ua na ona faatagā faafoliga atu. O ē pepelo o i latou ia e [“lē faamaoni,” NW]. (Faatusatusa le Luka 12:46 i le Mataio 24:50, 51.) O le pepelo (hy·poʹkri·sis) e mafai foi ona faailoa mai ai amioga leaga ma le faaʻoleʻole. (Mataio 22:18; Mareko 12:15; Luka 20:23) Pagā se faanoanoa pe a faaseseina se tagata sa faamaoni, i sina ʻataʻata, faaviiviia, ma ni gaoioiga ua na ona faafoliga atu! Peitai o se faamafanafana loto lo tatou iloaina o loo tatou faifaimea faatasi ma ni Kerisiano e maufaatuatuaina. Ma e faamanuiaina i tatou e le Atua ona o le amio lelei ma le lē pepelo. E fiafia lona finagalo ia i latou o loo faaalia le “alofa faamaoni i le au uso” ma iai le ‘faatuatua e aunoa ma le pepelo.’—1 Peteru 1:22; 1 Timoteo 1:5.

O le Amio Lelei o se Agalelei e Mataʻalia

17, 18. A o tatou faaalia le fua o le agaga o le agalelei, o le a faapefea ona tatou feutagai ai ma isi?

¹⁷ Afai tatou te faaopoopo atu le amio lelei i lo tatou faatuatua, o le a tatou tauivi ai e aloese mai i le mafaufau, le tautala, ma le faia o mea e lē talia e le Atua. Peitai, o le faaalia o le amio lelei faa-Kerisiano e manaomia ai foi ona tatou faatinoina le lelei e mataʻalia. O le mea moni, ua faamatalaina le amio lelei (virture) o le agalelei (goodness). Ma o le agalelei o se fua o le agaga paia o Ieova, ae lē o se iʻuga o ni taumafaiga a le tagata. (Kalatia 5:22, 23) A o tatou faailoa atu le fua o le agaga o le agalelei, o le a uunaia ai i tatou ina ia lelei o tatou mafaufauga i isi ma faamālō atu mo o latou uiga lelei e ui lava e iai ni o latou masei. Po ua latou lē auauna faamaoni ea ia Ieova mo le tele o tausaga? E ao la ona tatou faaaloalo ma faamālō atu i ai i a latou auaunaga i le Atua. E mātau e lo tatou Tamā faalelagi le alofa ua latou faaalia atu mo lona suafa ma a latou galuega lelei o le faatuatua, ma ua ao ai foi ona tatou faia faapea.—Neemia 13:31e; Eperu 6:10.

¹⁸ O le amio lelei ua tatou onosaia, malamalama, ma alofa mutimutivale ai. Afai e mafatia so tatou uso tapuai ia Ieova i ni mafatiaga po o ni omiga, o le a tatou faalototele ma faamafanafana loto atu i ai e pei foi ona faamafanafana loto lo tatou Tamā alofa faalelagi ia i tatou. (2 Korinito 1:3, 4; 1 Tesalonia 5:14) Tatou te tiga alofa faatasi ma ē ua faanoanoa, atonu po ona o se maliu o sē pele. Afai e iai so o se mea e mafai ona aveesea ai le mafatiaga, ia tatou faia faapea, auā o le agaga o le amio lelei e uunaia ai se gaoioiga alofa ma le fia fesoasoani.

19. O le ā faapefea ona feutagai isi ma i tatou pe a lelei o tatou mafaufauga, a tatou upu, ma a tatou gaoioiga?

 ¹⁹ E pei lava ona tatou viia Ieova i a tatou faaupuga lelei e uiga ia te ia, e faapena foi ona faamanuia mai isi ia i tatou pe a tatou amio lelei i mafaufauga, i upu ma gaoioiga. (Salamo 145:10) Ua faapea mai se faataoto atamai: “O faamanuia ua i luga o le ulu o lē amiotonu; a o gutu o e amio leaga, ua ufitia ia i le faasaua.” (Faataoto 10:6) O le tagata amio leaga ma le faasauā ua lē o ia te ia le amio lelei lea semanū e pele ai o ia i isi. Na te seleseleina le mea na te lūlū, auā e lē mafai ona faamanuia atu i ai tagata ia te ia e ala i lo latou tautala lelei e uiga ia te ia. (Kalatia 6:7) Maeu la le sili atu ona lelei pe a manatunatu, pe tautatala, ma gaoioi i ala amio lelei e pei o ni auauna a Ieova! Latou te maua ai le alofa, le maufaatuatuaina, ma le faaaloalo o isi, o ē ua fia faamanuia ma tautala lelei e uiga ia i latou. Ae maise, o a latou amio lelei faaleatua e maua ai faamanuiaga lē mafaatusalia a Ieova.—Faataoto 10:22.

20. O mafaufauga, o faamatalaga, ma gaoioiga lelei, e mafai ona iʻu ai i ā āuga i se faapotopotoga a tagata o Ieova?

²⁰ O mafaufauga, o faamatalaga, ma gaoioiga e amio lelei, ua mautinoa le faamanuiaina ai o le faapotopotoga a tagata o Ieova. Pe a iai i uso talitonu le alofa mutimutivale, o manatunatuga faaaloalo o le tasi i le tasi, ona uluola ai lea o le alofa faaleuso ia i latou. (Ioane 13:34, 35) O faamatalaga lelei, e aofia ai se faamālō ma se faalaeiauga e moni, e fesoasoani i le faatupuina o se lagona mafana o le felagolagomai ma le autasi. (Salamo 133:1-3) Ma o gaoioiga e faamafanafana loto, ma amio lelei e faagaeeina ai isi ina ia tali mai foi i lena lava auala. Ae o le iʻuga sili, o le faatinoina o le amio lelei faa-Kerisiano, e maua ai le finagalo malie ma faamanuiaga a lo tatou Tamā faalelagi e amio lelei, o Ieova. Seʻi avea la ma o tatou sini le tali atu i folafolaga tautele a le Atua, e ala i le faaalia o le faatuatua. Ona mautinoa ai lea, o le a tatou taumafai naunautai e faaopoopo atu le amio lelei i lo tatou faatuatua.

O ā Au Tali?

□ E faapefea ona e faamatalaina le “amio lelei,” ma aiseā ua mafai ai ona amio lelei tagata lē lelei atoatoa?

□ O ā ituaiga o mafaufauga e manaomia e le amio lelei?

□ E ao faapefea ona aafia a tatou faamatalaga i le amio lelei?

□ O le ā le aafiaga o a tatou gaoioiga ona o le amio lelei?

□ O ā nisi o aogā o le amio lelei?

[Fesili mo le Suʻesuʻega]

[Ata i le itulau 21]

Talu ai e lē mafai ona puna faatasi mai vai suamalie ma vai oona i se punāvai e tasi, e tatau ai la i isi ona latou faatalitalia auauna a Ieova e na o mea lelei e tautatala ai