Aua Ne’i Faaleagaina e se Tasi Au Amioga Lelei

“Aua neʻi faaseseina outou, O le feoai ma e amio leaga e leaga ai amio lelei.”—1 KORINITO 15:33.

1, 2. (a) Sa faapeī le lagona o le aposetolo o Paulo e uiga i Kerisiano i Korinito, ma aisea? (e) O le ā le fautuaga patino o le a tatou iloiloina?

MAEU se faalogona malosi o le alofa faamātua! E uunaia ai mātua ina ia faataulaga i latou mo a latou fanau, ia aʻoaʻo ma faufautua ia i latou. Atonu e leʻi avea le aposetolo o Paulo o se tamā e tausi aiga, ae na ia tusi atu i Kerisiano i Korinito e faapea: “E ui ina toamano o taʻitaʻi tama ia te outou ia Keriso, a e peitai e le toatele o outou tamā; auā na ou fanaua outou i le tala lelei ia Keriso Iesu.”—1 Korinito 4:15.

² Muamua atu, sa faimalaga ai Paulo i Korinito, o i inā na ia talaʻi atu ai i tagata Iutaia ma Eleni. Sa fesoasoani o ia i le tau amataina o le faapotopotoga i Korinito. I le isi ana tusi, na faatusa ai e Paulo lana tausiga, i le tausiga a se tina failele, ae o ia sa faapei o se tamā i uso i Korinito. (1 Tesalonia 2:7) I le pei ona faia e se tamā alofa, na apoapoai atu ai Paulo i lana fanau faaleagaga. Atonu e aogā ia te oe lana fautuaga faatamā i Kerisiano i Korinito e faapea: “Aua neʻi faaseseina outou, O le feoai ma e amio leaga e leaga ai amio lelei.” (1 Korinito 15:33) Aisea na tusi atu ai faapea Paulo i uso i Korinito? E mafai faapefea ona tatou faatatauina le fautuaga?

O Fautuaga mo i Latou ma i Tatou

3, 4. O le ā ua tatou iloa e uiga ia Korinito i le uluai senituri ma ona tagata?

³ I le uluai senituri, na tusia ai e le tagata Eleni o lē e suesue i tala o le lalolagi o Strabo e faapea: “Sa taʻua Korinito o le ‘mauoloa’ ona o ana faiga pisinisi, auā sa iai i le Isthmus (ʻAuiti) ma e lua ona taulaga o vaa, o le isi taulaga e mo vaa e agaʻi atu i Asia, a o le isi taulaga e mo vaa e agaʻi atu i Italia; ma sa faafaigofie ai mo fefaatauaiga o oloa mai atunuu uma e lua.” E tailua tausaga ma faia taaloga sa lauiloa o Isthmian Games (Taaloga faa-Eleni), lea sa tumutumu ane i ai le vao o tagata i Korinito.

⁴ O ā uiga o tagata o lenei aai, lea na fai ma faauluuluga o pulega faalemalo ma le tapuaiga ia Aphrodite? Na faamatalaina e le polofesa o T. S. Evans e faapea: “O le faitau aofai o ona  tagata e tusa ma le 400,000. Sa matuā faamamalu e tagata tu ma aganuu, ae na faatalale i amioga mamā, sa oo lava i se tulaga sili ona leaga. . . . Sa mataulia tagata Eleni na nofoia Achaïa i lo latou fesouaina faalemafaufau ma le naunau i tala fou. . . . O lo latou faamamafa naua o i latou lava sa faafaigofie ai ona tutupu aʻe fefinauaiga.

5. O le ā le lamatiaga na fesagai ma uso i Korinito?

⁵ I le mavae o se vaitaimi, e oo lava i le faapotopotoga sa fevaevaeai ona sa iai nisi sa iai pea faanaunauga faamaualuluga. (1 Korinito 1:10-31; 3:2-9) O le faafitauli tele ona sa faapea mai nisi: “E leai se toe tu mai o e ua oti.” (1 Korinito 15:12; 2 Timoteo 2:16-18) Po o le ā lava lo latou talitonuga, (po o se talitonuga sese), ae sa tatau ona faasaʻoina i latou e Paulo i se faamaoniga manino e faapea sa “toe faatuina mai Keriso i e ua oti.” O lea na mafai ai ona talitonu Kerisiano o le a aumaia e le Atua ia i latou le ‘manumalo e ala i lo tatou Alii o Iesu Keriso.’ (1 Korinito 15:20, 51-57) Pe ana faapea sa e iai i inā, pe o le a e aafia ai ea i lena lamatiaga?

6. O ai tonu sa faatatau i ai le fautuaga a Paulo i le 1 Korinito 15:33?

⁶ I le faamautinoaina o le toe tutū mai o ē ua oti, na taʻu atu ai e Paulo ia i latou: “Aua neʻi faaseseina outou, O le feoai ma e amio leaga e leaga ai amio lelei.” Sa faatatau tonu lenei fautuaga ia i latou sa auaumea ma le faapotopotoga, o ē na lē ioe i le aʻoaʻoga o le toetu. Pe sa na ona latou lē mautinoa ea i se manatu na latou lē malamalama i ai? (Faatusatusa i le Luka 24:38.) E leai. Na tusi mai Paulo e faapea ua “fai mai o isi o outou, e leai se toe tu,” o i latou la na aofia ai sa latou faaalia le lē malilie, ma lolo atu i le faaaposetasi. Na iloa lelei e Paulo e mafai e i latou na ona faaleagaina ai amioga ma mafaufauga lelei o isi.—Galuega 20:30; 2 Peteru 2:1.

7. O le ā le isi itu e mafai ona tatou faatatauina i ai le 1 Korinito 15:33?

⁷ E mafai faapefea ona tatou faatatauina le lapataiga a Paulo e uiga i aumea? E leʻi manatu o ia faapea e ao ona tatou fesoasoani i se tasi i le faapotopotoga o lē o loo faigata ona malamalama i se fuaiupu po o se aʻoaʻoga a le Tusi Paia. Ua uunaia moni i tatou e le Iuta 22, 23 ina ia fesoasoani atu ma le alofa mutimutivale i ē faamaoni o loo iai na faaletonu. (Iakopo 5:19, 20) Peitai ane, o le fautuaga faatamā a Paulo e ao ona faatatauina pe afai e masani pea ona tetee se tasi i mea ua tatou iloa o le upu moni lea a le Tusi Paia, po o le faitio foi i ni mea e lē talitonu pe lē fiafia i ai. E tatau ona leoleoina mai ai i tatou i le auaumea atu i lena ituaiga o tagata. Ioe, afai e maʻoti mai le faaaposetate o se tasi, o le a tatau loa ona gaoioi leoleo mamoe faaleagaga ina ia puipuia le lafu mamoe.—2 Timoteo 2:16-18; Tito 3:10, 11.

8. E faapefea ona tatou gaoioi ma le faautauta pe a lē ioe se tasi i le aʻoaʻoga a le Tusi Paia?

⁸ E mafai foi ona tatou faatatauina upu faatamā a Paulo i le 1 Korinito 15:33 e tusa ai ma ē o loo i fafo atu o le faapotopotoga, o loo latou faatuputupuina aʻoaʻoga sese. E faapefea ona oo ina tatou auaumea ma i latou? E mafai ona tupu pe a tatou lē faavasegaina lelei po o ai ē e ao ona fesoasoani atu i ai ina ia aʻoaʻoina le upu moni, a o ai i latou o loo faatupuina se feteenaiga ina ia amata aʻe ai se aʻoaʻoga sese. Mo se faaaoaoga, i le tatou galuega o le molimau atu, atonu tatou te fetaui ai ma se tagata e lē ioe i nisi o manatu ae o loo naunau ina ia talanoa atili i ai. (Galuega 17:32-34) O lona uiga e lē o se faafitauli lena tulaga, auā tatou te fiafia e faamatala atu upu moni o le Tusi Paia i so o se tasi e manao moni e fia iloa, ma toe foi atu e avatu i ai nisi faamaoniga. (1 Peteru 3:15) Ae e iai lava nisi e lē o naunau moni e fia iloa upu moni o le Tusi Paia.

9. E ao faapefea ona tatou tali atu pe a luia o tatou talitonuga?

⁹ E toatele tagata e finau pea mo le faitau fia itula ma le tele o vaiaso, ae e lē o faia ona o se fia sailiili i le upu moni. E na ona latou mananao e faavaivaia le faatuatua o le isi tagata a o latou fia faailoa atu so latou atamai i le faa-Eperu, le faa-Eleni po o le poto faaevolusione. A o fetaiai la ma i latou, ua oo ai ina faalotolotolua nisi o Molimau ma iu ina faateleina ai lo latou aumea i ē talitonu i talitonuga sese faalelotu, o filosofia, ma manatu sese faasaienitisi. E lelei ona matauina, sa leʻi faatagaina e Iesu lena mea ina ia tupu ia te ia, e ui lava sa ono mafai ona ia manumalo  i finauga ma taʻitaʻi lotu o ē na atamamai i le faa-Eperu po o le faa-Eleni. Ina ua luia Iesu, sa ia tali puupuu atu i ai, ona taulai atu lea o ona manatu i ē loto maulalo, o mamoe moni.—Mataio 22:41-46; 1 Korinito 1:23–2:2.

10. Aisea ua talafeagai ai ona faaeteete Kerisiano o ē o loo iai a latou komepiuta ma faaaogāina masini faaeletise?

¹⁰ Ua aumaia e komepiuta faaonaponei isi avanoa mo aumea leaga. Ua faia e nisi kamupanī faasalalau se faiga e faafiafiaina ai ē o loo lagolagoina a latou faasalalauga, e ala i le faaaogāina o se komepiuta ma se telefoni e faaoo atu ai se feau ma tala eseese i isi masini faaeletise o loo faia ai faasalalauga. O lenei faiga e mafai ai e se tagata ona maua mai i lea masini faaeletise se feau ua faasalalau atu i tagata uma o loo fiafia i ai. Ua mafai e lenei auala ona fai ai ni mea ua taʻua o finauga i masini, i mataupu faalelotu. E ono tosina atu i ai se Kerisiano i na finauga, ma faaalu ai sona taimi tele ma se aposetate o lē ua faateaeseina mai le faapotopotoga. O le taiala i le 2 Ioane 9-11 ua manino mai ai le fautuaga faatamā a Paulo i le aloese mai aumea leaga. *

Ia Alofia le Faaseseina

11. O le ā le avanoa na mauaina ona o le tulaga faapisinisi i Korinito?

¹¹ E pei ona taʻua, o Korinito o se nofoaga tutotonu o faiga pisinisi, sa iai le anoanoai o faleoloa ma pisinisi. (1 Korinito 10:25) O le toatele o tagata sa ō atu i ai mo Taaloga faa-Eleni sa nonofo i faleie, ma o le taimi lena e to ai e le au faatauoa ni tamai fale e faatau atu ai a latou oloa. (Faatusatusa i le Galuega 18:1-3.) O le pogai lena na faigofie ai ona maua e Paulo se galuega i inā o le faia o faleie. Ma sa mafai foi ona ia faaaogā le nofoaga sa fai ai ana galuega e faalautele atu ai le tala lelei. Ua tusia e le polofesa o J. Murphy-O’Connor e faapea: “Sa mafai  ona talanoa atu Paulo i tagata mai sina tamai fale sa fai ai lana galuega . . . e lē gata i tagata latou te faigaluega ma ē faatau mai ia te ia, ae o le motu uma o tagata. Pe a tau leai ni ana galuega i nisi taimi, ona tūtū lea o ia i luma o lona fale ma talanoa atu i ē sa ia manatu o le a faalogo ane . . . E faigofie lava ona iloa faapea, ona o lona uiga aasa ma lona talitonuga maumaututu sa vave ai ona ‘mataina o ia’ i ona tuaoi, ma o lenei mea na faatosina ane ai le fia iloa, e lē gata o le au tafafaovale, a o ē sa fia iloa moni. . . . Sa mafai foi ona ia talanoa atu i fafine nofotane ma a latou auauna o ē ina ua faalogo ia te ia, sa latou faatagā ō ane ai e faatau. I taimi o mafatiaga, pe a tau faamataʻu ane sauaga ma ni nai faafitauli laiti, ona ō atu lea ia te ia o ē talitonu e pei o ni ana tagata faatau. O le nofoaga foi sa fai ai lana galuega, na ia feiloai atu ai i pule o le aai.”

12, 13. E mafai faapefea ona faatatauina lelei le 1 Korinito 15:33 i nofoaga o galuega?

¹² Peitai, sa iloa e Paulo le avanoa e ono maua ai ‘aumea leaga’ i nofoaga o galuega. E tatau foi ona tatou iloa lena itu. O le mea mataina, sa taʻua e Paulo le uiga sa taatele i nisi e faapea: “Ina tatou aai ma inu, auā o a taeao tatou te oti ai.” (1 Korinito 15:32) Sa vave ona ia sosooina lena ma lana fautuaga faatamā: “Aua neʻi faaseseina outou, O le feoai ma e amio leaga e leaga ai amio lelei.” E faapefea i nofoaga o galuega ma le sailia o faafiafiaga, ona fesootai ma le ono mapuna aʻe ai o se lamatiaga?

¹³ E mananao Kerisiano ina ia faaleuo atu i ē latou te faigaluega, ma ua iloa e le toatele le aogā o lenei tulaga i le tatalaina ai o le auala i se molimau atu. Peitai e mafai e se tagata i le galuega ona faauiga sese le faaleuo, i le manatu faapea o se valaaulia lea ina ia lua faia se fiafiaga faatasi. Na te ono sosooina lena i se valaaulia lea ina ia lua faiʻaiga i le aoauli, pe faia sina lua inuga puupuu pe a manava, po o ni faafiafiaga i le faaiuga o le vaiaso. Atonu e foliga agalelei ma faatamalii atu lenei tagata ia oe, ma e foliga foi e leai se afaina o le valaaulia. Peitai, ua fautuaina i tatou e Paulo: “Aua neʻi faaseseina outou.”

14. Ua faaseseina faapefea nisi Kerisiano ona o aumea?

 ¹⁴ Ua faaseseina nisi Kerisiano. Sa faasolosolo malie lava ona latou lē manatu mamafa i aufaatasiga ma ē latou te faigaluega. Atonu na amata i le tau fai naunau uma i se taaloga po o se isi mea e fiafia uma i ai. Po o se isi foi e lē o se Kerisiano o loo faigaluega faatasi, atonu e ese mai lava lona agalelei ma loto alofa, ma oo ai ina faateleina le taimi e faaalu ma lena tagata, pe oo lava ina manatu e sili atu le faauo i lena tagata na i lo o isi i le faapotopotoga. Ona oo atu lava lea o lena mafutaga i le misia ai o se sauniga e tasi. Atonu e alu se isi po e te leʻi oo lava i le aiga ma lē taulau ai le fuafuaga o le auai i le faiva i le fanua i le taeao e sosoo ai. E ono matamata ai foi i se tifaga po o se ata vitio e masani ona lē taliaina e se Kerisiano. Atonu tatou te manatu, ‘E lē taitai lava tupu lena mea ia te aʻu.’ Ae o le toatele lava o i latou ua faaseseina, atonu sa faapena foi lo latou manatu na iai muamua. E manaomia ai ona tatou fesiligia i tatou lava, ‘O faapeī moni lava loʻu maumauai e faatatauina le fautuaga a Paulo?’

15. O le ā le uiga paleni e tatau ona ia i tatou e faatatau i tuaoi?

¹⁵ O mea faatoʻā tatou talanoaina e faatatau i nofoaga o galuega, e faatatauina foi i a tatou auaufaatasiga ma tuaoi. O le mea moni sa iai tuaoi o Kerisiano i Korinito anamua. I nisi oganuu, o se mea masani le faaleuo ma lagolagosua i tuaoi. I nuu i tua, atonu e faalagolago ai le tasi tuaoi i le isi ona o le mamao ese o o latou nofoaga. I nisi aganuu, e matuā malolosi ai faiā faaleaiga, ma e tele ina latou faaafeina tagata mo ni taumafataga. Ua manino mai, e tāua tele se vaaiga paleni, e pei ona sa faaalia e Iesu. (Luka 8:20, 21; Ioane 2:12) Pe a tatou faafeagai ma o tatou tuaoi ma tauaiga, po o tatou mafaufau ea e faaauau ona tatou amioai e pei ona sa tatou faia a o leʻi avea ma Kerisiano? Na i lo o lea, po ua lē ao nei ea ona tatou toe manatunatu i na faifaiga ma filifili lelei ai i tapulaa e talafeagai?

16. E ao faapefea ona faamalamalamaina fetalaiga a Iesu o loo i le Mataio 13:3, 4?

¹⁶ I se isi taimi, na faatusaina ai e Iesu le feau o le Malo, i fatu na ‘pauu i autafa o le auala; ona ō ane lea o manu felelei ma aai ai.’ (Mataio 13:3, 4, 19) I na taimi, sa matuā maaa le palapala i le auala ona o le soli i taimi uma e tagata fegasoloai. O le tulaga foi lena i le toatele o tagata. Ua alu le tele o o latou taimi i o latou tuaoi, i o latou tauaiga, ma isi e gasolo atu ia i latou ma faateleina ai a latou mea e fai. Ma o lena le pogai ua faamaaaina ai o latou loto, ua faafaigata ai ona mauaa fatu o le upu moni. E faapena foi le lē talileleia e mafai ona tuputupu aʻe i se tasi ua avea ma Kerisiano.

17. E mafai faapefea i le auaumea ma tuaoi ma isi ona aafia ai i tatou?

¹⁷ Atonu e faaleuo ma loto fesoasoani nisi tuaoi ma tauaiga i le lalolagi, e ui lava o loo leai pea so latou naunau fiafia i mea faaleagaga ma e lē alolofa foi i le amiotonu. (Mareko 10:21, 22; 2 Korinito 6:14) O le avea o i tatou ma Kerisiano e lē faapea ai e sā ona tatou faaleuo, pe ia lē alolofa i tuaoi. Na fautua mai Iesu ia i tatou ina ia faaalia le naunau moni i isi. (Luka 10:29-37) Ae ua faapena foi ona faagaeeina ma talafeagai le fautuaga a Paulo e faapea, ia faaeteete i a tatou aumea. A o tatou faatatauina le uluai fautuaga, ae e lē tatau ai foi ona galo ia i tatou le fautuaga mulimuli ane. O le a ono aafia a tatou amioga pe a tatou lē teuina i loto na mataupu silisili uma e lua. E faapefea ona faatusatusa au amioga, ma amioga a ou tuaoi po o tauaiga e tusa ai o le faamaoni po o le usiusitai i le tulafono a Kaisara? Mo se faataitaiga, i taimi e totogi ai lafoga, atonu latou te manatu, o le lē taʻua uma o tupe maua po o tupe faasili a le pisinisi ua lē afaina lea, ua talafeagai lava lea mo le soifuaga. A o faia se ipu kofe ma i latou pe asiasi puupuu mai foi, atonu latou te talanoa faatauanau ai i isi e uiga i o latou manatu na. O le a aafia faapefea ai ou mafaufauga ma amioga faamaoni ona o lena mea? (Mareko 12:17; Roma 12:2) “Aua neʻi faaseseina outou, O le feoai ma e amio leaga e leaga ai amio lelei.”

O Amioga Foi a Talavou

18. Aisea ua faatatau ai foi le 1 Korinito 15:33 i talavou?

¹⁸ Ua patino lava ona aafia talavou ona o mea o loo latou vāai ma faalogo i ai. Pe e te lē o  matauina ea i nisi tamaiti, e tutusa pau lava ma o latou mātua i a latou aga ma uiga? E lē tatau ai la ona faateia i tatou, e mafai ona matuā aafia tamaiti mai ē latou te taaalo pe aooga faatasi. (Faatusatusa i le Mataio 11:16, 17.) Afai o loo auaufaatasi lou atalii po o lou afafine i talavou e tautatala lē faaaloalo i o latou mātua, aisea la e te manatu ai o le a lē aafia ai lau fanau? Ae faapefea pe a latou faalogo soo o tautatala i gagana masoā isi talavou? Ae faapefea pe a naunau a latou aumea i le aʻoga po o tuaoi, i ni suiga fou o seevae, po o ni teuga i maataua? Pe tatau ea ona tatou manatu o le a lē faaleagaina ai talavou Kerisiano i na aafiaga? Pe na faapea mai ea Paulo o loo iai se tausaga faatapulaa e ono aafia ai se tasi i mea e pei ona taʻua i le 1 Korinito 15:33?

19. O le ā le manatu e ao ona taumafai mātua e totō i loto o a latou fanau?

¹⁹ Afai o oe o se matua, po o e manatua ea lena fautuaga a o e fefuafuatai ma faia faaiuga e faatatau i lau fanau? Atonu o le a aogā pe afai e te ioe, e lē o le uiga o lenei mea e faapea e lē o ni tagata lelei isi talavou na o loo faifai mea faatasi ma lau fanau i lo tou vaipanoa po o le aʻoga. Atonu o nisi e tausaafia ma amio lelei, e pei foi o nisi o ou tuaoi, o tauaiga, ma ē faigaluega faatasi. Taumafai e faapupula i lau fanau le itu lena, ma ia latou mautinoa, o loo paleni lou faatatauina o le fautuaga atamai faamātua a Paulo i uso i Korinito. Pe a latou manatua lau vaaiga paleni i nei mea, ona mafai lea ona fesoasoani ia i latou e faataitai ia te oe.—Luka 6:40; 2 Timoteo 2:22.

20. Talavou e, o le ā le lui o loo tou fesagai?

²⁰ O oe lena o loo i le tulaga o le talavou, taumafai e mafaufau i se auala e faatatauina ai le fautuaga a Paulo, i le iloaina e faapea, e tāua mo Kerisiano uma lava, pe laiti pe matutua. O se lui lenei mea, ae aisea e lē loto malie ai e faafetaiaia le lui? Ia e iloa, e tusa lava pe ua e masani lelei i uiga o na talavou a o tou laiti, ae lē faapea o le a lē mafai ai ona latou faaaafiaina au amioga, ma lē mafai ai ona faaleagaina au amio masani o loo e atiina aʻe o se talavou Kerisiano.—Faataoto 2:1, 10-15.

Laasaga Talafeagai e Puipuia ai a Tatou Amioga

21. (a) O le ā le manaoga e tatau ona ia i tatou e faatatau i aumea? (e) Aisea e mafai ai ona tatou mautinoa e mafai ona lamatia i tatou i nisi o aumea?

²¹ Tatou te manaomia uma lava aumea. Peitai, e tatau ona tatou mataala i le mea lenei, e mafai e a tatou aumea ona taaina i tatou, i le lelei po o le leaga. Na faamaonia le moni o lena tulaga ia Atamu ma isi uma i le tele o senituri talu mai lena taimi. Mo se faaaoaoga, o Iosefatu, o se tupu lelei o Iuta, sa olioli i le finagalo malie ma faamanuiaga a Ieova. Ae ina ua ia faatagaina lona atalii e faaipoipo atu i le afafine o le Tupu o Aapo o Isaraelu, ona amata loa lea ona auaumea faatasi Iosefatu ma Aapo. O lena auaufaatasiga leaga na toetoe lava maumau ai le ola o Iosefatu. (2 Tupu 8:16-18; 2 Nofoaiga a Tupu 18:1-3, 29-31) Pe a lē atamai a tatou filifiliga mo a tatou aumea, e mafai la ona oo atu i se tulaga lamatia.

22. O le ā e ao ona teu i o tatou loto, ma aisea?

²² Seʻi o tatou teu loto la le fautuaga alofa ua aumaia e Paulo ia i tatou i le 1 Korinito 15:33. Ua lē na o ni upu ua masani ona tatou faalogo pea i ai, ma e mafai ona tatou taulotoina. Peitai, e atagia mai ai le alofa faatamā o Paulo sa iai mo ona uso ma tuafāfine i Korinito, ae a faalautele atu, e mo i tatou foi. Ma le mautinoa, ua iai foi ma fautuaga ua saunia e lo tatou Tamā faalelagi, auā o lona finagalo ia tatou manumalo i a tatou taumafaiga.—1 Korinito 15:58.

[Faaopoopoga i lalo]

O E Manatua?

□ O le ā le mafuaaga autū na tusia ai e Paulo le 1 Korinito 15:33?

□ E mafai faapefea ona tatou faatatauina le fautuaga a Paulo i le nofoaga o galuega?

□ O le ā le vaaiga paleni e faatatau i tuaoi e ao ona ia i tatou?

□ Aisea ua avea ai le 1 Korinito 15:33 ma fautuaga talafeagai mo talavou?

[Fesili mo le Suʻesuʻega]

[Ata i le itulau 17]

Na faaaogā e Paulo le nofoaga sa fai ai ana galuega e faalautele atu ai le tala lelei

[Ata i le itulau 18]

E mafai e isi talavou ona faaleagaina au amioga faa-Kerisiano