Puipuia e Ieova Ona Tagata i Hagakeri

O HAGAKERI, e i le ogatotonu o Europa, sa masani ona āfaina i tulaga faigata i talafaasolopito. E pagātia tele ona tagata, e ui lava ina tuuina atu i latou i le Taupou o Maria ma faamalosia i latou e lo latou tupu muamua o Setefano ina ia taʻua i latou o ni Kerisiano i le 1001 T.A.

I le faagasologa o le tele o senituri na faavaivaia ai Hagakeri e le tele o a latou lava feteenaiga ma maua ai le avanoa o isi atunuu ia faatoilaloina pea i latou. Na fasiotia tagata uma o ia nuu i taimi o na feteenaiga, ma na mulimuli ane nofoia e tagata mai nuu ese. Ona o lea, ua fefiloi faatasi ai tagatanuu eseese i totonu o le atunuu. I le tulaga i lotu, e tusa ma le lua vae tolu o le faitau aofai o le atunuu sa auai pea i le lotu Katoliko, e ui lava na mulimuli ane salalau atu le lotu Toefuataiga i isi vaega o le atunuu.

Se Amataga Faatauvaa

Na amata ona lūlūina uluai fatu o le upu moni o le Tusi Paia i Hagakeri i le 1908. Sa faia lenei mea e se fafine o lē na ia aʻoaʻoina le upu moni mai Tagata Aʻoga o le Tusi Paia, e pei ona lauiloa ai Molimau a Ieova i aso ua mavae. Ona o lana talaʻiga, sa toatele ai i latou na fiafia i le tala lelei. E leʻi leva ae toe foi atu i Hagakeri ni tamāloloa se toalua mai le Iunaite Setete sa avea o ni muāau faataimi atoa ma faasalalau ai le tala lelei i inā. Sa faifaimalie le salalau atu o le upu moni ae sa mautinoa, ma sa faatuina ai se fale lomitusi i Kolozsvár.

Na maua le uluai lipoti maufaatuatuaina i le 1922, ina ua auai i le Faamanatuga o le maliu o Keriso Tagata Aʻoga o le Tusi Paia e toʻa 67 mai aai e sefulu. Na vave ona iai ni omiga i la latou galuega o le molimau atu, ma iʻu ai i teteega ina ua taaʻina e taʻitaʻi lotu le malo ma faasalalauga ina ia taofia le galuega talaʻi.

Faateleina Osofaiga

I le 1928, na faasalalauina ai e le patele Katoliko o Zoltán Nyisztor se tamai tusi na faaulutalaina o le Millennialist Bible Students. Na ia faasalalauina i lena tusi se faaupuga e faatatau i Tagata aʻoga o le Tusi Paia e faapea: “E sili atu lo latou leaga na i lo o le vaega faatupu faalavelave e faaaogāina auupega, auā ua latou taʻitaʻiseseina tagata faatauvaa e ala i le faaaogāina o le Tusi Paia e nanā ai a latou faaupuga moni. O loo matuā mataʻia lelei a latou gaoioiga e le Royal State Police i Hagakeri.”

I lena taimi, na asiasi atu ai i faapotopotoga se uso maelega e suafa ia Josef Kiss. Ma sa mulimuli faalilolilo atu leoleo ia te ia. I le 1931, na nofo ai o ia i le fale o se uso, ae na faateʻia o ia ina ua ō atu leoleo ma faatonuina o ia e tuua loa le fale. A o amata ona teu mea totino a le uso o Kiss, ae tā loa o ia e se tasi o leoleo i le muli o lana fana ma fai atu: “Faavave, po o le tui o oe!” Na ata le Uso o Kiss ma fai atu: “Ona vave atili ai lea ona ou alu i loʻu aiga,” e faasino i lona faamoemoe faalelagi o se Kerisiano faauuina.

 Na mulimuli atu fitafita i le Uso o Kiss seia oo i le nofoaafi. Na faatalitalia o ia e taunuu i le faapotopotoga i Debrecen ia Iuni 20, 1931, ae e leʻi oo atu lava. Na manatu uso ua fasiotia o ia e ona fili, ma o le mea moni ua “alu o ia i lona aiga” i lona taui faalelagi. E ui lava sa taofia lana galuega, ae leʻi mafai ai e pulega faalemalo ona taofia le malamalama o le upu moni.

Sa masani ona faaaogā le atamai ina ia avatu ai se molimau. Mo se faaaʻoaʻoga, i le ogatotonu o le 1931 e oo i le 1939, na maliu ai se uso i Tiszakarád. Seʻiloga lava la e aumai se faatagaga mai le malo ona faatoʻā mafai lea ona faia se sauniga o se maliu. Sa faatagaina uso ina ia faia le tatalo mo se minute, atoa ma le pese mo se minute. Na auai sui o leoleo ma fana i le sauniga o le maliu ina ia faamalosia lea fuafuaga. E toatele tagata o le nuu na auai ona o le fia iloa pe faapefea ona fai le sauniga o le maliu.

Na tū se uso i tafatafa o le pusa oti ma tatalo mo le afa itula ae o lena auala na fai mai ai tagata, latou te leʻi faalogo lava i se mea faapea. Na latou fai mai: “E tusa lava foi pe ana fai e ni patele se toʻaono le sauniga o le maliu, e lē taitai lava ona faagaeeina ai faapea.” Ona amata lea ona usu e se uso e lelei lona leo le pese, ae na faatonuina o ia e se leoleo ia nofo filemu. Mulimuli ane na faapea mai leoleo, e ui lava ina sa lē faigofie mo i latou lea mea, ae sa lē mafai ona latou faalavelave i le tatalo.

A o faaauau pea osofaiga, na tusia e se faifeau o le Lotu Toefuataiga o Lagos Szabo i lana tamai tusi o le Antichrist by the River Tisza i le 1935 e faapea: “O se manatu atamai le fafagaina faalemafaufau o tagata i aʻoaʻoga faakomenisi a Rusia i le igoa o lotu . . . Ua faafoliga mai Marx o se Keriso . . . Sa i inei le Anetikeriso e iai sona ofu mūmū faatasi ma Molimau a Ieova.”

Tausaga o Faasāsāaga

Na matuā faasāina atoatoa le galuega a Molimau a Ieova i le 1939. Sa faailogaina faapea o se galuega “e faasagatau i lotu ma faasagatau i tagata.” Na faasalalauina e le lotu Aso Fitu, lotu Papatiso, lotu Evagelia, ma le lotu Perepereane tamai tusi e faasagatau ai i Molimau. Ae sa leʻi lafoaia ai e Ieova ana auauna, ma sa tausia i latou e Molimau i isi atunuu. E lē gata i lea, e tele mea na tutupu i tagata o le Atua i Hagakeri e faamalosia ai le faatuatua.

Mo se faaaʻoaʻoga, ina ua aumaia e se uso se ato faafafa e tumu i a tatou mekasini mai Czechoslovakia, na fesiligia o ia e le ofisa o le tiute: “O ā mea o loo i totonu o lau ato?” Na tali atu le uso ma le faamaoni: “Watchtowers.” Ona faia lea e le alii ofisa se gaoioiga e faasino atu ai faapea e valea le uso, ma na ia faataga ai o ia e faaauau i le mea e alu i ai. O lea na taunuu ai ma le saogalemu meaʻai faaleagaga i Hagakeri.

Peitai, sa leʻi taofia ai mafatiaga. Na puʻeina ma faafalepuipuiina le toatele o uso i le tele o  taimi. Ona fuafuaina lea e le malo se vaega faapitoa o tagata e suesueina ma pule sauā i Molimau a Ieova. I le 1942, na tuufaatasia ai tane, o fafine, ma tamaiti ma tuu i totonu o fale o manu ma faleaʻoga gaogao o tagata Iutaia. Ina ua mavae masina e lua o le faataumaoiga, sa faamasinoina i latou ma faasalaina. Sa faasalaina nisi o i latou e faasoloatoa i le falepuipui; o isi e taʻi 2 i le taʻi 15 tausaga e nonofo ai i le falepuipui. E toʻatolu uso na faasalaina i le oti i le falepuipui i le sisiina, o Dénes Faluvégi, András Bartha, ma János Konrád, peitai na suia le faasalaga i le faasoloatoa i le falepuipui. Ma, e 160 uso na tuuina i le falepuipui i Bor ina ia feoti ai. Ina ua latou sopoia le tuaoi, na taʻu atu ia i latou o le a lē taitai ona toe foi mai i latou o feola. Mai le toʻa 6,000 tagata Iutaia na tuuina faamalosi i lea falepuipui, e na o le toʻa 83 na sao mai ai. Seʻi vagana ai le toʻafā, ae na toe foi uma lava Molimau.

Sa faamaturoina nisi o Molimau a Ieova. Seʻi faasolo atu ina uma le Taua Lona Lua a le lalolagi, na fasiotia ai e pulega faa-Nasi le toatele o uso. Na tafanaina ma feoti ai uso o Bertalan Szabó, János Zsondor, ma Antal Hónis, ae sa sisiina le uso o Lajos Deli.—Mataio 24:9.

Se Suiga Mataʻina Mo se Taimi Puupuu

Ina ua uma le taua lona lua a le lalolagi, na toe suia ai tulaga o mea i inā. Na folafola atu e le malo le aiā tatau a tagata. Ina ua toe foi mai uso mai le falepuipui, ona amata loa lea ona latou talaʻi atu ma faamaopoopoina faapotopotoga. Sa latou manatu ua tuuina mai e Ieova le saolotoga ia i latou ina ia mafai ai ona latou vivii atu i lona suafa sili, ae lē ina ia latou taumafai ai e faateleina oa faaletino. E oo ane i le faaiʻuga o le 1945, ua 590 le au talaʻi maelega o le Malo. I le 1947 na latou faatauina ai se fale e fai ma ofisa o le lālā o le Sosaiete o le Olo Matamata, ma sa faia foi sa latou tauaofiaga muamua, i se fale taalo. E 1,200 na auai, ma na faapaʻū foi e le vaega e pulea femalagaiga a nofoaafi le 50 pasene o le totogi o pasese mo i latou na malaga atu mo le tauaofiaga.

Peitai sa leʻi tumau ai lena saolotoga. E leʻi leva ae pulea e le Vaega Faakomunisi le atunuu, ma na toe suia ai le malo. Ona o le faateleina o Molimau a Ieova, na uaʻi atu ai manatu o le malo fou lea, ona o le tuputupu aʻe o le au talaʻi mai le 1,253 i le 1947, i le 2,307 le atu talaʻi i le 1950. I lena tausaga na amata ai e ofisa o le malo ona tuu atu toʻatugā i le galuega talaʻi. Sa manaomia se faatagaga e talaʻi ai, peitai sa mumusu le malo e faia na faatagaga, ma o lea na sasaina ai i latou ia na talosaga atu mo se faatagaga, e le vaega o Leoleo a le Malo. Sa faaauau ona faasalalauina e nusipepa e faapea o Molimau o ni ‘sui o le emeperoa.’ Peitai, a o leʻi pulea le malo e Komunisi, na aauina atu Molimau ina ia taofia i le falepuipui ona e faapea o i latou o ni ‘tagata e lagolagoina le faa-Komunisi Iutaia.’

Amata Faamataʻuga

Ia Novema 13, 1950, na puʻeina ai le ovasia o le lālā ma lē na avea ma faaliliu tusi (ia na auai ma i latou na uluai faasalaina i le oti) faatasi ai ma le ovasia o le matagaluega muamua. Na aauina atu i laʻua i le falepuipui e sili ona leaga e tū i le Aai o Budapest, o le 60 i le auala o Andrássy, ina ia “faavaivaia” ai. Na faia lo la faamasinoga ia Fepuari 2 o le tausaga na sosoo ai. Na faafalepuipuiina le ovasia o le lālā mo le sefulu tausaga, o le faaliliu tusi e iva tausaga, ma le ovasia o le matagaluega e valu tausaga. O i latou uma nei e toatolu sa fāoa faamalosi a latou mea totino. I le taimi o le faamasinoga, na tuuina atu ai foi isi ovasia e toʻafā o le faapotopotoga i le falepuipui mo le lima i le ono tausaga ona o moliaga e faapea ua latou taumafai e lafotuina le malo.

Na tuuina uso i se falepuipui e matuā leoleo maluina, ina ia lē mafai ai ona latou toe maua ni tusi, ni afifi, po o nisi foi e asiasi atu. Sa lē maua e o latou aiga ni faamatalaga e uiga ia i latou. E oo foi i o latou igoa sa lē taitai taʻutaʻua e leoleo. Ina ia iloa i latou, sa ʻula ai e tagata taitoatasi se asoa laau e faatautau i o latou ua e tusia ai ni fuainumera. E oo foi i le pa sa iai  se faailoga e faitauina faapea: “Aua le tau ina leoleoina pagota; ae inoino i ai.”

Sa matuā saisaitia Molimau, peitai sa lē mafai ona taofia ai le galuega talaʻi. Sa faaauau pea le talaʻiga e isi Molimau na suitulaga i pagota na faafalepuipuiina. Sa faapea foi ona puʻeina ē na suitulaga. I le tausaga e 1953, e sili atu i le 500 uso na saisaia ma tuuina i le falepuipui, ae sa lē mafai ai lava ona taofia le galuega talaʻi. E toʻalaiti lava uso na talitonu i folafolaga taufaasese a leoleo ma suia ai o latou mafaufau mai le upu moni.

Faamoemoe Pupula

I le 1956, na amata ai ona fouvale tagata i le malo. Na faatoilaloina e le Soviet Army le malo, ae na toe pulea e le Vaega Faa-Komunisi.

Na faasaolotoina uma Molimau sa faafalepuipuina, peitai na o nai uso toʻaitiiti na lausilafia e tagata na toe tuuina i le falepuipui e faaauau o latou faasalaga, e ui lava sa le faasalaina ē fou. Mulimuli ane, i le 1964, na amata ai ona suia i le lelei tulaga o mea. Sa lē toe faalavelave pulega faalemalo i sauniga o maliu ma taumafataga o faaipoipoga. Na faia fonotaga matagaluega i le togavao. E ui lava sa faalavelaveina nisi o nei fonotaga, peitai sa leʻi toe tuuina atu nisi Molimau i le falepuipui.

I le 1979 na faatagaina ai uso sa vaavaaia le galuega ina ia auai i le tauaofiaga i Vienna. I lena lava tausaga, na folafola atu ai e taʻitaʻi o le malo le faatagaina faaletulafono o Molimau a Ieova, peitai, na mavae tausaga e sefulu faatoʻā tupu moni lena mea. Na usuia le uluai tauaofiaga itumalo i le 1986, i le Youth Park o le Kamara Forest, i le ioega a taʻitaʻi o le malo. Sa faatuina foi se faailoga, e faailoa atu ai faapea o le Tauaofiaga Itumalo lenei a Molimau a Ieova, o le “Filemu Mai le Atua.” I le tausaga na sosoo ai na usia ai le Tauaofiaga o le “Faalagolago ia Ieova,” ma i le 1988, na olioli ai uso i le Tauaofiaga o le “Faamasinoga Mai le Atua.”

Sa Saoloto Mulimuli!

Ia Iuni 27, 1989, sa o se aso sili ona matagofie, ona na maua ai e uso se pepa faamaonia o le faatagaga mai le malo i le Faalapotopotoga Faalelotu o Molimau a Ieova i Hagakeri. Ia Iulai na faatumulia ai le Fale Taalo i Budapest i le 9,477 na auai i le Tauaofiaga Itumalo o le “Tuutoina i le Atua.” Na faaaogāina foi lena fale mo le Tauaofiaga Itumalo o le “Gagana Mamā,” i le 1990, ma sa faia foi tauaofiaga i isi aai tetele e tolu o Hagakeri.

Ona o lea ua matuā aveesea atoatoa faasāsāaga, sa mafai loa ona faia fuafuaga mo le uluai tauaofiaga faavaomalo. E ui lava i le tulaga faaletonu o le tau, ae sa faia i Népstadion i Budapest, lea na feiloai ai le aofai e 40,601 ina ia olioli i le mafana o le alofa faaleuso. Na auai sui o le Vaega Pule ma faamalosia le faatuatua o uso e ala i a latou lauga, ma sa tatalaina ai foi tusi fou ma polosiua felanulanuai i lenei tauaofiaga.

Le Mea o loo Tupu i le Taimi Nei

Ua lomia nei le Watchtower ma le Awake! i lanu eseese i le gagana Hagakeri e tutusa lelei ma le faa-Peretania i lona foliga mai ma le matagofie. I le 1992 na amata ai ona lomia le Yearbook i le gagana Hagakeri. Na vave le faateleina o le aofai o le au talaʻi o le tala lelei mai le 6,352 i le 1971, i le 13,136 ia Ianuari o le 1993.

I aso nei, ua olioli ai Molimau a Ieova i Hagakeri i le saolotoga e fai ai le tapuaiga ma ua saoloto foi e talaʻi mai lea fale i lea fale. O loo iai faapotopotoga e 205, ma e 27,844 na auai i le Faamanatuga ia Aperila 17, 1992. A o leʻi maua ni Maota lelei o le Malo, o loo faaauau pea e faapotopotoga ona feiloai i faleaʻoga, o fale e fai ai aganuu, o fale ua lē toe faaaogāina e fitafita, e oo lava i fale ua avanoa o le Vaega Faa-Komunisi. I le 1992 lava ia, e sefulu faapotopotoga sa faapaiaina o latou lava Maota o le Malo, a o isi maota o loo galulue ai le au fau fale.

Mai suiga uma ma fouvalega, sa tumau pea ma le faamaoni uso i le itu a Ieova le Atua ma lona Alo, o Iesu Keriso, ma faaauau pea le talaʻiga. Sa lē faaumatiaina e lōlōga o tulaga faigata i latou, auā na puipuia e Ieova ona tagata i Hagakeri.—Faataoto 18:10.

[Faafanua i le itulau 9]

(Tagaʻi i le lomiga mo le ata atoa)

Vienna

OSETERIA

Budapest

Debrecen

HAGAKERI

ROMANIA

[Ata i le itulau 10]

Tagata o Ieova na faapotopoto i Budapest