“E lē Taitai ona Ma Talanoa Lelei!”

ONA o Mikaele o se loia, sa avea ai o ia o se tagata e malosi tele i le talanoa. Sa manaomia e lana galuega lea uiga. Ae ina ua mavae le 16 tausaga talu ona faaipoipo, sa ioe ai Mikaele e faapea, pe a sau i le fale i lana avā o Aterina, e foliga mai ua mou atu ona tomai e talanoa ai. Fai mai Mikaele e faapea: “O le suesue masei, vaavaai vale, ma le faia o faamatalaga e faatiga ai, sa masani lava ona ma tauupu ai ma Aterina, ma sa ou manatu o le a avea lenei ma mea e faavaivaia ai o ma faamoemoega. Sa ou tau mānatu po o se faaipoipoga ea lea mea, ona e faaauau pea le lē femalilieai ma le faaʻonoʻono. Afai o le mea lava lea o le a oo ia i maʻua i o ma olaga atoa a o ma faatasi, ua ou manao la ou te sola ese—e lē o saʻu tala ula. E matuā lē mafai lava ona ou fesagai ma lea ituaiga o olaga faaʻonoʻono ma le omia pea mo le 20, 30, 40 tausaga.”

O lagona faapenei, e lē fuatasi ia Mikaele ma Aterina. O loo iai foi na lagona, i le toatele o ulugalii o ē e fesuisuiai a latou mafutaga mai le tauaimisa ma toe faalelei. O sina talanoaga faasamasamanoa, ae mapuna aʻe ai ni taugaupu matuia. Latou te “lagonaina” mea e leʻi tautalagia. Latou te tautatala i mea e leʻi mafaufauina. Latou te osofai atu ma faitio, ona nofo gūgū lea ma le ita e aunoa ma se toe tautala. Latou te lē teteʻa, ae e lē o toe avea i laua ma “tino e tasi.” (Kenese 2:24) Ua matuā tapunia lava le faiā. A manatu e teteʻa, o lona uiga o le a tatala le faaipoipoga, ae a mananao e nonofo pea, o lona uiga, o le a fesagai pea ma le tele o faigata i aso uma. Ina ia alofia le tiga i so o se tasi o nei filifiliga, ua fuafuaina ai e nei ulugalii ina ia nonofo eseese ona lē toe faatiga ai lea o le tasi i le isi.

E manaomia e na ulugalii se ‘taitaiga atamai’ i a latou faaipoipoga. (Faataoto 1:5) O lenei taitaiga o loo maua i le Afioga a le Atua, le Tusi Paia. I le tusi lona lua a Paulo ia Timoteo, ua faamautinoa ai e faapea o le Tusi Paia, “e aoga foi ia e aʻoaʻo ai, e aoai ai, e faatonu ai.” (2 Timoteo 3:16) Ua faamaonia o le tulaga lenei e foia ai le malepe o fesootaiga faalefaaipoipoga, e pei ona o le a tatou vaai nei i ai.